អាជ្ញាធរ​រាជធានី​ភ្នំពេញ​អំពាវនាវ​កុំ​ឱ្យ​ពលរដ្ឋ​សម្រុក​ទិញ​ទំនិញ​ទុក​កុំ​ឱ្យ​ជន​ឱកាស​និយម​ឆ្លៀត​ដំឡើង​ថ្លៃ

ដោយ យន់ សាមៀន
2020-03-07
អ៊ីម៉ែល
មតិ
Share
បោះពុម្ព
ទិដ្ឋភា​ព​អ្នក​រស់​នៅ​រាជធានី​ភ្នំពេញ ទៅទិញ​ទំនិញ​នៅ​ផ្សារ​ទំនើប​ឈ្មោះ ម៉ាក្រូ (Makro) នៅ​ល្ងាច​ថ្ងៃ​ទី៧ ខែ​មីនា ឆ្នាំ​២០២០។
ទិដ្ឋភា​ព​អ្នក​រស់​នៅ​រាជធានី​ភ្នំពេញ ទៅទិញ​ទំនិញ​នៅ​ផ្សារ​ទំនើប​ឈ្មោះ ម៉ាក្រូ (Makro) នៅ​ល្ងាច​ថ្ងៃ​ទី៧ ខែ​មីនា ឆ្នាំ​២០២០។
Photo Provided

សាលា​រាជធានី​ភ្នំពេញ អំពាវនាវ​ដល់​ប្រជាពលរដ្ឋ កុំ​ឱ្យ​ជ្រួលច្របល់​នាំគ្នា​សម្រុក​ទិញ​អ៊ីវ៉ាន់​ស្តុក​ទុក​តាម​ពាក្យ​ចចាមអារ៉ាម ព្រោះ​នាំ​ឱ្យ​ជន​ឆ្លៀតឱកាស​ដំឡើងថ្លៃ​ផលិតផល​ស្បៀង។ សង្គម​ស៊ីវិល​ថា ការ​ដែល​ពលរដ្ឋ​សម្រុក​ទិញ​អ៊ីវ៉ាន់​ស្តុក​ទុក​នេះ គឺជា​ការ​ត្រៀមខ្លួន​ល្អ​មួយ ខណៈ​ពួកគាត់​ហាក់ មិន​សូវ​មាន​ទំនុក​ចិត្ត​លើ​ក្រសួង​សុខាភិបាល​ក្នុង​ការ​ទប់ស្កាត់​ជំងឺ​រលាក​ផ្លូវ​ដង្ហើម​កូវីដ-១៩ (Covid-19)

សាលា​រាជធានី​ភ្នំពេញ ចេញ​សេចក្តី​ប្រកាស​ព័ត៌មាន​អំពាវនាវ​ដល់​ប្រជាពលរដ្ឋ​កម្ពុជា​ឱ្យ​រក្សា​ភាព ស្ងប់ស្ងាត់ ប្រកប​រប​ចិញ្ចឹមជីវិត​ដូច​ប្រក្រតី និង​កុំ​ជ្រួលច្របល់​តាម​ពាក្យ​ចចាមអារ៉ាម ហើយ​អនុវត្ត​តាម​វិធី​បង្ការ ដែល​ណែនាំ​ដោយ​ក្រសួង​សុខាភិបាល។

សេចក្តី​ប្រកាស​ព័ត៌មាន​ដែល​អាស៊ីសេរី​ទទួល​បាន​នៅ​ថ្ងៃទី​៧ ខែ​មីនា ឱ្យ​ដឹង​ថា ការ​អំពាវនាវ​នេះ គឺ ដើម្បី​រក្សា​សណ្ដាប់ធ្នាប់ ស្ថិរភាព​ទំនិញ និង​ចៀសវាង​ជន​ឆ្លៀតឱកាស​ដំឡើងថ្លៃ​ផលិតផល​ស្បៀង តាម​អំពើ​ចិត្ត ខណៈ​ស្បៀងអាហារ​ក្នុង​ក្រុងភ្នំពេញ ពុំ​ប្រឈម​ការ​ខ្វះខាត​នោះ​ទេ​។ អាជ្ញាធរ​ក្រុងភ្នំពេញ​អះអាង​ថា បច្ចុប្បន្ន​នេះ កម្ពុជា​ពុំ​ទាន់​មាន​ពលរដ្ឋ​ខ្មែរ​ណា​ម្នាក់​ឆ្លង​ជំងឺ​កូវីដ​-១៩ នៅឡើយ​ទេ ទោះបីជា​ជំងឺឆ្លង​មួយ​នេះ កំពុង​ឆ្លង​រាតត្បាត​ស្ទើរ​ពេញ​ពិភពលោក​ក្ដី។

សេចក្ដី​អំពាវនាវ​នេះ ធ្វើឡើង​បន្ទាប់ពី​អាជ្ញាធរ​សាលា​រាជធានី​ភ្នំពេញ សង្កេត​ឃើញ​ថា ប៉ុន្មាន​ថ្ងៃ​ចុង ក្រោយនេះ ប្រជាពលរដ្ឋ​រស់នៅ​ក្រុងភ្នំពេញ នាំគ្នា​សម្រុក​ទិញ​ទំនិញ​ស្តុក​ទុក ជាពិសេស ស្បៀង អាហារ​ប្រចាំថ្ងៃ។

ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព លោក យង់ គិមអេង មាន​ប្រសាសន៍ថា ការ​ដែល​ប្រជាពលរដ្ឋ​នាំគ្នា​ទិញ​ស្បៀង​សម្រាប់​បម្រុង​ទុក​ក្នុង​រយៈពេល​មាន​អាសន្ន​នេះ គឺជា រឿង​ល្អ​មួយ​ដែរ ហើយ​ពួកគេ​រៀន​សូត្រ​តាម​ប្រជាពលរដ្ឋ​នៅ​តាម​ប្រទេស​ផ្សេងៗ ដូចជា ប្រទេស​កូរ៉េ និង​ចិន​ជាដើម ព្រោះ​ក្នុង​ករណី​រដ្ឋាភិបាល​បិទ​ទីផ្សារ ឬ​មានការ​ណែនាំ​កុំ​ឱ្យ​ពលរដ្ឋ​ចាក​ចេញ​ពី​ផ្ទះ គឺ ពួកគាត់​មាន​ស្បៀងអាហារ​គ្រប់គ្រាន់​រួចជាស្រេច​។ លោក​យល់ថា អាជ្ញាធរ​គួរតែ​ចាត់វិធានការ​ទប់ស្កាត់​កុំ​ឱ្យ​ទំនិញ​ទាំងអស់​ឡើងថ្លៃ ទើប​ជា​រឿង​ប្រសើរ​ជាង ដើម្បី​កុំ​ឱ្យ​ប៉ះពាល់​ដល់​ជីវភាព​ប្រជាពលរដ្ឋ «ប៉ុន្តែ​យើង​ឃើញ​កន្លង​មក​សូម្បីតែ​ពាក់ព័ន្ធ​រឿង​ម៉ាស់ និង​ទឹក​លាង​សម្អាត​ដៃ​អី គឺ​ឃើញ​នៅតែ​ថ្លៃ​ដដែល ប៉ុន្តែ​មិនទាន់​ឃើញ​មាន​ចាត់វិធានការ​អី​សមរម្យ​នៅ​ឡើយ​ទេ»

លោក យង់ គិមអេង បន្ថែម​ថា ការ​ដែល​ពលរដ្ឋ​សម្រុក​ទិញ​ទំនិញ ក៏ដោយ​សារ​ពួកគេ​ព្រួយបារម្ភ និង​នៅ​មិន​សូវ​មាន​ទំនុក​ចិត្ត​លើ​សមត្ថភាព និង​វិធានការ​របស់​ក្រសួងសុខាភិបាល ជាពិសេស បន្ទាប់ពី​មាន​ករណី​បុរស​ជប៉ុន​មា្នក់ ដែល​ចាក​ចេញពី​ខេត្ត​សៀមរាប ត្រូវ​បាន​រក​ឃើញ​ថា មាន​ផ្ទុក​ជំងឺ​កូវីដ-១៩ នៅ​ពេល​ទៅដល់​វាល​យន្ត​ហោះ​ក្នុងប្រទេស​ជប៉ុន កាលពី​ថ្ងៃ​ទី​៤ ខែ​មីនា៖ «បុរស​ជប៉ុន​នោះ​ធ្លាប់​ទៅ​មន្ទីរពេទ្យ​នៅ​កម្ពុជា​ដែរ តែ​មាន​ការ​ខ្វះ​កិច្ចសហការ​គ្នា​រវាង​មន្ទីរពេទ្យ​ឯកជន​និង​មន្ទីរពេទ្យ​រដ្ឋ ដូច្នេះ​បញ្ហា​នេះ​ធ្វើ​ឱ្យ​ក្រសួង សុខាភិបាល​ធ្វើ​កិច្ច​ការងារ​បន្ថែម​ទៀត ឬ​កន្លែង​ដែល​ខ្វះ​ចន្លោះ ដើម្បី​រៀបចំ​ប្រព័ន្ធ​រាយការណ៍​ឱ្យ​កាន់​តែ​មាន​ប្រសិទ្ធភាព ហើយ​បើ​ករណី​សង្ស័យ​ត្រូវតែ​រាយការណ៍​ឱ្យ​ប្រញាប់ ព្រោះ​ជា​ការ វិវឌ្ឍ​នៃ​វិស័យ​សុខាភិបាល​របស់​យើង​ដែរ។ បើ​មិន​មាន​វិធានការ​ឱ្យ​បាន​ខ្លាំងក្លា​ជា​អតិបរិមា​ទេ មិន​ថា តែ​ពលរដ្ឋ​ទេ ពិភពលោក ក៏​គេ​អាច​មាន​មន្ទិល​ចំពោះ​សមត្ថភាព​របស់​យើង​ដែរ»

ទោះជា​យ៉ាង​នេះ​ក្តី រដ្ឋមន្ត្រី​ក្រសួង​សុខាភិបាល លោក ម៉ម ប៊ុនហេង នៅតែ​អំពាវនាវ​ឱ្យ​ពលរដ្ឋ​ជឿ​ទុកចិត្ត​លើ​ក្រសួង​សុខាភិបាល ហើយ​ក្នុង​ករណី​មានការ​សង្ស័យ ឬ​រក​ឃើញ​អ្នកជំងឺ​កូវីដ​-១៩ គឺ​ក្រសួង​នឹង​ប្រកាស​ភ្លាមៗ ដោយ​គ្មាន​ការ​លាក់បាំង​ព័ត៌មាន​នោះ​ទេ។

ទាក់ទង​នឹង​ករណី អ្នក​ប៉ះពាល់​ផ្ទាល់​ជាមួយ​ជនជាតិ​ជប៉ុន​រូប​នោះ​ចំនួន ៤​នាក់ ដែល​គេ​កំពុង​ដាក់​ឱ្យ​ស្ថិត​នៅ​ក្នុង​បន្ទប់​ដាច់ដោយឡែក​ពី​គេ​រយៈពេល ១៤​ថ្ងៃ ក្នុង​មន្ទីរពេទ្យ​បង្អែក​ខេត្ត សៀមរាប ចាប់​តាំង​ពី​ល្ងាច​ថ្ងៃ​ទី​៥ ខែ​មីនា មក​ដល់​ថ្ងៃ​ទី​៧ ខែ​មីនា គឺ​មិន​ទាន់​មាន​ចេញ​រោគសញ្ញា​អ្វី​នៅឡើយ​ទេ។

ប្រធាន​មន្ទីរពេទ្យ​បង្អែក​ខេត្ត​សៀមរាប លោក ក្រុស សារ៉ាត់ អះអាង​ប្រាប់​អាស៊ីសេរី​យ៉ាង​ខ្លី​ថា អ្នក​ទាំង ៤​នោះ នៅ​មាន​សុខភាព​ល្អ​ធម្មតា ហើយ​លោក​បាន​ផ្ដាច់​ទូរស័ព្ទ​ទៅវិញ​៖ «សុខភាព​គាត់​ធម្មតា ហើយ​បើ​មាន​ការ​អី សូម​ឱ្យ​ទាក់ទង​និង​សួរនាំ​ទៅ​ខាង​អ្នកនាំពាក្យ​ក្រសួង​សុខាភិបាល»

រីឯ​ក្រុម​គ្រូពេទ្យ​ក្នុង​គ្លីនិក​ឯកជន​មួយ​ក្នុង​ខេត្ត​សៀមរាប​ដែល​បាន​ពិនិត្យ​បុរស​ជនជាតិ​ជប៉ុន​ផ្ទាល់​កាលពី​ដំបូង​នោះ ខាង​ក្រសួង​សុខាភិបាល មិន​ទាន់​ប្រកាស​ថា នឹង​មាន​វិធានការ​ដាក់​ឱ្យ​ស្ថិត​នៅ​ក្នុង​បន្ទប់​ដាច់ដោយឡែក​ដូច​អ្នក​ប៉ះពាល់​ផ្ទាល់​មួយ​ចំនួន​ទៀត​នោះ​ទេ។

អាស៊ីសេរី បាន​ព្យាយាម​ទាក់ទង​អ្នកនាំពាក្យ​ក្រសួងសុខាភិបាល លោក លី សូវ៉ាន់ និង​អ្នកស្រី ឱ វណ្ណឌី​ន ជាច្រើនលើក តែ​ទូរស័ព្ទ​រោទ៍​ពុំ​មាន​អ្នក​ទទួល។

គិត​ត្រឹម​ថ្ងៃ​ទី​៧ ខែ​មីនា មាន​អ្នក​ឆ្លង​ជំងឺ​កូវីដ​១៩ សរុប​ឡើង​ដល់​ជាង ១០​ម៉ឺន ២​ពាន់​នាក់ (១០២.១៨៨​នាក់​) នៅ​លើ​ពិភពលោក ហើយ​អ្នក​ស្លាប់ ក៏​ឡើង​ដល់​ជិត ៣​ពាន់ ៥​រយ​នាក់ (.៤៩១​នាក់​) ហើយ ដែល​ភាគច្រើន​នៅ​ប្រទេស​ចិន​។ មេរោគ​នេះ ក៏​កំពុង​មាន​សន្ទុះ​ឆ្លង​រាលដាល​ខ្លាំង នៅ​ប្រទេស​កូរ៉េខាងត្បូង ប្រទេស​អ៊ីតាលី ប្រទេស​អ៊ីរ៉ង់ ប្រទេស​អាល្លឺម៉ង់ បារាំង និង​សហរដ្ឋអាមេរិក​។ ចំណែក​នៅ​ក្នុង​ប្រទេស​ក្រីក្រ និង​ប្រទេស​ដែល​រង​ការ​រិះគន់​ថា មាន​ប្រព័ន្ធ​សុខាភិបាល​ខ្សោយ មិនទាន់​ប្រកាស​ពី​ការ​ឆ្លង​រាលដាល​ឡើយ​ទេ ដូចជា ប្រទេស​កម្ពុជា និង​ប្រទេស​ឡាវ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល