កាំកុងត្រូល​ខេត្ត​ព្រះសីហនុ​ចាប់​បាន​ខ្ទឹម​ស្រស់​មាន​ផ្ទុក​សារធាតុ​គីមី​២៥​តោន​ដែល​នាំ​ចូល​ពី​ចិន

ដោយ វ៉ែន សុមេធ
2019-02-02
អ៊ីម៉ែល
មតិ
Share
បោះពុម្ព
សកម្មភាព​អាជ្ញាធរ​ដុត​បំផ្លាញ​ខ្ទឹមស មាន​សារធាតុ​គីមី ដែល​នាំ​ចូល​ពី​ប្រទេស​ចិន ចំនួន ២៥​តោន កាល​ពី​ថ្ងៃ​ទី៣១ ខែ​មករា ឆ្នាំ​២០១៩។
សកម្មភាព​អាជ្ញាធរ​ដុត​បំផ្លាញ​ខ្ទឹមស មាន​សារធាតុ​គីមី ដែល​នាំ​ចូល​ពី​ប្រទេស​ចិន ចំនួន ២៥​តោន កាល​ពី​ថ្ងៃ​ទី៣១ ខែ​មករា ឆ្នាំ​២០១៩។
Photo courtesy of MoC

រដ្ឋមន្ត្រី​ក្រសួង​ពាណិជ្ជកម្ម បាន​ស្នើ​ដល់​មន្ត្រី​សាខា​កាំកុងត្រូល នៅ​តាម​រាជធានី​ខេត្ត​នៅ​ទូទាំង​ប្រទេស ឱ្យ​បន្ត​សកម្មភាព​ចុះ​ត្រួតពិនិត្យ​គុណភាព​ទំនិញ​ឱ្យ​បាន​ច្រើន​ទៀត ទោះបី​មន្ត្រី​កាំកុងត្រូល​បាន​ដក​ចេញពី​ប្រចាំការ នៅ​តាម​ច្រក​ព្រំដែន​បែប​ណា​ក្ដី។

មន្ត្រី​ឃ្លាំមើល​សង្គម​គាំទ្រ ចំពោះ​សកម្មភាព​ចុះ​ត្រួតពិនិត្យ​គុណភាព​ចំណីអាហារ​របស់​មន្ត្រី​សាខា​កាំកុងត្រូល​ខេត្ត​ព្រះសីហនុ។

រដ្ឋមន្ត្រី​ក្រសួង​ពាណិជ្ជកម្ម លោក ប៉ាន សូរស័ក្តិ ថា ការ​ដកហូត ខ្ទឹម () ស្រស់​ចំនួន ២៥​តោន ដែល​មន្ត្រី​សាខា​កាំកុងត្រូល​ខេត្ត​ព្រះសីហនុ ពិនិត្យ​ឃើញ​ថា មាន​ផ្ទុក​សារធាតុ​គីមី ពី​ឈ្មួញ​នាំចូល​មកពី​ប្រទេស​ចិន តាម​ច្រក​កំពង់ផែ​ក្រុងព្រះសីហនុ យក​មក​ដុត​កម្ទេច​ចោល​នេះ គឺ​ធ្វើ​បាន​ទាន់​ពេល។

លោក​បន្ត​អះអាង​ថា ផល​ប៉ះពាល់ ដែល​បណ្ដាល​មក​ពី​ការប្រើប្រាស់ ឬ​ទទួលទាន​ខ្ទឹម​ស្រស់ មាន​ផ្ទុក​សារធាតុ​គីមី​នេះ គឺ​អាច​បង្ក​ផល​ប៉ះពាល់​ធ្ងន់ធ្ងរ​ដល់​សុខភាព​ប្រជាពលរដ្ឋ ឬ​អ្នក​ទទួលទាន ព្រោះ​អាច​ប៉ះពាល់​ដល់​ប្រព័ន្ធ​សរសៃប្រសាទ ហើយ​នាំ​ឱ្យ​អ្នក​បរិភោគ​ក្អួត រាគ ញ័រ ប្រកាច់ ប្រស្រី​ភ្នែក​រួម​តូច និង​ពិបាក​ដកដង្ហើម រហូត​គ្រោះថ្នាក់​ដល់​អាយុជីវិត​ថែមទៀត​ផង។

