អង្គការ​​៣​ចុះ​ស្រាវជ្រាវ​​អំពី​ផល​ប៉ះពាល់​នៃ​ទំនប់​វារីអគ្គិសនី​សេសាន​ក្រោម២

ដោយ ម៉ែន សុធីរ
2015-07-23
Share
សេសាន​​ក្រោម​២ ៦២០ ក្រុម​គណៈកម្មាធិការ​ប្រព្រឹត្តិកម្ម​នៃ​អង្គការ​សមាគម​ការពារ​សិទ្ធិមនុស្ស​កម្ពុជា ជជែក​ភិក្សា​ជាមួយ​ពលរដ្ឋ​រស់​នៅ​ភូមិ​ស្រែគរ ពី​ផល​ប៉ះពាល់​ទំនប់​វារីអគ្គិសនី​សេសាន​ក្រោម​ពីរ ស្រុក​សេសាន ខេត្ត​ស្ទឹងត្រែង កាល​ពី​ថ្ងៃ​ទី​២១ ខែ​កក្កដា ឆ្នាំ​២០១៥។
RFA/Men Sothyr

អង្គការ​ក្រៅ​រដ្ឋាភិបាល​ចំនួន​៣ បាន​ចុះ​សិក្សា​ស្រាវជ្រាវ​ពី​ផល​ប៉ះពាល់​ទំនប់​វារីអគ្គិសនី​សេសាន​ក្រោម​ពីរ នៅ​ខេត្ត​ស្ទឹងត្រែង។ អង្គការ​ទាំង​នោះ​រក​ឃើញ​ថា ក្រុមហ៊ុន​មាន​ភាព​ខ្វះ​ចន្លោះ​ច្រើន​ទាក់ទិន​ការ​ដោះស្រាយ​ផល​ប៉ះពាល់​ពលរដ្ឋ​ដែល​ត្រូវ​ជម្លៀស​ចេញ​ពី​លំនៅឋាន។

តើ​ក្រុម​អង្គការ​ទាំង​នោះ​រក​ឃើញ​អ្វី​ខ្លះ​ទាក់ទិន​ការ​មិន​ព្រម​ចាក​ចេញ​របស់​ពលរដ្ឋ​នៅ​តំបន់​នោះ?

ក្រុម​អង្គការ​សង្គម​ស៊ីវិល​ដែល​ធ្វើការ​ពាក់ព័ន្ធ និង​សិទ្ធិមនុស្ស​អំពាវនាវ​ឲ្យ​រដ្ឋាភិបាល​យក​ចិត្ត​ទុក្ខ​ដាក់​ដោះស្រាយ​ទុក្ខ​កង្វល់​ពលរដ្ឋ​ដែល​រង​ផល​ប៉ះពាល់​នៃ​ការ​សាងសង់​ទំនប់​វារីអគ្គិសនី​សេសាន​ក្រោមពីរ។

ការ​អំពាវ​នេះ ធ្វើ​ឡើង​បន្ទាប់​ពី​ក្រុម​គណៈកម្មាធិការ​ប្រព្រឹត្តិកម្ម​នៃ​អង្គការ​សមាគម​ការពារ​សិទ្ធិមនុស្ស​កម្ពុជា ចំនួន ៣ រួម​គ្នា ចុះ​ស្រាវជ្រាវ​ក្នុង​ឃុំ​ស្រែគរ និង​ឃុំ​ក្បាលរមាស ស្រុក​សេសាន ខេត្ត​ស្ទឹងត្រែង កាល​ថ្ងៃ​ទី​២១ ខែ​កក្កដា។ ក្រុម​អង្គការ​ទាំង​នោះ​ទទូច​ឲ្យ​រដ្ឋាភិបាល​ជំរុញ​ឲ្យ​ក្រុមហ៊ុន​សាងសង់​ទំនប់​វារីអគ្គិសនី​សេសានក្រោមពីរ ទទួល​ខុស​ត្រូវ​គម្រោង​អភិវឌ្ឍន៍​នេះ ដែល​ត្រូវ​ជម្លៀស​ពលរដ្ឋ​ចេញ​ពី​លំនៅឋាន និង​ការ​ផ្ដល់​សំណង​ទូទាត់​ជាដើម គឺ​ធ្វើ​យ៉ាង​ឲ្យ​ស្រប​តាម​គោលនយោបាយ​ដោះស្រាយ​ផល​ប៉ះពាល់​របស់​រដ្ឋាភិបាល។

​ក្រុម​គណៈកម្មាធិការ​ប្រព្រឹត្តិកម្ម​នៃ​អង្គការ​សមាគម​ការពារ​សិទ្ធិមនុស្ស​កម្ពុជា ដែល​មក​ពី​សមាគម​អាដហុក (Adhoc) លោក ប៉ែន ប៊ុណ្ណារ៍ ដែល​បាន​ចុះ​ស្រាវជ្រាវ​ដល់​ទី​កន្លែង​ផ្ទាល់​រក​ឃើញ​ថា ពលរដ្ឋ​ដែល​រង​ផល​ប៉ះពាល់​ទំនប់​វារីអគ្គិសនី​ប្រហែល ៦០​ភាគរយ នៅ​ឃុំ​ស្រែគរ និង​ជាង ៣០​ភាគរយ នៅ​ឃុំ​ក្បាលរមាស បាន​បង្ហាញ​ជំហរ​ថា ពួកគាត់​ស៊ូស្លាប់​មិន​ព្រម​ចាកចេញ។ លោក​បន្ត​ថា ប្រសិនបើ​ទំនប់​នេះ​​ត្រូវ​បើក​ឲ្យ​ដំណើរការ នឹង​ធ្វើ​ឲ្យ​ទឹក​លិចលង់​ភូមិ​គាត់​រស់​នៅ ហើយ​អាច​ប៉ះពាល់​ដល់​ជីវិត​អ្នក​ភូមិ​ធ្ងន់ធ្ងរ។

តែ​យ៉ាង​ណា​ក៏ដោយ លោក​ទទូច​ឲ្យ​រដ្ឋាភិបាល ឬ​គណៈកម្មាធិការ​ដោះស្រាយ​ផល​ប៉ះពាល់ ត្រូវ​ជជែក​ពិភាក្សា​ឲ្យ​លម្អិត​ពី​គ្រប់​ភាគី​ពាក់ព័ន្ធ​ធ្វើ​យ៉ាង​ណា​ដោះស្រាយ​បញ្ហា​នេះ​ជូន​ប្រជាពលរដ្ឋ​មុន​ពេល​ទំនប់​បើក​ឲ្យ​ដំណើរ​ការ ដើម្បី​ឲ្យ​ស្រប​តាម​គោលនយោបាយ​រាជរដ្ឋាភិបាល​ដោយ​ការ​ទទួល​ខុស​ត្រូវ​អំពី​ជីវិត​រស់​នៅ​របស់​ពលរដ្ឋ​ដែល​ធានា​ថា មិន​ធ្វើ​ទុក្ខបុកម្នេញ​ដល់​ពួក​គាត់។

លោក ប៉ែន ប៊ុណ្ណារ៍ សង្កត់​ធ្ងន់​ថា បន្ទាប់​ពី​ចុះ​ធ្វើការ​ស្រាវជ្រាវ​របស់​ក្រុម​អង្គការ​សង្គម​ស៊ីវិល ក្រុម​អង្គការ​គណៈកម្មាធិការ​ប្រព្រឹត្តិកម្ម​នៃ​អង្គការ​សមាគម​ការពារ​សិទ្ធិមនុស្ស​ចំនួន ៣ នឹង​រៀបចំ​របាយការណ៍​ទៅ​អង្គការ​ជាតិ និង​អន្តរជាតិ​សំខាន់ៗ ដើម្បី​រួមគ្នា​អន្តរាគមន៍​ទៅ​រដ្ឋាភិបាល​ឲ្យ​យក​ចិត្ត​ទុក​ដាក់​ដោះស្រាយ​សំណង​ទូទាត់​ជូន​ពលរដ្ឋ​ដោយ​ការ​ទទួល​ខុស​ត្រូវ​ខ្ពស់ និង​ធានា​ថា ពលរដ្ឋ​នៅ​តំបន់​នោះ​មិន​ត្រូវ​បាន​បណ្ដេញ​ចេញ​ដោយ​បង្ខំ។

លោក​បញ្ជាក់​ថា ទីតាំង​ផ្ដល់​ដី​កសិកម្ម​ដល់​ពលរដ្ឋ​មួយ​ចំនួន​នៅ​ភូមិ​ច្រប់ និង​ភូមិ​ស្រែស្រណុក ជា​ប្រភេទ​ដី​នៅ​តំបន់​ទួល​ខ្ពស់ បង្ក​ផល​លំបាក​ដល់​ការ​ធ្វើ​កសិកម្ម​របស់​អ្នក​ភូមិ ដូច្នេះ​គណៈកម្មាធិការ​ដោះស្រាយ​ផល​ប៉ះពាល់​គួរ​សិក្សា​ឡើង​វិញ​ចំពោះ​បញ្ហា​នេះ៖ «រាជរដ្ឋាភិបាល​ត្រូវ​មាន​កាតព្វកិច្ច​ចាំបាច់ ដើម្បី​បំពេញ​សេចក្ដី​ត្រូវ​ការ​ឲ្យ​សម​ជា​អ្នក​បម្រើ ព្រោះ​រាស្ត្រ​ជា​ម្ចាស់​អំណាច»

​ទោះ​យ៉ាង​ណា លោក ប៉ែន ប៊ុណ្ណារ៍ យល់​ឃើញ​ថា យន្តការ​ក្នុង​ការ​ផ្លាស់ប្ដូរ​ឥរិយាបថ​របស់​អ្នក​ភូមិ​ដើម្បី​ផ្លាស់ប្ដូរ​ទីតាំង មើល​ទៅ​រដ្ឋាភិបាល និង​តំណាង​ក្រុមហ៊ុន​ហាក់​ដូច​ជា​លំបាក​ក្នុង​ការ​ដោះស្រាយ ស្រប​ពេល​ដែល​ទំនប់​កំពុង​ដំណើរការ។ យ៉ាង​នេះ​ក្តី​លោក​ថា ចំណុច​សំខាន់ រដ្ឋាភិបាល​គួរ​យក​ចិត្ត​ទុក​ដាក់​ទទួល​យក​ទុក្ខ​កង្វល់​របស់​អ្នក​ភូមិ និង​សេចក្ដី​ត្រូវ​ការ​របស់​ពួកគេ​ទៅ​សិក្សា​ឲ្យ​លម្អិត រួច​ផ្ដល់​ជូន​នូវ​អ្វី​ដែល​ដែល​ពួកគេ​ត្រូវ​ការ នោះ​នឹង​ទទួល​បាន​ជោគជ័យ​ច្រើន។

ទំនប់​វារីអគ្គិសនី​សេសានក្រោមពីរ ដែល​ចាំបាច់​ត្រូវ​ជម្លៀស​ពលរដ្ឋ​ចេញពី​លំនៅឋាន គឺ​ជា​បញ្ហា​ដ៏​ចម្រូងចម្រាស​មួយ​ដែល​ក្រុម​មន្ត្រី​សង្គម​ស៊ីវិល​រក​ឃើញ​ថា ក្រុមហ៊ុន​ទទួល​សិទ្ធិ​សាងសង់​ទំនប់​វារីអគ្គិសនី​ហាក់​នៅ​មិន​ទាន់​ប្រកាន់​ជំហរ​ច្បាស់លាស់​ចំពោះ​ការ​ទទួល​ខុស​ត្រូវ​ជាក់លាក់​ទាក់ទិន​ការ​ដោះស្រាយ​ផល​ប៉ះពាល់​ចំពោះ​សំណង​ទូទាត់​នៅ​ឡើយ​ទេ ស្រប​ពេល​ដែល​ដំណើរការ​នៃ​ការ​សាងសង់​ទំនប់​នេះ​កំពុង​ដើរ​ឆ្ពោះ​ទៅ​មុខ។

ប្រធាន​កម្មវិធី​សិទ្ធិមនុស្ស និង​ដីធ្លី​នៃ​សមាគម​ខ្មែរ​ក្រោម ដើម្បី​សិទ្ធិមនុស្ស និង​អភិវឌ្ឍន៍ លោក សឺន ជុំសុធន ដែល​បាន​ចុះ​ដល់​មូលដ្ឋាន​ផ្ទាល់​ឲ្យ​ដឹង​នៅ​ថ្ងៃ​ទី​២១ ខែ​កក្កដា ថា រដ្ឋាភិបាល​គួរ​តែ​ជំរុញ​ទៅ​ក្រុមហ៊ុន​សាងសង់​ទំនប់​នេះ អនុវត្ត​គោលនយោបាយ​ដោះស្រាយ​ផល​ប៉ះពាល់​ដោយ​ការ​ទទួល​ខុស​ត្រូវ ដែល​ធានា​ថា ពលរដ្ឋ​នៅ​តំបន់​នោះ​មិន​ត្រូវ​បាន​គេ​រំលោភ​សិទ្ធិ និង​ការ​គំរាមកំហែង ដោយសារ​តែ​ជម្លៀស​ចេញពី​លំនៅឋាន។ លោក​ថា ភាព​ចន្លោះ​ប្រហោង​នៃ​ការ​ផ្ដល់​ជា​សំណង​ទូទាត់​ជូន​ពលរដ្ឋ​ដោយ​មិន​បាន​សិក្សា​ឲ្យ​លម្អិត​ជាមួយ​អ្នក​ភូមិ និង​ការ​វាយ​តម្លៃ​ដោយ​ឯករាជ្យ គឺ​ជា​ឧបសគ្គ​ចម្បង​របស់​រដ្ឋាភិបាល និង​រង​ការ​រិះគន់​កាន់​តែ​ខ្លាំង ប្រសិនបើ​ការ​អភិវឌ្ឍ​នោះ​ត្រូវ​បាន​បណ្ដេញ​ចេញ​ដោយ​បង្ខំ។

