ពលករខ្មែរដែលកំពុងធ្វើចត្តាឡីស័កនៅព្រំដែន ក្នុងខេត្តបន្ទាយមានជ័យរាប់សិបនាក់បានធ្លាក់ខ្លួនឈឺ និងក្អួតចង្អោរ ដោយអ្នកខ្លះត្រូវសង្គ្រោះបន្ទាន់ ក្រោយហូបតាង៉ែន ដែលជាអំណោយរបស់លោកនាយករដ្ឋមន្រ្តី ហ៊ុន សែន។
ពលករខ្មែរដែលត្រឡប់មកពីធ្វើការនៅប្រទេសថៃប្រមាណ ៤០ នាក់ ក្នុងចំណោមពលករជាង ៣០០ នាក់ ដែលកំពុងធ្វើចត្តាឡីស័ក នៅអនុវិទ្យាល័យទឹកជោរតាប៉ុន ក្នុងស្រុកព្រះនេត្រព្រះ ខេត្តបន្ទាយមានជ័យ កើតអាការបែបនេះ ក្រោយហូបផ្លែតាង៉ែន ដែលជាអំណោយរបស់លោក ហ៊ុន សែន។
សាក្សីនៅកន្លែងកើតហេតុ ថាអ្នកធ្វើចត្តាឡីស័កទាំងនោះ ធ្លាក់ខ្លួនឈឺធ្ងន់ព្រមៗគ្នា ភ្លាមៗ ក្នុងពេលតែមួយ។ ពលការិនីម្នាក់ដែលកំពុងជាប់ធ្វើចត្តាឡីស័កនៅមណ្ឌលនេះដែរ គឺលោកស្រី សឿន ស ដែលមានសុខភាពល្អ ព្រោះមិនបានហូបផ្លែតាង៉ែន ដូចអ្នកដែលធ្លាក់ខ្លួនឈឺនោះ ប្រាប់វិទ្យុអាស៊ីសេរី កាលពីយប់ថ្ងៃទី ២៥ ខែសីហា ថាមានអ្នកសន្លប់បាត់មាត់ ដោយសារតែអាការពុលនេះ៖ «គេឲ្យញ៉ាំបានរម្លងគ្នាមួយយប់ ពេលល្ងាចពេលឈឺពោះឈឺព្រមគ្នាបណ្ដោយ! កើតទៅគេហៅគ្រូពេទ្យមកដាក់សេរ៉ូមឲ្យ និងឲ្យថ្នាំលេប។ ក៏មានម្នាក់ដែរ ឃើញឡានពេទ្យទើបយក គាត់រាងធ្ងន់ជាងគេ គាត់ក្អួតច្រើនរហូតសន្លប់»។
ដូចគ្នានេះដែរ មន្រ្តីឃ្លាំមើលសិទ្ធិមនុស្ស នៅតំបន់នោះ ក៏បានបញ្ជាក់អំពីហេតុការណ៍ដែលកើតឡើងនេះដែរ។ អ្នកសម្របសម្រួលសមាគមអាដហុក (ADHOC) ប្រចាំខេត្តបន្ទាយមានជ័យលោក ស៊ុំ ចាន់គា ប្រាប់វិទ្យុអាស៊ីសេរីកាលពីយប់ថ្ងៃទី២៥ ខែសីហាដែរថា លោកបានទទួលព័ត៌មានពីខាងពលករចំណាកស្រុក ដែលកំពុងធ្វើចត្តាឡីស័កនៅអនុវិទ្យាល័យទឹកជោរតាប៉ុននោះ ដោយអ្នកទាំងនោះ ប្រាប់ថា ពួកគេពុលក្រោយហូបផ្លែតាង៉ែននេះ៖ «យើងបានព័ត៌មានពីអ្នកដែលពុលដោយសារផ្លែឈើហ្នឹងពិតប្រាកដ។ គាត់ទើបតែគេដកអ៊ុកស៊ីហ្សែនពីច្រមុះរបស់គាត់។ ប្រហែល ៤០០ នាក់គ្រាន់តែក្ដៅខ្លួន។ តែប្រហែល ៣០-៤០ នាក់ ជាអ្នកពុលធ្ងន់ធ្ងរ មានដាក់អ៊ុកស៊ីហ្សែនផង»។
ទោះជាយ៉ាងនេះក្ដី មន្រ្តីសុខាភិបាលមូលដ្ឋាន មិនអាចបញ្ជាក់ការពិតនៃព្រឹត្តិការណ៍ពុលនេះបានទេ។ មន្រ្តីរដ្ឋបាលសុខាភិបាលខេត្តបន្ទាយមានជ័យ ដែលសុំមិនបញ្ចេញឈ្មោះ ប្រាប់វិទ្យុអាស៊ីសេរីថា អាចមកពីលោកជាប់រវល់ទៅធ្វើការនៅកន្លែងខ្សោយសេវាទូរស័ព្ទ ទើបលោកមិនបានទទួលសេចក្តីរាយការណ៍ណាមួយអំពីរឿងនេះ៖ «ខ្ញុំដូចអត់បានព័ត៌មានផង។ ខ្ញុំអាល័យទៅការិយាល័យព្រឹកមិញ ទៅដល់អត់សូវមានសេវាទូរស័ព្ទ»។
ហេតុការណ៍ពុល ក្នុងមណ្ឌលចត្តាឡីស័កនេះ កើតមានឡើងក្រោយលោកនាយករដ្ឋមន្រ្តី ហ៊ុន សែន បើកយុទ្ធនាការប្រមូលទិញផ្លែតាង៉ែន ពីកសិករដែលគ្មានទីផ្សារលក់ផ្លែឈើនេះ។
លោក ហ៊ុន សែន ថានឹងយកផ្លែតាង៉ែនទាំងនោះ ទៅចែកដល់កងទ័ព នគរបាល កងរាជអាវុធហត្ថ គ្រូពេទ្យ អ្នកជំងឺ និងប្រជាពលរដ្ឋ ដែលកំពុងធ្វើចត្តាឡីស័ក។ លោក ហ៊ុន សែន ដែលមានវីឡាធំស្កឹមស្កៃច្រើនកន្លែង និងទ្រព្យសម្បត្តិស្តុកស្តម្ភ ពាក់នាឡិកាដៃតម្លៃរាប់លានដុល្លារផងនោះ អះអាងថា លោក «អាចបញ្ចាំផ្ទះ» យកលុយទៅទិញតាង៉ែន ពីកសិករដែលកំពុងជួបការលំបាក។
ប៉ុន្តែសារនេះ បានរងការរិះគន់ពីគ្រប់មជ្ឈដ្ឋាន ថាជាសារឃោសនានយោបាយ តាមបែបប្រជាភិថុតិ ដោះស្រាយបញ្ហាបែបដោះទាល់មួយគ្រាៗ ជាជាងបង្កើតឲ្យមានគោលនយោបាយថ្នាក់ជាតិរយៈពេលយូរអង្វែង ដើម្បីដោះស្រាយបញ្ហាដ៏រ៉ាំរ៉ៃនេះ ព្រោះបញ្ហាខ្វះទីផ្សារលក់កសិផលនេះ មិនមែនមានតែចំពោះផ្លែតាង៉ែននោះទេ គឺមានស្ទើរគ្រប់កសិផលក្នុងស្រុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។