អាជ្ញាធរខេត្តកំពង់ចាមប្ដេជ្ញាទប់ស្កាត់មិនឲ្យមានការចែកចាយនិងប្រើប្រាស់គ្រឿងញៀន
2016.06.29
អាជ្ញាធរខេត្តកំពង់ចាម ប្ដេជ្ញាពង្រឹងការផ្សព្វផ្សាយ និងការអនុវត្តច្បាប់ ដើម្បីធ្វើយ៉ាងណាទប់ស្កាត់មិនឲ្យមានសកម្មភាពប្រើប្រាស់ និងចែកចាយថ្នាំញៀន។ ការប្ដេជ្ញាចិត្តនេះ ធ្វើឡើងនៅក្នុងវេទិកាអន្តរជាតិប្រយុទ្ធប្រឆាំងការចរាចរ និងប្រើប្រាស់គ្រឿងញៀននៅព្រឹកថ្ងៃទី២៩ មិថុនា ដែលមានអ្នកចូលរួមជាង ៣ពាន់នាក់។ សង្គមស៊ីវិលនៅក្នុងខេត្ត សម្ដែងការគាំទ្រចំពោះការប្ដេជ្ញាចិត្តនេះ។
សារដែលអាជ្ញាធរខេត្តផ្ញើជូនប្រជាពលរដ្ឋក្នុងឱកាសប្រារព្ធទិវាអន្តរជាតិ ប្រយុទ្ធប្រឆាំងការចរាចរ និងការប្រើប្រាស់គ្រឿងញៀន មានដូចជា ត្រូវនិយាយថាទេចំពោះគ្រឿងញៀន។ លើសពីនេះ ពលរដ្ឋត្រូវចូលរួមទាំងអស់គ្នាតាមគ្រប់រូបភាព គ្រប់ពេលវេលា និងគ្រប់ទីកន្លែង ដើម្បីអនាគតខ្លួនយើង និងសហគមន៍យើងគ្មានគ្រឿងញៀន។
ថ្លែងក្នុងពិធីនេះ អភិបាលរងខេត្ត និងជាប្រធានគណៈកម្មាធិការត្រួតពិនិត្យគ្រឿងញៀន ខេត្តកំពង់ចាម លោក ជឹម លាវ បង្ហាញចំណាប់អារម្មណ៍ថា រាជរដ្ឋាភិបាលបានដាក់ចេញនូវវិធានការដ៏រឹងមាំ ដើម្បីទប់ស្កាត់ ឬលុបបំបាត់រាល់ការជួញដូរ និងការប្រើប្រាស់គ្រឿងញៀនខុសច្បាប់ឲ្យអស់ពីប្រទេសកម្ពុជា។ លោកថា គ្រឿងញៀនមិនត្រឹមតែធ្វើឲ្យប៉ះពាល់សន្តិសុខសង្គម និងសេដ្ឋកិច្ចប្រទេសជាតិប៉ុណ្ណោះទេ ប៉ុន្តែវាធ្វើឲ្យប៉ះពាល់ដល់សុវត្ថិភាពប្រជាពលរដ្ឋ ពិសេសយុវវ័យដែលជាកម្លាំងស្នូលក្នុងការអភិវឌ្ឍជាតិ៖ «ដើម្បីឲ្យមានប្រសិទ្ធភាពបំផុត បុគ្គលគ្រប់រូបត្រូវយល់ដឹងពីផលប៉ះពាល់ និងគ្រោះថ្នាក់នៃគ្រឿងញៀន»។
របាយការណ៍របស់ស្នងការដ្ឋាននគរបាលខេត្តកំពង់ចាម បង្ហាញថា អ្នកប្រើប្រាស់ថ្នាំញៀនកាលពីឆ្នាំ២០១៥ មានចំនួន ៤១៩នាក់។ ចំនួននេះ គឺកើនឡើងជាង ១០០នាក់ បើប្រៀបធៀបនឹងឆ្នាំ២០១៤។ លើសពីនេះ ក្នុងរយៈពេលមួយឆ្នាំសម្រាប់ឆ្នាំ២០១៥ សមត្ថកិច្ចបង្ក្រាបបទល្មើសគ្រឿងញៀនសរុបចំនួន ១៤២ករណី ចាប់ជនសង្ស័យបាន ២៧៨នាក់ ក្នុងនោះស្រីចំនួនជាង ៣០នាក់ ហើយមានជនជាតិវៀតណាម ម្នាក់ ព្រមទាំងដកហូតគ្រឿងញៀនប្រភេទម្សៅក្រាមពណ៌សជិត ២០០ក្រាម (១៩៦,០១ក្រាម)។ ចំណែកនៅឆមាសទី១ ឆ្នាំ២០១៦ វិញ សមត្ថកិច្ចខេត្តកំពង់ចាម បង្ក្រាបបានចំនួន ១០៤ករណី ចាប់ខ្លួនជនសង្ស័យបាន ២៤៥នាក់ ក្នុងនោះស្រី ១៩នាក់។ ចំនួនត្រឹមឆមាសទី១ ឆ្នាំ២០១៦ នេះ គឺជិតស្មើនឹងចំនួនបង្ក្រាបរយៈពេលមួយឆ្នាំកាលពីឆ្នាំ២០១៥។ ចំណែកគ្រឿងញៀនវិញ គឺសមត្ថកិច្ចដកហូតបានចំនួនជាង ៣០០ក្រាម (៣៣៤,៦១ក្រាម) ដែលលើសជាងពាក់កណ្ដាលបើប្រៀបធៀបនឹងឆ្នាំ២០១៥។
ក្នុងឱកាសនោះ ក៏មានការប្ដេជ្ញាចិត្តពីសំណាក់តំណាងប្រជាពលរដ្ឋ មន្ត្រីរាជការ និងសិស្សនិស្សិតថា ត្រូវចូលរួមទប់ស្កាត់មិនឲ្យមានការប្រើប្រាស់ ឬចែកចាយគ្រឿងញៀនក្នុងសហគមន៍ឡើយ។ ជាងនេះទៀត ពួកគេចង់ឲ្យយុវជនត្រូវស្ថិតនៅឲ្យឆ្ងាយពីថ្នាំញៀន មិនត្រូវសាកល្បងជាដាច់ខាត។ ក្រៅពីប្ដេជ្ញាចិត្តហើយ អ្នកចូលរួមថែមទាំងបានដើរហែក្បួនផ្សព្វផ្សាយនៅក្រុងកំពង់ចាម ដើម្បីជាសារអប់រំដល់ប្រជាពលរដ្ឋ។
ជាមួយគ្នានោះ អាជ្ញាធរបានដុតបំផ្លាញចោលនូវគ្រឿងញៀនដែលបង្ក្រាបបានកន្លងមកទៀតផង។
ស្នងការរង និងជាអនុប្រធានអចិន្ត្រៃយ៍លេខាធិការដ្ឋានត្រួតពិនិត្យគ្រឿងញៀន ខេត្តកំពង់ចាម លោកឧត្ដមសេនីយ៍ត្រី ឯម កុសល មានប្រសាសន៍ថា កន្លងមក អាជ្ញាធរបានខិតខំប្រឹងប្រែងអប់រំ និងផ្សព្វផ្សាយដល់ប្រជាពលរដ្ឋតាមមូលដ្ឋាន ឲ្យយល់ដឹងអំពីច្បាប់ និងផលប៉ះពាល់នៃគ្រឿងញៀន។ លើសពីនេះទៀត សមត្ថកិច្ចបានចាត់ទុកបញ្ហាថ្នាំញៀនជាបញ្ហាអាទិភាព ដើម្បីស្រាវជ្រាវរកកូនប្រជាពលរដ្ឋញៀនថ្នាំ ហើយសមត្ថកិច្ចត្រូវណែនាំ និងបញ្ជូនពួកគេទៅមណ្ឌលកែប្រែ ព្រមទាំងបានបង្ក្រាបជាច្រើនករណីរហូតបានលេខមួយទូទាំងប្រទេសទៀតផង។
លោក ឯម កុសល បញ្ជាក់ថា យុទ្ធសាស្ត្របន្តទៀត អាជ្ញាធរនឹងស្រាវជ្រាវរកមុខសញ្ញាអ្នកប្រើប្រាស់គ្រឿងញៀន ដើម្បីអប់រំណែនាំឲ្យពួកគាត់ត្រឡប់មកផ្លូវល្អវិញ និងត្រូវចាកឆ្ងាយពីគ្រឿងញៀន។ បន្ថែមពីនេះ លោកប្ដេជ្ញាថានឹងធ្វើការងារទាំងនេះដូចភ្លៀងរលឹម៖ «យើងនឹងប្ដេជ្ញាថា ធ្វើម៉េចដើម្បីកាត់បន្ថយបញ្ហាគ្រឿងញៀន មិនឲ្យនៅក្នុងខេត្ត នៅស្រុករបស់យើងនៅតាមមូលដ្ឋានភូមិ-ឃុំរបស់យើង»។
មន្ត្រីសម្របសម្រួលអង្គការការពារសិទ្ធិមនុស្សលីកាដូ (LICADHO) ខេត្តកំពង់ចាម លោក ប៊ូ វីរៈ គាំទ្រចំពោះវិធានការរបស់អាជ្ញាធរទាំងនេះ ប៉ុន្តែលោកស្នើឲ្យសមត្ថកិច្ចត្រូវស្វែងរកឧក្រិដ្ឋជនជួញដូរគ្រឿងញៀនធំៗនៅស្រុកខ្មែរមកផ្ដន្ទាទោស និងត្រូវលុបបំបាត់អំពើពុករលួយ ដែលជាហេតុនាំឲ្យការអនុវត្តច្បាប់មិនបានស្មើភាពគ្នា។ លោកថា ប្រសិនបើសមត្ថកិច្ចអាចចាប់មេជួញដូរគ្រឿងញៀនធំៗបាន នោះទើបធ្វើឲ្យការប្ដេជ្ញាចិត្តទប់ស្កាត់ ឬកាត់បន្ថយការប្រើប្រាស់គ្រឿងញៀនរបស់ពួកគេមានប្រសិទ្ធភាព។ លោកសង្កេតឃើញថា អ្នកជាប់ពន្ធនាគារពាក់ព័ន្ធបញ្ហាថ្នាំញៀនបច្ចុប្បន្ន គឺភាគច្រើនជាអ្នកប្រើប្រាស់ ឬជាជនរងគ្រោះប៉ុណ្ណោះ ចំណែកឈ្មួញជួញដូរថ្នាំញៀនធំៗវិញ គឺមិនឃើញមានឡើយ៕