សហព័ន្ធ​សហជីព​សាកល អំពាវនាវ​ឲ្យ​រដ្ឋាភិបាល​ទម្លាក់​ចោល​រាល់​បទ​ចោទ និង​ដោះលែង​លោក រ៉ុង ឈុន ជា​បន្ទាន់

ដោយ មាន ឫទ្ធិ
2020-08-04
អ៊ីម៉ែល
មតិ
Share
បោះពុម្ព
សហភាពសហជីពសកល (Global Union Federations)
សហភាពសហជីពសកល (Global Union Federations)
រូប៖ (Global Union Federations)

សហព័ន្ធ​សហជីព​សាកល (Global Union Federations​) ដែល​តំណាង​ឲ្យ​សហ​ជីព​ធំៗ​មក​ពី​បណ្តា​វិស័យ​ឧស្សាហកម្ម និង​ការងារ​ជាក់លាក់​នៅ​ទូទាំង​ពិភពលោក រួម​ទាំង​សាខា​របស់​ខ្លួន​ប្រចាំ​តំបន់​អាស៊ី​ប៉ាស៊ីហ្វិក ថ្កោលទោស​ការ​ចាប់ខ្លួន​ប្រធាន​សហភាព​សហជីព​កម្ពុជា លោក រ៉ុង ឈុន។ សហព័ន្ធ​សហជីព​សាកល អំពាវនាវ​ឲ្យ​រដ្ឋាភិបាល​ទម្លាក់​ចោល​រាល់​បទ​ចោទនា​នា​ប្រឆាំង​នឹង​លោក រ៉ុង ឈុន និង​ឲ្យ​ដោះលែង​រូបលោក​ជាបន្ទាន់។

សហព័ន្ធ​សហជីព​សាកល​ដដែល​នេះ​ថា លោក រ៉ុង ឈុន តែងតែ​ឈរ​នៅ​ជួរមុខ​គេ​ក្នុង​ការ​តស៊ូ​ទាមទារ​ឲ្យ​មានការ​ការពារ​សិទ្ធិ​របស់​កម្មករ​និយោជិត។ អង្គការ​នេះ​ថា ការ​យាយី និង​ការ​បង្ក្រាប​នា​រយៈពេល​ចុងក្រោយ​នេះ មក​លើ​ការ​ប្រមូល​ផ្តុំ​ដោយសន្តិវិធី និង​សេរីភាព​នៃ​ការ​សម្ដែង​មតិ ធ្វើឲ្យ​ខ្លួន​មាន​កង្វល់​ជា​ខ្លាំង ជុំវិញ​ការ​បន្ត​រំលោភ​សិទ្ធិ​សហជីព និង​សិទ្ធិមនុស្ស​នៅ​កម្ពុជា ដែល​ស្តែង​ឲ្យ​ឃើញ​តាមរយៈ​ការ​ចាប់ខ្លួន និង​ការ​ធ្វើទុក្ខ​បុក​ម្នេញ​មក​លើស​កម្ម​ភាព​របស់​សហជីព។ អង្គការ​នេះ​សង្កត់ធ្ងន់​ថា ការ​ចាប់ខ្លួន​លោក រ៉ុង ឈុន នៅ​ពីក្រោយ​រឿងរ៉ាវ​នៃ​សកម្មភាព​សហជីព​របស់​លោក និង​ការរិះគន់​របស់​លោក ជុំវិញ​ផល​ប៉ះពាល់​នៃ​គោលនយោបាយ​របស់​រដ្ឋាភិបាល​ឆ្លើយតបទៅនឹង​ការ​ធ្លាក់​ចុះ​សេដ្ឋកិច្ច​ដោយសារតែ​វិបត្តិ​ជំងឺរាតត្បាត​សាកល​កូវីដ១៩ គឺជា​ការវាយប្រហារ​យ៉ាង​ច្បាស់ក្រឡែត​របស់​រដ្ឋាភិបាល​កម្ពុជា​មក​លើ​រូប​លោក។

សហព័ន្ធ​សហជីព​សាកល ស្នើ​រដ្ឋាភិបាល​កម្ពុជា បំពេញ​កាតព្វកិច្ច​របស់​ខ្លួន ក្នុង​ការ​ការពារ និង​លើក​កម្ពស់​គោល​ការណ៍​នានា ដូច​មាន​ចែង​ក្នុង​អនុសញ្ញា​អង្គការ​អន្តរជាតិ​ស្ដីពី​ការងារ សន្ធិសញ្ញា​អន្តរជាតិ​ពាក់ព័ន្ធ​នឹង​បញ្ហា​សិទ្ធិមនុស្ស និង​អនុសាសន៍​នានា ដាក់​ចេញ​ដោយ​អ្នក​រាយការណ៍​ពិសេស​របស់​អង្គការ​សហប្រជាជាតិ។ សហព័ន្ធ​សហជីព​សាកល​ថា លោក រ៉ុង ឈុន ព្រមទាំង​សកម្មជន​សហជីព​ដទៃ​ទៀត ដែល​ត្រូវ​ឃុំខ្លួន និង​កាត់​ទោស​ដោយសារ​តែ​ការ​អនុវត្ត​សិទ្ធិ និង​សេរីភាព​របស់​ពួក​គេ​ក្នុង​ការ​បញ្ចេញ​មតិ ត្រូវតែ​ទទួល​បាន​នូវ​ការ​ដោះ​លែង​ជា​បន្ទាន់ និង​ទម្លាក់​ចោល​រាល់​បទ​ចោទ​នានា ប្រឆាំង​នឹង​ពួក​គេ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល