ប្រជាពលរដ្ឋដែលកំពុងរស់នៅក្នុងតំបន់ក្រហមឬតំបន់បិទខ្ទប់ក្នុងខេត្តសៀមរាប អំពាវនាវរកជំនួយពីរដ្ឋាភិបាលដោយសារពួកគាត់បាត់បង់ការងារ និងគ្មានប្រាក់ចំណូលដោះស្រាយជីវភាព។ អាជ្ញាធរអះអាងថា ពេលនេះ ក្រុមការងារកំពុងចុះផ្តល់ជំនួយជូនប្រជាពលរដ្ឋជាបន្តបន្ទាប់ និងអំពាវនាវឲ្យប្រជាពលរដ្ឋចូលរួមសហការដើម្បីកាត់ផ្តាច់ការចម្លងជំងឺកូវីដនៅក្នុងសហគមន៍។
វិធានការបិទខ្ទប់ក្រុងសៀមរាមដើម្បីទប់ស្កាត់ជំងឺកូវីដ-១៩រយៈពេលពីរសប្តាហ៍មកនេះ កំពុងធ្វើឲ្យជីវភាពរបស់ប្រជាពលរដ្ឋកាន់តែយ៉ាប់យឺនបន្ថែមទៀត ដែលទាមទារឲ្យមានការផ្តល់ជំនួយពីរដ្ឋាភិបាល។
ប្រជាពលរដ្ឋម្នាក់រស់នៅភូមិគោកតាចាន់ សង្កាត់គោកចក ដែលអាជ្ញាធរកំណត់ជាតំបន់លឿងទុំ គឺលោក នុប សុខុម ប្រាប់អាស៊ីសេរីថា គ្រួសាររបស់លោក និងប្រជាពលរដ្ឋភាគច្រើននៅតំបន់នោះ បាត់បង់មុខរបរនិងប្រាក់ចំណូលទាំងស្រុង ហើយកំពុងតស៊ូរស់នៅទាំងលំបាកលំបិន ជាពិសេសខ្វះខាតស្បៀងអាហារហូបចុកប្រចាំថ្ងៃ និងប្រាក់សងធនាគារ។ លោកឲ្យដឹងថា អាជ្ញាធរមូលដ្ឋាន ក៏បានផ្តល់ជំនួយខ្លះដែរ ប៉ុន្តែមិនគ្រប់គ្រាន់ឡើយ ព្រោះមានតែអង្ករ តែខ្វះម្ហូប និងគ្មានលុយ។ លោកសំណូមដល់រដ្ឋាភិបាល ជួយបង្កើនជំនួយឧបត្ថម្ភបន្ថែមទៀត ដើម្បីសម្រួលដល់ជីវភាពរស់នៅរបស់ប្រជាពលរដ្ឋ៖ «និយាយរួមសេដ្ឋកិច្ចធ្លាក់ចុះខ្លាំងមែនទែន វាហួសនិស្ស័យ ប៉ុន្តែធ្វើម៉េចវារឿងមួយអកុសលក្នុងខេត្តសៀមរាបរបស់យើងទទួលរងផលប៉ះពាល់ខាំ្លង។យើងចេះតែទ្រាំទៅ មានខ្លះហូបខ្លះអត់ខ្លះហូបខ្លះវាមិនបរបូរទេ»។
ពលរដ្ឋរស់នៅសង្កាត់គោកចកម្នាក់ទៀតលោក យឹម សុខណា រៀបរាប់ថា វិធានការបិទខ្ទប់របស់អាជ្ញាធរលើកនេះ ហាក់ដូចជាតឹងរ៉ឹងជាងមុនដោយមិនអនុញ្ញាតឲ្យប្រជាពលរដ្ឋធ្វើដំណើរចេញពីផ្ទះឡើយ ហើយការលក់ដូរ ក៏ត្រូវបានហាមឃាត់។ លោកបន្តថា ការរឹតបន្តឹងបែបនេះ ធ្វើឲ្យអ្នកលក់ដូរមួយចំនួន ឆ្លៀតឱកាសលក់ម្ហូបអាហារក្នុងតម្លៃថ្លៃទ្វេដង ហើយពិបាករកទិញថែមទៀត ដែលធ្វើឲ្យប៉ះពាល់ធ្ងន់ធ្ងរដល់ជីវភាពរបស់ពលរដ្ឋក្នុងតំបន់ក្រហម។ ពលរដ្ឋរូបនេះ បន្ថែមថា ចាប់តាំងពីអាជ្ញាធរបិទខ្ទប់មកគ្រួសាររបស់លោក ទទួលបានថ្នាំពេទ្យពីរបន្ទះពីអាជ្ញាធរ ប៉ុន្តែមិនទាន់ ទទួលបានជំនួយជាអង្ករនិងម្ហូបអាហារឡើយ៖ «ទាក់ទងនឹងការស្នើសុំអាជ្ញាធរមូលដ្ឋាននិងរដ្ឋាភិបាល ទី១ សុំពន្យាការបង់ថ្លៃទឹកថ្លៃភ្លើងមួយខែទៅពីរខែទៅ ទី២សុំឲ្យគាត់ជួយបន្ធូរសេរីភាពនៃការដើរហើរបន្តិច ទី៣សុំកុំឲ្យអាជ្ញាធរលក់ទំនិញមួយចំនួនឡើងថ្លៃពេក ព្រោះធ្វើឲ្យ ប្រជាពលរដ្ឋរស់នៅក្នុងតំបន់ក្រហម ខ្វះថវិកាហើយណាមួយអត់មានទិញទៀត ព្រោះអត់មានលក់។ ក្រៅពីនេះសុំរដ្ឋាភិបាលជួយផ្តល់អង្ករ ឬក៏ត្រីងៀត ពងទា និង សាច់ក្រកដែលជាការស្នើសុំរបស់ពលរដ្ឋក្នុងតំបន់ក្រហម»។
រដ្ឋបាលខេត្តសៀមរាប បានបិទខ្ទប់ក្រុងសៀមរាប និងហាមធ្វើដំណើរចេញចូលចាប់តាំងពីថ្ងៃទី១១ ខែកញ្ញាមក ដើម្បីទប់ស្កាត់ការចម្លងជំងឺកូវីដ-១៩ នៅក្នុងសហគមន៍។ គិតត្រឹមថ្ងៃទី២៦ ខែកញ្ញា តំបន់មួយចំនួនមិនទាន់ធូរស្រាលនៅឡើយ ដោយអាជ្ញាធរបន្តដាក់ជាតំបន់លឿងទុំ និងតំបន់ក្រហមដដែល។
ចៅសង្កាត់គោកចកលោក ទិត ឌីរ៉ា ថ្លែងថា អាជ្ញាធរពាក់ព័ន្ធកំពុងយកចិត្តទុកដាក់ខ្ពស់ជួយដល់ប្រជាពលរដ្ឋដោយជំហ៊ានទី១អាជ្ញាធរ បាន ផ្តល់ជំនួយដល់ប្រជាពលរដ្ឋដែលមានប័ណ្ណក្រីក្រ ហើយជំហ៊ានបន្ទាប់ គឺអាជ្ញាធរកំពុងសហការជាមួយក្រុមយុវជន ចុះផ្តល់ជំនួយជូនដល់ប្រជាពលរដ្ឋនៅតាមមុខផ្ទះជាបន្តបន្ទាប់៖ «តំបន់ក្រហម ត្រូវការបិទខ្ទប់មិនឲ្យចេញដើរឆ្វេចឆ្វាចទេ ដូច្នេះការលួចលក់ដូរនេះ គាត់លក់ក្នុងតម្លៃខ្ពស់ អ៊ីចឹងពួកយើងអាជ្ញាធរ កំពុងតែហាម ឃាត់មិនឲ្យលក់ទេ ព្រោះយើងមានអ្នកដែលលក់មិនឲ្យយកតម្លៃតាមសេរីទេ គឺតម្លៃមន្ទីរពាណិជ្ជកម្មបានកំណត់ ជាតម្លៃដើម ហើយមិនឲ្យលក់ឆ្វេចឆ្វាចអ៊ីចឹងទេ។ ការដែលលក់ថ្លៃនោះ ដោយសារមានអ្នកលួចលក់ទេ ហើយយើងកំពុងតែតាមប្រមាញ់មិនឲ្យគាត់លួចលក់ទេ ព្រោះកាលណាលក់ទៅ វាមានផលប៉ះពាល់ដល់ប្រជាពលរដ្ឋកំពុងមានបញ្ហា»។
ទោះជាយ៉ាងណា មន្ត្រីសមាគមការពារសិទ្ធិមនុស្សអាដហុកប្រចាំខេត្តសៀមរាប គឺលោក សួស ណារិន ដែលកំពុងរស់នៅក្នុងតំបន់ក្រហមដែរនោះ ទទួលស្គាល់ថា ប្រជាពលរដ្ឋ រស់នៅតំបន់មួយចំនួនពិតជាមិនទាន់ទទួលបានជំនួយដូចជាស្បៀងអាហារនិងថ្នាំពេទ្យពីអាជ្ញាធរនៅឡើយ ហើយតម្លៃម្ហូបអាហារពិតជាឡើងថ្លៃខ្ពស់។ លោក ជំរុញឲ្យអាជ្ញាធរយកចិត្តទុកដាក់បន្ថែមទៀត៖ «ខ្ញុំគិតថា អាជ្ញាធរមុននឹងលក់គួរតែគិតអំពីហានិភ័យ សម្រាប់ផ្តល់ស្បៀងអីហ្នឹងទុកឲ្យហើយ។លោក ចង់បិទមួយខែក៏បានដែរ ប៉ុន្តែលោក ត្រូវតៀមស្បៀងត្រៀមអាហារ ដើម្បីចែកជូនប្រជាពលរដ្ឋដែលនៅតំបន់ក្រហម ព្រោះ ពួកគាត់លំបាកណាស់ ចេញពីផ្ទះអត់បានទេ»។
កន្លងទៅប្រជាពលរដ្ឋ តែងតែរិះគន់រដ្ឋាភិបាល ទាក់ទងនឹងការផ្តល់ជំនួយយឺតយ៉ាវ និងមិនបានគ្រប់គ្រាន់ដល់ប្រជាពលរដ្ឋរស់នៅក្នុងតំបន់បិទខ្ទប់ រហូតពលរដ្ឋនៅកន្លែងខ្លះ បាននាំគ្នាផ្ទុះការតវ៉ាទៀតផង ទើបអាជ្ញាធរយកជំនួយជូនពលរដ្ឋ។ លើសពីនេះ ប្រជាពលរដ្ឋមួយចំនួនក៏ខកចិត្តចំពោះលោក ហ៊ុន សែន ដែល ចំណាយលុយដ៏ច្រើនសន្ធឹកសន្ធាប់ជួលក្រុមហ៊ុនបញ្ចុះបញ្ចូល ឬឡប់ប៊ី(Lobby)នៅអាមេរិក ដើម្បីជួយលុបលាងកេរ្តិ៍ឈ្មោះអាក្រក់របស់ខ្លួន និងផ្តល់ជំនួយដល់ប្រទេសមួយចំនួន ដើម្បីទប់ស្កាត់កូវីដ ដែលប្រទេសខ្លះនោះមានសេដ្ឋកិច្ចល្អជាងកម្ពុជាផង ក្នុងគ្រាដែលពលរដ្ឋកម្ពុជាខ្លួនឯងកំពុងរង់ចាំជំនួយជាបន្ទាន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។