អ្នកជំនាញចិន និងគ្រឿងបរិក្ខារទប់ទល់នឹងការឆ្លងមេរោគនៃជំងឺកូវីដ-១៩ បានមកដល់ប្រទេសកម្ពុជានៅថ្ងៃទី២៣ មីនា។
គ្រូពេទ្យជំនាញរបស់ចិនមួយក្រុម ដែលមានគ្នាចំនួន ៧នាក់ បានមកដល់ប្រទេសកម្ពុជា នៅថ្ងៃទី២៣ ខែមីនា ដើម្បីចូលរួមជាមួយក្រុមគ្រូពេទ្យខ្មែរ ក្នុងការព្យាបាលប្រជាពលរដ្ឋ ដែលបានឆ្លងជំងឺកូវីដ-១៩។
ក្រុមគ្រូពេទ្យដែលនាំមកជាមួយនូវសម្ភារៈបរិក្ខារពេទ្យមួយចំនួន ដូចជា ស្រោមដៃ ម៉ាស់វះកាត់ ម៉ាសវេជ្ជសាស្ត្រ ដែលមានឈ្មោះបច្ចេកទេស អិន៩៥ (N95) សំលៀកបំពាក់សុវត្ថិភាពរបស់មន្ត្រីសុខាភិបាល របាំងមុខវេជ្ជសាស្ត្រ ទែរម៉ូម៉ែត្រ (Thermometer) ឬសីតុណ្ហមាត្រ សម្រាប់វាស់កម្ដៅ និងវ៉ែនតាសុវត្ថិភាពមួយចំនួនទៀតផង មកប្រគល់ឱ្យកម្ពុជា។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ដែលមានវត្តមាននៅវាលយន្តហោះអន្តរជាតិភ្នំពេញ មានប្រសាសន៍ថា ក្រុមគ្រូពេទ្យកម្ពុជាបានត្រៀមខ្លួនរួចហើយ ដើម្បីធ្វើការងារជាមួយក្រុមគ្រូពេទ្យជំនាញចិនក្នុងរយៈពេល ២សប្ដាហ៍ខាងមុខនេះ ដើម្បីជំរុញវិធានការទប់ស្កាត់ និងឆ្លើយតបការរាតត្បាតរបស់ជំងឺកូវីដ-១៩ ឱ្យបានជោគជ័យ។
ក្រសួងសុខាភិបាលរកឃើញអ្នកឆ្លងជំងឺកូវីដ-១៩ ចំនួន ៨៧ករណីហើយ គិតមកត្រឹមថ្ងៃទី២៣ ខែមីនា ហើយក្នុងចំណោមអ្នកឆ្លងនេះ មានជនជាតិខ្មែរ ៣៣នាក់ និងជនបរទេស ៥៣នាក់ ខណៈមានមនុស្ស ២នាក់ ត្រូវបានគេរាយការណ៍ថា ព្យាបាលបានជាសះស្បើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។