ពលរដ្ឋ​ភាគ​ច្រើន​ផ្អាក​បរិភោគ​សាច់​ជ្រូក​ បន្ទាប់​ពី​ជំងឺ​ប៉េស្ត​ជ្រូក​រាល​ដាល​កាន់តែ​ខ្លាំង​

ដោយ ហេង រស្មី
2019-07-15
អ៊ីម៉ែល
មតិ
Share
បោះពុម្ព
សាច់ជ្រូក ដែល​គេ​ដាក់​លក់​ក្នុង​ផ្សារ​មួយ​ នៅ​រាជធានីភ្នំពេញ។
សាច់ជ្រូក ដែល​គេ​ដាក់​លក់​ក្នុង​ផ្សារ​មួយ​ នៅ​រាជធានីភ្នំពេញ។
RFA

ពលរដ្ឋ​រស់នៅ​តាម​បណ្តាល​ខេត្ត​មួយចំនួន​ និង​រាជធានី​ភ្នំពេញ​ ភ័យខ្លាច​ក្នុង​ការ​បរិភោគ​សាច់​ជ្រូក​ បន្ទាប់ពី​ជំងឺ​ប៉េស្ត​ជ្រូក​អាហ្វ្រិក​ បាន​រីក​រាល​ដាល់​ កាន់តែ​ខ្លាំង​ឡើង​ក្នុង​ប្រទេស​កម្ពុជា​។ មន្ត្រី​សង្គម​ស៊ីវិល​បារម្ភ​ថា​ ឥទ្ធិពល​ជំងឺ​នេះ​ បង្ក​ឲ្យ​ប៉ះពាល់​ធ្ងន់ធ្ងរ​ដល់​អ្នក​ចិញ្ចឹម​ជ្រូក​ ជាពិសេសគឺ ​ជីវភាព​របស់​អាជីវករ​លក់​សាច់​ជ្រូក​តាម​ទីផ្សារ​។

ក្រុម​អង្គការ​សង្គម​ស៊ីវិល​ និង​ពលរដ្ឋ​ចាត់​ទុក​ ការ​រីក​រាលដាល​ជំងឺ​ប៉េស្ត​ជ្រូក​កាន់​តែខ្លាំង​ឡើង​មាន​ន័យ​ថា​ វិធានការ​ទាំង​ឡាយ​របស់​រដ្ឋាភិបាល គឺ​គ្មាន​ប្រសិទ្ធភាព។ ពួកគេ​មើល​ឃើញ​ថា មក​ទល់​ពេល​នេះ​ មិន​ទាន់​ឃើញ​មាន​សមត្ថកិច្ច​ព្រំដែន​ណា​មួយ​ ទទួល​ខុស​ត្រូវ​ចំពោះ​មុខ​ច្បាប់​នោះ​ទេ​ ពាក់ព័ន្ធ​ការ​ឃុបឃិតជាមួយ​ពាណិជ្ជករ​វៀតណាម​បណ្តោយ​ ឲ្យ​នាំ​ជ្រូក​ចូល​កម្ពុជា។

ជនជាតិ​ដើម​ភាគតិច​ចារ៉ាយ​ រស់នៅ​ភូមិ​គង់​ធំ​ ឃុំ​ប៉ាតេ​ ស្រុក​អូរយ៉ាដាវ​ ខេត្តរតនគិរី​ លោក​ សេវ​ វ៉ាន់​លី​ ឲ្យដឹង​ថា​ ជំងឺ​ប៉េស្ត​ជ្រូក​នេះ​ បាន​សម្លាប់​ជ្រូក​អ្នកភូមិ​ដែល​ចិញ្ចឹម​លក្ខណៈ​ប្រពៃណី​ ស្ទើរតែ​ដាច់​ពូជ​ ហើយ​មកទល់​ពេលនេះ​ ជំងឺ​នេះ​បាន​ឆ្លង​រាលដាល​កាន់តែ​ខ្លាំង​ដល់​តំបន់​ផ្សេងទៀត​ក្នុង​ខេត្តរតនគិរី​។ លោក​ថា​ កាលពី​អំឡុង​ខែមីនា​កន្លងទៅ​ ជំងឺ​ប៉េស្ត​ជ្រូក​ បាន​ឆ្លង​ចូល​ជាលើកដំបូង​ក្នុង​ឃុំ​សោមធំ​ជាប់​ព្រំដែន​កម្ពុជា​-រៀ​តណាម​ បន្ទាប់មក​ឆ្លង​ចូល​ឃុំ​យ៉ាទុង​ និង​ឃុំ​ប៉ាតេ​ ស្រុក​អូរ​យ៉ាដាវ។ លោក​ថា អ្នកភូមិ​កំពុង​ភ័យខ្លាច​មិន​ហ៊ាន​បរិភោគ​សាច់​ជ្រូក​នោះ​ទេ៖ «សម្រាប់​នៅ​ស្រុក​អូរ​យ៉ាដាវ កើត​ជំងឺ​ខែ៣ សម្រាប់​នៅ​ឃុំ​ប៉ាតេ ជ្រូក​កើត​ជំងឺ​តាំង​ពី​ខែ៤ វា​ងាប់​អស់​រលីង​គ្មាន​សល់។ បើ​អ្នក​ភូមិ​ត្រូវ​ការ​ជ្រូក​សែនព្រេន​ក៏​គ្មាន​ដែរ ទោះ​បី​មាន​ក៏​គាត់​មិន​ហ៊ាន​ហូប​ដែរ ព្រោះ​គាត់​ហូប​អាច​ប៉ះ​ពាល់​សុខភាព​របស់​គាត់»

ពលរដ្ឋ​រស់នៅ​រាជធានី​ភ្នំពេញ​ លោក​ ឈុំ​ ឈឿន​ ឲ្យដឹង​ថា​ គ្រួសារ​លោក​បាន​ផ្អាក​បរិភោគ​សាច់​ជ្រូក​ជាច្រើន​ខែ​មក​ហើយ​ ព្រោះ​ភ័យខ្លាច​ជំងឺ​ដ៏​សាហាវ​នេះ។ លោក​ថា កសិករ​ភាគ​ច្រើន​បាន​ខ្ចីបុល​ពី​ធនាគារ​ ដើម្បី​ធ្វើ​ដើមទុន​ចិញ្ចឹម​ជ្រូក​ លក់​បង្វិល​សង​ម្ចាស់​បំណុល​វិញ​ តែបើ​ជំងឺ​នេះ​ផ្ទុះ​ឡើង​ហើយ​នោះ​ ពួក​គេ​នឹង​ប្រឈម​ខាត​បង់​ប្រាក់​ចំណូល​ និង​ជីវភាព​ធ្លាក់​ចុះ៖ «ពេល​មាន​ជំងឺ​នេះ​កើត​មក ប្រាកដក​ជា​ប្រឈម​ការ​ខាត​បង់ ខ្លះ​គាត់​យក​លុយ​ធនាគារ មក​ខ្ចី​បុល​គេ​មក​ប្រើ​អ៊ីចឹង​ទៅ ធ្វើ​ឲ្យ​គាត់​ខាត​បង់ គាត់​លំបាក​បង្វិល​អាច​ជា​បញ្ហា​ធ្ងន់ ធ្វើ​ឲ្យ​គាត់​ប្រឈម​លក់​ផ្ទះ​សម្បែង និង​ដីធ្លី ដើម្បី​សង​ធនាគារ​ទាំង​អស់​នោះ»

ថ្មីៗ នេះ​ ក្រសួង​កសិកម្ម​ សម្រេច​ផ្អាក​ជា​បណ្តោះអាសន្ន​ ការ​ចិញ្ចឹម​ ទិញ​ លក់​ និង​ដឹកជញ្ជូន​សត្វ​ជ្រូក​ និង​ផលិតផល​មាន​ដើមកំណើត​ពី​សត្វ​ជ្រូក​គ្រប់​ប្រភេទ​ ចេញពី​តំបន់​ផ្ទុះ​ជំងឺ​ប៉េស្ត​ជ្រូក​អាហ្វ្រិក។ លើស​ពីនេះ​ ក្រសួង​នឹង​ចាត់បញ្ជូន​មន្ត្រី​ជំនាញ​បសុព្យាបាល​ ចុះ​ពិនិត្យ​ និង​វិភាគ​ នៅ​តំបន់​ផ្ទុក​ជម្ងឺ​ ដើម្បី​រក​មេរោគ​ជំងឺ​ប៉េស្ត​ជ្រូក​អាហ្វ្រិក។ ក្នុងករណី​ ពុំ​មាន​វត្តមាន​ជំងឺ​ប៉េស្ត​ជ្រូក​អាហ្វ្រិក​ទេ​ ក្រសួង​នឹង​អនុញ្ញាត​ឱ្យ​ អាជីវករ​លក់​សត្វ​ជ្រូក​ចេញពី​តំបន់​នោះ​ ដើម្បី​ផ្តល់​លទ្ធភាព​ជូន​ប្រជាជន​រក​ ប្រាក់​ចំណូល​ ក្នុង​ការ​ទូទាត់​ចំណាយ​ដែល​បាន​ខិតខំ​ចិញ្ចឹម​កន្លងមក។

អាស៊ី​សេរី​បាន​ទាក់ទង​អ្នក​នាំ​ពាក្យ​ក្រសួង​កសិកម្ម​ លោក​ ស្រី​ វុឌ្ឍី​ ដើម្បី​សុំ​ការ​អធិប្បាយ​ជុំវិញ​ករណី​នេះ​ តែ​ទូរស័ព្ទ​ហៅ​ចូល​គ្មាន​អ្នក​ទទួល​នៅ​ថ្ងៃ​ទី១៤ កក្កដា។

ទោះ​យ៉ាង​ណា​អគ្គនាយក​ដ្ឋាន​សុខភាព​សត្វ​ និង​ផលិតកម្ម​សត្វ​ លោក​ តាន់​ ផាន់​ណា​រ៉ា​ ប្រាប់​កាសែត​ក្នុង​ស្រុក​ថា​ ក្នុង​ចំណោម​ជ្រូក​ជាង​ ២ពាន់​ក្បាល មាន​ជ្រូក ៧៩៨​ក្បាល ត្រូវ​បាន​សម្លាប់​ចោល​ និង​មាន​ជ្រូក​ជាង​ ១ពាន់​ក្បាល​ផ្សេងទៀត​ងាប់​ដោយសារ​ជំងឺ​ប៉េស្ត​ជ្រូក​អាហ្វ្រិក​នេះ​។ លោក​ថា​ ក្រសួង​កសិកម្ម​ បាន​បិទ​ការនាំចូល​ជ្រូក​ពី​វៀតណាម​ ក៏ប៉ុន្តែ​អនុញ្ញាត​ឲ្យ​នាំចូល​ជ្រូក​ពី​ថៃ​ ក្នុង​ចន្លោះ​ពី​ ១.៥០០​ក្បាល ទៅ ២.០០០ ដើម្បី​ផ្គត់ផ្គង់​តម្រូវ​ការ​ពលរដ្ឋ។

ប្រធាន​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា​លោក​ សន​ ជ័យ​ យល់ថា​ ឥទ្ធិពល​ជំងឺ​ប៉េស្ត​ជ្រូក​នេះ​នឹង​ធ្វើឲ្យ​ប៉ះពាល់​ធ្ងន់ធ្ងរ​ដល់​កសិករ​ ហេតុនេះ​ក្រសួង​កសិកម្ម​ត្រូវ​រក​មធ្យោបាយ​ចែករំលែក​ ការខាតបង់​ របស់​កសិករ​ តាមរយៈ​វិធានការ​ឆ្លើយតប​ជាគោល​នយោបាយ​ និង​រក​វិធានការ​ទប់ទល់​ជំងឺ​នេះ​មិន​ឲ្យ​ឆ្លង​រាលដាល​កាន់តែ​ខ្លាំង​។ លោក​ថា​ រដ្ឋាភិបាល​មិន​គួរ​ព្រងើយកន្តើយ​ ចំពោះ​កសិករ​ដែល​ខាតបង់​ដោយសារ​ជំងឺ​នេះ​ទេ​ ព្រោះ​មូលហេតុ​នៃ​ការ​ឆ្លង​ជំងឺ​នេះ​មក​កម្ពុជា​ ដោយសារ​ការ​អនុវត្ត​ច្បាប់​របស់​សមត្ថកិច្ច​ពាក់ព័ន្ធ​តាម​ព្រំដែន៖ «រដ្ឋាភិបាល​មិន​គួរ​ប្រងើយ​កន្តើយ ចំពោះ​កសិករ​ដែល​ខាត​បង់​ផល​ប្រយោជន៍​ដោយសារ​ជំងឺ​នេះ​ទេ តែ​ដោយសារ​តែ​ឥទ្ធិពល​នៃ​ការ​អនុវត្ត​ច្បាប់ របស់​មន្ត្រី​នៅ​តាម​ព្រំ​ដែន​ហ្នឹង។ អ៊ីចឹង​រឿង​ជួយ​កសិករ​ជា​ផ្នែក​មួយ និង​ស៊ើប​អង្កេត​មន្ត្រី ដែល​បើក​ដៃ​ឲ្យ​នាំ​ជ្រូក​ចូល​ពី​វៀតណាម។ ខ្ញុំ​យល់​ថា នេះ​ជា​បទ​ល្មើស​ធ្ងន់ តែ​មក​ដល់​ពេល​នេះ​មិន​ទាន់​មាន​មន្ត្រី​អនុវត្ត​ច្បាប់​ណា​មួយ ត្រូវ​ប្រឈ​មុខ​ផ្លូវ​ច្បាប់​នៅ​ឡើយ​ទេ»

មក​ទល់​ពេល​នេះ​ជំងឺ​ប៉េស្ត​ជ្រូក​ បាន​ឆ្លង​រាលដាល​ ដល់​ខេត្ត​ចំនួន​ ៥ សុទ្ធសឹង​ជា​ខេត្ត​នៅ​ជាប់​ព្រំដែន​ប្រទេស​វៀតណាម រួម​មាន ខេត្តរតនគិរី​ ខេត្ត​ត្បូងឃ្មុំ​ ខេត្តតាកែវ​ ខេត្តកណ្តាល​ និង​ខេត្ត​ស្វាយរៀង។ កាល​ពី​ចុងខែ​មីនា​ ឆ្នាំ២០១៩​ ជំងឺ​ប៉េស្ត​ជ្រូក​ បាន​ឆ្លង​ជា​លើក​ដំបូង​ ចូល​ក្នុង​ស្រុក​អូរយ៉ាដាវ​ ខេត្តរតនគិរី​ ដោយមាន​ជ្រូក ២.១៤០​ក្បាល ត្រូវ​បាន​សម្លាប់​ចោល និង​ងាប់​ ហើយ​កាល​ពីរ​ សប្តាហ៍​មុន​ សត្វ​ជ្រូក​របស់​ពលរដ្ឋ​ជាង ៥០០ក្បាល នៅ​ខេត្តកណ្តាល​ ក្នុង​ឃុំ​ក្រាំងយ៉ូវ​ ស្រុក​ស្អាត​បាន​ស្លាប់​ដោយសារ​ជំងឺ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល