រដ្ឋមន្រ្តីក្រសួងការបរទេស បាននិយាយនៅក្នុងខ្សែអាត់ផ្ញើទៅក្នុងគ្រុប ឬក្រុមការងាររបស់លោក ហើយបានបែកធ្លាយតាមបណ្ដាញសង្គម ដែលអាស៊ីសេរីទទួលបាននៅថ្ងៃទី១៥ មីនា លោក ប្រាក់ សុខុន បានដាក់វិធានការចំនួន ៤ចំណុចទៅមន្រ្តីក្រសួងការបរទេសទាំងអស់ ឲ្យប្រុងប្រយ័ត្ន ចំពោះការរីករាលដាលជំងឺកូវី១៩ ខណៈជំងឺនេះ កំពុងតែវាយលុកប្រទេសផ្សងៗ រួមទាំងកម្ពុជាផង។ លោក ប្រាក់ សុខ អះអាងថា មន្ត្រីក្រសួងការបរទេស ត្រូវធ្វើការតាមផ្ទះជំនួសឲ្យទៅធ្វើការដោយផ្ទាល់នៅឯក្រសួងការបរទេស បើសិនជាគ្មានការអ្វីចាំបាច់៖ «បើគ្មានការអនុញ្ញាតពីខ្ញុំទេ បេសកកម្មនៅក្រៅប្រទេសត្រូវផ្អាកសិន ហើយបើសិនភ្ញៀវបរទេសមកជួប បើចាំបាច់បំផុត កុំចាប់ដៃ និងត្រូវលាងដៃ ចាប់ពីពេលនេះទៅ មិនត្រូវមកធ្វើការទេ មកតែក្នុងករណីចាំបាច់បានហើយ » ។
អាស៊ីសេរីមិនអាចទាក់ទង លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស ដើម្បីសុំការអត្ថាធិប្បាយបន្ថែមជុំវិញរឿងនេះបានទេ កាលពីរាត្រីថ្ងៃទី១៥ មីនា។
កាលពីយប់ថ្ងៃទី១៥មីនានេះដែរ លោក នាយករដ្ឋមន្ត្រី ហ៊ុន សែន បានដាក់វិធានការចំនួន៤ ដើម្បីទប់ស្កាត់ការរីករាលដាលឆ្លងជំងឺកូវីត១៩ ដែរនោះ គឺទី១ មិនឲ្យពលរដ្ឋធ្វើដំណើរទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ប្រសិនបើមិនមានការអ្វីចាំបាច់បំផុត ដែលខានពុំបាន។ ទី២ គ្រប់ក្រសួង ស្ថាប័នរដ្ឋទាំងអស់ ទាំងនៅថ្នាក់ជាតិ និងថ្នាក់ក្រោមជាតិមិនត្រូវអនុញ្ញាតឲ្យមន្ត្រីរាជការ បុគ្គលិកគ្រប់លំដាប់ថ្នាក់ ធ្វើដំណើរចូលរួមកិច្ចប្រជុំគ្រប់ប្រភេទ ទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់។ ទី៣ ក្នុងករណីចាំបាច់ខានមិនបាន ដែលតម្រូវឲ្យមានតំណាងរបស់កម្ពុជា ចូលរួមប្រជុំនៅបណ្ដាប្រទេសទាំងនេះ ក្រសួង ស្ថាប័នពាក់ព័ន្ធនីមួយៗ ត្រូវធ្វើសំណើទៅកាន់ក្រសួងការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះនៃការប្រជុំ ឲ្យចូលរួមជំនួស។ ទី៤ ចំពោះមន្ត្រីរាជការ និងប្រជាពលរដ្ឋកម្ពុជាទាំងឡាយណា ដែលទើបវិលត្រឡប់ពីបណ្ដាលប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ត្រូវដាក់ ឱ្យនៅដោយឡែកពីគេ ក្នុងរយៈពេល ១៤ថ្ងៃ គិតចាប់ពីថ្ងៃដែលបានត្រឡប់មកដល់ប្រទេសកម្ពុជាវិញ ស្របតាមនីតិវិធីកំណត់ដោយក្រសួងសុខាភិបាល។
វិធានការហាមឃាត់របស់លោក ហ៊ុន សែន ដែលមិនបានដាក់បញ្ចូលប្រទេសចិន ដែលជាប្រទេសប្រភពដើមនៃការចម្លងជំងឺរលាកផ្លូវដង្ហើមប្រភេទថ្មីនេះ គឺរងការរិះគន់ពីអង្គការសង្គមស៊ីវិល ថា លោក ហ៊ុន សែន គួរតែដាក់ចិនជាប្រទេសមិនឲ្យជនជាតិចិនចូលកម្ពុជា ឬហាមពលរដ្ឋកម្ពុជាមិនឲ្យចូលទៅប្រទេសចិនដូចគ្នា ដើម្បីចៀសវាងការឆ្លងជំងឺកូវីត១៩ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។