បច្ចុប្បន្ននេះ នៅប្រទេសកម្ពុជា ក៏ដូចជាប្រទេសថៃ និងវៀតណាម គឺគ្រាប់ពូជឈើគ្រញូងមានតម្លៃថ្លៃបំផុត ដោយ ១គីឡូក្រាមយ៉ាងហោចណាស់ក៏ថ្លៃពី ៣០០ ទៅជិត ៤០០ដុល្លារអាមេរិកដែរ។ ការលក់គ្រាប់ពូជយ៉ាងថ្លៃដូចនេះ ដោយសារតែប្រភេទឈើគ្រញូង បានវិនាសផុតពូជស្ទើរតែទាំងស្រុង បន្ទាប់ពីជាង ៥-៦ឆ្នាំជាប់ៗគ្នាមកហើយ ប្រទេសចិន បានប្រមូលទិញប្រភេទឈើទាំងនោះ ដោយយកទាំងឫស ទាំងគល់គ្មានសល់ រហូតធ្វើឱ្យពលរដ្ឋខ្មែរជាច្រើនបានគ្រោះថ្នាក់ដល់ជីវិតក្នុងពេលឆ្លងដែនទៅកាប់ឈើគ្រញូងខុសច្បាប់ក្នុងទឹកដីថៃ ទៀតផង។
តើពេលនេះប្រទេសកម្ពុជា រកគ្រាប់ឈើគ្រញូងមកពីណាដើម្បីដាំដុះឱ្យកូនខ្មែរជំនាន់ក្រោយបានស្គាល់វាបន្តទៀត?
សង្កាត់រដ្ឋបាលព្រៃឈើកន្ទួតខ្នាក្រៅ គឺជាអង្គភាពការពារព្រៃឈើមួយដែលស្ថិតនៅក្នុងឃុំខ្នារង្វះ ស្រុកបន្ទាយស្រី ចម្ងាយជាង ៤០គីឡូម៉ែត្រ ភាគខាងជើងឆៀងខាងលិចពីទីរួមខេត្តសៀមរាប។
មន្ត្រីរដ្ឋបាលព្រៃឈើទីនោះ កំពុងទទួលខុសត្រូវយ៉ាងធ្ងន់ធ្ងរលើកិច្ចការពារ និងអភិរក្សដើមគ្រញូងពូជ ដែលនៅសេសសល់ចុងក្រោយបំផុតចំនួនជាង ៥៧០ដើម ដែលដុះនៅលើផ្ទៃដីអភិរក្សទំហំជាង ៥០ហិកតារ។
នាយរងសង្កាត់រដ្ឋបាលព្រៃឈើកន្ទួតខ្នាក្រៅ គឺលោក ហង្ស ជំនិតរិទ្ធី។ លោកមានប្រសាសន៍ថា បច្ចុប្បន្ននៅប្រទេសកម្ពុជា ស្ទើរតែបាត់បង់ឈើគ្រញូងទាំងស្រុង ក៏ប៉ុន្តែនៅក្នុងសង្កាត់រដ្ឋបាលព្រៃឈើរបស់លោក គឺនៅមានសេសសល់ពូជគ្រញូងចុងក្រោយដែលរូបលោក ក៏ដូចជាក្រុមដើរល្បាតកំពុងប្រឹងប្រែងការពារទាំងយប់ទាំងថ្ងៃ។ វាជាការពិបាកបំផុតទៅលើកិច្ចការពារដើមឈើគ្រញូងដែលមានទំហំមុខធំៗ ពីព្រោះតែបច្ចុប្បន្ន ក្រុមឈ្មួញដែលជួញដូរឈើគ្រញូងនៅមិនទាន់បោះបង់ចោលមុខរបររបស់ពួកគេនៅឡើយ ហើយពួកគេតែងតែប្រាថ្នាចង់បានដើមឈើប្រភេទនោះ ពីព្រោះវាមានតម្លៃខ្ពស់រហូតដល់ទៅរាប់ម៉ឺនដុល្លារអាមេរិកក្នុង ១ដើម។
លោក ហង្ស ជំនិតរិទ្ធី បញ្ជាក់ថា ដើមគ្រញូងធំៗ ដែលនៅសេសសល់ចុងក្រោយក្នុងសង្កាត់របស់លោកនេះ គឺជាក្ដីសង្ឃឹមឡើងវិញសម្រាប់ជួយប្រទេសកម្ពុជា ឱ្យអាចយកគ្រាប់ពូជទៅបណ្ដុះចែកចាយតាមបណ្ដាខេត្តជាច្រើនទៀតឱ្យយកវាទៅដាំឡើងវិញ៖ «ស្រាវជ្រាវដើម្បីយកគ្រាប់ទៅបណ្ដុះចែកចាយដល់រដ្ឋបាលព្រៃឈើផ្នែកណាដែលអត់មាន ដូចជានៅខេត្តព្រះសីហនុ ខេត្តស្វាយរៀង ក៏ដូចជាបណ្ដាខេត្តខ្លះទៀតដែលគេស្នើសុំ»។
បច្ចុប្បន្ននេះឈើគ្រញូងនៅតែទទួលរងការកាប់បំផ្លាញធ្វើអាជីវកម្មខុសច្បាប់ស្ទើរតែគ្រប់តំបន់ ហើយមួយផ្នែកទៀត ក្រុមឈ្មួញក៏នៅតែជួលពលរដ្ឋខ្មែរឱ្យឆ្លងដែនចូលទៅកាប់ដោយខុសច្បាប់ក្នុងទឹកដីថៃ ហើយដឹកជញ្ជូនយកទៅលក់ឱ្យចិន ដោយឆ្លងកាត់ប្រទេសវៀតណាម ដដែល។
ដោយសារតែឈើគ្រញូងនៅតែទទួលរងពីការជួញដូរនេះ ក្រុមអភិរក្សចម្ការពូជគ្រញូងរបស់សង្កាត់រដ្ឋបាលព្រៃឈើកន្ទួតខ្នាក្រៅ បានរៀបចំផែនការដើរល្បាតការពារឈើគ្រញូងដែលនៅសេសសល់ទាំងយប់ទាំងថ្ងៃ ព្រមទាំងធ្វើស្លាកលេខរៀងដើរបោះនៅតាមដើមគ្រញូងនីមួយៗ ដើម្បីចំណាំផង។
អ្នកដើរល្បាតការពារព្រៃចម្ការគ្រញូងម្នាក់ ក្នុងចំណោមកងល្បាតជាច្រើនទៀត លោក សែម សិទ្ធិ មានប្រសាសន៍ថា សព្វថ្ងៃនេះរូបលោក និងមិត្តរួមការងារជិត ៣០នាក់ផ្សេងទៀត បានរៀបចំជាច្រើនក្រុមដើម្បីដើរល្បាតការពារជុំវិញព្រៃគ្រញូង មិនថាយប់ ឬថ្ងៃ មិនថាពេលភ្លៀង ឬក៏រាំងនោះទេ ទោះជាយ៉ាងណា អ្នកភូមិខ្លះនៅតែលួចចូលទៅបំពានដាក់អន្ទាក់ចាប់យកសត្វព្រៃ និងលួចកាប់ឈើគ្រញូងនៅក្នុងតំបន់អភិរក្សនោះ។
លោក សែម សិទ្ធិ បញ្ជាក់ថា ក្រុមរបស់លោក បើទោះបីជាដើរល្បាតមានអាវុធនៅជាប់នឹងខ្លួនក៏ដោយ ក៏ពេលខ្លះបានទទួលរងការគំរាមកំហែងពីក្រុមអ្នកដាក់អន្ទាក់ចាប់សត្វព្រៃ និងក្រុមអ្នកដែលប៉ុនប៉ងកាប់ឈើគ្រញូង៖ «ព្រៃអភិរក្ស ព្រៃជម្រកសត្វអី ខ្ញុំការពារទាំងអស់ អត់មានឱ្យបទល្មើសចូលបានទេ។ ថ្ងៃមុនអ្នកដើរដាក់អន្ទាក់សត្វព្រៃ មានកាំភ្លើងខ្យល់បាញ់ពួកខ្ញុំដែរ»។
បន្ទាប់ពីឈើគ្រញូងត្រូវបានឈ្មួញដឹកជញ្ជូនយកទៅជួញដូរយ៉ាងគគ្រឹកគគ្រេង ៥-៦ឆ្នាំ រហូតដល់ពេលនេះ វាបានធ្វើឱ្យឈើប្រភេទនេះ ពិបាករក ហើយមានតម្លៃកាន់តែខ្ពស់ថែមទៀត។ បច្ចុប្បន្នឈើប្រភេទនេះ គឺនៅមានការកែច្នៃធ្វើជាសង្ហាររឹម និងវត្ថុអនុស្សាវរីយ៍ដាក់លក់ឱ្យភ្ញៀវទេសចរខ្លះៗនៅតាមរោងសិប្បកម្ម និងកន្លែងលក់វត្ថុអនុស្សាវរីយ៍ជាដើម។
នាយកផ្នែករដ្ឋបាលព្រៃឈើបន្ទាយស្រី លោក ម៉ុង ប៊ុនលីម មានប្រសាសន៍ថា ជារៀងរាល់ថ្ងៃកម្លាំងរបស់លោកនៅតែសកម្មស្ទាក់ចាប់រថយន្តដឹកឈើខុសច្បាប់ជាច្រើនប្រភេទ និងពេលខ្លះក៏មានរថយន្តដឹកគ្រញូងលួចឆ្លងកាត់ដែរ។
លោក ម៉ុង ប៊ុនលីម បញ្ជាក់ថា បើទោះបីជាយ៉ាងណា ភារកិច្ចនៃកម្លាំងរបស់លោកមិនត្រឹមតែបង្ក្រាបបទល្មើសព្រៃឈើ ដែលដឹកជញ្ជូននៅតាមដងផ្លូវប៉ុណ្ណោះទេ គឺត្រូវទទួលខុសត្រូវការពារទៅលើចម្ការគ្រញូង មេពូជឱ្យបានគង់វង្ស។ លោក ម៉ុង ប៊ុនលីម បានចាត់ទុកដើមគ្រញូងធំៗ ជាង ៥៧០ដើមនៅក្នុងតំបន់ការពាររបស់លោកនោះ គឺជាពូជឈើកម្រដែលនៅសេសសល់ចុងក្រោយបំផុតនៃប្រទេសកម្ពុជា។
លោកកំពុងព្រួយបារម្ភខ្លាចបាត់បង់ដោយសារតែបច្ចុប្បន្នមានមនុស្សខ្លះនៅតែព្យាយាមចង់បានវាយកទៅធ្វើជំនួញ៖ «គឺថារាល់ថ្ងៃហ្នឹង ពិសេសពេលភ្លៀងគឺជនឆ្លៀតឱកាសខ្លះតែងនាំគ្នាលួចចូលទៅកាប់រហូតដល់រូបលោក អំពាវនាវឱ្យអាជ្ញាធរភូមិ-ឃុំ នៅជុំវិញជួយការពារ ក៏ជនឆ្លៀតឱកាសនៅតែមិនស្ដាប់»។
មន្ត្រីផ្នែករដ្ឋបាលព្រៃឈើបន្ទាយស្រី ឱ្យដឹងថា គ្រញូងមេពូជចំនួនជាង ៥៧០ដើម ដែលនៅលើផ្ទៃដីជាង ៥០ហិកតារនោះ គឺអាចផ្ដល់គ្រាប់ឱ្យធ្វើពូជបានប្រមាណពី៣០ ទៅ ៥០គីឡូក្រាមក្នុង១ឆ្នាំៗ។ គ្រាប់ឈើនេះ គឺជាក្ដីសង្ឃឹមក្នុងការបន្តពូជគ្រញូង ឱ្យមានឡើងវិញនៅកម្ពុជា ពីព្រោះតែគ្រាប់ឈើនេះ បច្ចុប្បន្នមានតម្លៃពី ៣០០ ទៅ ៤០០ដុល្លារក្នុង១គីឡូក្រាម បើយើងទិញពីប្រទេសថៃ ឬក៏ប្រទេសវៀតណាម មកបណ្ដុះ។
បន្ថែមពីលើការអភិរក្សចំការពូជគ្រញូងនេះ ពេលបច្ចុប្បន្នសង្កាត់រដ្ឋបាលព្រៃឈើកន្ទួតខ្នាក្រៅ ក៏បានពង្រីកផ្ទៃដីបន្ថែមរហូតដល់ទៅ ១.៨៨៨ហិកតារ ដោយកាយដីធ្វើជាចង្អូរប្រព័ន្ធការពារយ៉ាងធំ។ នៅលើផ្ទៃដីដែលទើបតែពង្រីកថ្មីនេះ សង្កាត់រដ្ឋបាលព្រៃឈើកន្ទួតខ្នាក្រៅ ក៏បានទុកផ្ទៃដីខ្លះធ្វើជាចម្ការដាំកូនឈើអនុស្សាវរីយ៍ ហើយបើកឱកាសឱ្យឥស្សរជន សំខាន់ៗរបស់រដ្ឋសភា រដ្ឋាភិបាល ព្រមទាំងវិស័យឯកជន និងគ្រួសារណាដែលចង់ដាំ អាចអញ្ជើញទៅរួមចំណែកបានគ្រប់ពេល និងដោយសេរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។