មន្ត្រីមន្ទីរអប់រំខេត្តក្រចេះ ឲ្យដឹងថា សិស្សសាលាចំនួន ៦នាក់ និងសមាជិកក្រុមគ្រួសារ ១៣នាក់ទៀត មានសុខភាពល្អធម្មតា ពុំមានបញ្ហាប្រឈមនឹងជំងឺកូវីដ-១៩ នោះទេ។ ការលើកឡើងនេះ បន្ទាប់ពីមន្ត្រីការិយាល័យអប់រំស្រុក សំបូរខេត្តក្រចេះ បានបញ្ជូនឈ្មោះ សិស្សសាលា ៦នាក់ និងសមាជិកក្រុមគ្រួសាររបស់ពួកគេមួយចំនួនទៀត ទៅមន្ទីរសុខាភិបាលឱ្យជួយអន្តរាគមន៍ ស្របពេលដែលពួកគេទាំងនោះ ធ្លាប់មានទំនាក់ទំនងស្និទ្ធជាមួយ មិត្តភក្ត្រម្នាក់ ដែលជាកូនសិស្សជនជាតិជប៉ុនម្នាក់មានផ្ទុកជំងឺកូវីដ-១៩។
ប្រធានមន្ទីរអប់រំ ខេត្តក្រចេះ លោក ឡាយ បូរ៉ា ឱ្យដឹងនៅថ្ងៃទី៩ មីនាថា បន្ទាប់ពីទទួលបានដំណឹងនេះ លោកបានរាយការណ៍ជូនមន្ទីរសុខាភិបាលរួចហើយ ដើម្បីជួយអន្តរាគមន៍ទប់ស្កាត់ និងបង្ការ ក៏ប៉ុន្តែមកទល់ពេលនេះ មិនទាន់មាននរណាម្នាក់មានរោគសញ្ញាឆ្លងជំងឺកូវីដ-១៩ទេ។ លោកអះអាងថា មន្ត្រីជំនាញកំពុងធ្វើកិច្ចការងារនេះ ដោយប្រុងប្រយ័ត្ន ចៀសវាងប៉ះពាល់អារម្មណ៍ប្រជាពលរដ្ឋ ដែលកំពុងភ័យខ្លាច៖ «ហេតុការណ៍ហ្នឹងដែលវាកើតឡើង យើងមានការប្រុងប្រយ័ត្នខ្លាច ប្រការណាមួយដែលវាកើតឡើង យើងមើលវាមិនឃើញទេ។ នេះជាការប្រុងប្រយ័ត្នរបស់យើងទេ។ អ្វីដែលជារបាយការណ៍របស់អប់រំស្រុក គាត់ធ្វើមកឱ្យខ្ញុំ ខ្ញុំរាយការណ៍ទៅមន្ទីរសុខាភិបាល ដើម្បីឱ្យគាត់ជួយពិនិត្យ។ អ៊ីចឹងអត់មានបញ្ហាអ្វីថា គាត់ប៉ុន្មាននាក់ហ្នឹង មានផ្ទុកវីរុសកូវីដ - ១៩ ហ្នឹងទេ ហើយមកទល់ពេលនេះ ក៏អត់មានបញ្ហាអីកើតឡើងដែរ » ។
ប្រធានការិយាល័យអប់រំស្រុកសំបូរ លោក ទូន ផល្លា ថ្មីៗ នេះ (កាលពីពីថ្ងៃទី៨ ខែមីនា) បានសរសេររបាយការណ៍ ស្ដីពីបង្ការជំងឺកូវីដ-១៩ រាយការណ៍ជូនប្រធានមន្ទីរអប់រំខេត្តក្រចេះ ដោយបង្ហាញន័យដើមថា កាលពីដើមសប្ដាហ៍មុន មានក្រុមគ្រួសារមួយ មានសមាជិក ៥នាក់ រស់នៅភូមិកែងប្រាសាទ ឃុំសំបូរ ស្រុកសំបូរ បានធ្វើដំណើររួមគ្នាទៅខេត្តសៀមរាប ជាមួយសិស្សសាលា ៦នាក់ទៀត ដើម្បីជូនដំណើរ សិស្សម្នាក់ ឡើងយន្តហោះ ទៅប្រទេសជប៉ុន កាលពីថ្ងៃទី៥ ខែមីនា។ ទន្ទឹមនឹងនេះ សិស្សម្នាក់ដែលធ្វើដំណើរទៅប្រទេសជប៉ុននោះ ធ្លាប់ស្នាក់នៅសិក្សាភាសាជប៉ុន និងទំនាក់ទំនងស្និទ្ធជាមួយគ្រូបង្រៀនជនជាតិជប៉ុនម្នាក់ ដែលមានផ្ទុកជំងឺកូវីដ-១៩។
ចំណែក ប្រធានមន្ទីរសុខាភិបាល ខេត្តក្រចេះ លោក ឈ្នាង សុវុត្ថា អះអាងថា សិស្សសាលា ៦នាក់ និងសមាជិកក្រុមគ្រួសាររបស់ពួកគេ ១៣នាក់ទៀត ត្រូវបានក្រុមគ្រូពេទ្យ ពិនិត្យសុខភាពរួចហើយ ពុំមានអាការៈ និងរោគសញ្ញាផ្ទុកជំងឺកូវីដ-១៩ទេ។ លោកថា ពួកគេទាំង ១៩ នាក់នោះ កំពុងរស់នៅផ្ទះធម្មតា ហើយគ្រូពេទ្យបានណែនាំពួកគាត់ ត្រូវប្រញាប់មកមណ្ឌលសុខភាពជាបន្ទាន់ ប្រសិនបើមានការប្រែប្រួលសុខភាព «សិស្ស ៦ ប៉ុន្តែមានឪពុកម្ដាយទៀតទាំងអស់វា ១៩នាក់ តែក្នុងនោះ ខ្ញុំបានពិនិត្យអស់ហើយ សុខភាពគាត់អត់មានបញ្ហាអីទេ មកដល់ម៉ោងហ្នឹង។ រាល់ថ្ងៃនេះគឺគាត់ ធ្វើការបានល្អធម្មតាទាំងអស់ អ៊ីចឹងបានន័យថា គាត់អត់មានបញ្ហាប្រឈមនឹងជំងឺហ្នឹងទេ » ។
បុរសជនជាតិជប៉ុន មានផ្ទុកជំងឺកូវីដ-១៩ គឺជានាយកសាលាបណ្ដុះបណ្ដាលភាសាជប៉ុន និងជាគ្រូបង្រៀនភាសាជប៉ុន របស់សិស្សម្នាក់នៅខេត្តក្រចេះ។
ក្រសួងសុខាភិបាលប្រកាសថា បុរសខ្មែរម្នាក់ អាយុ ៣៨ឆ្នាំ បានឆ្លងជំងឺកូវីដ-១៩។ បុរសខ្មែរម្នាក់នេះ គឺជាមនុស្សម្នាក់ក្នុងចំណោម ៤នាក់ ដែលជាអ្នកប៉ះពាល់ផ្ទាល់ និងធ្វើការជិតស្និទ្ធជាមួយបុរសជនជាតិជប៉ុន ដែលត្រូវបានរកឃើញមានផ្ទុកជំងឺកូវីដ-១៩ នៅពេលទៅដល់ប្រទេសជប៉ុនវិញ បន្ទាប់ពីចាកចេញពីកម្ពុជា កាលពីថ្ងៃទី៣ ខែមីនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។