អាណាព្យាបាលកុមាររងគ្រោះជាង ២០គ្រួសារ ស្នើឱ្យតុលាការកំពូលកាត់ក្ដី ផ្ដល់ភាពយុត្តិធម៌ឱ្យពួកគាត់ ក្នុងសំណុំរឿង ក្រុមហ៊ុនម្សៅទឹកដោះគោ នូទ្រីលេត (Nutrilatt) ដែលបានធ្វើឱ្យកូនៗ ពួកគាត់ធ្លាក់ខ្លួនឈឺធ្ងន់ធ្ងរ ក្រោយប្រើប្រាស់ផលិតផលគ្មានគុណភាពមួយនេះ។ មន្ត្រីអង្គការសង្គមស៊ីវិល ជំរុញឱ្យតុលាការពន្លឿនការកាត់ក្ដីក្នុងសំណុំរឿងនេះ ដើម្បីផ្ដល់ភាពយុត្តិធម៌ និងឱ្យក្រុមហ៊ុនផ្ដល់សំណងប៉ះប៉ូវដល់ក្រុមគ្រួសារកុមាររងគ្រោះ។
អាណាព្យាបាលកុមាររងគ្រោះ ដោយសារផឹកម្សៅទឹកដោះគោរបស់ក្រុមហ៊ុន នូទ្រីលេត (Nutrilatt) ដែលបណ្ដាលឱ្យមានជំងឺកាលពី ៣ឆ្នាំមុន រំពឹងថា តុលាការកំពូល នឹងបញ្ចប់សំណុំរឿងមួយនេះ ដោយរក្សាការសម្រេចរបស់សាលាដំបូង ដើម្បីផ្ដល់ភាពយុត្តិធម៌ឱ្យកូនៗ របស់ពួកគាត់។
ម្ដាយក្មេងរងគ្រោះ គឺលោកស្រី ជួន ផល្លា ប្រាប់វិទ្យុអាស៊ីសេរី នៅថ្ងៃទី២០ ខែធ្នូ ថា លោកស្រីរំពឹងថាការប្រកាសសាលដីការបស់តុលាការជាន់ខ្ពស់នៅថ្ងៃទី២១ ខែធ្នូ នឹងកាត់ក្ដីឱ្យពួកគាត់ឈ្នះលើសំណុំរឿងប្ដឹងផ្ដល់ជាមួយ ក្រុមហ៊ុនម្សៅទឹកដោះគោ នូទ្រីលេត (Nutrilatt) ដោយបញ្ចូលសាលក្រមរបស់សាលាដំបូងរាជធានីភ្នំពេញចូលជាស្ថាពរ។ លោកស្រីស្នើឱ្យ តុលាការកំពូលបញ្ចប់រឿងក្ដីមួយនេះត្រឹមថ្ងៃប្រកាសសាលដីកា ដោយលោកស្រីថា ការអូសបន្លាយសំណុំរឿងដល់ទៅបីឆ្នាំវាយូរពេកហើយសម្រាប់ក្មេងរងគ្រោះ និងក្រុមគ្រួសារ ដែលធ្លាក់ខ្លួនឈឺធ្ងន់ធ្ងរ ខាតបង់ប្រាក់កាសនិងពេលវេលា ដោយសារភាពគ្មានទំនួលខុសត្រូវរបស់ក្រុមហ៊ុនមួយនេះ។
លោកស្រី ជួន ផល្លា៖«ស្នើសុំឱ្យពួកគាត់(តុលាការជាន់ខ្ពស់)ហ្នឹងជួយដោះស្រាយ ហើយរកភាពយុត្តិធម៌ឱ្យក្មេងៗរងគ្រោះទាំង ២១គ្រួសារហ្នឹង។ សូមឱ្យកាត់ក្ដីឆាប់ចប់ទៅ ព្រោះវាបីឆ្នាំហើយ។ រឿងក្ដីមួយដល់ទៅបីបួនឆ្នាំ ដូចវាយូរពេកហើយ។ ប៉ះទង្គិចខ្លាំងហ្មង។ ទឹកដោះគោហ្នឹង យើងអត់ដឹង ដូចបញ្ច្រកថ្នាំពុលកូនអ៊ីចឹង បើយើងមើលអត់ទាន់មានតែទៅហើយកូន!»។
