សមត្ថកិច្ចឃាត់ខ្លួនម្ចាស់លក់ស្រាចំនួនពីរ នាក់ក្រោយពីបានធ្វើឱ្យមនុស្សចំនួន ៥នាក់ស្លាប់ និងជាង ២០នាក់ផ្សេងទៀតធ្លាក់ខ្លួនឈឺជាបន្តបន្ទាប់ ក្រោយពីបានទិញស្រាស យកមកទទួលទានជុំគ្នានៅស្រុកកំពង់ត្រាច ខេត្តកំពត។
ស្នងការប៉ូលិសខេត្តកំពតលោក ម៉ៅ ច័ន្ទមធុរិទ្ធ ប្រាប់អាស៊ីសេរី នៅថ្ងៃទី២៤ ឧសភាថា សមត្ថកិច្ចកំពុងសាកសួរម្ចាស់លក់ស្រាទាំងពីរនាក់សិន មិនទាន់សម្រេចថា នឹងបញ្ជូនទៅតុលាការ ឬមួយយ៉ាងណាទេ។ តែទោះជាយ៉ាងណា លោកថា ករណីបណ្ដាលឱ្យមានមនុស្សស្លាប់នេះជាបទល្មើសព្រហ្មទណ្ឌ ហើយជនសង្ស័យត្រូវតែទទួលទោសចំពោះមុខច្បាប់។
ស្នងការប៉ូលិសខេត្តកំពតរូបនេះ មិនបានបញ្ជាក់ពីមូលហេតុដែលបណ្ដាលឱ្យមានករណីស្លាប់នោះទេ ដោយលោកគ្រាន់តែបញ្ជាក់ថា ប្រជាពលរដ្ឋបានទិញស្រាស យកមកទទួលទានជុំគ្នានៅតាមភូមិ ហើយក្រោយមកក៏មានអាការៈពុលជាបន្តបន្ទាប់ ហើយមកដល់ពេលនេះ មានមនុស្សចំនួន ៥នាក់ហើយបានស្លាប់៖ «ឥឡូវដំបូងយើងអញ្ជើញម្ចាស់ទីតាំងដែលគាត់ផលិតស្រា ហ្នឹងរង់ចាំលទ្ធផលចេញពីឡាបូ (Laboratory) ពីទីក្រុងភ្នំពេញ មកសិន បានយើងបន្តនីតិវិធីបន្តទៀត»។
ករណីពុលស្រាស នៅក្នុងខេត្តកំពត នេះបានកើតមានឡើងបន្ទាប់ពីខេត្តកណ្ដាល។ កាលពីថ្ងៃទី១៩ ឧសភា មានមនុស្សចំនួន ១២នាក់ស្លាប់ បន្ទាប់ពីពួកគេទទួលទានស្រាស និងស្រាថ្នាំ នៅក្នុងពិធីបុណ្យសព នៅស្រុកល្វាឯម ខេត្តកណ្ដាល។
សមត្ថកិច្ចបានចាប់ខ្លួនមនុស្ស ១៣នាក់ក្នុងនោះរួមទាំងអ្នកលក់ស្រាផង បញ្ជូនទៅតុលាការពាក់ព័ន្ធ នឹងករណីពុលស្រានេះ។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី ធ្លាប់មានប្រសាសន៍ថា ក្រសួងពីរគឺ ក្រសួងសុខាភិបាល និងក្រសួងឧស្សាហកម្ម ត្រូវតែទទួលខុសត្រូវចំពោះមនុស្សស្លាប់ ហើយលោកមិនចង់ឃើញឱ្យមានករណីដដែលៗ នេះ កើតមានឡើងទៅលើពលរដ្ឋទៀតទេ។
ទាក់ទិននឹងករណីពុលស្រានេះ បានកើតមានឡើងមិនមែនជាលើកដំបូងទេ នៅក្នុងប្រទេសកម្ពុជា។ នៅក្នុងខេត្តកំពង់ឆ្នាំង កាលពីខែធ្នូ ឆ្នាំ២០២០ មានមនុស្សចំនួន ៨នាក់ស្លាប់ និង ១៣០នាក់ផ្សេងទៀត បានធ្លាក់ខ្លួនឈឺ បន្ទាប់ពីពួកគេបានទទួលទានស្រាស។ ចំណែក ពលរដ្ឋនៅស្រុកសំបូរ ខេត្តក្រចេះ ចំនួន ៥នាក់ ក៏ស្លាប់ដោយសារតែការពុលស្រាសនេះដែរ កាលពីខែតុលា ឆ្នាំ២០១៨។ ក្រោយមកទៀត នៅឆ្នាំ២០២០ មានពលរដ្ឋនៅស្រុកម៉ាឡៃ ខេត្តបន្ទាយមានជ័យ ចំនួន ៤នាក់ស្លាប់ និងជាង ១០នាក់ ត្រូវបានសង្គ្រោះបន្ទាន់ ដោយសារពុលស្រាថ្នាំចិនសែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។