រដ្ឋាភិបាល សម្រេចបិទគ្រឹះស្ថានសិក្សាទាំងរដ្ឋ និងឯកជនទូទាំងប្រទេស ហើយណែនាំឲ្យពលរដ្ឋ និងមន្ត្រីរាជការ ដែលទើបត្រឡប់មកពីអាមេរិក តំបន់អឺរ៉ុប និងអ៊ីរ៉ង់ ត្រូវនៅដាច់ដោយឡែករយៈ ពេល ១៤ថ្ងៃសិន ដើម្បីបង្ការទប់ស្កាត់ការរីករាលដាលជំងឺកូវីដ-១៩។ អ្នកជំនាញផ្នែកសុខភាព សាធារណៈ ពិនិត្យឃើញថា វិធានការរដ្ឋាភិបាលឆ្លើយតបទាន់ពេលវេលា និងរំពឹងថា អាចទប់ទល់ជាមួយជំងឺឆ្លងកូវីដ-១៩ បាន។
ស្របពេលដែលក្រសួងសុខាភិបាល ប្រកាសរកឃើញអ្នកឆ្លងជំងឺកូវីដ-១៩ ជាបន្តបន្ទាប់នោះ ក្រសួងស្ថាប័នពាក់ព័ន្ធ បានដាក់ចេញវិធានការផ្សេងៗ គ្នា ដើម្បីទប់ស្កាត់ការរីករាលដាលនៃជំងឺឆ្លងមួយនេះដែរ។
ក្រសួងអប់រំយុវជន និងកីឡា នៅថ្ងៃទី១៦ ខែមីនា បានចេញសេចក្ដីណែនាំស្ដីពីការចាប់ផ្ដើមវិស្សម កាលតូច និងការឈប់សម្រាកមុនកាលកំណត់សម្រាប់គ្រឹះស្ថានសិក្សាគ្រប់កម្រិត គ្រប់ប្រភេទទាំងសាធារណៈ និងឯកជនទូទាំងប្រទេស រហូតដល់មានការជូនដំណឹងជាថ្មី។
ចំណែកក្រសួងសុខាភិបាល បានចេញសេចក្ដីណែនាំស្ដីពីវិធីដាក់ខ្លួនឯងឲ្យនៅដាច់ដោយឡែក ក្នុងរយៈពេល ១៤ថ្ងៃ នៅតាមផ្ទះជាលក្ខណៈបុគ្គលរៀងៗ ខ្លួន សម្រាប់បុគ្គលដែលសង្ស័យឆ្លងជំងឺ កូវីដ-១៩។ វិធីទាំងនោះ មានដូចជា ត្រូវរស់នៅក្នុងបន្ទប់ដាច់ដោយឡែក មានខ្យល់ចេញចូលល្អ ត្រូវធ្វើអនាម័យខ្លួនប្រាណ និងកាត់បន្ថយការប្រើប្រាស់កន្លែងរស់នៅរួមគ្នា ដូចជា ផ្ទះបាយ និងបន្ទប់ទឹក ហើយបើមានអាការៈក្តៅខ្លួន ក្អក ឈឺបំពង់ក ពិបាកដកដង្ហើម និងរោគសញ្ញាផ្សេងៗ ទៀត ត្រូវទាក់ទងក្រសួងសុខាភិបាលតាមរយៈលេខ១១៥ ឬទៅអាជ្ញាធរខេត្ត និងមន្ទីរពេទ្យបង្អែកដែលនៅជិតផ្ទះ។ ក្រសួង ក៏បានណែនាំដល់អាជ្ញាធរមូលដ្ឋានឲ្យតាមដានបុគ្គលដែលតម្រូវឲ្យរស់នៅដាច់ដោយឡែកទាំងនោះដែរ។ ក្រសួងមួយនេះ ក៏ចេញលិខិតមួយទៀត នៅរសៀលថ្ងៃទី១៦ ខែមីនា ស្នើឲ្យអភិបាលរាជធានី-ខេត្តក្រុងទាំងអស់បង្កើតគណៈកម្មការប្រយុទ្ធប្រឆាំងនឹងជំងឺកូវីដ-១៩ តាមរាជធានី-ខេត្តរបស់ខ្លួន។
ក្រៅពីនេះ ប្រមុខរដ្ឋាភិបាលកម្ពុជា លោក ហ៊ុន សែន បានចេញសារាចរណែនាំស្ដីពីវិធានការ បង្ការ និងទប់ស្កាត់ការរាតត្បាតនៃជំងឺកូវីដ១៩ កាលពីយប់ថ្ងៃទី១៥ ខែមីនា។ សារាចរនោះ គឺណែនាំដល់ពលរដ្ឋ និងមន្ត្រីតាមក្រសួងស្ថាប័ននានា កុំធ្វើដំណើរទៅកាន់ប្រទេសអាមេរិក អឺរ៉ុប និងអីរ៉ង់ ប្រសិនបើមិនមានករណីចាំបាច់។ ចំពោះមន្ត្រីរាជការ និង ប្រជាពលរដ្ឋកម្ពុជាទាំងឡាយណា ដែលទើបវិលត្រឡប់មកពីបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ត្រូវដាក់ខ្លួនឲ្យនៅដាច់ដោយឡែកក្នុងរយៈពេល ១៤ថ្ងៃ គិតចាប់ពីថ្ងៃមកដល់កម្ពុជាវិញ ស្របតាមនីតិវិធីណែនាំរបស់ក្រសួងសុខាភិបាល។
ទន្ទឹមគ្នានេះ លោក ហ៊ុន សែន ក៏សម្រេចផ្អាកកម្មវិធីវេទិការាជរដ្ឋាភិបាល និងផ្នែកឯកជនលើក ទី១៩ ដែលគ្រោងធ្វើឡើងនៅថ្ងៃទី១ ខែមេសា និងផ្អាកកម្មវិធីសំណេះសំណាលជាមួយក្រុមកីឡាករ ដែលគ្រោងធ្វើនៅថ្ងៃទី៤ ខែមេសាខាងមុខ ដោយសារតែជំងឺកូវីដ-១៩ផងដែរ។ ចំណែក អាជ្ញាធររាជធានី-ខេត្តមួយចំនួន ក៏បានប្រកាសលុបចោលកម្មវិធីអង្គរសង្ក្រាន្តឆ្នាំថ្មីផងដែរ។
អាស៊ីសេរី មិនអាចសុំការបញ្ជាក់បន្ថែមអំពីការត្រៀមវិធានការដទៃទៀត ពីខាងអ្នកនាំពាក្យ ក្រសួងសុខាភិបាល លោក លី សូវ៉ាន់ និងអ្នកស្រី ឱ វណ្ណឌីន ព្រមទាំងរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានទេ ដោយទូរស័ព្ទចូលពុំមានអ្នកទទួល។ ចំណែកប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ក៏មិនទទួលទូរស័ព្ទដែរ។
អគ្គនាយកក្រុមហ៊ុន ម៉េងលី ជេ. គួច អេឌ្យូខេសិន (J.Quach Education) និងជាវេជ្ជបណ្ឌិត គឺឧកញ៉ា គួច ម៉េងលី មានប្រសាសន៍ថា លោកជឿទុកចិត្តចំពោះវិធានការរដ្ឋាភិបាលកម្ពុជាថា អាច យកឈ្នះជំងឺកូវីដ-១៩ បាន ព្រោះលោកពិនិត្យឃើញថា វិធានការរបស់អាជ្ញាធរ និងក្រសួងស្ថាប័នពាក់ព័ន្ធ គឺសហការគ្នាបានល្អ និងឆ្លើយតបបានលឿន និងទាន់ហេតុការណ៍។ ទោះជាយ៉ាងណាក្ដី អ្នកជំនាញផ្នែកសុខភាពសាធារណៈរូបនេះ មិនអាចវាយតម្លៃបានទេថា តើក្រសួងសុខាភិបាល បាន ត្រៀមបរិក្ខារពេទ្យ និងបុគ្គលិកជំនាញគ្រប់គ្រាន់បែបណានោះទេ។ ប៉ុន្តែលោកមានជំនឿថា ក្នុងករណីកម្ពុជា មានអាសន្នធំជាងបច្ចុប្បន្ន គឺនឹងមានប្រទេសសម្ព័ន្ធមិត្តជាច្រើនចូលរួមជួយជ្រោមជ្រែងកម្ពុជា៖ «ខ្ញុំមិនខុសពីក្រសួងអប់រំ ក្រសួងសុខាភិបាលទេ ហើយក៏មិនខុសពីប្រទេសដទៃទៀតដែរ ដូចជា អាមេរិក និងសហភាពអឺរ៉ុបអ៊ីចឹង គឺមានតែយើងផ្ញើសារមួយថា កុំឲ្យមានការជួបជុំផ្ដុំគ្នាច្រើន ហើយឆ្ងាយពីគ្នាបន្តិច ហើយសំខាន់យើងអប់រំអំពីវិធីសាស្ត្រការពារ កុំឲ្យមានការចាប់ដៃគ្នា កុំនៅជិតគ្នាពេក ហើយញាំទឹកឲ្យបានច្រើន និងថែទាំសុខភាពឲ្យបានល្អ។ បើមានជំងឺផ្ដាសាយ ឬស្រដៀងៗ ត្រូវពាក់ម៉ាស់ ហើយបើមានរោគសញ្ញាក្ដៅខ្លួន បែកញើស ឬក្អកស្ងួត ត្រូវទៅពេទ្យពិនិត្យ ដើម្បីចៀសវាងការសង្ស័យកូវីដ-១៩»។
កាលពីថ្ងៃទី១៤ ខែមីនា សហរដ្ឋអាមេរិក បានផ្ដល់ជំនួយដល់កម្ពុជាចំនួន ២លានដុល្លារដល់កម្ពុជាសម្រាប់ការងារទប់ស្កាត់ការរីករាលដាលជំងឺកូវីដ១៩។ ចំណែកប្រទេសជប៉ុនវិញ កាលពីថ្ងៃទី១៥ ខែកុម្ភៈ កន្លងទៅ បានផ្ដល់នូវសម្ភារៈបរិក្ខារពេទ្យមួយចំនួនធំដល់កម្ពុជា ដូចជា អាវបំពង់ អាល់កុលសម្លាប់មេរោគ និងវ៉ែនតាការពារសុវត្ថិភាព ព្រមទាំងស្រោមដៃគូ ជាដើម។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ស្ថានភាពជំងឺកូវីដ-១៩ កំពុងក្លាយជាក្តីបារម្ភសម្រាប់សហគមន៍ហើយ បន្ទាប់ពីមានករណីកើត លើពលរដ្ឋខ្មែរជាបន្តបន្ទាប់រយៈពេលប៉ុន្មានថ្ងៃចុងក្រោយនេះ។ លោកព្រួយបារម្ភថា ប្រសិនបើជំងឺនេះ ឆ្លងរីករាលក្នុងសហគមន៍ គឺប្រហែលជារដ្ឋាភិបាលកម្ពុជា ពិបាកគ្រប់គ្រងស្ថានការណ៍។ លោក ស្នើសុំឲ្យក្រសួងសុខាភិបាល បណ្ដុះបណ្ដាលបុគ្គលិកពេទ្យជំនាញឲ្យបានច្រើនថែមទៀត ត្រៀម សម្ភារៈបរិក្ខារពេទ្យឲ្យបានគ្រប់គ្រាន់ ហើយត្រូវធ្វើសកម្មស្វែងរកអ្នកប៉ះពាល់ជាមួយអ្នកជំងឺឲ្យបាន លឿន ដើម្បីកុំឲ្យមានការចម្លងពីម្នាក់ទៅម្នាក់។ ម្យ៉ាងវិញ លោកក៏ស្នើសុំឲ្យរដ្ឋាភិបាល កាត់បន្ថយ ការផ្សព្វផ្សាយគ្រឿងស្រវឹង ហើយបង្កើនការផ្សព្វផ្សាយព័ត៌មាន និងអប់រំដល់ពលរដ្ឋឲ្យកែប្រែទម្លាប់ មួយចំនួន ដែលមានហានិភ័យដល់ការឆ្លងជំងឺ៖ « តាំងពីដើមមក យើងចង់ឃើញវិធានការបង្ការ គឺនៅក្នុងចំណុចខ្ពស់ ដែលអាចបង្ការហានិភ័យកុំឲ្យកើតមាននៅកម្ពុជា។ ទោះបីជាកម្ពុជា មានអាកាសធាតុក្ដៅ តែយើងឃើញថា ចំនួនអ្នកដែលឆ្លងបានឃើញជាហួរហែមកហើយ។ ជាមួយគ្នានេះ ត្រូវមានវិធានការតឹងតែងចំពោះអ្នកដំណើរមកពីក្រៅប្រទេស មិនមែនតែអឺរ៉ុប និងអាមេរិកទេ គឺបូកទាំងចិន និងបណ្ដាប្រទេសផ្សេង ដែលគ្រោះថ្នាក់ខ្លាំង។ ចំពោះព័ត៌មានត្រូវផ្ដល់ឲ្យពលរដ្ឋឲ្យបានទៀងទាត់ និងមានតម្លាភាព កុំឲ្យព័ត៌មានខ្លះដាច់មួយកំណាត់ដោយយើងមិនដឹងថា អ្នកជំងឺ ប៉ះពាល់ជាមួយអ្នកណាខ្លះ ហើយការដែលមិនដឹងនេះហើយ ធ្វើឲ្យប្រជាពលរដ្ឋយើងព្រួយបារម្ភ » ។
កាលពីថ្ងៃទី៤ ខែមីនា រដ្ឋាភិបាលកម្ពុជា បានប្រកាសត្រៀមថវិកា៣០លានដុល្លារអាមេរិកដើម្បីការពារវីរុសកូវីដ-១៩។ អ្នកនាំពាក្យក្រសួងសុខាភិបាល អ្នកស្រី ឱ វណ្ណាឌីន បញ្ជាក់ក្នុងពេល នោះថា កញ្ចប់ថវិកាទាំងនេះ នឹងប្រើប្រាស់ក្នុងការត្រៀមគ្រូពេទ្យប្រចាំការតាមបណ្ដារាជធានីខេត្តមួយចំនួន ការត្រៀមឱសថចាំបាច់ និងការព្យាបាល និងសម្ភារៈអប់រំផ្សេងៗ ។ ប៉ុន្តែគេនៅមិនទាន់ដឹង អំពីផែនការ និងខ្ទង់ចំណាយលំអិតនៃការប្រើប្រាក់៣០លានដុល្លារនោះនៅឡើយទេ។
រដ្ឋាភិបាលកម្ពុជា ហាក់ដូចជាទើបមានជំហរប្រុងប្រយ័ត្នក្នុងពេលថ្មីៗ នេះ ខណៈកន្លងមក លោក ហ៊ុន សែន ប្រកាសថា ជំងឺកូវីដ-១៩គ្មានអ្វីគួរឲ្យខ្លាចនោះទេ និងថាអ្វីដែលគួរឲ្យខ្លាចនោះ គឺជំងឺភ័យខ្លាចជ្រុលហួសហេតុទៅវិញទេ។
គិតត្រឹមថ្ងៃទី១៦ ខែមីនា កម្ពុជាបានរកឃើញអ្នកឆ្លងជំងឺកូវីដ-១៩ ចំនួន ១៣ករណីហើយ ក្នុងនោះមានពលរដ្ឋខ្មែរ ៥នាក់ ក្រៅពីនោះជាជនជាតិបរទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។