មន្ត្រីការបរទេស មិនទាន់ទទួលបានការបំភ្លឺយ៉ាងណា ពីខាងប្រទេស ម៉ាឡេស៊ីនៅឡើយទេ ក្រោយក្រសួងបានកោះហៅមន្ត្រីទូតម៉ាឡេស៊ី ឲ្យចូលមកបំភ្លឺតាំងពីថ្ងៃទី២៥ ខែកុម្ភៈ ជុំវិញការណ៍ ចំពោះលទ្ធផល ដែលអាជ្ញាធរម៉ាឡេស៊ី រកឃើញស្រ្តីជនជាតិអាមេរិកវ័យ ៨៣ឆ្នាំ មានផ្ទុកមេរោគកូរ៉ូណាថ្មី ឬកូវីដ-១៩ (COVID-19) នោះ។
រយៈពេល ៩ ថ្ងៃ បានកន្លងផុតទៅហើយ នៅឡើយតែលទ្ធផល នៃជំនួបវាងរដ្ឋមន្រ្តីការបរទេសកម្ពុជាលោក ប្រាក់ សុខុន និងឯកអគ្គរាជទូតប្រទេសម៉ាឡេស៊ីប្រចាំនៅកម្ពុជាលោក អែលឌីន ហ៊ូសៃនី មហាម៉ាត់ ហាស់ហ្ស៊ីម (Eldeen Husaini Mohd Hashim) ដែលលោកនាយករដ្ឋមន្ត្រី ហ៊ុន សែន បង្គាប់ឲ្យកោះហៅមកចូលបំភ្លឺភ្លាមៗ ជុំវិញការណ៍នៅតែកើតទុក្ខមិនសុខចិត្ត រឿងដែលអាជ្ញាធរម៉ាឡេស៊ី រកឃើញមេរោគកូរ៉ូណាថ្មី លើស្ត្រីអាមេរិកនោះ ស្របពេលដែលខាងអាជ្ញាធរកម្ពុជា រកមិនឃើញមេរោគនេះ។
មន្ត្រីនាំពាក្យក្រសួងការបរទេសកម្ពុជាលោក កុយ គួង ប្រាប់អាស៊ីសេរី តាមប្រព័ន្ធតេឡេក្រាម កាលពីថ្ងៃទី៣ ខែមីនាថា រហូតមកដល់ពេលនេះ ខាងកម្ពុជានៅមិនទាន់ទទួលបានការឆ្លើយតបយ៉ាងណានៅឡើយទេ ពីខាងភាគីម៉ាឡេស៊ី។ ឆ្លើយតបទៅនឹងសំណួររបស់អាស៊ីសេរី ដែលសួរថា តើខាងប្រទេសម៉ាឡេស៊ី គេសន្យាថានឹងផ្ដល់ចម្លើយនោះ មកកម្ពុជានៅពេលណា លោក កុយ គួង ថា"មិនបានដឹងដែរ"។
ការកោះហៅឯកអគ្គរាជទូតនៃប្រទេសម៉ាឡេស៊ីប្រចាំនៅកម្ពុជានេះ ធ្វើឡើងតែមួយថ្ងៃប៉ុណ្ណោះ ក្រោយលោក ហ៊ុន សែន ថ្លែងកាលពីថ្ងៃទី២៤ ខែកុម្ភៈ អំពីការនៅតែមិនសុខចិត្តរបស់កម្ពុជា រឿងម៉ាឡេស៊ី ដែលរកឃើញអ្នកដំណើរដែលចុះពីលើកប៉ាល់ទេសចរ វ៉េស្ទើរដាម (Westerdam) មានផ្ទុកជំងឺកូវីដ-១៩ នេះ៖ «កោះហៅអគ្គរដ្ឋទូតម៉ាឡេស៊ី ទៅធ្វើការបំភ្លឺលើរឿងនេះ ព្រោះឥឡូវមួយកប៉ាល់ទាំងអស់ អត់មាននរណាមានជំងឺហ្នឹងសោះ។ តើជំងឺនេះ វាកើតពីកម្ពុជាទៅ ឬទៅដល់ម៉ាឡេស៊ីបានវាកើត ?»។
តបតាមការកោះហៅបន្ទាន់នេះ តំណាងទូតម៉ាឡេស៊ី បានចូលទៅជួបរដ្ឋមន្រ្តីការបរទេសលោក ប្រាក់ សុខុន កាលពីថ្ងៃទី២៥ ខែកុម្ភៈ ប៉ុន្តែក្រោយជំនួបនោះ ក្រសួងការបរទេសកម្ពុជា គ្មានចេញសេចក្ដីប្រកាសព័ត៌មាន ឬសេចក្ដីថ្លែងការណ៍អ្វីមួយ អំពីលទ្ធផលនៃការជួបនេះ នោះឡើយ។
ទោះជាយ៉ាងនេះក្តី មន្ត្រីនាំពាក្យក្រសួងការបរទេសកម្ពុជាលោក កុយ គួង ប្រាប់អាស៊ីសេរី កាលពីថ្ងៃទី២៧ ខែកុម្ភៈ ពោលគឺពីរថ្ងៃក្រោយជំនួបនោះ លោកថា មិនទាន់បានចម្លើយបែបណានៅឡើយទេ ក្នុងរឿងនេះ ព្រោះខាងតំណាងស្ថានទូតម៉ាឡេស៊ី ត្រូវការសុំយោបល់ពីថ្នាក់បន្តទៀត៖ «ទូតក៏បានទទួលចម្ងល់ពីខាងកម្ពុជា ហើយគាត់ហ្នឹងថា នឹងពាំនាំយកចម្ងល់ហ្នឹង ជូនទៅថ្នាក់លើរបស់គាត់ »។
ក្រោយគ្មានឃើញលទ្ធផលផ្លូវការនៃជំនួបនេះ អ្នកវិភាគនយោបាយ និងសង្គមលោក គឹម សុខ ដែលហ៊ាននិយាយរិះគន់របបលោក ហ៊ុន សែន ឥតសំចៃមាត់ និងដែលកំពុងរស់នៅនិទ្ទេសខ្លួននៅប្រទេសហ្វាំងឡង់ថា ការមិនប្រកាសលទ្ធផល អំពីជំនួបកម្រិតការទូតបែបនោះ គឺជាបរាជ័យផ្ទួនៗ ជាលើកទីបួន របស់លោក ហ៊ុន សែន ក្នុងការព្យាយាមបំភាន់មតិសាធារណជន អំពីការថ្លោះធ្លោយរបស់លោក ក្នុងការទទួលយកកប៉ាល់ទេសចរ វ៉េស្ទើដាម (Westerdam) ដែលអ្នកដំណើរម្នាក់ មានផ្ទុកជំងឺរលាកផ្លូវដង្ហើម ដ៏កាចសាហាវនេះ។
លោក គឹម សុខ ថា ការធ្វើជាកោះហៅឱ្យតំណាងទូតរបស់ប្រទេសម៉ាឡេស៊ី ទៅជួបនេះ គឺធ្វើគ្រាន់តែបង្គ្រប់កិច្ច ដើម្បីលុបលាងការនិយាយជ្រុលហួសរបស់លោក ហ៊ុន សែន តែប៉ុណ្ណោះ។ លោកថា វាគ្រាន់តែជារូបភាព ដែលជួបនិយាយពាក្យគួរសម បែបការទូត ហើយគ្មានខ្លឹមសារអ្វី ដែលរបបក្រុងភ្នំពេញ អាចស្រង់យកទៅធ្វើជាសេចក្ដីថ្លែងការណ៍អួតកើតនោះទេ។
អាស៊ីសេរី នៅតែមិនទាន់អាចសុំការឆ្លើយតប ពីមន្ត្រីស្ថានទូតប្រទេសម៉ាឡេស៊ី ជុំវិញរឿងនេះបាននៅឡើយទេ គិតត្រឹមម៉ោងផ្សាយនេះ។
លោក គឹម សុខ ថ្មីៗនេះ ព្រមានថា បើលោក ហ៊ុន សែន នៅតែមិនបញ្ឈប់ការប៉ុនប៉ង យកប្រទេសម៉ាឡេស៊ីជាចំណុចស៊ីប ដើម្បីលុបលាងភាពអាម៉ាស់របស់ខ្លួនទេ នោះលោក ហ៊ុន សែន នឹងរងភាពអាម៉ាស់ជាលើកទី៥ ជុំវិញរឿងជំងឺរលាកផ្លូវដង្ហើមកូវីដ-១៩ (COVID-19) នេះជាក់ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។