ក្រសួងសុខាភិបាល រកឃើញអ្នកឆ្លងជំងឺផ្ដាសាយបក្សី H5N1 ពីរករណីថ្មីទៀត នៅខេត្តកំពង់ចាម។ ការរកឃើញការឆ្លងថ្មីពីរករណីនេះ គឺជាករណីទី៥ ហើយនៅក្នុងព្រះរាជាណាចក្រកម្ពុជា ក្នុងដើមឆ្នាំ២០១៤។
ក្នុងសេចក្ដីប្រកាសរួមរបស់ក្រសួងសុខាភិបាល និងអង្គការសុខភាពពិភពលោក ចុះថ្ងៃទី២៧ កុម្ភៈ បានសរសេរថា អ្នកឆ្លងជំងឺផ្ដាសាយបក្សី ២ករណីថ្មីនេះ គឺទីមួយកើតចំពោះកុមារីអាយុ ១០ម្នាក់ នៅក្នុងភូមិរវាង ឃុំខ្នុរដំបង ស្រុកជើងព្រៃ ខេត្តកំពង់ចាម។
ករណីថ្មីទីពីរ គឺកើតលើកុមារីអាយុ ១១ឆ្នាំម្នាក់ទៀត នៅភូមិឡាអោក ឃុំក្រែក ស្រុកពញាក្រែក ខេត្តត្បូងឃ្មុំ។ ករណីទាំងពីរនេះ ត្រូវបានរកឃើញដោយអង្គការផ្នែកស្រាវជ្រាវវេជ្ជសាស្ត្រនាវាសហរដ្ឋអាមេរិក ហើយបញ្ជាក់ដោយវិទ្យាស្ថានប៉ាស្ទ័រកម្ពុជា នៅថ្ងៃទី២០ កុម្ភៈ។ កុមារទាំងនេះ មានអាការៈគ្រុនក្ដៅ ហូរសំបោរ ក្អក ឈឺបំពង់ក និងក្អួត។ បន្ទាប់ពីដាក់ឱ្យសម្រាកព្យាបាលនៅមន្ទីរពេទ្យខេត្តកំពង់ចាម មក បច្ចុប្បន្នកុមារទាំងពីរបានជាសះស្បើយវិញហើយ។
ចាប់តាំងពីឆ្នាំ២០០៥ មក កម្ពុជា មានអ្នកឆ្លងជំងឺផ្ដាសាយបក្សីចំនួន ៥២ករណីហើយ ហើយក្នុងចំណោមនេះមាន ៣៤ករណីបានស្លាប់។ អ្នកឆ្លងជំងឺផ្ដាសាយបក្សី H5N1 ច្រើនមកពីតំបន់ដែលមានសត្វមាន់ ឬទាងាប់ច្រើន។ ក្រសួងសុខាភិបាល អំពាវនាវឱ្យពលរដ្ឋប្រុងប្រយ័ត្នខ្ពស់ចំពោះជំងឺផ្ដាសាយបក្សី ហើយផ្ដល់ព័ត៌មានតាមទូរស័ព្ទលេខ ១១៥ ឬ ០១២ ៤៨ ៨៩ ៨១ បើសង្ស័យថា មានជំងឺនេះនៅក្នុងស្រុកភូមិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។