លោក សឺន ជុំសុធន សង្កត់​ធ្ងន់​ថា ការ​កសាង​ហេដ្ឋារចនាសម្ព័ន្ធ​នៅ​ទីតាំង​ថ្មី​ទាក់ទិន​លំនៅ រួម​ទាំង​គុណភាព​សំណង់​ជា​លក្ខណៈ​ស្តង់ដារ គឺ​ជា​ប្រធានបទ​ដ៏​សំខាន់​ដែល​ធ្វើ​ឲ្យ​អ្នកភូមិ​មាន​ជំនឿ​ចិត្ត អាច​នឹង​ប្ដូរ​ឥរិយាបថ​ទទួល​យក​សំណង​វិញ ជា​ពិសេស​គឺ​ដំណោះស្រាយ​ដោយ​ឈើ​លើ​យន្តការ​សិក្សា​ឲ្យ​លម្អិត និង​ឯករាជ្យ​ពី​គ្រប់​ភាគី​ពាក់ព័ន្ធ ក៏​ជា​ចំណុច​សំខាន់​ធ្វើ​ឲ្យ​អ្នក​ភូមិ​មាន​ទំនុក​ចិត្ត​ផង​ដែរ៖ «ប្រសិនបើ​ការ​អភិវឌ្ឍ​ដោយ​មាន​ការ​សប្បាយ​ចិត្ត​ពី​ប្រជាពលរដ្ឋ​របស់​ខ្លួន ការ​អភិវឌ្ឍ​នោះ​ទើប​រីក​ចម្រើន»

​វិទ្យុ​អាស៊ីសេរី មិន​អាច​ទាក់ទង​សុំ​ការ​អធិប្បាយ​បញ្ហា​នេះ​ពី​តំណាង​ក្រុមហ៊ុន ឡាន ឆាង ហាយដ្រូ ផៅវើ ឆាយណា អេឡិចត្រិច (Lang chhang Hydro Power China Electric) លោក អ៊ុំ ប៊ុនរ៉េត ដែល​ទទួល​សិទ្ធិ​សាងសង់​ទំនប់​នេះ​បាន​ទេ កាល​ពី​ថ្ងៃ​ទី​២១ ខែ​កក្កដា ព្រោះ​ទូរស័ព្ទ​មិន​អាច​ទាក់ទង​បាន។ តែ​យ៉ាង​ណា​លោក​ធ្លាប់​ប្រាប់​វិទ្យុ​អាស៊ីសេរី​ថា អ្នក​ភូមិ​ត្រូវ​សហការ​ជាមួយ​ក្រុម​ការងារ​បង្ហាញ​ពី​តម្រូវការ​ចាំបាច់​ពាក់ព័ន្ធ​ផល​ប៉ះពាល់ ដើម្បី​ក្រុម​ការងារ​ដោះស្រាយ​ផល​ប៉ះពាល់​រួម​គ្នា​ជូន​ពលរដ្ឋ និង​ជួយ​ជំរុញ​ដល់​ដំណើរការ​រៀបចំ​លំនៅឋាន​ហេដ្ឋារចនាសម្ព័ន្ធ​តាំងទី​លំនៅ​ថ្មី​របស់​ពលរដ្ឋ​បាន​ឆាប់ ដើម្បី​ភាព​ងាយ​ស្រួល​ដល់​ការ​ដាំដុះ​កសិកម្ម មុន​ពេល​ទំនប់​សាងសង់​រួច។

​ពលរដ្ឋ​រង​ផល​ប៉ះពាល់​ទំនប់​នេះ​ក្នុង​ឃុំ​ចំនួន​៣ គឺ​ឃុំ​ភ្លុក ឃុំ​ស្រែគរ និង​ឃុំ​ក្បាលរមាស ភាគ​ច្រើន​គឺ​ជា​ពលរដ្ឋ​ជនជាតិ​ដើម​ភាគតិច ដូចជា ព្នង ព្រៅ គ្រឹង និង​មួយ​ចំនួន​ធំ​ជា​ពលរដ្ឋ​ភាគ​តិច​ឡាវ ដែល​តាំងទី​លំនៅ​ក្នុង​​តំបន់​នោះ តាំង​ពី​សម័យ​សង្គមរាស្ត្រនិយម។ ពួកគេ​សម្ដែង​ក្តី​បារម្ភ​ដូចៗ​គ្នា​ថា ការ​ជម្លៀស​អ្នក​ភូមិ​ចេញ​ពី​លំនៅឋាន នឹង​ប្រឈម​ការ​បាត់បង់​មុខ​របរ ដីស្រែ​ចម្ការ ផល​ដំណាំ​កសិកម្ម និង​ផ្នូរ​កប់​សព។ បញ្ហា​ទាំង​នេះ​ជា​មូលដ្ឋាន​សំខាន់ៗ ដែល​អ្នក​ភូមិ​មួយ​ចំនួន​បាន​ប្ដេជ្ញា​ថា មិន​ព្រម​ចាកចេញ​ជា​ដាច់ខាត។ ពួកគាត់​នៅ​ស្ដាយស្រណោះ​ដី​កំណើត ប្រពៃណី ដី​ផ្នូរ​កប់​សព​ដូនតា ផ្ទះសម្បែង ដីស្រែ​ចម្ការ និង​ផល​ដំណាំ​ជាដើម ជាពិសេស​គឺ​មុខ​របរ​នេសាទ៖ «គឺ​ឪពុក​ម្ដាយ ឆ្អឹង​ប៉ា ម៉ាក់​របស់​ខ្ញុំ  មិន​ទុក​ឲ្យ​គាត់​ងាប់​ក្នុង​បាត​អាង​ទេ។ ទំនៀម​ទម្លាប់​របស់​គេ​ធ្លាប់​រស់​នៅ​តាំង​ពី​ដូនតា​មក មិនមែន​ថ្មីៗ​ទេ យូរ​ណាស់​ហើយ»

ពលរដ្ឋ​ជនជាតិ​ដើម​ភាគតិច​ព្នង រស់​នៅ​ភូមិ​ក្បាលរមាស ដែល​ប្ដេជ្ញា​មិន​ព្រម​ចាកចេញ លោក ប្រក់ រិទ្ធី សម្ដែង​ពី​ទុក្ខ​កង្វល់​ខ្លាំង​ពី​ឧបសគ្គ​ចម្បង​នៃ​ជីវិត​រស់​នៅ​រវាង​ទីតាំង​ថ្មី និង​ទីតាំង​ចាស់ ដែល​នឹង​អាច​ប៉ះពាល់​ដល់​ជីវភាព​ធ្ងន់ធ្ងរ។ លោក​ថា អ្នក​ភូមិ​មិន​ជំទាស់​នឹង​គម្រោង​អភិវឌ្ឍន៍​របស់​រាជរដ្ឋាភិបាល​ទេ តែ​ពួកគេ​មិន​អាច​បោះបង់​ចោល​បាន​នូវ​ទឹកដី​ភូមិ​កំណើត​ជាដាច់ខាត ដូចជា​ផ្នូរ​សព​ដូនតា ដែល​នឹង​ត្រូវ​លិចលង់​ក្នុង​ទឹក កាល​ណា​តំបន់​នោះ​ដំណើរការ៖ «ខ្ញុំ​ថា​អត់​គ្រប់គ្រង​ក៏ដោយ រាល់​ដង​ស្មាន​រដ្ឋាភិបាល​ចិញ្ចឹម? ខ្ញុំ​ទិញ​គោយន្ត​ស្មាន​រដ្ឋាភិបាល​ឲ្យ​គោ​ក្របី​ខ្ញុំ​លក់​ទិញ​គោយន្ត?»

​របាយការណ៍​សិក្សា​ផល​ប៉ះពាល់​ស្ដីពី​ការ​សាងសង់​ទំនប់​វារីអគ្គិសនី​សេសានក្រោម​ពីរ មាន​ប្រជាពលរដ្ឋ​ជាង ១​ពាន់​គ្រួសារ​នៅ​ភូមិ​ចំនួន​៧ ក្នុង​ឃុំ​ចំនួន​៣ ត្រូវ​បាន​ជម្លៀស​ចេញ​ពី​ភូមិ​ចាស់​ទៅ​តាំង​ទី​លំនៅ​ថ្មី ក្នុង​ស្រុក​សេសាន ចម្ងាយ​ប្រមាណ​ជិត ២០​គីឡូម៉ែត្រ​ពី​ភូមិ​ចាស់។

មន្ត្រី​លេខាធិការ​គណៈកម្មការ​ដោះស្រាយ​ផល​ប៉ះពាល់​នៃ​ទំនប់​វារីអគ្គិសនី​សេសានក្រោមពីរ និង​ជា​អនុ​ប្រធាន​រដ្ឋបាល​សាលា​ខេត្ត​ស្ទឹងត្រែង លោក ម៉ែន គង់ មាន​ប្រសាសន៍​ថា គណៈកម្មាធិការ​ដោះស្រាយ​ផល​ប៉ះពាល់​អន្តរក្រសួង និង​អភិបាល​ខេត្ត ជា​ប្រធាន​គណៈកម្មាធិការ​ដោះស្រាយ​ផល​ប៉ះពាល់ បាន​បញ្ជាក់​ច្បាស់​ថា ពលរដ្ឋ​ដែល​មិន​ព្រម​ចាកចេញ​ដោយសារ​តែ​មិន​ទាន់​ជ្រាប​ច្បាស់​អំពី​គោលនយោបាយ​ដោះស្រាយ​ផល​ប៉ះពាល់​របស់​រដ្ឋាភិបាល។ ជាក់ស្ដែង​ពលរដ្ឋ​ទាំង​នោះ​នៅ​មិន​ទាន់​ប៉ះពាល់​ជាក់ស្ដែង​នៅ​ឡើយ  ហេតុនេះ​ពួកគេ​នៅ​តែ​ក្រាញននៀល​មិន​ព្រម​ចាកចេញ​ពី​ភូមិ​កំណើត។ តែ​យ៉ាង​ណា​ក៏ដោយ គណៈកម្មាធិការ​ដោះស្រាយ​ផល​ប៉ះពាល់ នឹង​ប្រឹងប្រែង​​ធ្វើ​យ៉ាង​ណា​អប់រំ​ណែនាំ​ពលរដ្ឋ​ទាំង​នោះ ទាក់ទិន​ការ​ផ្ដល់​សំណង​ទូទាត់ ដើម្បី​ឲ្យ​ស្រប​ទៅ​នឹង​គោលនយោបាយ​ដោះស្រាយ​ផល​ប៉ះពាល់។

លោក​បញ្ជាក់​ថា គណៈកម្មាធិការ​ដោះស្រាយ​ផល​ប៉ះពាល់​កំពុង​ប្រឹងប្រែង​ដោះស្រាយ​បញ្ហា​នេះ ជូន​ពលរដ្ឋ​ដែល​យល់​ព្រម​ទទួល​សំណង​នៅ​ភូមិ​ចំនួន ២ មុន​គេ គឺ​ភូមិ​ច្រប់ និង​ភូមិ​ស្រែស្រណុក។ លោក​ថា ដំណើរការ​នៃ​ការសាងសង់​ទំនប់​នេះ​មិន​អាច​​អាក់ខាន​ឡើយ ដូច្នេះ​ចាំបាច់​ពលរដ្ឋ​ដែល​រង​ផល​ប៉ះពាល់​ដាច់ខាត​ត្រូវតែ​សហការ​ជាមួយ​អាជ្ញាធរ​ពាក់ព័ន្ធ​ដោះស្រាយ​​សំណង​ផល​ប៉ះពាល់ ដើម្បី​ឲ្យ​ក្រុមហ៊ុន​រក​យន្តការ​ដោះស្រាយ​ឲ្យ​បាន​មុន​ពេល​ទំនប់​ដំណើរការ។

លោក ម៉ែន គង់៖ «ដោយសារ​យើង​ឃើញ​ថា ពលរដ្ឋ​នៅ​ទីនោះ​បង្កបង្កើត​ផល​របរ​កសិកម្ម ដូច្នេះ​អ្វី​ដែល​យើង​ជួយ​គាត់ គឺ​ផ្ដល់​ពូជ និង​ផ្ដល់​បច្ចេកទេស​ជា​កសិកម្ម»

​មន្ត្រី​សម្របសម្រួល​អង្គការ​បណ្ដាញ​ទន្លេ​បី លោក មៀច មាន មាន​ប្រសាសន៍​ថា ថ្វីត្បិតតែ​ពលរដ្ឋ​យល់​ព្រម​ឲ្យ​មន្ត្រី​ជំនាញ​វាស់វែង​ដើម្បី​ទូទាត់​សំណង​ពិតមែន ប៉ុន្តែ​ជាក់ស្ដែង​ពលរដ្ឋ​មួយ​ចំនួន​នៅ​មិន​ទាន់​យល់ព្រម​នៅ​ឡើយ​ទេ។ មូល​ហេតុ​ដែល​ពលរដ្ឋ​មិន​ទាន់​យល់​ព្រម​ដោយសារ​តែ​ពួកគាត់​រង់ចាំ​មើល​នៃ​យន្តការ​នៃ​ការ​រៀបចំ​ផ្ដល់​សំណង​ផ្ទះសម្បែង និង​កិច្ចសន្យា​ផ្សេងៗ​ទាក់ទិន​ការ​ទូទាត់​សំណង​ដូចជា​ទ្រព្យសម្បត្តិ​​រូបវន្ត​ជាដើម ដល់​ពលរដ្ឋ​នៅ​ភូមិ​ចំនួន ២ គឺ​ភូមិ​ស្រែស្រណុក និង​ភូមិ​ច្រប់ ក្នុង​ឃុំ​ក្បាលរមាស។

លោក​កត់សម្គាល់​ថា អ្នកភូមិ​មាន​ការ​រារែក​ច្រើន​ដោយសារ​តែ​គុណភាព​ផ្ទះ​ដែល​ផ្ដល់​ជូន​ពលរដ្ឋ​នៅ​ភូមិ​ស្រែស្រណុក និង​ភូមិ​ច្រប់ ហាក់​ដូច​មិន​ទាន់​មាន​ស្តង់ដារ​នៅ​ឡើយ​ទេ ស្រប​ពេល​ដែល​ផ្ទះ​ចំនួន ៨​ខ្នង​មាន​បញ្ហា​ពេល​កំពុង​សាងសង់។ លោក​កត់សម្គាល់​ថា ពលរដ្ឋ​នៅ​មាន​ការ​ស្ទាក់ស្ទើរ​ចំពោះ​ការ​ទទួល​យក​សំណង​នៅ​ឡើយ ព្រោះតែ​ការ​រៀប​លំនៅឋាន​ជូន​ដល់​ពលរដ្ឋ​ហាក់​មិន​ផ្ដល់​ភាព​កក់ក្ដៅ​ដែល​អាច​ឲ្យ​ពួកគាត់​ជឿ​ទុក​ចិត្ត​ឡើយ។

តែ​យ៉ាងណាក៏ដោយ លោក មៀច មាន រំពឹង​ថា ក្តី​បារម្ភ​របស់​ពលរដ្ឋ​ទាក់ទិន​ការ​ផ្ដល់​សំណង​ផ្ទះសម្បែង និង​ដីធ្លី​ជាដើម គឺ​ជា​ចំណុច​សំខាន់​ដែល​អាជ្ញាធរ​ជំនាញ និង​តំណាង​ក្រុមហ៊ុន​ត្រូវ​យក​ចិត្តទុកដាក់​ដោះស្រាយ។ លោក​ថា ការ​ធ្វើ​ឲ្យ​ឃើញ​ប្រាកដ​ពី​ហេដ្ឋារចនាសម្ព័ន្ធ​កន្លែង​តាំងទី​លំនៅ​ថ្មី រួម​ទាំង​គុណភាព គឺ​ជា​កត្តា​សំខាន់​ដែល​ធ្វើ​ឲ្យ​អ្នក​ភូមិ​មាន​ជំនឿ​ចិត្ត​ប្ដូរ​ឥរិយាបថ​ទទួល​យក​សំណង​ផល​ប៉ះពាល់​ឡើង​វិញ ជាពិសេស​ករណី​ផ្នូរ​សព​ដូនតា ទីសក្ការៈ​អ្នក​ភូមិ ត្រូវ​មាន​ដំណោះស្រាយ​សមស្រប​មួយ​ដែល​ធានា​ថា ប្រពៃណី​អ្នក​ភូមិ​ត្រូវ​បាន​គោរព។

លោក មៀច មាន៖ «បើ​​កាល​ណា​កាត់​បន្ថយ​កម្ពស់​ទំនប់ កាត់​បន្ថយ​នូវ​ទំហំ​ទ្វារ​ទឹក​​នៅ​អាង​ទំនប់ គេ​សប្បាយចិត្ត​ហើយ គេ​អត់​ប្រឆាំង​ការ​អភិវឌ្ឍ​ទេ គេ​ជំទាស់​ទៅ​នឹង​ការ​បណ្ដេញ​គេ​ចេញ»

​កាលពី​ចុង​ខែ​មិថុនា មន្ត្រី​គណៈកម្មាធិការ​ដោះស្រាយ​ផល​ប៉ះពាល់​ស្ដីពី​ការ​សាងសង់​ទំនប់​វារីអគ្គិសនី​សេសានក្រោមពីរ នៅ​ខេត្ត​ស្ទឹងត្រែង រួម​នឹង​តំណាង​ក្រុមហ៊ុន​សាងសង់​ទំនប់​ធ្លាប់​ស្នើសុំ​ឲ្យ​ប្រជាពលរដ្ឋ​ដែល​នៅ​សេសសល់​មិន​ចូលរួម​ផ្ដល់​ទិន្នន័យ​ទ្រព្យសម្បត្តិ ដីធ្លី ផលដំណាំ​របស់​ខ្លួន ព្រមទាំង​អត្តសញ្ញាណកម្ម​ដោយ​ការ​ប្រញាប់ ដើម្បី​ពិគ្រោះ​យោបល់​ពី​ក្រុម​ការងារ​ដើម្បី​រក​ដំណោះស្រាយ​ពី​ទុក្ខ​លំបាក​ផ្សេងៗ​ដែល​កើត​មាន​នៅ​ថ្ងៃ​ខាង​មុខ។

តួលេខ​ឃុំ​ស្រែគរ បង្ហាញ​ថា ពលរដ្ឋ​រង​ផល​ប៉ះពាល់​សរុប​ចំនួន ៥៧០​គ្រួសារ ក្នុង​នោះ​ពលរដ្ឋ​មិន​បាន​វាស់វែង​ចំនួន ២៥៤​គ្រួសារ និង​ពលរដ្ឋ​ដែល​វាស់វែង​រួច​មាន​ចំនួន ២៧០​គ្រួសារ ដោយ​ឡែក​ពលរដ្ឋ​ដែល​វាស់វែង​រួចរាល់​ក៏​មិន​ប្រាកដ​ថា យល់ព្រម​ចាកចេញ​ដែរ ព្រោះ​អ្នក​ភូមិ​កំពុង​រង់ចាំ​មើល​ដំណើរការ​ដោះស្រាយ​សំណង​ពលរដ្ឋ​នៅ​ភូមិ​ស្រែស្រណុក និង​ភូមិ​ច្រប់ ជា​មុន​សិន។ ចំណែក​នៅ​ឃុំ​ក្បាលរមាស នៅ​សល់​ពលរដ្ឋ​ជាង ៤០​គ្រួសារ​មិន​ព្រម​ចាកចេញ​ដាច់​ខាត។ ដោយ​ឡែក​នៅ​ភូមិ​ច្រប់ មាន​ពលរដ្ឋ​ចំនួន ១​គ្រួសារ​មិន​ព្រម​ចាកចេញ។

​ទោះ​យ៉ាង​ណា អ្នក​ភូមិ​ខ្លះ​ទទួល​សំណង​ជា​ប្រាក់​ថ្លៃ​ផ្ទះ និង​ថ្លៃ​ដី​កសិកម្ម​សរុប ១​ម៉ឺន​ដុល្លារ ក្នុង​នោះ​ដី​កសិកម្ម​អាជ្ញាធរ​ប្រគល់​ជូន​ពលរដ្ឋ​ក្នុង ១​គ្រួសារ​ទទួល​បាន ៥​ហិកតារ ដោយ​ក្រុមហ៊ុន​ឈូស​ឆាយ​សម្អាត​ឲ្យ​ទៅ​ជា​ដី​កសិកម្ម។

ទំនប់​វារីអគ្គិសនី​សេសានក្រោមពីរ គ្រោង​ចំណាយ​ថវិកា​សរុប ៩៧៧​លាន​ដុល្លារ​អាមេរិក អាច​ផលិត​ថាមពល​អគ្គិសនី ៤០០​មេហ្គាវ៉ាត់ និង​គ្រោង​សាងសង់​ឲ្យ​រួចរាល់​នៅ​ខែ​មិថុនា ឆ្នាំ​២០១៧ ដោយ​ក្រុមហ៊ុន​ឈ្មោះ ឡាន ឆាង ហាយដ្រូ ផៅវើ ឆាយណា អេឡិចត្រិច។  តាម​ការ​គ្រោង​ទុក បើ​គម្រោង​នេះ​កសាង​រួច នឹង​អាច​ផ្គត់ផ្គង់​អគ្គិសនី​ដល់​ពលរដ្ឋ​នៅ​តាម​បណ្ដាល​ខេត្ត​មួយ​ចំនួន ដូចជា ខេត្ត​ក្រចេះ កំពង់ចាម ស្ទឹងត្រែង និង​រាជធានី​ភ្នំពេញ។ គម្រោង​នេះ​ត្រូវ​បាន​រដ្ឋាភិបាល​វិនិយោគ​ឲ្យ​ក្រុមហ៊ុន​រយៈពេល ៤៥​ឆ្នាំ និង​មាន​រយៈពេល​សាងសង់ ៥​ឆ្នាំ។ បន្ទាប់​ពី​ការ​វិនិយោគ​រួច ក្រុមហ៊ុន​ត្រូវ​ប្រគល់​ជូន​រដ្ឋ​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល