ពលរដ្ឋ​នៅ​ក្រុង​ប៉ោយប៉ែត ទាមទារ​ក្រុមហ៊ុនអានកូ ឱ្យ​​ទទួល​ខុសត្រូវ ចំពោះផល​ប៉ះពាល់ពី​ការ​ផ្ដល់​ទឹក​មិន​ស្អាត

ប្រជាពលរដ្ឋ​នៅ​ក្រុង​ប៉ោយប៉ែត ទាមទារ​​ក្រុមហ៊ុន​ផ្គត់ផ្គង់​ទឹក អានកូ (ANCO) ឱ្យ​ផ្ដល់​សំណង និង​ទទួលខុសត្រូវ​លើ​កំហុស​បច្ចេកទេស​របស់​ខ្លួន ដែល​ចែកចាយ​ទឹក​មិន​ស្អាត​នាំ​ឱ្យ​ប៉ះពាល់​ដល់​សុខភាព និង​ជីវភាព ក្រោយ​ប្រើប្រាស់​ទឹក​កខ្វក់​ជិត​បី​ខែ​មកនេះ។ មន្ត្រី​សង្គម​ស៊ីវិល ជំរុញ​ឱ្យ​អាជ្ញាធរ​ជំនាញ ត្រួតពិនិត្យ​លើ​កិច្ចការ​នេះ ដើម្បី​ធានា​ថា​ក្រុមហ៊ុន​ពន្លឿន​ការ​ដោះស្រាយ​ផ្គត់ផ្គង់​ទឹក​ស្អាត​ឱ្យ​បាន​គ្រប់គ្រាន់ និង​មានគុណ​ភាព។

ប្រជាពលរដ្ឋ​នៅ​ក្រុង​ប៉ោយប៉ែត មិន​អាច​ស៊ូទ្រាំ​នឹង​ការ​ផ្គត់ផ្គង់​ទឹក​ស្អាត ដែល​គ្មាន​គុណភាព របស់​ក្រុមហ៊ុន​អានកូ វ៉តធើរ សឹបផ្លាយ (ANCO Water Supply) បាន​ទៀត​នោះ​ទេ ដោយសារ​បញ្ហា​នេះ បាន​រំខាន​ដល់​កា​រស់នៅ និង​ប៉ះពាល់​សុខភាព​របស់​ពួកគាត់។

ពលរដ្ឋ​នៅ​ក្រុង​ប៉ោយប៉ែត លោក ដេន ដឿត ប្រាប់​វិទ្យុ​អាស៊ី​សេរី នៅ​ថ្ងៃ​ទី១៨ ខែ​កក្កដា ថា មកទល់​ពេលនេះ ទឹក​ស្អាត​របស់​ក្រុមហ៊ុន អានកូ ​នៅតែ​កខ្វក់ និង​មាន​ក្លិន​មិន​ល្អ​ដដែល។ លោក​ ដេន ដឿត ចង់​ឱ្យ​ក្រុមហ៊ុន​អានកូ ទទួលខុសត្រូវ​បញ្ហា​នេះ ព្រោះ​ក្រុមហ៊ុន បាន​ផ្គត់ផ្គង់​ទឹក​កខ្វក់​ជាង១ខែ​កន្លងមក​ហើយ និង​ធ្វើ​ឱ្យ​គ្រួសារ​របស់​លោក មាន​បញ្ហា​សុខភាព ដូចជា​រមាស់ ក្អក​ឈឺ​បំពង់ក និង​ឈឺពោះ ហើយ​ត្រូវ​ចំណាយ​ប្រាក់​ព្យាបាល​អស់​ជាច្រើន។

លោក ដេន ដឿត៖ «មើល​ទៅ​ដូច​វា​ប៉ះពាល់​ដល់​ប្រជាជន​ច្រើន​មែនទែន ទាំង​ផលប្រយោជន៍ ទាំង​សុខភាព ប៉ះពាល់​ខ្លាំង​មែនទែន។ ចង់​ឱ្យ​អាជ្ញាធរ ប្រព័ន្ធ​ផ្លូវច្បាប់​ហ្នឹង រឹត​បន្តឹង​ចំពោះ​ក្រុមហ៊ុន​ទាំងអស់​នៅ​ក្នុងស្រុក​ខ្មែរ ជួយ​ត្រួតពិនិត្យមើល​ក្រុមហ៊ុន​ទាំង​អស់ហ្នឹង​ឱ្យ​មាន​ទំនួល​ខុសត្រូវ​ឱ្យ​ខ្ពស់ មាន​ជា​សំណង​ប៉ះប៉ូវ​ដល់​បញ្ហា​សុខភាព​ហ្នឹង​ជា​លុយ​ជា​កាក់ ព្យាបាល​អ្វី​ដែល​ខ្លួនឯង​បាន​ធ្វើ​ហ្នឹង ឱ្យ​បាន​តឹងរ៉ឹង​បន្តិច»។

ក្រោយ​មាន​ការរិះគន់​ពី​ប្រជាពលរដ្ឋ​ពលរដ្ឋ អាជ្ញាធរ និង​ក្រុមហ៊ុន បាន​បកស្រាយ​ម្យ៉ាង​ម្នាក់ ផ្សេងៗ​ពី​គ្នា។ មន្ទីរ​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ​ខេត្ត​បន្ទាយមានជ័យ បាន​បកស្រាយ​កាលពី​ថ្ងៃ​ទី១៦ ខែ​កក្កដា ថា បញ្ហា​ទឹក​មាន​ក្លិន​ស្អុយ និង​ល្អក់​នេះ កើតមានឡើង​តិចតួច​ប៉ុណ្ណោះ ហើយ​មូលហេតុ ដែល​ធ្វើ​ឱ្យ​ទឹក​កខ្វក់​នោះ គឺ​ដោយសារ​ការ​ជី​កកាយ​កប់​ប្រព័ន្ធ​លូ​បង្ហូរទឹក តាម​ដង​ផ្លូវ​ធ្វើ​អោយ​បែក​ធ្លាយ​បំពង់​បណ្ដាញ​ទឹក​ស្អាត​ជា​ញឹកញាប់ ដែល​នាំ​ឱ្យ​ជ្រាប ភក់ ហូរ​ចូល​ក្នុង​បណ្ដាញ​ចែកចាយ។

ចំណែក​ក្រុមហ៊ុន​អានកូ វ៉តធើរ សឹបផ្លាយ កាលពី​ថ្ងៃ​ទី១៦ ខែ​កក្កដា បាន​ចេញ​សេចក្ដីជូនដំណឹង ថា បញ្ហា​ផ្គត់ផ្គង់​ទឹក​មិន​គ្រប់គ្រាន់ ដោយសារ​គ្មាន​ភ្លៀង​ធ្លាក់ ជាហេតុ​ធ្វើ​ឱ្យ​ប្រភព​រក្សា​ទឹកឆៅ ដែល​មាន​ទីតាំងនៅ​អូរ​ខៃដន (Khay Dorn) ប្រទេស​ថៃ មានការ​រីង​រាក់​ជាច្រើន​ម៉ែត្រ។ ចំពោះ​បញ្ហា​ទឹក​មាន​ក្លិន និង​កខ្វក់ តំណាង​ក្រុមហ៊ុន អានកូ បាន​អះអាង​ថា ក្រុមបច្ចេកទេស​បាន​ធ្វើ​តេស្ត​ទឹក ដែល​ចម្រោះ​រួចហើយ ដើម្បី​ស្ទង់​កម្រិត​ល្អក់ កំហាប់​អាស៊ីត (pH) និង​សារធាតុ​ក្លរីន (CL) មុន​ចែកចាយ​ទឹក​ស្អាត​ទៅតាម​ផ្ទះ។ តំណាង​ក្រុមហ៊ុន ណែនាំ​ឱ្យ​ពលរដ្ឋ​ត្រូវ​ផ្ដល់​ដំណឹង​ដល់​ក្រុមហ៊ុន ដើម្បី​ចុះ​ពិនិត្យ​ប្រសិនបើ​ទឹក​ចេញពី​ក្បាល​រ៉ូប៊ីណេ ចេញ​មក​កខ្វក់។

ទោះជា​បែបនេះ​ក្ដី ពលរដ្ឋ​ឱ្យ​ដឹង​ថា បញ្ហា​ទឹកល្អក់ មាន​ស្លែ និង​ក្លិន​ស្អុយ​នេះ កើតឡើង​ជា​ច្រើន​ឆ្នាំ​មក​ហើយ ដោយ​ពលរដ្ឋ​បាន​ថត​បង្ហោះ​នៅ​លើ​បណ្ដាញ​សង្គម និង​រាយការណ៍​ទៅ​ក្រុមហ៊ុន​ជាច្រើន​ដង​មក​ហើយ ប៉ុន្តែ​នៅតែ​គ្មាន​ដំណោះស្រាយ។

បុគ្គលិក​ធ្វើការ​នៅ​កាស៊ីណូ​ក្រោន(Crown) ​ក្រុង​ប៉ោយប៉ែត ដែល​ជា​កម្មសិទ្ធិ​របស់​ឧកញ៉ា កុក អាន សុំ​មិន​បញ្ចេញ​ឈ្មោះ និង​សំឡេង ដោយ​បារម្ភ​ពី​បញ្ហា​សុវត្ថិភាព ប្រាប់​វិទ្យុ​អាស៊ី​សេរី ថា ក្រុមហ៊ុន អានកូ គ្រុប(ANCO GROUP) ​របស់​ឧកញ៉ា កុក អាន បាន​ទទួល​សិទ្ធ​ផ្ដាច់មុខ​ពី​រដ្ឋាភិបាល​ក្នុង​ការ​ផ្គត់ផ្គង់​ទឹក​ស្អាត និង​អគ្គិសនី នៅ​ក្រុង​ប៉ោយប៉ែត ទើប​ធ្វើ​ឱ្យ​ការ​ផ្ដល់​សេវា​ដល់​អ្នកប្រើប្រាស់​មិនសូវ​ល្អ ដោយសារ​គ្មាន​ក្រុមហ៊ុន​ផ្សេង មក​ប្រកួតប្រជែង។ បុគ្គលិក​រូប​នេះ បន្ត​ទៀត​ថា ក្នុង​មួយឆ្នាំៗ ឧកញ៉ា កុក អាន បានផល​ចំណេញ​ពី​កា​ផ្គត់ផ្គង់ ទឹក ភ្លើង នៅ​ក្រុង​ប៉ោយប៉ែត ជាច្រើន ប៉ុន្តែ​លោក​មិនសូវ​យក​ប្រាក់ចំណេញ​ទាំងនោះ ទៅ​អភិវឌ្ឍ​គុណភាព និង​ប្រសិទ្ធ​ភាព​សេវាកម្ម​ទាំងនោះ​ឡើយ។

វិទ្យុ​អាស៊ី​សេរី មិន​អាច​ទាក់ទង​ក្រុមហ៊ុន អានកូ វ៉តធើ សឹបផ្លាយ(ANCO Water Supply) ​និង​ប្រធានមន្ទីរ​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ខេត្ត​បន្ទាយមានជ័យ លោក ញ៉ិល ប៊ុនធឿន ដើម្បី​សុំ​ការ​បកស្រាយ​ជុំវិញ​រឿង​នេះ​បានទេ នៅ​ថ្ងៃ​ទី១៨ ខែ​កក្កដា។

ទាក់ទិន​រឿង​នេះ អ្នកគ្រប់គ្រង​ប្រចាំ​ការិយាល័យ​អង្គការ​លីកាដូ (LICADHO) នៅ​ខេត្ត​បន្ទាយមានជ័យ លោក អ៊ិន គង់ជិត ជំរុញ​ឱ្យ​អាជ្ញាធរ​ពាក់ព័ន្ធ ចុះ​ស្រាវជ្រាវ​រក​កំហុស​បច្ចេកទេស និង​ដាក់​ពិន័យ​ចំពោះ​ក្រុមហ៊ុន ដើម្បី​បង្កើន​ប្រសិទ្ធភាព​សេវាកម្ម ព្រោះ​ករណី​ផ្គត់ផ្គង់​ទឹក​កខ្វក់​នេះ ប៉ះពាល់​ដល់​ការ​រស់ និង​សុខភាព​របស់​ពលរដ្ឋ​ជាច្រើន​គ្រួសារ។
លោក អ៊ិន គង់ជិត៖ «ប្រជាពលរដ្ឋ​នៅតែ​មាន​សិទ្ធិ​ប្ដឹង​ទាមទារ​សំណង​ពី​ក្រុមហ៊ុន​បាន​ដដែល។ រឿង​នេះ​គឺ ក្រុមហ៊ុន​ជា​អ្នក​ទទួលខុសត្រូវ​ទាំងស្រុង ព្រោះ​ក្រុមហ៊ុន​បាន​យក​ថ្លៃ​សេវា ពី​អ្នក​ប្រើប្រាស់ ហើយ​ធានា​ក្នុង​ការ​ផ្គត់ផ្គង់​ទឹក​ស្អាត​ដល់​ប្រជាពលរដ្ឋ»។

ក្រុមហ៊ុន​អានកូ (ANCO GROUP) ផ្គត់ផ្គង់​ទឹក​ស្អាត​ក្នុង​ក្រុង​ប៉ោយប៉ែត គឺជា​កម្មសិទ្ធិ​របស់​ឧកញ៉ា កុក អាន ដែល​ជា​អនុ​ប្រធាន​សមាគម​ឧកញ៉ា​កម្ពុជា និង​ជា​ឧកញ៉ា​ដ៏​មាន​ឥទ្ធិពល​មួយ​រូប ដែល​តែងតែ​ផ្ដល់​លុយ​ឱ្យ​រដ្ឋាភិបាល​ម្ដងៗ រាប់​លាន​ដុល្លារ។ ក្រុមហ៊ុន​នេះ បាន​ទទួល​សិទ្ធិ​ពី​រដ្ឋាភិបាល ក្នុង​ការ​ផ្គត់ផ្គង់​ទឹក​ស្អាត អគ្គិសនី កាស៊ីណូ និង​រីស្សត នៅ​តាម​ក្រុង​ក្នុង​ខេត្ត​ជាប់​ព្រំដែន​មួយ​ចំនួន ដូចជា ក្រុង​បាវិត ខេត្ត​ស្វាយរៀង និង​ក្រុង​ប៉ោយប៉ែត ខេត្ត​បន្ទាយមានជ័យ។ តែ​យ៉ាង​ណា​ក្ដី ជា​ញឹក​ញាប់ ក្រុមហ៊ុន​មួយ​នេះ តែងតែ​ទទួល​រង​ការ​រិះគន់​ពី​ប្រជាពលរដ្ឋ​ថា ផ្គត់ផ្គង់​ទឹក និង​អគ្គិសនី​មិន​បាន​ល្អ​ជា​ដើម។

ពលរដ្ឋ​ស្នើ​អាជ្ញាធរ​ក្រុង​ប៉ោយប៉ែត បើកឱកាស​ឱ្យ​ក្រុមហ៊ុន​ដទៃ​ទៀត ចូល​មក​វិនិយោគ​លើ​វិស័យ​ផ្គត់ផ្គង់​ទឹក​ស្អាត និង​អគ្គិសនី នៅ​ក្រុង​ប៉ោយប៉ែត ដើម្បី​បើក​ឱ្យ​មាន​ការប្រកួតប្រជែង ជាជាង​បណ្ដោយ​ឱ្យ​ក្រុមហ៊ុន​មួយ រកស៊ី​ផ្ដាច់មុខ និង​គិតតែពី​ប្រាក់ចំណេញ ជាង​សុខភាព និង​ការរស់នៅ​របស់​ប្រជាពលរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។