អ្នកវិភាគថា ការលាក់ព័ត៌មានមន្ត្រីជាន់ខ្ពស់ខ្មែរដែលផ្ទុកកូវីដ-១៩ យូរ គឺជានយោបាយក្បត់ពលរដ្ឋ
2020.03.22
អ្នកវិភាគនយោបាយ និងសង្គមថា ការលាក់ព័ត៌មានមន្ត្រីជាន់ខ្ពស់ខ្មែរ ដែលផ្ទុកជំងឺកូវីដ-១៩ ដ៏យូរបែបនេះ គឺជានយោបាយក្បត់ប្រជាពលរដ្ឋខ្លួនឯង។ ប្រតិកម្មនេះ ធ្វើឡើងក្រោយនាយកដ្ឋានប្រយុទ្ធនឹងជំងឺឆ្លង រង់ចាំដល់ថ្ងៃទី២២ ខែមីនា ទើបហ៊ានចេញមុខប្រកាសជាលើកដំបូងថា ពិតជាមានមន្ត្រីជាន់ខ្ពស់ខ្មែរម្នាក់ ផ្ទុកជំងឺនេះមែន បើទោះបីក្រសួងសុខាភិបាល រកឃើញគាត់ផ្ទុកមេរោគនេះ ជាងមួយសប្ដាហ៍ទៅហើយក្ដី។
អ្នកវិភាគនយោបាយ និងសង្គម ដែលហ៊ានរិះគន់របបក្រុងភ្នំពេញឥតសំចៃមាត់ និងកំពុងរស់នៅនិរទេសខ្លួន នៅប្រទេសហ្វាំងឡង់ លោក គឹម សុខ ថា ការចេញមកបកស្រាយរបៀបយឺតពេលបែបនេះ គឺគ្រាន់តែជាការដោះសារ កុំឲ្យបាក់មុខប៉ុណ្ណោះ។ ជាងនេះទៅទៀត លោកថាការណ៍នេះ មិនត្រឹមតែមិនអាចជួយស្ដារមុខមាត់របបក្រុងភ្នំពេញបានប៉ុណ្ណោះទេ ប៉ុន្តែវារឹតតែបង្ហាញពីភាពខ្វះតម្លាភាព និងភាពមិនស្មោះត្រង់របស់របបក្រុងភ្នំពេញ ជុំវិញរបាយការណ៍ពិត នៃអ្នកផ្ទុកជំងឺកូវីដ-១៩ នៅកម្ពុជានេះទៅទៀត។
លោក គឹម សុខ ថាលេសបែបនេះ ពិបាកទទួលយកបានណាស់៖ «តើទទួលយកយ៉ាងម៉េចនឹងបាន? បើអះអាងថា មន្ត្រីរូបនោះ មាននៅក្នុងបញ្ជីយូរហើយ ហើយក៏ដឹងថា គាត់មានផ្ទុកជំងឺកូវីដ-១៩ ហើយដែរ។ ក៏ប៉ុន្តែ បែរជាមិនបានបញ្ចេញព័ត៌មានពិត ឲ្យប្រជាពលរដ្ឋដឹង។ នេះមានន័យថា មានបំណងអាក្រក់ជាមួយប្រជាពលរដ្ឋទូទៅហើយ។ មិនប្រាប់ឲ្យប្រជាពលរដ្ឋដឹង និងមន្ត្រីរាជការជាមិត្តភ័ក្ដិនៅក្បែរៗ គាត់ដឹង គឺដូចទុកឲ្យមានការឆ្លងរីករាលដាលដល់អ្នកផ្សេងៗ ទៀត និងប្រជាពលរដ្ឋអ៊ីចឹង! ដូច្នេះវាទៅជានយោបាយក្បត់ប្រជាពលរដ្ឋ ប៉ងសម្លាប់ប្រជាពលរដ្ឋដូច ប៉ុល ពត ទៅហើយ»។
ព័ត៌មានអំពីមន្ត្រីជាន់ខ្ពស់ក្រសួងការបរទេស ឆ្លងជំងឺកូវីដ-១៩នេះ ទើបតែត្រូវបែកការណ៍ក្រោយកូនប្រុសទីពីររបស់លោក ហ៊ុន សែន និងជាប្រធានអគ្គនាយកដ្ឋានស្រាវជ្រាវចារកិច្ច នៃក្រសួងការពារជាតិគឺលោក ហ៊ុន ម៉ានិត កាលពីដើមសប្ដាហ៍កន្លងទៅ បាននិយាយអំពីមន្ត្រីជាន់ខ្ពស់នៅក្រសួងការបរទេសម្នាក់ ដែលមានផ្ទុកជំងឺនេះ ប៉ុន្តែគ្មានរាយការណ៍ទៅក្រសួងសុខាភិបាល ដើម្បីចុះក្នុងបញ្ជីនៃអ្នកដែលផ្ទុកជំងឺនេះទេ៖ «អគ្គនាយកម្នាក់នៅក្រសួងការបរទេសបានឆ្លង ហើយមុនគាត់មកហ្នឹង គាត់ជួបជាមួយទូតយើងនិងបាយជាមួយគ្នា បន្ទាប់មកគាត់ជួយជាមួយនឹងក្រសួងការពារជាតិម្នាក់ដែលគាត់ការងារសកម្មដែរ។ ដូច្នេះការរាលដាលច្រើនដែរ។ ការរាលដាលច្រើន»។
ក្រោយការបែកធ្លាយសារសំឡេងនេះ រដ្ឋមន្ត្រីក្រសួងការបរទេសលោក ប្រាក់ សុខុន ទទួលស្គាល់ថា ពិតជាមានមន្ត្រីក្រសួងការបរទេសម្នាក់ ផ្ទុកមេរោគនេះមែន។ ប៉ុន្តែរបាយការណ៍បច្ចុប្បន្នភាពនៃអ្នកផ្ទុកជំងឺនេះសរុបនៅទូទាំងប្រទេសកម្ពុជា នៅតែគ្មានរៀបរាប់អំពីមន្ត្រីនេះដដែល។
ក្រោយការផ្សាយរបស់អាស៊ីសេរី ដែលទាមទារឲ្យមានការស្រាយបំភ្លឺជុំវិញរឿងមិនបញ្ចូលឈ្មោះមន្ត្រីរូបនោះ ទៅក្នុងបញ្ជីរួមនៃអ្នកផ្ទុកមេរោគ ទើបនាយកដ្ឋានប្រយុទ្ធនឹងជំងឺឆ្លង កាលពីថ្ងៃទី២២ ខែមីនា បានបង្ហោះសារនៅលើទំព័រហ្វេសប៊ុកផ្លូវការរបស់ខ្លួន នាយកដ្ឋាននេះអះអាងថា បានបញ្ចូលទិន្នន័យមន្ត្រីជាន់ខ្ពស់ម្នាក់នេះ នៅក្នុងបញ្ជីរួមតាំងពីថ្ងៃទី១៨ ខែមីនាមកម្ល៉េះ។ នាយកដ្ឋានប្រយុទ្ធនឹងជំងឺឆ្លង រៀបរាប់ថា មន្ត្រីជាន់ខ្ពស់ម្នាក់នោះ គឺជាជនជាតិខ្មែរ ធ្វើដំណើរពីស្រុកបារាំង។ នាយកដ្ឋាននេះ ក៏បានស្នើឲ្យសាធារណជនពិនិត្យមើលតារាងទិន្នន័យរួម នៅថ្ងៃទី១៨ ខែមីនា ដែលដាក់ថា នៅភ្នំពេញ មានអ្នកផ្ទុកជំងឺនេះម្នាក់ជាខ្មែរ និងឲ្យពិនិត្យក្នុងតារាងចាស់គូសរង្វង់ក្រហម ដែលភ្ជាប់មកជាមួយក្នុងទំព័រហ្វេសប៊ុកនោះ។ នាយកដ្ឋាននេះបន្ថែមថា ខ្លួនគ្មានហេតុផលលាក់ទិន្នន័យនោះទេ ហើយខ្លួនធ្វើតាមជំនាញបច្ចេកទេស ដោយមានកិច្ចសហការជិតស្និទ្ធជាមួយអង្គការសុខភាពពិភពលោក (WHO) និងផ្នែកប្រយុទ្ធជំងឺឆ្លងអាមេរិក និង វិទ្យាស្ថានប៉ាស្ទ័រកម្ពុជា។
ជាការពិត អាស៊ីសេរីបានផ្ទៀងផ្ទាត់តារាងករណីជំងឺកូវីដ-១៩ នៅក្នុងប្រទេសកម្ពុជា គិតត្រឹមថ្ងៃទី១៨ ខែមីនានោះ ឃើញរង្វង់ក្រហមដែលនាយកដ្ឋាននេះគូសលើ ជនជាតិខ្មែរម្នាក់ ដែលស្ថិតក្នុងចំណោមអ្នកផ្ទុកជំងឺនេះ ទាំង ៩នាក់ដែលរកឃើញនៅថ្ងៃនោះ។ ក្រៅពីជនជាតិខ្មែរម្នាក់នោះ គឺមានជនជាតិចាម ដែលនាយកដ្ឋាននេះដាក់ថា ខ្មែរឥស្លាម ៤នាក់ ជនជាតិប៊ែលហ្សិកម្នាក់ ជនជាតិកាណាដាម្នាក់ និងជនជាតិបារាំង ២នាក់។
ទោះជាយ៉ាងនេះក្តី នាយកដ្ឋានប្រយុទ្ធប្រឆាំងនឹងជំងឺឆ្លង មិនបានបញ្ជាក់ថា ជនជាតិខ្មែរម្នាក់នោះ ជាមន្ត្រីជាន់ខ្ពស់រដ្ឋាភិបាល ឬជាមន្ត្រីនៅក្រសួងណានោះដែរ។
អាស៊ីសេរី ក៏បានផ្ទៀងផ្ទាត់ទិន្នន័យនេះ ទៅនឹងសេចក្តីជូនដំណឹងរបស់ក្រសួងសុខាភិបាល កាលពីថ្ងៃទី១៥ ខែមីនា ស្ដីពីការរកឃើញករណីថ្មីទៀត នៃអ្នកផ្ទុកជំងឺនេះ ដោយកាលណោះក្រសួងសុខាភិបាល រៀបរាប់អ្នកផ្ទុកជំងឺជាជនជាតិខ្មែរនោះ ត្រឹមតែបុរសជនជាតិខ្មែរម្នាក់ ក្រោយពីត្រលប់មកពីប្រទេសបារាំងវិញ មានលទ្ធផលធ្វើតេស្តវិជ្ជមានមេរោគកូរ៉ូណាថ្មី ដែលតម្រូវឲ្យព្យាបាលនៅក្នុងមន្ទីរពេទ្យមិត្តភាពខ្មែរ-សូវៀត។
ក្រសួងសុខាភិបាលនៅពេលនោះ ក៏មិនបានបញ្ជាក់ថា បុរសខ្មែរម្នាក់នោះ ជាមន្ត្រីជាន់ខ្ពស់របស់រដ្ឋាភិបាលកម្ពុជា ឬជាមន្ត្រីនៅក្រសួងណានោះដែរ។ ទោះតែក្រោយការបែកធ្លាយសារលោក ហ៊ុន ម៉ានិត និងក្រោយការផ្សាយរបស់អាស៊ីសេរី ជាបន្តបន្ទាប់ ជុំវិញការទាមទារសុំឲ្យបំភ្លឺរឿងនេះប៉ុណ្ណោះ ទើបនៅពេលនេះនាយកដ្ឋានប្រយុទ្ធប្រឆាំងនឹងជំងឺឆ្លង ប្រាប់ជាលើកដំបូងថាបុរសខ្មែរម្នាក់នោះ គឺជាមន្ត្រីជាន់ខ្ពស់រដ្ឋាភិបាល ហើយក៏មិនប្រាប់ថាមន្ត្រីនេះ ធ្វើការនៅក្រសួងណានៅដែរ បើទោះបីលោក ហ៊ុន ម៉ានិត ថា ជាប្រធាននាយកដ្ឋានមួយនៃក្រសួងការបរទេស និងរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បញ្ជាក់ប្រាប់អាស៊ីសេរី ក្រោយយើងសុំការបភ្លឺថា មន្ត្រីនោះពិតជាធ្វើការនៅក្រសួងការបរទេសមែនក៏ដោយ។
ជាគោលការណ៍សាកល នៃក្រមសីលធម៌វិជ្ជាជីវៈវេជ្ជសាស្ត្រ របាយការណ៍អំពីអ្នកផ្ទុកជំងឺកូវីដ-១៩ នេះ ឬក៏ជំងឺអ្វីទៀតផ្សេង គឺមិនត្រូវបង្ហាញអត្តសញ្ញាណផ្ទាល់ខ្លួនរបស់អ្នកជំងឺនោះទេ។ អត្តសញ្ញាណផ្ទាល់ខ្លួនដែលមិនត្រូវបង្ហាញនោះ រួមមានឈ្មោះ តួនាទី និងអាសយដ្ឋានរបស់អ្នកជំងឺ។
ប៉ុន្តែ ក្រមសីលធម៌នេះ មិនបានហាមឃាត់ ក្នុងបង្ហាញអំពីព័ត៌មានទូទៅ អំពីអ្នកជំងឺ ដូចជាគាត់មានសញ្ជាតិអ្វី គាត់មកពីខេត្តណា ឬធ្វើការនៅស្ថាប័នណាមួយនោះទេ ដរាបណាមិនបង្ហាញព័ត៌មានផ្ទាល់ខ្លួន ដូចជាឈ្មោះ តួនាទី និងអាសយដ្ឋានរបស់ជននោះ។
ក្រសួងសុខាភិបាល បានបង្ហាញព័ត៌មានច្រើនអំពីអ្នកជំងឺដទៃ ដែលឆ្លងជំងឺនេះ ដោយដាក់រហូតដល់ភូមិរបស់អ្នកជំងឺទៀតផង ដូចជា បុរសខ្មែរម្នាក់នៅភូមិឬស្សី ក្រុងសេរីសោភ័ណជាដើម។
ក្នុងរយៈពេលប៉ុន្មានថ្ងៃចុងក្រោយនេះ មន្ត្រីក្នុងជួររបបលោក ហ៊ុន សែន ដែលបានដឹងរឿងមន្ត្រីជាន់ខ្ពស់ឆ្លងជំងឺនេះ លួចខ្សឹបខ្សៀវគ្នា និងចែកផ្សាយរូបរបស់មន្ត្រីរូបនោះ នៅក្នុងបណ្តាញរបស់ខ្លួន ដើម្បីប្រាប់ទៅសហការី បងប្អូន និងក្រុមគ្រួសារពួកគាត់ឲ្យប្រុងប្រយ័ត្នខ្ពស់ និងកុំឲ្យទៅក្បែរមនុស្ស ដែលបុរសនោះបានជួបផ្ទាល់។
លោក គឹម សុខ ថា ការណ៍ដែលរបបក្រុងភ្នំពេញ មិនហ៊ានបង្ហាញប្រាប់ថា បុរសជនជាតិខ្មែរនៅភ្នំពេញ ជាមន្ត្រីជាន់ខ្ពស់នៃក្រសួងការបរទេសនេះ គឺជាគ្រោះថ្នាក់ធំបំផុត និងបង្កើតការភ័យខ្លាចកាន់តែខ្លាំង ក្នុងចំណោមពលរដ្ឋខ្មែរ ដែលកំពុងព្រួយបារម្ភខ្លាំងរឿងរាតត្បាតនៃជំងឺនេះស្រាប់៖ «ដោយសារតែក្រុមលោក ហ៊ុន សែន លាក់បាំងព័ត៌មានហ្នឹងហើយ ឧទាហរណ៍សូម្បីតែមន្ត្រីជាន់ខ្ពស់នៅក្រសួងការបរទេស គេអត់បញ្ចេញឲ្យដឹងផងថា គាត់បានឆ្លងមេរោគកូរ៉ូណា។ ហើយអ្នកទាំងនោះ មិនដឹងឆ្លងទៅអ្នកណាផ្សេងទៀត ប៉ុន្មានអ្នកទៀត។ ដូច្នេះទំហំនៃការឆ្លងនេះ ខ្ញុំគិតថា វាធំជាងអ្វីដែលជារបាយការណ៍របស់រដ្ឋាភិបាល។ ដោយសារតែក្រុមលោក ហ៊ុន សែន អត់បានបង្ហាញនូវមូលដ្ឋានទំនុកចិត្តណាមួយនៃវិធានការបង្ការផង ដើម្បីកម្ចាត់ផង ដើម្បីព្យាបាលផង រក្សានូវស្មារតី និងទឹកចិត្តប្រជាពលរដ្ឋ ឲ្យចូលរួមសកម្មផង ដូច្នេះប្រជាពលរដ្ឋខ្លាចហើយ»។
អ្នកវិភាគនយោបាយ និងសង្គមនេះថា ក្រសួងសុខាភិបាលកម្ពុជា អនុវត្តស្តង់ដារពីរជុំវិញការបង្ហាញព័ត៌មានអំពីអ្នកផ្ទុកជំងឺកូវីដ-១៩ នេះ ជាពិសេសព័ត៌មានដែលប៉ះពាល់នឹងមន្ត្រីរដ្ឋាភិបាល និងជនជាតិចិន៕