កម្ពុជារកឃើញអ្នកកើតជំងឺកូវីដ-១៩ ៣នាក់បន្ថែមទៀត នៅថ្ងៃទី៧ វិច្ឆិកា គឺមានអង្គរក្សលោក ហ៊ុន សែន ម្នាក់ និងជនបរទេស ២នាក់ ដែលម្នាក់ជាជនជនជាតិឥណ្ឌា និងម្នាក់ទៀតជាជនជាតិប៉ាគីស្ថាន។ ក្នុងសារសំឡេងមួយរបស់លោក ហ៊ុន សែន គឺលោកមិនបានបញ្ជាក់ទេថា មានមន្ត្រីជាន់ខ្ពស់រដ្ឋាភិបាល រួមទាំងលោកផង ដែលបានចាប់ដៃជាមួយរដ្ឋមន្ត្រីជាន់ខ្ពស់ ហុងគ្រី នោះ មានជំងឺកូវីដ១៩ ឬអត់នោះទេ។
ដោយឡែកអ្នកដែលប៉ះពាល់ផ្ទាល់ ឬពាក់ព័ន្ធនឹងដំណើរទស្សនកិច្ចរបស់រដ្ឋមន្ត្រីការបរទេស ហុងគ្រី ជិត ៩០០នាក់ផ្សេងទៀត កំពុងធ្វើចត្តាឡីស័ក និងធ្វើតេស្តតាមដានជំងឺនេះ ជាបន្តបន្ទាប់ទៀត។ ក្នុងសេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃដដែលនេះ បានលើកយកបញ្ជារបស់លោក ហ៊ុន សែន ដែលឱ្យអ្នកប៉ះពាល់ផ្ទាល់ និងប្រយោលទាំងអស់ ទៅធ្វើចត្តាឡីស័កនៅក្នុងសណ្ឋាគាររ៉េស៊ីដង់ សុខា ភ្នំពេញ ស្ថិតនៅផ្លូវ កែវ ចិន្ដា ភូមិ១ សង្កាត់ជ្រោយចង្វា រាជធានីភ្នំពេញ។ ការធ្វើចត្តាឡីស័ក រយៈពេល ១៤ថ្ងៃនេះ គឺចាប់ផ្ដើមពីថ្ងៃទី៨ វិច្ឆិកាតទៅ៕