ទន្ទឹម​គ្នា​នេះ លោក ប៉ាន សូរស័ក្តិ ក៏បាន​លើកទឹកចិត្ត​ដល់​មន្ត្រី​សាខា​កាំកុងត្រូល​នៅ​ទូទាំង​ប្រទេស ជាពិសេស​មន្ត្រី​កាំកុងត្រូល​ខេត្ត​ព្រះសីហនុ ឱ្យ​បន្ត​សកម្មភាព​ចុះ​ត្រួតពិនិត្យ​ទំនិញ នៅ​លើ​ទីផ្សារ និង​នៅ​តាម​ហាង​លក់ទំនិញ​នានា​ក្នុង​មូលដ្ឋាន​រៀងៗ​ខ្លួន​ឱ្យ​បាន​ច្រើន​ថែមទៀត ដើម្បី​ចូលរួម​លើក​កម្ពស់​សុវត្ថិភាព​ចំណីអាហារ​ជូន​អ្នកប្រើប្រាស់ នៅ​ទូទាំង​ប្រទេស ដោយ​អនុលោម​តាម​កម្មវិធី​អភិក្រម ស្ដីពី «ការគ្រប់គ្រង​ហានិភ័យ» ផ្អែក​លើ​មូលដ្ឋាន​បច្ចេកទេស និង​វិទ្យាសាស្ត្រ​ច្បាស់លាស់៖ «គឺ​យើង​ត្រូវតែ​ខិតខំ​ប្រឹងប្រែង​ធ្វើការ​ឱ្យ​បាន​ខ្លាំងក្លា ពីព្រោះ​យើង​មិនបាន​ឈរជើង​នៅ​តាម​ព្រំដែន​ដូច​ពេល​មុន​ទៀត​ទេ។ តែ​យើង​ត្រូវ​ប្រមូល​ផ្តុំ​កម្លាំង របស់​យើង​មក​ធ្វើការ នៅ​ក្នុង​ផ្ទៃ​ប្រទេស​ឱ្យ​បាន​ខ្លាំង ដើម្បី​ទប់ទល់​នឹង​បទល្មើស ដែល​អាច​ហូរ​ចូល​មកពី​ក្រៅ​ប្រទេស​ជាយថាហេតុ ដែល​យើង​គិត​ថា កន្លងមក​យើង​ឈរជើង​នៅ​តាម​ព្រំដែន គឺ​យើង​ចាប់​បាន​ប៉ុណ្ណឹង គឺ​ជាក់ស្ដែង​នៅ​ពេល​នេះ យើង​ចាប់​បាន និង​ចូលរួម​ដុត​បំផ្លាញ​ចោល​ចំនួន ២៥​តោន»

រដ្ឋមន្ត្រី​ក្រសួង​ពាណិជ្ជកម្ម លោក ប៉ាន សូរស័ក្តិ បាន​ឱ្យ​ដឹង​ទៀត​ថា ខ្ទឹម​ស្រស់ នាំ​ចូល​ពី​ប្រទេស​ចិន មាន​ផ្ទុក​សារធាតុ​គីមី ប្រភេទ​ថ្នាំពុល​កសិកម្ម ឌីសសាលហ្វូតុន (Disulfoton) សម្រាប់​ការពារ​សត្វ​ល្អិត​បំផ្លាញ​ដំណាំ និង​គ្រាប់​ធញ្ញជាតិ។

អ្នកស្រី ជៀប សុធារី អ្នក​សម្របសម្រួល​សមាគម​អាដហុក (Adhoc) ខេត្ត​ព្រះសីហនុ និង​ជា​ស្ត្រី​មេផ្ទះ​ម្នាក់ ថ្លែង​គាំទ្រ​ចំពោះ​សកម្មភាព របស់​មន្ត្រី​កាំកុងត្រូល​ខេត្ត​នេះ ដែល​មាន​សកម្មភាព​ចុះ​ត្រួត​ពិនិត្យ​ទំនិញ​នៅ​តាម​ទីផ្សារ និង​រក​ឃើញ​ចំណីអាហារ​ខូច​គុណភាព ដែល​មាន​ដាក់​លាយ​សារធាតុ​គីមី ជា​បន្តបន្ទាប់​មកនេះ៖ «ខ្ញុំ​ក៏ដូចជា​ប្រជាពលរដ្ឋ ឬ​ស្ត្រី​មេផ្ទះ​ផ្សេងទៀត​ដែរ គឺ​សប្បាយចិត្ត​មែនទែន ដោយសារតែ​មន្ត្រី​សាខា​កាំកុងត្រូល​ខេត្ត​ព្រះសីហនុ បាន​ចុះ​ពិនិត្យ​នៅ​តាម​ទំនិញ​នៅ​តាម​ទីផ្សារ​នានា ជាពិសេស​គ្រឿង​ឧបភោគ​បរិភោគ មាន​បន្លែ ត្រី​សាច់​ជាដើម​ជាប្រចាំ។ ព្រោះថា រាល់ថ្ងៃ​នេះ ជំងឺ​គ្រប់​ប្រភេទ​បាន​កើត​ឡើង ហើយ​ស្ត្រី​មេផ្ទះ ឬ​ប្រជាពលរដ្ឋ​យើង​ធម្មតា​គាត់​ទៅ​ទិញ​ចំណី​អាហារ​នៅ​ក្នុង​ទីផ្សារ​ហ្នឹង គឺ​អត់​ចេះ​ពិនិត្យមើល​ទំនិញ​ទាំង​នោះ​ទេ ដោយ​មិន​ដឹង​ថា ចំណីអាហារ ឬ​គ្រឿង​ទេស​ណា​ដែល​មាន​ផ្ទុក​សារធាតុ​គីមី​ហ្នឹង គឺ​មិន​ដឹង​នោះ​ទេ»

អគ្គនាយកដ្ឋាន​កាំកុងត្រូល​បាន​ឱ្យ​ដឹង​ថា កាលពី​ឆ្នាំ​២០១៨ មន្ត្រី​ជំនាញ នៃ​អគ្គនាយកដ្ឋាន​កាំកុងត្រូល បាន​រក​ឃើញ និង​ដកហូត​ទំនិញ​ខូចគុណភាព និង​ម្ហូបអាហារ​ពុំ​មាន​សុវត្ថិភាព ទម្ងន់​សរុប​ចំនួន ៦៦​តោន រួមមាន​៖ (​បន្លែ ផ្លែឈើ គ្រឿង​កំប៉ុង គ្រឿង​សមុទ្រ និង​សាច់​ស្រស់​មាន​ផ្ទុក​សារធាតុ​គីមី​ហាមឃាត់ ឬ​សំណល់​ថ្នាំ​កសិកម្ម) យក​ទៅ​ដុត​កម្ទេច​ចោល។ នៅ​ក្នុង​នោះ​ទំនិញ​ជាង ៥​តោន ត្រូវ​បាន​រឹបអូស​ពី​មាត់ច្រក​ព្រំដែន និង​នៅ​តាម​ទីផ្សារ​មួយ​ចំនួន​នា​ខេត្ត​ព្រះសីហនុ។

ក្រសួងពាណិជ្ជកម្ម តាមរយៈ​អគ្គនាយកដ្ឋាន​កាំកុងត្រូល ក៏បាន​ដាក់​ឱ្យ​ប្រើប្រាស់​រថយន្ត​មន្ទីរ​ពិសោធន៍​ចល័ត​ចំនួន ៣​គ្រឿង ដែល​រថយន្ត​២​គ្រឿង សម្រាប់​ត្រួតពិនិត្យ និង​វិភាគ​ផលិតផល​ម្ហូបអាហារ និង​រថយន្ត ១​គ្រឿង​ទៀត សម្រាប់​ត្រួតពិនិត្យ​គុណភាព និង​បរិមាណ​ប្រេង នៅ​តាម​ស្ថានីយប្រេងឥន្ធនៈ​ទូទាំង​ប្រទេស​កម្ពុជា។ លើស​ពី​នេះ​ទៀត ក្រសួង​ក៏​អះអាង​ថា និង​រៀបចំ​លិខិត​បទដ្ឋាន​គតិយុត្តិ​ចំនួន​បី ដើម្បី​ពង្រឹង​ប្រសិទ្ធភាព​ការងារ របស់​អគ្គនាយកដ្ឋាន​កាំកុងត្រូល​បន្ថែម​ទៀត​ដូចជា​៖ ច្បាប់​ស្ដីពី​សុវត្ថិភាព​ម្ហូបអាហារ - ច្បាប់​ស្ដីពី​កិច្ចការពារ​អ្នកប្រើប្រាស់ និង​ច្បាប់​ស្ដីពី​ភាព​ប្រកួតប្រជែង ដើម្បី​ជំរុញ​ឱ្យ​សកម្មភាព​ការងារ​ចុះ​ត្រួតពិនិត្យ​គុណភាព​ចំណីអាហារ ដែល​អាច​ផ្ដល់​សុវត្ថិភាព​ជូន​ប្រជាពលរដ្ឋ​នៅ​ទូទាំង​ប្រទេស​ឱ្យ​កាន់តែ​ប្រសើរ​ថែមទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល