យុវជនសោកស្ដាយដែលអាជ្ញាធរខេត្តកោះកុងនៅតែបណ្ដោយឱ្យដែនជម្រកសត្វព្រៃពាមក្រសោបក្លាយជាកន្លែងចាក់សំរាម
2024.12.12
រូបភាពយុវជនចុះអង្កេតនៅតំបន់គំនរសំរាម ស្ថិតក្នុងដែនជម្រកសត្វព្រៃពាមក្រសោប ខេត្តកោះកុង កាលពីថ្ងៃទី១១ ខែធ្នូ ឆ្នាំ២០២៤។
រូប៖ ផ្ដល់ឱ្យ
យុវជនស្រឡាញ់បរិស្ថានសោកស្ដាយដែលអាជ្ញាធរខេត្តកោះកុងនៅតែបណ្ដែតបណ្ដោយឱ្យដែនជម្រកសត្វព្រៃពាមក្រសោប ក្លាយជាកន្លែងចាក់សំរាមយ៉ាងអនាធិបតេយ្យ បើទោះបីជាពួកគាត់ធ្លាប់ស្នើឱ្យក្រសួងបរិស្ថានដោះស្រាយបញ្ហានេះជាច្រើនដងហើយក្ដី។
អាជ្ញាធរខេត្តកោះកុង នៅតែមិនទាន់ដោះស្រាយ បញ្ហាចាក់សំរាមនៅតំបន់ដែនជម្រកសត្វព្រៃពាមក្រសោបឱ្យបានត្រឹមត្រូវនៅឡើយ រហូតមកទល់ពេលនេះ ហើយ យុវជន និងពលរដ្ឋចោទអាជ្ញាធរខេត្ត និងក្រសួងបរិស្ថានថា អសមត្ថភាព ដែលបណ្ដែតបណ្ដោយឱ្យករណីនេះកើតឡើងតាមអំពើចិត្ត ដោយពុំគិតពីផលប៉ះពាល់ បរិស្ថាន និងសង្គម។
យុវជនស្រឡាញ់បរិស្ថានមកពីរាជធានីភ្នំពេញ លោក ធឿន សេរី ដែលបានចុះទៅតំបន់ដែនជម្រកសត្វព្រៃពាមក្រសោប កាលពីថ្មីៗនេះ សង្កេតឃើញថា ការចាក់សំរាមនៅតំបន់ដែនជម្រកសត្វព្រៃពាមក្រសោប នៅតែបន្តកើតមានជាដដែល បើទោះជាកន្លងទៅ យុវជនចលនាមាតាធម្មជាតិធ្លាប់បានដាក់ញត្តិស្នើសុំទៅក្រសួងបរិស្ថានឱ្យជួយដោះស្រាយបញ្ហានេះម្ដងជាពីរដង មកហើយក្ដី។
លោកបារម្ភថា ជម្រកសត្វព្រៃមួយនេះ នឹងបន្តហិនហោច ខណៈដែលការចាក់សំរាមបន្តកើតមានយ៉ាងអនាធិបតេយ្យ។ ជាមួយគ្នានោះ លោកអះអាងថា សំរាមនេះ ពុំមានការគ្រប់គ្រងឱ្យបានត្រឹមត្រូវនោះទេ ធ្វើឱ្យកាកសំណល់ប្លាស្ទិករសាត់រប៉ាត់រប៉ាយ ហើយជះក្លិនស្អុយយ៉ាងខ្លាំង នៅតាមបណ្ដោយផ្លូវជាតិលេខ៤៨ ស្ថិតនៅភូមិទួលគគីរលើ ឃុំទួលគគីរ ស្រុកមណ្ឌលសីមា។
លោក ធឿន សេរី៖ «ខ្ញុំគិតថាវាប៉ះពាល់សំខាន់មកលើបរិស្ថាននៅតំបន់នោះ ព្រោះអីតំបន់ការពារវាគឺជាតំបន់ដែលយើងរក្សា។ យើងការពារឱ្យល្អប្រសើរតែបើយើងធ្វើឱ្យខូចអ៊ីចឹងទៅ នឹងប៉ះពាល់ដី និងព្រៃឈើនៅហ្នឹង។ មួយទៀតសំរាមនេះវានៅជិតផ្លូវ ខ្ញុំគិតថាវាជាតំបន់មួយដែលគេចង់ឱ្យខូចខាតអ៊ីចឹងទៅ ដើម្បីទាញយកដើម្បីធ្វើអីផ្សេង»។
បញ្ហាចាក់សំរាមនៅដែនជម្រកសត្វព្រៃពាមក្រសោបនេះ ធ្វើឡើងក្រោយពេលដែលក្រសួងបរិស្ថានចេញអនុក្រឹត្យកាត់ដីឱ្យទៅក្រុមហ៊ុនអេកូ ឡូខល សឺលូសិន (Eco Local solution) ៥០ហិកតារ និងឱ្យទៅមន្ទីរសុខាភិបាលខេត្តកោះកុងចំនួន១០ហិកតារ ដើម្បីដាក់សំរាមបណ្ដោះអាសន្ន ក្រោយពីទីលានចាក់សំរាមចាស់នៅក្រុងខេមរភូមិន្ទបានពេញ។
ទោះជាយ៉ាងណា យុវជន និង ប្រជាពលរដ្ឋលើកឡើងថា ការដែលអាជ្ញាធរខេត្តកោះកុងយកដែនជម្រកសត្វព្រៃមកធ្វើជាទីលានចាក់សំរាម គឺជារឿងដែលមិនត្រឹមត្រូវនោះឡើយ ព្រោះថា បញ្ហាសំរាមនេះ នឹងបង្កផលប៉ះពាល់ធ្ងន់ធ្ងរទៅដល់សត្វព្រៃ ជីវចម្រុះ ប្រព័ន្ធអេកូឡូស៊ី និងប៉ះពាល់ដល់ការរស់នៅរបស់ពលរដ្ឋ។
ពលរដ្ឋរស់នៅភូមិទួលគគីរលើជាប់នឹងដែនជម្រកសត្វព្រៃពាមក្រសោប ប្រាប់វិទ្យុអាស៊ីសេរីក្នុងលក្ខខណ្ឌសុំមិនបញ្ចេញឈ្មោះ និងសំឡេង ព្រោះបារម្ភពីសុវត្ថិភាពលើកឡើងថា ចាប់តាំងពីអាជ្ញាធរយកដែនជម្រកសត្វព្រៃ ធ្វើកន្លែងចាក់សំរាម មក ពលរដ្ឋភាគច្រើនពុំសប្បាយចិត្តនោះទេ ព្រោះពួកគាត់បារម្ភថា អនាគតព្រៃអភិរក្សមួយនេះ នឹងបន្តហិនហោច ក្រោមរូបភាពអភិវឌ្ឍន៍ ដើម្បីតែប្រយោជន៍របស់ក្រុមអ្នកមានលុយមានអំណាចប៉ុណ្ណោះ។ ទន្ទឹមនឹងនោះ ពួកគាត់ទទូចឱ្យក្រសួងបរិស្ថានត្រូវតែដកហូតដីទាំងនោះពីក្រុមហ៊ុនមកវិញ ទុកជាដែនជម្រកសត្វព្រៃ។
វិទ្យុអាស៊ីសេរីពុំអាចទាក់ទងអ្នកនាំពាក្យក្រសួងបរិស្ថាន លោក ខ្វៃ អាទិត្យា និង អភិបាលខេត្តកោះកុង អ្នកស្រី មិថុនា ភូថង ដើម្បីឆ្លើយតបជុំវិញរឿងនេះបានទេនៅថ្ងៃទី១១ ខែធ្នូ ដោយហៅទូរស័ព្ទចូលតែគ្មានអ្នកទទួល។
យ៉ាងណា កាលពីពេលកន្លងទៅ លោក ខ្វៃ អាទិត្យា ធ្លាប់អះអាងថា ទីតាំងចាក់សំរាមថ្មីរបស់រដ្ឋបាលខេត្តកោះកុង ជាទីតាំងបម្រុងទុកជាយូរមកហើយ ពុំមែនស្ថិតនៅក្នុងដែនជម្រកសត្វព្រៃពាមក្រសោបនោះទេ។ ផ្ទុយពីការអះអាងនេះ រដ្ឋបាលខេត្តកោះកុងធ្លាប់លើកឡើងថា ទីតាំងចាក់សំរាមដែលក្រុមយុវជនធ្លាប់តវ៉ានោះ ពិតជាស្ថិតក្នុងដែនជម្រកសត្វព្រៃមែន ប៉ុន្តែគ្រាន់តែជាការចាក់សំរាមបណ្ដោះអាសន្ន ដោយសារកន្លែងចាក់សំរាមចាស់បានពេញ។
ទាក់ទិនរឿងនេះ អ្នកការពារសិទ្ធិមនុស្ស និងបរិស្ថាន លោក ម៉ា ចិត្រា លើកឡើងថា ការយកដែនជម្រកសត្វព្រៃធ្វើជាទីលានចាក់សំរាមនេះ ពុំត្រឹមត្រូវឡើយ ព្រោះលោកថា សំរាមនឹងបង្កផលប៉ះពាល់ជាច្រើន ដល់បរិស្ថាន និងសត្វព្រៃ។ ទន្ទឹមនឹងនោះ លោកថា រដ្ឋមិនក្រដល់ថ្នាក់គ្មានដីសម្រាប់ចាក់សំរាមនោះទេ។ កន្លងទៅរដ្ឋាភិបាលតែងតែប្រកាសចែកដីឱ្យឧកញ៉ានេះ ឧកញ៉ានោះ ហេតុអ្វីគ្រាន់តែដីចាក់សំរាមគ្មាន ហើយទៅរំលោភយកដីដែនជម្រកសត្វព្រៃ។ លោកស្នើឱ្យរដ្ឋាភិបាល និងក្រសួងបរិស្ថានគួរតែពិចារណាឡើងវិញ។
លោក ម៉ា ចិត្រា៖ «ចង់មិនចង់វានឹងប៉ះពាល់ទៅដល់សត្វដែលរស់នៅក្នុងព្រៃហ្នឹង។ អ៊ីចឹងរដ្ឋាភិបាលមិនគួរក្រដីដល់ថ្នាក់អត់មានកន្លែងដាក់សំរាម ហើយយកសំរាមទៅដាក់ក្នុងព្រៃអ៊ីចឹងទេ។ យើងឃើញថា កន្លងមករដ្ឋ យើងមានដីច្រើនណាស់ ចែកឱ្យឧកញ៉ានេះ ឧកញ៉ានោះ ប៉ុន្តែ ហេតុអីមកក្រអីត្រឹមដីដាក់សំរាម ខ្ញុំគិតថា រដ្ឋាភិបាលយើងមិនសមហេតុផលទេ គួរតែពិចារណាត្រង់ហ្នឹងឡើងវិញ។យើងអាចកាត់ដីឱ្យឧកញ៉ានេះ ឧកញ៉ានោះ ហេតុអីយើងមិនព្រមទៅរកដីកន្លែងណាសម្រាប់ដាក់សំរាមឱ្យបានត្រឹមត្រូវ»។
កាលពីខែឧសភា ឆ្នាំ២០២៤ ក្រុមយុវជនចលនាមាតាធម្មជាតិ ធ្លាប់បានចុះអង្កេត និងធ្វើវីដេអូ បង្ហោះលើបណ្ដាញសង្គមហ្វេសប៊ុក រកឃើញថា ផលប៉ះពាល់នៃសំរាមដែលចាក់នៅដែនជម្រកសត្វព្រៃនេះបានបង្កក្លិនស្អុយ និងមានទឹកដក់សុទ្ធតែដង្កូវ សម្បូរដោយសំណល់ផ្ទះបាយ រោងចក្រ និងសំណល់វេជ្ជសាស្ត្របង្កឱ្យប៉ះពាល់ដល់ទឹកក្រោមដី និងលើដី។
ដែនជម្រកសត្វព្រៃពាមក្រសោបមានទំហំជាង ២ម៉ឺន ៣ពាន់ហិកតារ (២៣.៧៥០) ឋិតក្នុងស្រុកមណ្ឌលសីមា ខេត្តកោះកុង បានចុះបញ្ជីជាតំបន់អភិរក្ស កាលពីឆ្នាំ ១៩៩៣។ ដែនអភិរក្សនេះ សំបូរប្រជុំកោះតូចធំ និងព្រែកទឹកប្រៃខ្វាត់ខ្វែង សំបូរព្រៃកោងកាងផ្ដល់ជម្រកសត្វបក្សីទឹក និងជីវចម្រុះសមុទ្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
