ក្រសួងសុខាភិបាលស្នើសុំពលរដ្ឋឱ្យមានការយោគយល់ចំពោះការរង់ចាំចាក់វ៉ាក់សាំងបង្ការជំងឺឆ្កែឆ្កួត និងផ្ដល់អាទិភាពចំពោះអ្នកដែលកំពុងមានបញ្ហា។
ក្នុងរយៈពេលប៉ុន្មានថ្ងៃមកនេះ ពលរដ្ឋខ្មែរជាច្រើននាក់បានសម្រុកទៅចាក់វ៉ាក់សាំងជំងឺឆ្កែឆ្កួតនៅវិទ្យាស្ថានប៉ាស្ទ័រ ក្រោយពេលមានករណីក្មេងស្រីម្នាក់បានស្លាប់ដោយសារជំងឺនេះ។
ក្រសួងសុខាភិបាលស្នើឱ្យពលរដ្ឋដែលមិនទាន់មានសត្វឆ្កែ ឬឆ្មាខាំ ឬក៏មានខាំដែរ តែយូរថ្ងៃមកហើយមិនមានរោគសញ្ញាហានិភ័យនោះ ឱ្យរង់ចាំការចាក់វ៉ាក់សាំង (Vaccine) នេះបន្តិចសិន ដោយត្រូវទុកអាទិភាពឱ្យអ្នកមានហានិភ័យខ្ពស់ ដូចជា អ្នកត្រូវឆ្កែឬឆ្មាខាំហើយមានរោគសញ្ញា ស្ត្រីមានផ្ទៃពោះ និងអ្នកដែលត្រូវចាក់វ៉ាក់សាំងតាមកាលវិភាគជាដើម។
ការអំពាវនាវរបស់ក្រសួងសុខាភិបាលនេះ ធ្វើឡើងតាមរយៈសេចក្ដីជូនដំណឹងមួយច្បាប់ កាលពីថ្ងៃទី២៣ កន្លងទៅ បន្ទាប់ពីមានពលរដ្ឋជាច្រើនបានសម្រុកទៅចាក់វ៉ាក់សាំងបង្ការជំងឺឆ្កែឆ្កួត បង្កឱ្យមានស្ថានភាពកកកុញនៅពេញវិទ្យាស្ថានប៉ាស្ទ័រ។ ការផ្អើលទៅចាក់វ៉ាក់សាំងនេះ គឺដោយសារមានក្មេងស្រីម្នាក់បានបាត់បង់ជីវិតនៅពេលថ្មីៗនេះ ដោយសារត្រូវឆ្មាខ្វាច កាលពីខែធ្នូ ឆ្នាំ២០១៨ កន្លងទៅ ហើយវីដេអូរបស់ក្មេងស្រីរងគ្រោះនេះ ត្រូវបានចែកចាយពេញបណ្ដាញសង្គមហ្វេសប៊ុក។
ក្រសួងសុខាភិបាលបញ្ជាក់ថា ការចាក់វ៉ាក់សាំងបង្ការជំងឺឆ្កែឆ្កួត ធ្វើឡើងជារៀងរាល់ថ្ងៃជូនដល់ពលរដ្ឋទូទៅ នៅវិទ្យាស្ថានប៉ាស្ទ័រកម្ពុជា និងវិទ្យាស្ថានជាតិស្រាវជ្រាវសុខភាពសាធារណៈ ស្ថិតក្នុងរាជធានីភ្នំពេញ និងមណ្ឌលចាក់ថ្នាំបង្ការជំងឺនេះមួយកន្លែងទៀតនៅខេត្តបាត់ដំបង។ ក្រៅពីនេះ ពលរដ្ឋក៏មានជម្រើសចាក់ថ្នាំបង្ការជំងឺនេះនៅតាមមន្ទីរពេទ្យឯកជនដែលមានអាជ្ញាប័ណ្ណត្រឹមត្រូវផងដែរ។
ចំណែកវិទ្យាស្ថានជាតិប៉ាស្ទ័រវិញ បានអះអាងថា វិទ្យាស្ថានមានវ៉ាក់សាំងបង្ការជំងឺឆ្កែឆ្កួតគ្រប់គ្រាន់សម្រាប់ផ្គត់ផ្គង់ជូនអតិថិជន ប៉ុន្តែស្នើសុំការយោគយល់ចំពោះការរង់ចាំយូរ ដោយសារអ្នកទៅទទួលយកសេវាព្យាបាលមានចំនួនកើនឡើងខ្លាំង។ វិទ្យាស្ថានប៉ាស្ទ័រផ្ដល់អាទិភាពដល់អ្នកដែលមានកាលវិភាគត្រូវចាក់បន្ត អ្នកដែលមានមុខរបួសដោយឆ្កែខាំធ្ងន់ធ្ងរ កុមារតូចៗ ព្រះសង្ឃ ជនពិការ មនុស្សចាស់ជរា និងស្ត្រីមានផ្ទៃពោះ។
និស្សិតផ្នែកវេជ្ជសាស្ត្រ លោក ហេង សុធារិទ្ធ កត់សម្គាល់ថា ជំងឺឆ្កែឆ្កួតកើតមានជាយូរមកហើយ ក៏ប៉ុន្តែទើបតែកក្រើកឡើងនៅពេលមានការបង្ហោះវីដេអូជនរងគ្រោះដោយសារជំងឺនេះ នៅលើបណ្ដាញសង្គមហ្វេសប៊ុក កាលពីពេលថ្មីៗនេះ។ លោកបន្តថា ពលរដ្ឋនៅទីក្រុងភ្នំពេញមានការយល់ដឹងច្រើនអំពីជំងឺនេះ ប៉ុន្តែពលរដ្ឋនៅតាមទីជនបទអាចនៅមានការយល់ដឹងទាបនៅឡើយ។ លោកស្នើសុំឱ្យស្ថាប័នជំនាញផ្សព្វផ្សាយឱ្យបានទូលំទូលាយអំពីជំងឺឆ្កែឆ្កួត និងជំងឺដទៃទៀត ដើម្បីបង្កើនការយល់ដឹងរបស់ពលរដ្ឋអំពីបញ្ហាសុខភាព៖ «ឆ្កែខាំ វាមិនមែនសុទ្ធតែធ្វើឱ្យយើងទៅជាឆ្កួតកើតទេ ទាល់តែឆ្កែហ្នឹងវាផ្ទុកមេរោគ។ ជួនកាលស្វា ជួនកាលគោខាំ ឆ្មាខ្វាច ទាល់តែករណីវាផ្ទុកមេរោគ រែប៊ី (Rabies) ហ្នឹង បានវាអាចឆ្លងដល់យើង។ មិនមែនគ្រប់ពួកហ្នឹងខាំ សុទ្ធតែធ្វើឱ្យយើងឆ្លងនោះទេ ក៏ប៉ុន្តែដល់ពេលប្រជាជនយើងឃើញទិដ្ឋភាពក្មេងស្រីហ្នឹង ធ្វើឱ្យគាត់ភ័យខ្លាំង។ អ៊ីចឹងជួនកាលគ្រាន់តែទឹកមាត់ ឬត្រូវសត្វលិឍអ៊ីចឹង គាត់ខ្លាច ឬក៏ខាំតិចតួចដែលឆ្កែហ្នឹងមិនមែនឆ្កួត ឬក៏គោហ្នឹងមិនមែនឆ្កួត គាត់មកចាក់វ៉ាក់សាំង អ៊ីចឹងបានវាផ្អើលទឹកផ្អើលដីហ្នឹងនោះ»។
ក្រសួងសុខាភិបាលណែនាំពលរដ្ឋឱ្យអនុវត្តវិធានការមួយចំនួន ដើម្បីបង្ការហានិភ័យនៃការឆ្លងជំងឺឆ្កែឆ្កួត។ វិធីទាំងនោះរួមមាន កុំលេងជាមួយសត្វឆ្កែ ឬឆ្មា និងការពារកុំឱ្យសត្វឆ្កែ ឬឆ្មាខាំ។ សម្រាប់អ្នកដែលចិញ្ចឹមសត្វឆ្កែ ឬឆ្មាវិញ ក្រសួងសុខាភិបាលណែនាំឱ្យយកសត្វចិញ្ចឹមទាំងនោះទៅចាក់ថ្នាំការពារនៅពេទ្យសត្វ និងត្រូវថែទាំសត្វទាំងនោះឱ្យល្អ កុំឱ្យដើរពាសវាលពាសកាល ដែលអាចខាំគេឯងបាន។
ជំងឺឆ្កែឆ្កួតបានឆក់យកអាយុជីវិតប្រជាពលរដ្ឋខ្មែរប្រមាណ ៨០០នាក់ជារៀងរាល់ឆ្នាំ ហើយប្រហែល ៥០% នៃជនរងគ្រោះ គឺជាកុមារអាយុក្រោម ១៥ឆ្នាំ។ កម្ពុជាបានធ្វើយុទ្ធនាការប្រយុទ្ធប្រឆាំងជំងឺនេះ និងគ្រោងឈានដល់ការលុបបំបាត់ជំងឺនេះនៅឆ្នាំ២០៣០ តាមរយៈការផ្សព្វផ្សាយអំពីគ្រោះថ្នាក់ និងវិធីបង្ការជំងឺឆ្កែឆ្កួត ព្រមទាំងការបង្កើតមជ្ឈមណ្ឌលបង្ការជំងឺនេះនៅតាមបណ្ដាខេត្តមួយចំនួនផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។