ចៅក្រមជំនុំជម្រះនៃតុលាការកំពូល គ្រោងប្រកាសសាលដីកាសំណុំរឿង ក្រុមហ៊ុនម្សៅទឹកដោះគោ នូទ្រីលេត ម៉ាស្ទ័រ អិលអឹម (Nutrilatt Master LM Co., LTD) នៅថ្ងៃទី២១ ខែធ្នូ បន្ទាប់ពីខកខានកាលពីថ្ងៃទី១៣ ខែធ្នូ ដោយសារ មេធាវីតំណាងឱ្យក្រុមហ៊ុននេះ បានស្នើសុំតុលាការទម្លាក់បទចោទ លើកូនក្ដីរបស់ខ្លួន ដោយលើកហេតុផលថា ផលិតផលរបស់ក្រុមហ៊ុន គឺមានការទទួលស្គាល់ពីក្រសួងសុខាភិបាល និងចេញវិញ្ញាបនបត្របញ្ជាក់អំពីគុណភាព និងអនុញ្ញាតឱ្យក្រុមហ៊ុនចែកចាយ។
វិទ្យុអាស៊ីសេរី មិនអាចទាក់ទងប្រធានក្រុមប្រឹក្សាជំនុំជម្រះនៃតុលាការ កំពូលលោក យូរ ប៊ុនឡេង និងតំណាងក្រុមហ៊ុន នូទ្រីលេត (Nutrilatt) ដើម្បីសុំការបកស្រាយបានទេ នៅថ្ងៃទី២០ ខែធ្នូ។
ទោះជាយ៉ាងណាក្ដី អាណាព្យាបាលកុមាររងគ្រោះថ្លែងថា គោលបំណងរបស់មេធាវីក្រុមហ៊ុន ហាក់មានចេតនាចង់អូសបន្លាយពេលវេលា ក្នុងការកាត់ក្ដីរឿងនេះ ព្រោះភាគីក្រុមហ៊ុនមិនដែលចូលខ្លួនមកបំភ្លឺនៅក្នុងសវនាការឡើយ។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត រំពឹងថា តុលាការកំពូល នឹងផ្ដល់យុត្តិធម៌ឱ្យគ្រួសារកុមាររងគ្រោះ។ លោកបន្តថា ការប្ដឹងជំទាស់ គឺជាសិទ្ធិរបស់ភាគីទាំងសងខាង ក៏ប៉ុន្តែកត្តាសំខាន់ នោះគឺយុត្តិធម៌ចំពោះកុមារ និងអាណាព្យាបាល ដែលរងគ្រោះ ប៉ះពាល់ដល់សុខភាព និងចំណាយលើការព្យាបាល។
លោក អំ សំអាត៖«ក្រុមហ៊ុន ដែលគាត់លក់ផលិតផល មិនមានគុណភាព ធ្វើឱ្យប៉ះពាល់ដល់ទារក ត្រូវតែទទួលខុសត្រូវ ចំពោះមុខច្បាប់។ អ៊ីចឹងយើងសង្ឃឹមថា តុលាការកំពូល នៅតែផ្ដល់យុត្តិធម៌សម្រាប់ឪពុកម្ដាយ និងកុមាររងគ្រោះ»។
នៅខែមេសា ឆ្នាំ២០២២ សាលាដំបូងរាជធានីភ្នំពេញ បានប្រកាសសាលក្រម សម្រេចផ្ដន្ទាទោសជនជាប់ចោទ គឺលោកស្រី ខុន កែវកេសី ដាក់ពន្ធនាគាររយៈពេល ១០ខែ និងពិន័យជាប្រាក់ ៨លានរៀល (៨.០០០.០០០) និងបង្គាប់ឱ្យផ្ដល់សំណងដល់ជនរងគ្រោះចន្លោះពី ១ម៉ឺន(១០.០០០) ទៅ ២ម៉ឺនដុល្លារ (២០.០០០) ផ្អែកលើស្ថានភាពជាក់ស្ដែង។ ប៉ុន្តែភាគីក្រុមហ៊ុន បានប្ដឹងសាទុក្ខទៅសាលាឧទ្ធរណ៍ និងបន្តប្ដឹងជំទាស់ដល់តុលាការកំពូល ដោយមិនព្រមទទួលខុសត្រូវចំពោះកំហុសរបស់ខ្លួននោះឡើយ។
អាណាព្យាបាលទារករងគ្រោះទាំង ២១គ្រួសារ ស្នើឱ្យស្ថាប័នតុលាការបញ្ចប់សំណុំរឿងមួយនេះឱ្យបានឆាប់ ព្រោះពួកគាត់មិនចង់បន្តឡើងសវនាការ ដែលតម្រូវឱ្យរៀបរាប់ និងបង្ហាញពីរូបភាពនៃការឈឺចាប់របស់កូនៗ ពួកគាត់ម្ដងហើយម្ដងទៀតនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។