ពលរដ្ឋ និងមន្ត្រីបក្សប្រឆាំងមិនជឿការអះអាងរបស់លោក ហ៊ុន សែន ដែលប្រកាសថា លោកនឹងចាក់វ៉ាក់សាំងកូវីដ-១៩ របស់ចិនមុនគេ
2021.01.17
លោកនាយករដ្ឋមន្ត្រី ហ៊ុន សែន និងវ៉ាក់សាំងជំងឺកូវីដ-១៩
ហ្វេសប៊ុករបស់លោក ហ៊ុន សែន/AP
ពលរដ្ឋ និងមន្ត្រីបក្សប្រឆាំង មិនជឿការអះអាងរបស់លោក ហ៊ុន សែន ដែលប្រកាសថា លោកនឹងចាក់វ៉ាក់សាំងកូវីដ-១៩ របស់ចិនមុនគេនោះទេ។ មតិរបស់ពលរដ្ឋបែបនេះ ធ្វើឡើងក្រោយលោកនាយករដ្ឋមន្ត្រី ហ៊ុន សែន នៅថ្ងៃអាទិត្យ ទី១៧ ខែមករា អះអាងថា លោកនឹងចាក់វ៉ាក់សាំងចិនមុនគេ ដើម្បីធ្វើឲ្យពលរដ្ឋទុកចិត្ត។
លោកនាយករដ្ឋមន្ត្រី ហ៊ុន សែន នៃរបបឯកបក្ស ដែលមានរហស្សនាមថា បុរសសង្ហារដើរបញ្ច្រាសទិស ទំនងជាចង់ស្រាយចម្ងល់ ការសង្ស័យ និងមន្ទិលរបស់ពលរដ្ឋ ជុំវិញវ៉ាក់សាំងចិននោះ ទើបចេញប្រកាសតាមទំព័រគណនីបណ្ដាញសង្គមហ្វេសប៊ុករបស់លោកថា លោកគឺជាមនុស្សដំបូងគេនៅកម្ពុជា ដែលនឹងចាក់វ៉ាក់សាំងបង្ការជំងឺកូវីដ-១៩ ដែលជារបស់ចិននោះ។
លោកសរសេរលើហ្វេសប៊ុកលោកថា លោកសម្រេចបែបនេះ ដើម្បីបង្កើតនូវជំនឿទុកចិត្តលើវ៉ាក់សាំងចិន និងជំរុញចលនាប្រយុទ្ធប្រឆាំងជំងឺកូវីដ-១៩ផង។ លោកអួតអាងថា នេះជាទម្លាប់ធម្មតារាប់សិបឆ្នាំរបស់លោកទៅហើយ ព្រោះលោកត្រូវតែស្ថិតនៅខ្សែត្រៀមជួរមុខជានិច្ចបែបនេះ។ លោក ហ៊ុន សែន បញ្ចប់ឃ្លា ដែលមិនទាក់ទងនឹងជំងឺកូវីដ-១៩ ដោយសរសេរថា អរគុណសន្តិភាព! អរគុណនយោបាយឈ្នះ-ឈ្នះ!
ទោះជាមានការអះអាងបែបនេះក្ដី អនុប្រធានគណបក្សសង្គ្រោះជាតិ ប្រចាំខេត្តកំពង់ឆ្នាំង លោក ដួង ចន្ត្រា ដែលកំពុងភៀសខ្លួននៅប្រទេសថៃ យល់ថា លោក ហ៊ុន សែន មិនហ៊ានចាក់វ៉ាក់សាំង ដែលចិនផ្ដល់ឱ្យនោះទេ។ មន្ត្រីបក្សប្រឆាំងរូបនេះកត់សម្គាល់ឃើញថា កន្លងមក លោក ហ៊ុន សែន តែងលើកឡើងពីសមត្ថភាពពេទ្យខ្មែរ ប៉ុន្តែពេលឈឺថ្កាត់ម្ដងៗ លោក ហ៊ុន សែន តែងតែចេញទៅក្រៅប្រទេស ដើម្បីរកសេវាសុខាភិបាលពីរដ្ឋបរទេស។
ជាងនេះទៅទៀតលោក ដួង ចន្ត្រា ថា វ៉ាក់សាំងចិននេះ កំពុងស្ថិតក្នុងភាពមិនច្បាស់លាស់ និងអាចមានគ្រោះថ្នាក់ដល់សុខភាពមនុស្សថែមទៀតផង។ លោកថា ដោយសារតែហានិភ័យនៃវ៉ាក់សាំងនេះ លោក ហ៊ុន សែន អាចយកវាទៅចាក់ឲ្យក្រុមមន្ត្រី ឬមនុស្សណា ដែលមិននៅខាងលោក ដូចគ្រាន់តែដើម្បីតែពិសោធន៍ ព្រោះលោកថា សព្វថ្ងៃនេះ គណបក្សប្រជាជនកម្ពុជាចែកចេញពីក្រុម គឺក្រុមលោក ហ៊ុន សែន និងក្រុមមួយទៀត ដែលមិនគាំទ្រលោក ហ៊ុន សែន៖ «ទស្សនៈរបស់ខ្ញុំ ការយល់ឃើញរបស់ខ្ញុំ ខ្ញុំបារម្ភថាប្រហែលជា បើវ៉ាក់សាំងហ្នឹងវាមានភាពមិនប្រក្រតី វានឹងធ្វើឲ្យមនុស្សដែលគាត់មិនទុកចិត្តនោះឯង ត្រូវស្លាប់ក្រោមកណ្ដាប់ដៃរបស់ចិន ព្រោះកន្លងទៅយើងឃើញថា ផ្ទៃក្នុងរបស់គណបក្សប្រជាជន មានការបែកបាក់»។
ស្រដៀងគ្នានេះដែរ ប្រជាពលរដ្ឋម្នាក់លោក ម៉ុច មុល យល់ថា លោក ហ៊ុន សែន មិនហ៊ានចាក់វ៉ាក់សាំងនេះទេ ហើយគ្រាន់តែយកថ្នាំផ្សេង អាចជាថ្នាំកម្លាំង ឬថ្នាំបញ្ឆោត (ផ្លាស៊ីបូ) មកចាក់ជំនួសវ៉ាក់សាំងចិន ដើម្បីសម្ដែងតែប៉ុណ្ណោះ។
លោកថា ការណ៍ដែលលោក ហ៊ុន សែន យល់ព្រមទទួលវ៉ាក់សាំងរបស់ចិន ស្របពេលដែលអង្គការសុខភាពពិភពលោកមិនទាន់ទទួលស្គាល់វ៉ាក់សាំងនេះ ធ្វើឲ្យមានការសង្ស័យកាន់តែខ្លាំង អំពីការងាកខ្លាំងទៅរកចិន ដើម្បីផ្គាប់ផ្គុនចិន សុំជំនួយ ដើម្បីបន្តក្រាញអំណាចយូរអង្វែងតទៅទៀត។
ពលរដ្ឋរូបនេះ ព្រួយបារម្ភថា អាយុជីវិតពលរដ្ឋរាប់សែននាក់ ស្ថិតក្នុងហានិភ័យខ្ពស់ និងក្លាយជាគោលដៅនៃការធ្វើពិសោធន៍វ៉ាក់សាំងរបស់ចិន៖ «បើតាមខ្ញុំគិត ហ៊ុន សែន មិនហ៊ានទេ។ គាត់អាចចាក់ថ្នាំស្អីផ្សេង។ អាចចាក់ថ្នាំបំបាត់គ្រុនផ្ដាសាយ ឬបាត់គ្រុនស្អី គាត់ចាក់ដើម្បីឲ្យគេជឿថា គាត់បានចាក់មុនគេ។ ការពិតគឺ មិនមែនទេ។ គាត់ចាក់ថ្នាំបាត់គ្រុន បាត់រងា យកចិត្តយកថ្លើមគេ។ គាត់ចង់ឲ្យប្រជាជនខ្លួនឯងរងគ្រោះ ដើម្បីតែផលប្រយោជន៍ និងអំណាចផ្ដាច់ការខ្លួនឯង»។
រហូតមកដល់ពេលនេះ ប្រទេសជាច្រើន បានស្រាវជ្រាវរកឃើញវ៉ាក់សាំងការពារជំងឺកូវីដ-១៩ នេះ។ ឥឡូវនេះ វ៉ាក់សាំងដែលត្រូវបានស្រាវជ្រាវឃើញ និងផលិតឲ្យប្រើប្រាស់ មាន ១០វ៉ាក់សាំង។ ប្រទេសចិន និង រុស្ស៊ី ជាអ្នកប្រកាស ថាខ្លួនបានរកឃើញវ៉ាក់សាំងនេះមុនគេ គឺរកឃើញតាំងពីអំឡុងខែកញ្ញា ឆ្នាំ២០២០ ម្ល៉េះ ដែលពេលនោះអ្នកជំនាញវិទ្យាសាស្ត្រល្បីៗ ដាក់ការសង្ស័យអំពីភាពប្រញាប់ប្រញាល់ និងភាពគ្រោះថ្នាក់ នៃវ៉ាក់សាំងនេះ។
អ្នកជំនាញវិទ្យាសាស្រ្ត អះអាងថា វ៉ាក់សាំងចិន និងរុស្ស៊ី បានដាក់ឲ្យប្រើប្រាស់ ដោយមិនឆ្លងកាត់ដំណាក់កាលត្រឹមត្រូវ និងសព្វគ្រប់នៃការធ្វើតេស្តវ៉ាក់សាំង ជាពិសេសការរំលងដំណាក់កាលទី៣ នៃការសាកល្បងលើមនុស្ស និងការខកខានក្នុងការបង្ហាញទិន្នន័យស្រាវជ្រាវជាសាធារណៈ។ ទោះជាវ៉ាក់សាំងចិន ត្រូវបានរកឃើញយូរហើយក្ដី ក៏វ៉ាក់សាំងនេះ ត្រូវបានប្រើប្រាស់ តែក្នុងប្រទេសដែលព្រមយកពលរដ្ឋខ្លួន ឲ្យធ្វើពិសោធន៍វាតែប៉ុណ្ណោះ។ អង្គការសុខភាពពិភពលោក មិនបានទទួលស្គាល់វ៉ាក់សាំងនេះទេ។
លោកនាយករដ្ឋមន្ត្រី ហ៊ុន សែន បានប្រកាសទទួលយកវ៉ាក់សាំងការពារជំងឺកូវីដ-១៩ របស់ចិន ឈ្មោះស៊ីណូហ្វាម (Sinopharm) ដែលមិនទាន់មានការទទួលស្គាល់គុណភាពពីអង្គការសុខភាពពិភពលោកនៅឡើយ។ វ៉ាក់សាំងដែលចិនគ្រោងផ្តល់មកឲ្យកម្ពុជានោះ មានចំនួន ១លានដូស។ លោក ហ៊ុន សែន ថា វ៉ាក់សាំងនេះ នឹងត្រូវប្រើដើម្បីចាក់ជូនមន្ត្រីជួរមុខ និងប្រជាពលរដ្ឋប្រមាណកន្លះលាននាក់។
អ្នកជំនាញវិទ្យាសាស្រ្តថា រហូតមកដល់ពេលនេះ ក្រុមហ៊ុនចិនស៊ីណូហ្វាម នៅតែមិនទាន់បង្ហាញលទ្ធផលលម្អិតនៃការធ្វើតេស្តដំណាក់កាលទី៣ របស់ខ្លួននៅឡើយ ដែលខុសពីវ៉ាក់សាំងរបស់ក្រុមហ៊ុនអាមេរិក អាល្លឺម៉ង់ និងអង់គ្លេស ដែលគេប្រកាសលទ្ធផលនេះជាផ្លូវការរួចទៅហើយ។
ទោះជាយ៉ាងនេះក្ដីវ៉ាក់សាំងនេះ នឹងត្រូវយកមកចាក់លើមន្ត្រី និងពលរដ្ឋខ្មែរយ៉ាងហោចណាស់កន្លះលាននាក់នោះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យដឹងថា ក្រៅពីលោក ហ៊ុន សែន នៅមានប្រធានព្រឹទ្ធសភា លោក សាយ ឈុំ ប្រធានរដ្ឋសភា លោក ហេង សំរិន និងរដ្ឋមន្ត្រីក្រសួងមហាផ្ទៃ លោក ស ខេង ជាដើម ក៏នឹងចាក់វ៉ាក់សាំងនេះដែរ។ អ្នកនាំពាក្យដដែលចាត់ទុកការរិះគន់របស់ពលរដ្ឋ និងមន្ត្រីបក្សប្រឆាំងនេះថា ជាក្រុមដែលមើលមិនឃើញពីទង្វើល្អរបស់រដ្ឋាភិបាល ដែលដឹកនាំដោយគណបក្សប្រជាជនកម្ពុជា។ លោក សុខ ឥសាន អះអាងទៀតថា កម្ពុជាមិនមែនជាប្រទេសទី១ ដែលទទួលវ៉ាក់សាំងនេះទេ ដោយថ្មីៗ នេះ មានប្រទេសប្រេស្ស៊ីល និងប្រទេសឥណ្ឌូនេស៊ី ក៏បានចាក់វ៉ាក់សាំងរបស់ចិននេះ ហើយមេដឹកនាំ និងពលរដ្ឋប្រទេសទាំងនោះមិនកើតបញ្ហាអ្វីនោះទេ៖ «គេចាក់អត់មានប្រតិកម្មអ្វី មិនមែនជារឿងក្លែងក្លាយ ឬមួយជាការឃោសនាអ្វីនោះទេ គ្រាន់តែបញ្ជាក់ជូនប្រជាពលរដ្ឋឲ្យលោកមានការនឹងនចិត្ត និងមានការកក់ក្ដៅ ពីព្រោះអត់មានហានិភ័យទេ ដោយសារថ្នាក់ដឹកនាំចិន មុនប្រគល់ ឬធ្វើវិភាគទានដល់បណ្ដាប្រទេសនានា លើពិភពលោក ថ្នាក់ដឹកនាំចិនបានចាក់រួចហើយ»។
រហូតមកដល់ពេលនេះ វ៉ាក់សាំងដែលត្រូវបានទទួលស្គាល់ដោយអង្គការពិភពលោក ឬ WHO គឺមានតែវ៉ាក់សាំងរបស់ក្រុមហ៊ុនអាមេរិក និងអាល្លឺម៉ង់មួយគត់ គឺវ៉ាក់សាំងរបស់ក្រុមហ៊ុន Pfizer និង BioNTech។
កន្លងទៅលោក ហ៊ុន សែន ធ្លាប់ប្រកាសថា រដ្ឋាភិបាលកម្ពុជា នឹងមិនទិញ ឬទទួលយកវ៉ាក់សាំងណា ដែលគ្មានការទទួលស្គាល់ ពីអង្គការសុខភាពពិភពលោកនោះទេ។ ដូចគ្នានេះដែរ មន្រ្តីនាំពាក្យរដ្ឋាភិបាលលោក គឺលោក ផៃ ស៊ីផាន ថែមទាំងប្រកាសជាឱឡារិកនាពេលថ្មីៗ នេះដែរថា រដ្ឋាភិបាលកម្ពុជា នឹងមិនអនុញ្ញាតឲ្យនរណាយកពលរដ្ឋខ្លួន ធ្វើតេស្តពិសោធន៍វ៉ាក់សាំងដូចសត្វកណ្ដុរនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