លោក ហ៊ុន សែន ព្រមាន​ពី​ការ​ផ្ទុះ​រាលដាល​ជំងឺ​កូវីដ១៩ ក្នុង​សហគមន៍ បើ​ធ្វេសប្រហែស​ក្នុង​ពេល​ធ្វើ​ចត្តាឡឺស័ក

ដោយ ​​មួង ណារ៉េត
2020-11-07
អ៊ីម៉ែល
មតិ
Share
បោះពុម្ព
​រូបភាព​រដ្ឋមន្ត្រី​ក្រសួង​កសិកម្ម​លោក វេង សាខុន និង​ភរិយា​របស់​លោក ដើរ​ហាត់ប្រាណ​តាម​ផ្លូវ អម​ដោយ​សារ​ថា ពួកគាត់​ទាំងពីរ​នាក់​ត្រូវ​ចូល​បន្ទុំ​ក្នុង​ផ្ទះ រយៈពេល ១៤​ថ្ងៃ អំឡុងពេល​ត្រូវ​ធ្វើ​ចត្តាឡឺស័ក។
​រូបភាព​រដ្ឋមន្ត្រី​ក្រសួង​កសិកម្ម​លោក វេង សាខុន និង​ភរិយា​របស់​លោក ដើរ​ហាត់ប្រាណ​តាម​ផ្លូវ អម​ដោយ​សារ​ថា ពួកគាត់​ទាំងពីរ​នាក់​ត្រូវ​ចូល​បន្ទុំ​ក្នុង​ផ្ទះ រយៈពេល ១៤​ថ្ងៃ អំឡុងពេល​ត្រូវ​ធ្វើ​ចត្តាឡឺស័ក។
Photo courtesy of Sakhon Veng Facebook Page

លោកនាយក​រដ្ឋមន្ត្រី ហ៊ុន សែន ដែល​កំពុង​ធ្វើ​ចត្តាឡឺស័ក បាន​ព្រមាន​អំពី​ការ​ផ្ទុះ​រាលដាល​ជំងឺ​កូវីដ​-១៩ ក្នុង​សហគមន៍ បើ​មន្ត្រី និង​អ្នក​ពាក់ព័ន្ធ​ទាំងអស់ ធ្វេសប្រហែស​ក្នុង​ពេល​កំពុង​ធ្វើ​ធ្វើ​ចត្តាឡឺស័ក​នេះ​។ ប៉ុន្តែ មន្ត្រី​សង្គម​ស៊ីវិល ស្នើ​ឲ្យ​មន្ត្រី​ជាន់ខ្ពស់​រដ្ឋាភិបាល កុំ​ធ្វេសប្រហែស តាំងពី​ដំណាក់កាល​ជួប​ប្រាស្រ័យ​ទាក់ទង​គ្នា​ជាមួយ​ភ្ញៀវ​បរទេស​ម្ល៉េះ។

លោក ហ៊ុន សែន ព្រមាន​ដូច្នេះ នៅ​ក្នុង​សារ​សំឡេង ដែល​ចែក​ផ្សាយ​តាម​ប្រព័ន្ធ​ផ្សព្វផ្សាយ​ក្នុង​ស្រុក កាលពី​ថ្ងៃ​ទី៦ ខែ វិច្ឆិកា ដោយ​លោក​អំពាវនាវ​ឲ្យ​រដ្ឋមន្ត្រី មន្ត្រី​ជាន់ខ្ពស់​ដទៃ​ទៀត រួម​ទាំង​អ្នក​ពាក់ព័ន្ធ​ទាំងអស់ ដែល​បាន​ចាប់ដៃ ឬ​ប៉ះពាល់​ផ្ទាល់​ជាមួយ​រដ្ឋមន្ត្រីការបរទេស និង​ពាណិជ្ជកម្ម​នៃ​ប្រទេស​ហុង​គ្រី រួម​ទាំង​អ្នកបើកបរ​រថយន្ត​ឲ្យ​មន្ត្រី​ទាំងនោះ​ផង៖ «មិន​ត្រូវ​ធ្វេសប្រហែស​ណាមួយ ប្រសិន​មិន​ដូច្នោះ​ទេ វា​នឹង​ផ្ទុះ​កណ្ដាល​ទីក្រុង​ភ្នំពេញ​តែម្ដង ពិសេស​ក្នុង​ពេល​ធ្វើ​ចត្តាឡឺស័ក»

