ពលរដ្ឋ​នៅ​ខេត្ត​រតនគិរី​ព្រួយបារម្ភ​ពី​ជំងឺ​គ្រុន​ឈាម​​ឆ្លង​​រាល​​ដាន​​កាន់​តែ​​ច្រើន

ដោយ វ៉ែន សុមេធ
2019-06-28
អ៊ីម៉ែល
មតិ
Share
បោះពុម្ព
រូប​មូស​ខ្លា ដែល​ខាំ​បឺត​ឈាម​មនុស្ស ហើយ​បង្ក​ជំងឺ​គ្រុន​ឈាម និង​ជំងឺ​មួយ​ចំនួន​ផ្សេង​ទៀត។
រូប​មូស​ខ្លា ដែល​ខាំ​បឺត​ឈាម​មនុស្ស ហើយ​បង្ក​ជំងឺ​គ្រុន​ឈាម និង​ជំងឺ​មួយ​ចំនួន​ផ្សេង​ទៀត។
រូប៖ ប័ណ្ណ​ផ្សព្វផ្សាយ​របស់​នាយកដ្ឋាន​ប្រយុទ្ធ​នឹង​ជំងឺ​ឆ្លង នៃ​ក្រសួង​សុខាភិបាល​កម្ពុជា

ជំងឺគ្រុនឈាម​បន្ត​រាតត្បាត​ឆ្លង​ទៅ​ដល់​ប្រជាពលរដ្ឋ​ជាច្រើន​នាក់​នៅ​ស្រុក​វើនសៃ ខេត្ត​រតនគិរី។ពលរដ្ឋ​ព្រួយបារម្ភ​ខ្លាច​ជំងឺ​នេះ​ឆ្លង​រាលដាល​កាន់តែ​ខ្លាំង នាំ​ឱ្យ​ពិបាក​ទប់ទល់ ស្រប​ពេល​ដែល​អ្នកស្រុក​ជាច្រើន​នាក់​បាន​បញ្ជូន​កូន​ទៅ​ព្យាបាល​មន្ទីរពេទ្យ​ជា​បន្តបន្ទាប់។

ប្រជាពលរដ្ឋ​រស់នៅ​ភូមិ​កាឡាន់ញ៉ៃ ឃុំ​វើនសៃ អ្នកស្រី ភីម ផល្លី ប្រាប់​អាស៊ីសេរី​នៅ​រសៀល​ថ្ងៃ​ទី​២៧ មិថុនា ថា សមាជិក​គ្រួសារ​របស់​អ្នកស្រី​ចំនួន​៣​នាក់ ក្នុង​នោះ​មាន​អ្នកស្រី​ខ្លួនឯង​ផ្ទាល់ កូន​អាយុ​១២​ឆ្នាំ​ម្នាក់​និង ៥​ឆ្នាំ​ម្នាក់​បាន​ឆ្លង​ជំងឺគ្រុនឈាម​។ អ្នកស្រី​បន្ត​ថា សព្វថ្ងៃ ពួកគាត់​កំពុង​សម្រាក​ព្យាបាល​ជំងឺ​នៅ​មណ្ឌល​សុខភាព​ក្នុងស្រុក​វើនសៃ មិន​ទាន់​បាន​ធូរស្រាល​នៅ​ឡើយ​ទេ​។ អ្នកស្រី​បន្ត​ថា នេះ​ជា​លើក​ទី​២​ហើយ ដែល​គ្រួសារ​អ្នកស្រី​កើត​ជំងឺគ្រុនឈាម គឺ​កាលពីដើម​ខែ​មិថុនា​កើត​ម្ដង​ចូល​សម្រាក​មន្ទីរពេទ្យ​ប្រមាណ ៣​ថ្ងៃ ក៏បាន​ធូរស្រាល ហើយ​គ្រូពេទ្យ​ឱ្យ​ត្រឡប់​ទៅ​ផ្ទះ​វិញ ហើយ​ក្រោយមក​ស្រាប់តែ​ជំងឺ​នេះ​បាន​ផ្ទុះឡើង​ជា​ថ្មី​ទៀត៖ «យើង​ធូរ​តែ​វា​អត់​ដឹង​ថា ជា​ដាច់​ហើយ​នៅ​ទេ ខ្លាច​មាន​មេរោគ​នៅ​ក្នុង​ខ្លួន​ទៀត ប៉ុន្តែ​នៅ​ពេទ្យ​មណ្ឌល​សុខភាព​គាត់​ថា បើ​មិន​ជា​ដាច់​ទេ​គ្រូពេទ្យ​មិន​ឱ្យ​ចេញទៅ​ផ្ទះ​ទេ កាលពី​ដំបូង​ខ្ញុំ​អត់​ដឹង​ដែរ ដោយសារ​ពេទ្យ​ឯកជន​គេ​អត់​និយាយ គេ​ដាក់​សេរ៉ូម​ពីរ​បី​កំប្លោក​គេ​ថា ខ្ញុំ​ជា​ហើយ ទើបតែ​លឺ​ពេទ្យ​រដ្ឋ​នៅ​នេះ​គាត់​និយាយ​ថា បើ​មិន​ជា​ទេ គេ​មិន​ឱ្យ​ត្រឡប់​ទៅ​ផ្ទះ។ តែ​ខ្ញុំ​នៅតែ​បារម្ភ​ដោយសារ​នៅ​ទីនេះ​ចេះតែ​ភ្លៀង និង​អាកាសធាតុ​ក្ដៅ​ខ្លាំង»

