លោកនាយករដ្ឋមន្ត្រី ហ៊ុន សែន នៅថ្ងៃទី៤ មីនានេះ បានបញ្ជាទៅក្រសួងស្ថាប័ននានា ឱ្យកាត់បន្ថយការចំណាយពី ២៥ ទៅ ៥០ភាគរយ ដើម្បីត្រៀមថវិកាជាអាទិភាព សម្រាប់ប្រយុទ្ធប្រឆាំងនឹងមេរោគវីរុសកូរ៉ូណា ក្នុងករណីកើតមាន។
ក្រសួងសុខាភិបាលប្រកាសថា រហូតមកដល់ពេលនេះ កម្ពុជានៅពុំទាន់រកឃើញករណីជំងឺកូរ៉ូណាវីរុសប្រភេទថ្មីបន្ថែមទៀតនៅឡើយទេ ហើយថា ក្រុមឆ្លើយតបបន្ទាន់ និងក្រុមគ្រូពេទ្យ ដែលបានបណ្ដុះបណ្ដាលអំពីឆ្លើយតបទៅនឹងជំងឺរាតត្បាតជាង ២.០០០នាក់ កំពុងបន្តតាមដានរុករកករណីសង្ស័យនៅទូទាំងប្រទេស។
មេរោគវីរុស កូរ៉ូណាប្រភេទថ្មី ដែលចាប់ផ្ទុះនៅទីក្រុងវូហាន ប្រទេសចិន នៅតែបន្តឆ្លងរាលដល់ពលរដ្ឋប្រទេសផ្សេងៗ ទៀត ជាង ៦០ នៅលើពិភពលោក។ ក្នុងស្ថានការណ៍ដែលប្រទេសលើលោកកំពុងបារម្ភ និងប្រយុទ្ធទប់ទល់ជាមួយការរាតត្បាតរបស់មេរោគកូរ៉ូណាប្រភេទថ្មីនេះ ធនាគារពិភពលោកសម្រេចបញ្ចេញកញ្ចប់ទឹកប្រាក់បន្ទាន់ចំនួន ១២ពាន់លាន (១២ប៊ីលាន) ដុល្លារ ដើម្បីជួយដល់ប្រព័ន្ធសុខាភិបាលរបស់ប្រទេស ដែលកំពុងអភិវឌ្ឍ សម្រាប់ដោះស្រាយផលប៉ះពាល់សេដ្ឋកិច្ច និងសុខភាព ដែលបណ្ដាលមកពីការរាតត្បាតរបស់មេរោគកូរ៉ូណាប្រភេទថ្មីនេះ។ កញ្ចប់ថវិកានេះ មានគោលដៅប្រើសម្រាប់ធ្វើសកម្មភាពឆ្លើយតបមេរោគនេះ ឱ្យមានប្រសិទ្ធភាព និងបន្ថយផលប៉ះពាល់ឱ្យនៅតិច។
តួលេខនៅថ្ងៃទី៤ មីនា មានអ្នកឆ្លងសរុបឡើងដល់ជាង ៩ម៉ឺន ៣ពាន់នាក់ (៩៣.៤៥៥នាក់) នៅលើពិភពលោក ហើយអ្នកស្លាប់ឡើងដល់ជាង ៣ពាន់ ១រយនាក់ (៣.១៩៨នាក់)។ មេរោគនេះ កំពុងមានសន្ទុះឆ្លងរាលដាលខ្លាំង នៅប្រទេសកូរ៉េខាងត្បូង ដែលពេលនេះ មានពលរដ្ឋកូរ៉េជាង ៥ពាន់ ៦រយនាក់ (៥.៦២១នាក់) បានឆ្លងមេរោគ កូរ៉ូណា ប្រភេទថ្មីនេះ។ បន្ទាប់ពីប្រទេសកូរ៉េខាងត្បូង គឺប្រទេសអ៊ីតាលី មានអ្នកឆ្លងចំនួនជាង ២ពាន់ ៥រយនាក់ (២.៥០២នាក់) និងប្រទេសអ៊ីរ៉ង់ មានចំនួនជាង ២ពាន់ ៣រយនាក់ (២.៣៣៦នាក់)។
ទាក់ទងនឹងវិធានការសេដ្ឋកិច្ចរបស់លោក ហ៊ុន សែន ដែលកាត់បន្ថយការចំណាយរបស់រដ្ឋពាក់កណ្ដាល ដើម្បីយកលុយត្រៀមសម្រាប់ប្រយុទ្ធប្រឆាំងនឹងមេរោគវីរុសកូរ៉ូណាថ្មីនោះ ត្រូវបានអ្នកវិភាគយល់ថា ជាវិធានការគ្មានប្រសិទ្ធភាព។
អ្នកហ៊ានរិះគន់លោក ហ៊ុន សែន ឥតសំចៃមាត់ ដែលកំពុងរស់និរទេសខ្លួននៅប្រទេសហ្វាំងឡង់ គឺលោក គឹម សុខ មើលឃើញថា លោក ហ៊ុន សែន យកវិធានការកាត់បន្ថយការចំណាយនេះទៅប្រើសម្រាប់ធ្វើជានយោបាយមុខមាត់ និងសេដ្ឋកិច្ចគ្រួសាររបស់លោក គឺមិនមែនជាវិធានការជួយទ្រទ្រង់ដំណើររីកចម្រើននៃសេដ្ឋកិច្ចជាតិឡើយ។
សូមលោកអ្នកនាងចុចស្ដាប់សំឡេងពីកិច្ចពិភាក្សារវាងលោក មួង ណារ៉េត និងលោក គឹម សុខ ជុំវិញបញ្ហានេះ...
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។