សារ​ព្រមាន​របស់​លោក ហ៊ុន សែន ធ្វើឡើង​ក្រោយ​ក្រសួង​សុខាភិបាល បាន​ប្រកាស​កាលពី​ថ្ងៃ​ទី ០៥ ខែ វិច្ឆិកា ថា អ្នក​ប៉ះពាល់​សរុប មាន​ចំនួន ៨៤០ នាក់ ដែល​បាន​ធ្វើ​តេស្ត លើកទីមួយ ដើម្បី​រក​ជំងឺ​កូវីដ​-១៩ និង​បាន​ដាក់​ឲ្យ​ធ្វើ​ចត្តាឡី​ស័ក​តាម​ផ្ទះ​រៀងៗ​ខ្លួន។

ក៏ប៉ុន្តែ ក្នុង​ពេល​កំពុង​ធ្វើ​ចត្តាឡឺស័ក​នេះ មាន​មន្ត្រី​មួយ​ចំនួន បាន​បង្ហោះ​រូបភាព ពី​ការ​ដើរចេញ​ក្រៅ​ផ្ទះ ដើម្បី​ហាត់ប្រាណ និង​មិន​បាន​ពាក់​ម៉ាស់​ការពារ​នោះ​ឡើយ​។ ទំព័រ​ហ្វេសប៊ុក​ឈ្មោះ វេង សាខុន បាន​បង្ហោះ​រូបភាព​រដ្ឋមន្ត្រី​ក្រសួង​កសិកម្ម​លោក វេង សាខុន និង​ភរិយា​របស់​លោក ដើរ​ហាត់ប្រាណ​តាម​ផ្លូវ អម​ដោយ​សារ​ថា ពួកគាត់​ទាំងពីរ​នាក់​ត្រូវ​ចូល​បន្ទុំ​ក្នុង​ផ្ទះ រយៈពេល ១៤​ថ្ងៃ តាម​វិធានការ​របស់​ក្រសួង​សុខាភិបាល និង​នៅតែ​ហាត់ប្រាណ​ជា​ធម្មតា។

ប្រហែល​ការ​ចេញ​ហាត់ប្រាណ​ខាងក្រៅ ដោយ​មិន​ពាក់​ម៉ាស់​ការពារ និង​នៅ​កៀក​គ្នា​នេះ​ហើយ ទើប​លោក ហ៊ុន សែន ថា មិន​ត្រឹមត្រូវ ក្នុង​ដំណាក់កាល​ធ្វើ​ចត្តាឡឺស័ក​បែបនេះ៖ «ខ្ញុំ​បាន​ទទួល​ព័ត៌មាន ដ៏​គួរ​ឲ្យ​សោកស្ដាយ​ថា ការ​ធ្វើ​ចត្តាឡឺស័ក​របស់​មន្ត្រី​យើង​ខ្លះ គឺ​មិន​បាន​ត្រឹមត្រូវ​ទេ ហាក់​ដូច​ជា​មាន​ដើរ​ហាត់ប្រាណ​នៅ​ក្រៅ​ផ្ទះ ការ​កាន់​ដៃ​គ្នា ការ​ជួប​ប្រាស្រ័យ​ជាមួយ​អ្នក​នេះ អ្នកនោះ»

រដ្ឋមន្ត្រី​ក្រសួង​កសិកម្ម​លោក វេង សាខុន ស្ថិត​ក្នុងចំណោម​រដ្ឋមន្ត្រី​ជា​ច្រើនរូប​ទៀត​នៃ​ក្រសួង​ស្ថាប័នរដ្ឋ​ជាច្រើន ដែល​បាន​ចាប់ដៃ​ជាមួយ​រដ្ឋមន្ត្រី​ការបរទេស និង​ពាណិជ្ជកម្ម​នៃ​ប្រទេស​ហុងគ្រី (Hungary) លោក ភីធើរ ស្ស៊ីយ៉ាតូ (Péter Szijjártó) កាលពី​ថ្ងៃ​ទី៣ ខែ វិច្ឆិកា​។ លោក​និង​ភរិយា​លោក​ស្ថិត​ក្នុង​ចំណោម​មនុស្ស ៨៤០ នាក់​ដែល​កំពុង​ដាក់​ឲ្យ​ធ្វើ​ចត្តាឡឺស័ក​រយៈពេល ១៤ ថ្ងៃ ហើយ​ត្រូវ​ធ្វើតេស្ត​ពីរ​ដង​ទៀត មុន​នឹង​អនុញ្ញាត​ឲ្យ​ចេញ​ក្រៅ​បាន។

ភ្លាមៗ​ក្រោយ​សារ​សំឡេង​របស់​លោក ហ៊ុន សែន អត្ថបទ និង​រូបភាព​ហាត់ប្រាណ​ក្រៅ​ផ្ទះ របស់​លោក វេង សាខុន និង​ភរិយា មិន​ឃើញ​មាន​នៅ​លើ​គណនី​ហ្វេសប៊ុក​ឈ្មោះ វេង សាខុន នោះ​ទៀត​ទេ។

ចំណែក​ឯ​លោក ហ៊ុន សែន ឯណោះ​វិញ បាន​បញ្ជាក់​នៅ​ក្នុង​សារ​សំឡេង​របស់​លោក ដោយ​អះអាង​ថា លោក កំពុង​ខិតខំ​ប្រឹងប្រែង​អនុវត្ត​យ៉ាង​ខ្ជាប់ខ្ជួន​តាម​ក្បួន និង​គោលការណ៍​ណែនាំ​របស់​ក្រសួងសុខាភិបាល ក្នុង​ពេល​កំពុង​ធ្វើ​ចត្តាឡឺស័ក​នេះ​។

ការអនុវត្ត​ខ្ជាប់ខ្ជួន​តាម​គោលការណ៍​ចត្តាឡឺស័ក គឺជា​រឿង​សំខាន់​មួយ សម្រាប់​បង្ការ​ជំងឺ​កូវីដ​-១៩​។ ប៉ុន្តែ អ្នកឃ្លាំមើល​សង្គម​លោក​បណ្ឌិត សេង សារី ថា​ការណ៍​ដែល​មន្ត្រី​ជាន់ខ្ពស់ នៃ​រដ្ឋាភិបាល​កម្ពុជា ប្រព្រឹត្ត​រំលង​គោលការណ៍​សុវត្ថិភាព និង​សេចក្ដី​ណែនាំ​របស់​ក្រសួង​សុខាភិបាល កាលពី​ក្នុង​ជំនួប​ជាមួយ​រដ្ឋមន្ត្រីការបរទេស​ហុងគ្រី​នោះ មិន​ត្រឹមតែ​ជា​ការ​ធ្វេសប្រហែស និង​បំពាន​ប៉ុណ្ណោះ​ទេ តែ​ជា​គំរូ​អាក្រក់ ដល់​ប្រជាពលរដ្ឋ​ខ្មែរ​ទូទៅ​ថែម​ទៀត​ផង។

កាល​ពី​ពេល​ជួប​រដ្ឋមន្ត្រីការបរទេស និង​ពាណិជ្ជកម្ម​ហុងគ្រី ដែល​មន្ត្រី​រូប​នោះ មួយ​ថ្ងៃ​ក្រោយ​មក ត្រូវ​បាន​អាជ្ញាធរ​សុខាភិបាល​ថៃ រក​ឃើញ​ថា មាន​ផ្ទុក​ជំងឺ​កូ​វីដ​-១៩ នោះ លោក ហ៊ុន សែន និង​មន្ត្រី​ជាន់ខ្ពស់​ជាច្រើន​នាក់​របស់​លោក មិន​បាន​ពាក់​ម៉ាស់​ទេ​នៅ​ពេល​នោះ ស្រប​ពេល​រដ្ឋមន្ត្រី​ការបរទេស​ហុងគ្រី​នោះ ក៏​មិន​ពាក់​ម៉ាស់​ការពារ​នោះ​ដែរ ដោយ​ប្រហែលជា​អាង​ថា​មាន​លិខិត​ពេទ្យ​ពី​ប្រទេស​ហុងគ្រី មុន​មក​ទស្សនកិច្ច​នៅ​កម្ពុជា បញ្ជាក់​ថា គាត់​គ្មាន​ជំងឺ​នេះ​។

មន្ត្រី​អង្គការ​សង្គម​ស៊ីវិល ថា មន្ត្រី​ជាន់ខ្ពស់​រដ្ឋាភិបាល មិន​គួរ​ណា​ធ្វេស​ប្រហែស ពេល​ជួប​មន្ត្រី​បរទេស​សោះ ព្រោះ​ករណី​ជំងឺ​កូវីដ​-១៩ ដែល​មាន​នៅ​កម្ពុជា នា​ពេល​កន្លង​មក គឺ​សុទ្ធតែ​នាំចូល​ពី​បរទេស។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ ថា​នេះ​ជា​មេរៀន​មួយ ដែល​មន្ត្រី​ខ្មែរ និង​ពលរដ្ឋ​ទាំងអស់ ត្រូវ​មាន​វិធានការ​ឲ្យ​បាន​ហ្មត់ចត់​ជាង​នេះ និង​គួរ​ផ្លាស់ប្ដូរ​ឥរិយាបថ ដោយ​មិន​ត្រូវ​មើលស្រាល​ជំងឺ​នេះ​ទេ៖ «តាមពិត​វិធានការ​ដែល​មាន​ស្រាប់​ហ្នឹង គឺ​បាន​ដាក់​ឲ្យ​អនុវត្ត​រួចហើយ ដូចជា​រក្សា​គម្លាត​។ ការ​ជួប​សន្ទនា​គ្នា​ក៏​ជួប​ទៅ ប៉ុន្តែ​បើ​ករណី​ពិសេស មិន​អាច​ខាន​បាន ការសន្ទនា​នៅ​ក្នុង​ទម្រង់​គម្លាត មិន​បាច់​ចាប់ដៃ​ចាប់​ជើង​ទេ យើង​ជម្រាបសួរ​គ្នា ដូចដែល​ពី​ដំណើរការ​ដំបូង​កាល​ពេល​ចាប់ផ្ដើម​ឆ្លង​។ ឃើញ​បណ្ដា​ប្រទេស​មួយ​ចំនួន ដូច​នៅ​អឺរ៉ុប គេ​អត់​ចាប់ដៃ​ទៀត​ទេ គេ​សំពះ ជម្រាបសួរ​គ្នា​។ យើង​ត្រូវ​ពិនិត្យមើល​ទៅ​ក្រោយ​បន្តិច ថា​តើ​ស្ថានភាព​នៃ​ការ​បង្ការ​ពេលនោះ​យ៉ាងម៉េច​? ឥឡូវ​ក៏​គួរតែ​បន្ត​ដែរ ព្រោះ​អត់​ទាន់​សញ្ញា​វិជ្ជមាន​ណាមួយ នៃ​ការ​គ្រប់គ្រង​នៃ​ជំងឺ​នេះ ខៈណៈ​ប្រទេស​អឺរ៉ុប​មួយ​ចំនួន ក៏​ចាប់ផ្ដើម​បិទ​ប្រទេស (lockdown) ឡើងវិញ​ដែរ»

លោក សន ជ័យ ថា បើ​ករណី​ជំងឺ​កូវីដ​-១៩​នេះ ឆ្លង​រាលដាល​ក្នុង​សហគមន៍ នោះ​កម្ពុជា​នឹង​រង​ផល​ប៉ះពាល់​ធំធេង​ណាស់​។ លោក​ថា ការពារ​គឺ​ប្រសើរ​ជា​ងព្យាបាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល