ទាក់ទងនឹងប្រការនេះ គម្រោងពង្រឹងសហគ្រាសខ្នាតតូចបំផុត ខ្នាតតូច និងខ្នាតមធ្យម (MSME= micro Small Medium Enterprise) ដោយបានជំនួយពីទីភ្នាក់ងារអភិវឌ្ឍន៍អន្តរជាតិរបស់សហរដ្ឋអាមេរិក (USAID) កាលពីថ្ងៃទី១២ ខែឧសភា បានរៀបចំវេទិកាមួយស្ដីពីអាជីវកម្មទឹកឃ្មុំព្រៃនៅខេត្តកំពង់ធំ។
អនុប្រធានគម្រោងពង្រឹងសហគ្រាសខ្នាតតូច និងខ្នាតមធ្យម លោក ស៊ុន ប៊ុណ្ណារិទ្ធ បានថ្លែងថា វេទិកានេះគឺដើម្បីផ្ដល់ឱកាសឲ្យក្រុមសហព័ន្ធសហគ្រាសផលិតទឹកឃ្មុំព្រៃនៅកម្ពុជា បានជួបប្រាស្រ័យគ្នាឱ្យបានជិតដិតជាមួយម្ចាស់ធនាគារ និងក្រុមហ៊ុនផ្ដល់ប្រាក់កម្ចី ដើម្បីពង្រីកមុខរបររបស់ខ្លួន និងជួបជាមួយអតិថិជនធំៗ ដើម្បីទាក់ទាញពង្រីកទីផ្សារផលិតផលទឹកឃ្មុំព្រៃកម្ពុជា។
លោក ស៊ុន ប៊ុណ្ណារិទ្ធ បន្តថា អ្នកផលិតទឹកឃ្មុំព្រៃជាអ្នកការពារព្រៃសហគមន៍ដែលបានចុះបញ្ជីជាមួយក្រសួងពាក់ព័ន្ធ ដើម្បីថែទាំព្រៃផង និងប្រមូលទឹកឃ្មុំផង ហើយវេទិកានេះក៏ដើម្បីបង្ហាញពីគុណភាពទឹកឃ្មុំព្រៃដែលផលិតនៅក្នុងប្រទេសកម្ពុជាផងដែរ ៖ «ជាវេទិកាមួយដើម្បីផ្សាភ្ជាប់នូវអាជីវករ និងអ្នកផលិតទាំងអស់ ឬអ្នករកឃ្មុំហ្នឹងទាំងអស់ ដើម្បីឲ្យគាត់មានទំនាក់ទំនងនឹងគ្នាក្នុងការធ្វើអាជីវកម្មទឹកឃ្មុំ»។
អនុប្រធានទី២នៃសហព័ន្ធសហគ្រាសប្រមូល និងអភិរក្សទឹកឃ្មុំព្រៃកម្ពុជា លោក អ៊ិត វុន មកពីខេត្តព្រះវិហារ បានថ្លែងថា វេទិកាស្ដីពីអាជីវកម្មទឹកឃ្មុំព្រៃកម្ពុជានេះ មានសារប្រយោជន៍ដល់សហព័ន្ធសហគ្រាសប្រមូល និងអភិរក្សទឹកឃ្មុំព្រៃដែលអាចបង្ហាញអតិថិជនពីភាពសុទ្ធនៃទឹកឃ្មុំ និងប្រភពប្រមូលទឹកឃ្មុំព្រៃ។
លោក អ៊ិត វុន បានឲ្យដឹងថា សមាជិកប្រមូលទឹកឃ្មុំព្រៃសុទ្ធមាន ១៦ក្រុម និង ១៦សហគមន៍ នៅតាមខេត្តចំនួន ៦ គឺខេត្តព្រះវិហារ កោះកុង មណ្ឌលគិរី រតនគិរី ក្រចេះ និងខេត្តស្ទឹងត្រែង។
លោកអះអាងថា ទឹកឃ្មុំព្រៃដែលដាក់លក់នៅលើទីផ្សារសព្វថ្ងៃនេះសុទ្ធតែបានឆ្លងកាត់ម៉ាស៊ីនវាស់គុណភាពនៅមន្ទីរពិសោធន៍នៃក្រសួងពាណិជ្ជកម្ម។ លោកបញ្ជាក់ថា ទុនដែលនឹងខ្ចីមកនោះ គឺសម្រាប់ចំណាយលើគម្រោងផលិតជាក្រមួន ក្រែមសម្រាប់លាបស្បែក សាប៊ូ ស្រា និងទឹកខ្មេះជាដើម៕