អ្នកស្រី​បន្ត​ថា ជំងឺ​នេះ​ចាប់ផ្ដើម​ផ្ទុះឡើង​តាំងពី​ថ្ងៃ​ទី​ពាក់កណ្ដាល​ខែ​ឧសភា រហូត​មក​ដល់​ថ្ងៃ​ទី​២៧​មិថុនា មាន​មនុស្ស​កាន់តែ​ច្រើន​បាន​ឆ្លង​ជំងឺ​នេះ ក្នុង​នោះ​មាន​ទាំង​មនុស្ស​ចាស់​និង​កុមារ ហើយ​នៅ​ក្នុង​ភូមិ​របស់​អ្នកស្រី​មាន​មនុស្ស​២​នាក់​ហើយ បាន​ស្លាប់​ដោយសារ​កើត​ជំងឺគ្រុនឈាម និង​មាន​ពលរដ្ឋ​ប្រមាណ​១០០​នាក់​ទៀត​កំពុង​សម្រាក​ព្យាបាល​ជាមួយ​អ្នកស្រី​នៅ​មណ្ឌល​សុខភាព​ស្រុក​វើនសៃ។

អាស៊ីសេរី​មិន​អាច​ទាក់ទង​អនុប្រធាន​មន្ទីរ​សុខាភិបាល​ស្រក​វើនសៃ លោក ជា សានិត និង​អ្នកនាំពាក្យ​ក្រសួងសុខាភិបាល​អ្នកស្រី ឱ វណ្ណឌីន ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បាន​នៅ​ថ្ងៃ​ទី​២៧​ មិថុនា ដោយ​ទូរស័ព្ទ​ចូល​ជា​ច្រើនដង​ ពុំ​មាន​អ្នក​ទទួល។

ប៉ុន្តែ​អ្នកនាំពាក្យ​របប​ក្រុងភ្នំពេញ លោក ផៃ ស៊ី​ផាន បាន​ថ្លែង​ក្នុង​សន្និសីទ​សារព័ត៌មាន​អំពី​ស្ថានភាព​ជំងឺគ្រុនឈាម​នា​ពេល​បច្ចុប្បន្ន នៅ​មន្ទីរពេទ្យ​កុមារ​ជាតិ កាលពី​ព្រឹក​ថ្ងៃ​ទី​២៧ ខែ​មិថុនា​ថា ជំងឺ​នេះ​បាន​ផ្ទុះឡើង​ខ្លាំង​នៅ​កម្ពុជា។ ទោះជា​យ៉ាង​ណា​​លោក​​ថា អាជ្ញាធរ​ក្រុងភ្នំពេញ​មិន​មាន​ការ​ព្រួយ​បារម្ភ​ចំពោះ​ជំងឺ​នេះ​ទេ និង​បាន​រៀបចំ​គ្រូពេទ្យ និង​មាន​វិធានការ​បាញ់ថ្នាំ​កម្ចាត់​មូស​ខ្លា​គ្រប់​ខេត្ត​រួចហើយ៖ «បាន​រៀបចំ​វិធាន​មួយ​ដើម្បី​បញ្ចៀស​ ជាជាង​ផ្ដុំ​គ្នា​មក​កុមារ​ជាតិ ឬ​មក​ទីក្រុង​ភ្នំពេញ ឬ​វិធាន​របស់​​ក្រសួងសុខាភិបាល​លោក​បាន​ហ្វឹកហ្វឺន​ជំនាញ​ដល់​បុគ្គលិក​ពេទ្យ​បោះ​យើង​ឱ្យ​ទៅ​នៅ​ទីកន្លែង ​ជាពិសេស​ គឺ​ចាប់ផ្ដើម​នៅ​ខេត្ត​កំពង់ធំ ដែល​ជា​ចំណុច​ផ្ដល់​សារសំខាន់ ហើយ​និង​ត្រៀមលក្ខណៈ​ បើសិនជា​មានការ​ផ្ទុះ​ជំងឺគ្រុនឈាម​ខ្លាំង​យ៉ាង​ណា យើង​នៅតែ​មាន​លទ្ធភាព​ក្នុង​ការ​គ្រប់គ្រង​កន្លែង​ផ្ទុក​អ្នកជំងឺ​គ្រុនឈាម ក៏ដូចជា​ ការ​​បង្វែរ​​ការ​​ថែ​រក្សា​​អ្នក​ជំងឺ»

អ្នក​ជំនាញ​ខាង​ជំងឺគ្រុនឈាម​នៅ​មន្ទីរពេទ្យ​កុមារ​ជាតិ លោក វេជ្ជ បណ្ឌិត ប៉ែន កក្កដា មាន​​ប្រសាសន៍​ថា ជំងឺ​គ្រុន​ឈាម​​អាច​​ឆ្លង​​ទៅ​​ទាំង​​មនុស្ស​​ចាស់ និង​កុមារ តាមរយៈ​មូស​ខ្លា​ខាំ​។ លោក​បន្ត​ថា ជំងឺ​នេះ​ដំបូង អ្នក​កើត​ជំងឺ​មាន​អាការ​ក្ដៅខ្លួន ចាប់​ពី​ ៣៨ ទៅ ៣៩​អង្សា​សេ មាន​រយៈពេល​មួយ​សប្ដាហ៍ ក្រោយមក​អ្នកជំងឺ និង​ចុះ​ត្រជាក់​វិញ។ ប៉ុន្តែ​លោក​ថា ការ​ចុះ​ត្រជាក់​នេះ ជា​សញ្ញា​គ្រោះថ្នាក់​ដែល​ត្រូវ​ប្រុងប្រយ័ត្ន ហើយ​ជាសះស្បើយ ប្រសិនបើ​មានការ​ព្យាបាល​បាន​ត្រឹមត្រូវ​ និង​ទាន់​ពេល ព្រោះ​​ប្រសិនបើ​មិនបាន​ព្យាបាល​ទាន់​ពេល​ទេ នៅ ​២​ថ្ងៃ​ក្រោយពី​ចុះ​ត្រជាក់ គឺ​អាច​ធ្វើ​ឱ្យ​អ្នកជំងឺ​បាត់បង់​ជីវិត​បាន៖ «ជំងឺ​ឈាម​អាច​ស្លាប់​បាន ទី​មួយ​ស្លាប់​ដោយសារ​ឪពុកម្ដាយ​មួយ​ពេល​កូន​ក្ដៅខ្លួន​គាត់​ប្រើ​ថ្នាំ​ត្រជាក់ ធម្មតា​ថ្នាំ​ត្រជាក់​គេ​ឱ្យ​ប្រើ​ទាប​បំផុត ហើយ​នៅ​ក្នុង​នោះ​គេ​ឱ្យ​ប្រើ​វា​ ៦​ម៉ោង​ម្ដងទៀត ហើយ​ពេល​គាត់​ឱ្យ​តែ​ត្រជាក់​ដាក់​ថ្នាំៗ គឺ​កូន​អាច​ស្លាប់​ដោយសារ​ការ​ដាក់​ថ្នាំ​ត្រជាក់ ជាពិសេស ប៉ារ៉ាសេតាម៉ុល​តែម្ដង។ ដូច្នេះ​ត្រូវ​ប្រយ័ត​ការ​ប្រើ​ថ្នាំ​ប៉ារ៉ាសេតាម៉ុល​នេះ បើ​កូន​មិន​ត្រជាក់​យើង​មិន​ត្រូវ​ដាក់​ថ្នាំ​ទេ យើង​ត្រូវ​មុជទឹក​ត្រូវ​ជូត​ខ្លួន និង​ប្រើ​កង្ហារ​អី​ធ្វើ​ឱ្យ​កូន​ត្រជាក់​ទី​២ សំខាន់​ជាង​នោះ​មិន​គួរ​បញ្ចូល​សេរ៉ូម​នៅ​ក្នុង​អំឡុង​ពេល​ក្ដៅខ្លួន​នោះ​ទេ បើ​បញ្ចូល​សេរ៉ូម​ច្រើន​ពេល​អាច​ប្រឈមមុខ​នឹង​លិច​លង់​ដល់​សួត គឺ​ទឹក​ចូល​ក្នុង​សួត ក៏​គ្រោះ​ថ្នាក់​មួយ​ដែរ យើង​គួរតែ​ទៅ​រក​ពេទ្យ​ត្រឹមត្រូវ​ក្នុង​ការ​ព្យាបាល»

លោក​បន្ត​ថា ដើម្បី​ទប់ស្កាត់​កុំ​ឱ្យ​កើត​ជំងឺ​នេះ គឺ​ពលរដ្ឋ​ត្រូវ​សំអាត​នៅ​ជុំវិញ​ផ្ទះ​របស់​ខ្លួន​ឱ្យ​បាន​ស្អាត ជាពិសេស​ ទីជម្រក​របស់​មូស​ខ្លា គឺ​ត្រូវ​បោសសំអាត​ធ្វើ​យ៉ាង​ណា​កុំ​ឱ្យ​មាន​ទឹក​ដក់​នៅ​ជុំវិញ​ផ្ទះ ដូចជា​កុំ​ឱ្យ​មាន​សំបក​កំប៉ុង សំបក​ដូង និង​សំបក​កង់ឡាន​ជាដើម ព្រោះ​របស់​ទាំងនេះ​ជាទី​កន្លែង​ដែល​មូស​ខ្លា​នៅ និង​ពង​បាន។ លោក​ថា ប្រសិន​មាន​មនុស្ស​ក្នុង​គ្រួសារ​ណា​ម្នាក់​មានការ​សង្ស័យ​កើត​ជំងឺគ្រុនឈាម​ត្រូវ​ប្រញាប់​នាំ​អ្នកជំងឺ​ទៅ​ព្យាបាល​នៅ​មន្ទីរពេទ្យ​ដែល​នៅ​ជិត​ផ្ទះ​ឱ្យ​បាន​ឆាប់ ដើម្បី​​កុំ​ឱ្យ​ជំងឺ​ធ្ងន់ធ្ងរ​នាំ​ឱ្យ​លំបាក​ព្យាបាល។

កាសែត​ក្នុងស្រុក​ចុះផ្សាយ​នៅ​ថ្ងៃ​ទី​២៦ មិថុនា​ថា ក្រសួង​សុខាភិបាល​អះអាង​ថា ក្នុង​ឆ្នាំ​២០១៩ គឺជា​ឆ្នាំ​ដែល​ជំងឺគ្រុនឈាម​បាន​ផ្ទុះឡើង​ខ្លាំង​នៅ​កម្ពុជា​។ រដ្ឋមន្ត្រី​ក្រសួងសុខាភិបាល លោក ម៉ម ប៊ុនហេង បញ្ជាក់​ថា ចាប់ពី​ខែ​មករា ដល់​ថ្ងៃ​ទី​២០ ខែ​មិថុនា អ្នក​កើត​ជំងឺគ្រុនឈាម​ទូទាំង​ប្រទេស មាន​ជាង ១​ម៉ឺន ២​ពាន់​នាក់ (១២.០០០) និងបាន​សម្លាប់​មនុស្ស ២១​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល