សង្គមស៊ីវិលនិងសកម្មជនធ្វើយុទ្ធនាការ "ថតរូបខ្លួនឯងជាមួយដើមឈើ"
2016.11.08
សកម្មជននៃចលនាមាតាធម្មជាតិ ធ្វើយុទ្ធនាការថតរូបខ្លួនឯងជាមួយដើមឈើ នាស្រុកមណ្ឌលសីមា ខេត្តកោះកុង កាលពីថ្ងៃទី៦ ខែវិច្ឆិកា ឆ្នាំ២០១៦។ ការថតរូបនេះគឺដើម្បីជាសារដល់ពលរដ្ឋឲ្យស្រលាញ់ និងការពារព្រៃឈើ។
Photo supplied
បណ្ដាញយុវជន និងសកម្មជនការពារព្រៃឡង់ នាំគ្នាបង្កើតយុទ្ធនាការថ្មីមួយទៀតក្នុងការផ្សព្វផ្សាយឱ្យប្រជាពលរដ្ឋស្រលាញ់ និងការពារព្រៃឈើ ពិសេសចង់ឱ្យរាជរដ្ឋាភិបាលកាន់តែយកចិត្តទុកដាក់លើកិច្ចការពារធនធានធម្មជាតិ។ យុទ្ធនាការនេះ គឺគ្រាន់តែថតរូបជាមួយដើមឈើដើម្បីអប់រំឱ្យមហាជនផ្សេងទៀតបានដឹង ហើយរួមគ្នាថែរក្សាធនធានព្រៃឈើ ឬដាំដើមឈើឡើងវិញ ដើម្បីទប់ទល់ទៅនឹងបម្រែបម្រួលអាកាសធាតុនៅពេលបច្ចុប្បន្ន ព្រមទាំងចង់រំលឹកដល់ការប្ដេជ្ញាចិត្តរបស់រាជរដ្ឋាភិបាលក្នុងកិច្ចការពារព្រៃឈើកន្លងមក។
យុទ្ធនាការរបស់សង្គមស៊ីវិល ព្រមទាំងសកម្មជនការពារព្រៃឈើ លើការអប់រំ និងផ្សព្វផ្សាយអំពីសារសំខាន់នៃធនធានព្រៃឈើ គឺមានជាហូរហែ និងមានលក្ខណៈផ្សេងៗគ្នា។
យុទ្ធនាការទាំងនោះ រួមមានការហែញត្តិដាក់ទៅស្ថាប័នជាតិធំៗ ដើម្បីឱ្យស្ថាប័នរដ្ឋចាត់វិធានការលើបញ្ហាប្រឈមដែលកើតមានក្នុងតំបន់ដែលពួកគេរស់នៅ។ លើសពីនេះទៀត រួមមានការដាំកូនឈើឡើងវិញ ការចុះល្បាតព្រៃដើម្បីតាមដានសកម្មភាពបទល្មើសកាប់បំផ្លាញឈើធំៗ ឬបទល្មើសរានដីព្រៃធ្វើជាកម្មសិទ្ធិ ព្រមទាំងសកម្មភាពជាច្រើនផ្សេងទៀត។
ជាមួយគ្នានេះ បណ្ដាញយុវជនកម្ពុជា និងបណ្ដាញការពារព្រៃឡង់ សហការជាមួយអង្គការដៃគូបានរៀបចំយុទ្ធនាការថ្មីមួយទៀត គឺយុទ្ធនាការ សែលហ្វ៊ី (Selfie) ឬថតរូបខ្លួនឯងជាមួយដើមឈើ។ យុទ្ធនាការនេះ គឺចង់អប់រំមហាជន ពិសេសអ្នកប្រើប្រាស់បណ្ដាញសង្គមឱ្យពួកគេស្រលាញ់ និងយកចិត្តទុកដាក់ ព្រមទាំងចេះការពារព្រៃឈើ ដែលកំពុងប្រឈមការកាប់បំផ្លាញនៅពេលបច្ចុប្បន្ន។
ប្រធានបណ្ដាញយុវជនកម្ពុជា លោក ទឹម ម៉ាឡៃ មានប្រសាសន៍ថា យុទ្ធនាការថតរូបជាមួយដើមឈើ គឺចាប់ផ្ដើមដំបូងពីតំបន់ព្រៃឡង់ ពីព្រោះជាតំបន់ដែលសំខាន់ជាងគេ ប៉ុន្តែពលរដ្ឋគ្រប់រូបអាចធ្វើសកម្មភាពនេះបានយ៉ាងងាយស្រួល ដោយគ្រាន់តែថតរូបជាមួយដើមឈើដែលមាននៅតំបន់ពួកគាត់រស់នៅ។
លោកបញ្ជាក់ថា យុទ្ធនាការនេះ គឺបន្ថែមទៅនឹងយុទ្ធនាការមុនៗ ដើម្បីកាន់តែធ្វើឱ្យពលរដ្ឋចាប់អារម្មណ៍ ព្រមទាំងដាស់ស្មារតីដល់រាជរដ្ឋាភិបាលឱ្យនឹកឃើញដល់ការសន្យា ឬការប្ដេជ្ញាចិត្តរបស់ខ្លួនចំពោះកិច្ចការពារព្រៃឈើកន្លងមក៖ «ជំរុញឱ្យរដ្ឋាភិបាលខ្លួនហ្នឹងចាប់ផ្ដើមមើលឡើងវិញទៅលើការសន្យា ជាពិសេសការសន្យាដាក់ជាតំបន់ព្រៃការពារ ឬព្រៃអភិរក្សអីហ្នឹង»។
យុទ្ធនាការថតរូបខ្លួនឯងជាមួយដើមឈើ គឺធ្វើរយៈពេលមួយសប្ដាហ៍មកហើយ និងបន្តធ្វើពេញមួយខែវិច្ឆិកា នេះ។
លោក ទឹម ម៉ាឡៃ ពន្យល់ថា យុទ្ធនាការនេះ គឺមានការប្រកួតប្រជែងដើម្បីទទួលបានវត្ថុអនុស្សាវរីយ៍តាមរយៈការថតរូបដែលទទួលបានការចាប់អារម្មណ៍ច្រើន ឬការគាំទ្រពីមិត្តភ័ក្ដិរបស់ពួកគេច្រើន ដូចជាការចុច ឡៃខ៍ (Like) ឬចូលចិត្តលើរូបថតនោះជាដើម។
ប្រធានបណ្ដាញយុវជនកម្ពុជា ដដែលលើកឡើងថា កន្លងមករាជរដ្ឋាភិបាលបានសន្យា និងមានសកម្មភាពជាច្រើនដើម្បីទប់ស្កាត់ និងការពារព្រៃឈើ ប៉ុន្តែការសន្យាទាំងនោះគ្មានន័យ ពីព្រោះបទល្មើសនៅតែកើតមានឡើង។
អាស៊ីសេរី មិនអាចទាក់ទងអ្នកនាំពាក្យក្រសួងបរិស្ថាន លោក សៅ សុភាព ដើម្បីឆ្លើយតបចំពោះយុទ្ធនាការរបស់ក្រុមយុវជន និងបណ្ដាញការពារព្រៃឡង់ បានទេ នៅថ្ងៃទី៧ ខែវិច្ឆិកា។
ទោះបីជាយ៉ាងនេះក្តី កន្លងមករាជរដ្ឋាភិបាលបានប្ដេជ្ញាចិត្ត និងសន្យាម្ដងហើយម្ដងទៀត ចំពោះកិច្ចការពារធនធានធម្មជាតិ ពិសេសព្រៃឈើ។ ប្រមុខរាជរដ្ឋាភិបាលធ្លាប់ប្រកាសកាត់កខ្លួនឯងចោលទៀតផង ប្រសិនបើការពារព្រៃឈើមិនបាន។ ជាងនេះទៀត កាលពីថ្ងៃទី១៥ មករា រាជរដ្ឋាភិបាលបានបង្កើតគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើឡើង ក្នុងគោលបំណងទប់ស្កាត់បទល្មើសព្រៃឈើ ប៉ុន្តែមកទល់ពេលនេះ សកម្មជនការពារព្រៃឈើលើកឡើងថា សកម្មភាពកាប់ឈើនៅតែកើតមានឡើងដដែល។
គណៈកម្មការនេះ មានភារកិច្ចសំខាន់ៗមួយចំនួន ដូចជា ទប់ស្កាត់ និងបង្ក្រាបសកម្មភាពកាប់ឈើ ការនាំចេញឈើខុសច្បាប់ និងបទល្មើសព្រៃឈើនៅភូមិភាគឦសាននៃប្រទេស។ ស្រាវជ្រាវរកអ្នកពាក់ព័ន្ធក្នុងការកាប់ និងនាំឈើខុសច្បាប់ ចាប់ជនល្មើស និងវត្ថុតាងដើម្បីបញ្ជូនសំណុំរឿងទៅតុលាការ ព្រមទាំងសហការជាមួយភាគីវៀតណាម និងឡាវ ដើម្បីធ្វើការងារឲ្យមានប្រសិទ្ធភាព។ បន្ថែមពីនេះ លោកនាយករដ្ឋមន្ត្រី ហ៊ុន សែន បញ្ជាឱ្យប្រធានគណៈកម្មការទប់ស្កាត់ និងបង្ក្រាបបទល្មើសព្រៃឈើ លោក សៅ សុខា ប្រើប្រាស់គ្រាប់រ៉ុកកែត បាញ់កម្ទេចក្រុមឈ្មួញរកស៊ីដែលព្រហើនថែមទៀតផង។
បេសកកម្មរបស់គណៈកម្មការជាតិមួយនេះ រយៈពេលប្រមាណ ៣ខែដំបូង ពួកគេសម្រេចបញ្ជូនរបាយការណ៍របស់ខ្លួនទៅលោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែមេសា បន្ទាប់ពីចាប់បានឈើខុសច្បាប់ជាង ៧ម៉ឺនម៉ែត្រគូប និងប្ដឹងឈ្មួញរកស៊ីចំនួន ៥៧ករណីទៅតុលាការ។ ជាមួយគ្នានេះ កាលពីខែសីហា កន្លងទៅ លោកនាយករដ្ឋមន្ត្រី ហ៊ុន សែន បានដាក់បញ្ជាឱ្យក្រសួងពាក់ព័ន្ធនឹងធនធានធម្មជាតិ ត្រូវជួបប្រជុំជាមួយអង្គការសង្គមស៊ីវិលរាល់បីខែម្ដង ដើម្បីតាមដានប្រសិទ្ធភាពការងារ និងរិះរកវិធីការពារធនធានធម្មជាតិ។
យ៉ាងណាក៏ដោយចុះ សង្គមស៊ីវិល និងមហាជនជាច្រើនមើលឃើញថា ការប្ដេជ្ញាចិត្ត ឬការសន្យារបស់រាជរដ្ឋាភិបាលកន្លងមក គឺមិនសូវមានប្រសិទ្ធភាពទេ ហើយនឹងឈានទៅបរាជ័យទាំងស្រុងនៅពេលធនធានធម្មជាតិ ពិសេសព្រៃឈើ ត្រូវបានវិនាសគ្មានសល់។
ប្រធានលេខាធិការដ្ឋានបណ្ដាញការពារព្រៃឡង់ លោក សេង សុខហេង អះអាងថា យុទ្ធនាការថតរូបជាមួយដើមឈើសម្រាប់ផ្សព្វផ្សាយលើបណ្ដាញសង្គមពេលនេះ គឺជារូបភាពមួយថ្មីទៀត ដើម្បីទាញការចាប់អារម្មណ៍ពីមហាជនឱ្យស្រលាញ់ព្រៃឈើ។ បន្ថែមពីនេះ ដើម្បីរំឭកដល់រដ្ឋាភិបាលឱ្យចងចាំនូវការប្ដេជ្ញាចិត្តរបស់ខ្លួននៅក្នុងសន្និសីទទីក្រុងប៉ារីស ស្ដីពីប្រែប្រួលអាកាសធាតុកាលពីឆ្នាំ២០១៥។ កាលណោះ រាជរដ្ឋាភិបាលកម្ពុជា សន្យាថា នឹងការពារ ហើយស្តារព្រៃឈើឡើងវិញឱ្យបាន ៦០ភាគរយ នៅឆ្នាំ២០៣០។
លោក សេង សុខហេង មើលឃើញថា ការប្ដេជ្ញាចិត្តរបស់រដ្ឋាភិបាល គឺមានការប្រែប្រួលខ្លះ ដូចជាការបង្កើតតំបន់ព្រៃការពារកាន់តែច្រើន ការបង្កើតគណៈកម្មការទប់ស្កាត់ និងបង្ក្រាបបទល្មើសព្រៃឈើឡើង ព្រមទាំងកិច្ចសហការជាមួយប្រជាសហគមន៍ និងមន្ត្រីជំនាញកាន់តែប្រសើរជាងមុន។ យ៉ាងនេះក្ដី លោកថា មិនសូវមានប្រសិទ្ធភាពប៉ុន្មានទេ។ ជាក់ស្ដែងបទល្មើសព្រៃឈើនៅតែកើតមានឥតឈប់ឈរ ពិសេសតំបន់ព្រៃការពារដែលរដ្ឋាភិបាលទើបនឹងបង្កើតឡើង ម្យ៉ាងក្រុមឧក្រិដ្ឋជនជួញដូរឈើធំៗ ក្រៅពី ហេង សំនៀង ហៅយាយ ព្រឿង គឺមិនត្រូវបានចាប់ខ្លួនឡើយ៖ «ទន្ទឹមនឹងនោះ បទល្មើសព្រៃឈើនៅតែបន្តកើតមានដែលមានពាក់ព័ន្ធនឹងឧកញ៉ាមួយចំនួនទៀត ព្រមទាំងមន្ត្រីពាក់ព័ន្ធមួយចំនួនទៀតដែលនៅពីក្រោយខ្នង»។
សកម្មជនការពារព្រៃឡង់រូបនេះ មើលឃើញថា ក្រោយពេលបាត់បង់ព្រៃឈើកាន់តែច្រើន បញ្ហាបម្រែបម្រួលអាកាសធាតុពីមួយឆ្នាំទៅមួយឆ្នាំ គឺកើតមានឡើងជាបន្តបន្ទាប់ ដូចជាគ្រោះរាំងស្ងួត គ្រោះទឹកជំនន់ ខ្យល់កន្ត្រាក់ រដូវកាលមិនទៀងទាត់ជាដើម។
ប្រភពដដែលអះអាងថា ពួកគាត់នឹងប្រមូលឯកសារ ឬភស្តុតាងឱ្យបានច្រើនដើម្បីចងក្រងជូនទៅរាជរដ្ឋាភិបាល ពិសេសដាក់ទៅម្ចាស់ជំនួសធំៗ ទាំងអង្គការជាតិ និងអន្តរជាតិ ដើម្បីអន្តរាគមន៍ឱ្យទាន់ពេលវេលាចំពោះវិនាសកម្មព្រៃឈើដែលកំពុងកើតឡើងនៅក្នុងប្រទេសកម្ពុជា បច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