លោក ហ៊ុន សែន ស្នើ​​អ្នក​សារព័ត៌មាន​​ឱ្យ​គោរព​វិជ្ជាជីវៈ ខណៈ​​លោក​ជាប់​​ឈ្មោះ​ជា​​អ្នក​កម្ទេច​​​ស្ថាប័ន​​ព័ត៌មាន​​ឯករាជ្យ

ដោយ ហេង រស្មី
2019-06-12
អ៊ីម៉ែល
មតិ
Share
បោះពុម្ព
លោក ហ៊ុន សែន ថ្លែង​ក្នុង​ពិធី​បើក​កិច្ច​ប្រជុំ​កំពូល​សារព័ត៌មាន​អាស៊ី​លើក​ទី១៦ នៅ​ថ្ងៃ​ទី១២ ខែ​មិថុនា ឆ្នាំ២០១៩។
លោក ហ៊ុន សែន ថ្លែង​ក្នុង​ពិធី​បើក​កិច្ច​ប្រជុំ​កំពូល​សារព័ត៌មាន​អាស៊ី​លើក​ទី១៦ នៅ​ថ្ងៃ​ទី១២ ខែ​មិថុនា ឆ្នាំ២០១៩។
រូប៖ ហ្វេសប៊ុក Samdech Hun Sen, Cambodian Prime Minister

មេ​ដឹក​នាំ​របប​ក្រុង​ភ្នំពេញ​លោក ហ៊ុន សែន អំពាវនាវ​​ឱ្យ​អ្នក​សារព័ត៌មាន​គោរពច្បាប់ និង​​ក្រម​សីលធម៌​វិជ្ជាជីវៈ​ឱ្យ​បាន​ខ្ជាប់ខ្ជួន ​ចៀសវាង​ការ​ផ្សាយ​ព័ត៌មាន​មិន​ពិត​ ប៉ះពាល់​ដល់​សន្តិសុខ​សង្គម។ អ្នក​ជំនាញ​ខាង​ប្រព័ន្ធ​ផ្សព្វផ្សាយ​គាំទ្រ​ការ​លើក​ឡើង​នេះ ក៏​ប៉ុន្តែ​ស្នើ​ឱ្យ​របប​ក្រុង​ភ្នំពេញ​បើក​សិទ្ធិ​សេរីភាព​ឱ្យ​បាន​ពេញលេញ​ដល់​ស្ថាប័ន​ព័ត៌មាន​ឯករាជ្យ។

លោកនាយក​រដ្ឋ​មន្ត្រី ហ៊ុន សែន ថ្លែង​នៅ​ថ្ងៃ​ទី១២ មិថុនា​ថា អ្នក​សារព័ត៌មាន​ត្រូវ​តែ​ពង្រឹង​ការ​អនុវត្ត​ច្បាប់ និង​ក្រម​សីលធម៌ ដោយ​មិន​ត្រូវ​ផ្សព្វផ្សាយ​ព័ត៌មាន​បែប​ក្លែង​បន្លំ គំនុំគំកួន ការ​ជេរប្រមាថ និង​ការ​ញុះញង់​បញ្ឆេះ​កំហឹង​នោះ​ឡើយ។ លោក​បន្ត​ថា អ្នក​សារព័ត៌មាន​ក៏​មិន​ត្រូវ​ផ្សព្វផ្សាយ​ព័ត៌មាន​បែប​ស្អប់​ខ្ពើម​ រើស​អើង និង​បង្កជម្លោះ​រវាង​ជាតិ​សាសន៍ ឬ​សាសនា​នោះ​ដែរ ជាពិសេស គឺ​កុំ​បំផ្លើស​ព័ត៌មាន​ខុស​ពី​ការ​ពិត​ ដែល​នាំ​ឱ្យ​មាន​ភាព​វឹកវរ​នៅ​ក្នុង​សង្គម៖ «ត្រូវ​ពង្រឹង​កិច្ច​សហប្រតិបត្តិ​ការ​ឱ្យ​បាន​ជិត​ស្និទ្ធ ដើម្បី​ដោះស្រាយ​ទំនាស់​នៃ​ការ​ផ្សាយ​ព័ត៌មាន​ ដែល​បង្ក​ឱ្យ​កើត​មាន​ភាព​វឹកវរ និង​ប៉ះពាល់​ដល់​ការ​ប្រើប្រាស់​បច្ចេកវិទ្យា​ឌីជីថល»

លោក ហ៊ុន សែន ផ្ដល់​ដំបូន្មាន​បែប​នេះ​ដល់​តំណាង​រដ្ឋាភិបាល ស្ថាប័ន​ព័ត៌មាន និង​អ្នក​សារព័ត៌មាន​ជាតិ និង​អន្តរជាតិ ប្រមាណ ៥០០នាក់ នៅ​ក្នុង​ពិធី​បើក​កិច្ច​ប្រជុំ​កំពូល​សារព័ត៌មាន​អាស៊ី​លើក​ទី១៦ ស្រប​ពេល​របប​របស់​លោក​កំពុង​ជាប់​ឈ្មោះ​ថា ជារបប​ដែល​បាន​វាយ​កម្ទេច​សំឡេង​ឯករាជ្យ និង​សំឡេង​រិះគន់ ដោយ​ឥត​ត្រាប្រណី។ ជា​ពិសេស គឺ​នៅ​ចំ​ពេល​ដែល​សិទ្ធិ​សេរីភាព​បញ្ចេញ​មតិ និង​សេរីភាព​សារ​ព័ត៌មាន​នៅ​កម្ពុជា ​កំពុង​ធ្លាក់​ចុះ​ដុនដាប​ខ្លាំង ចាប់​ពី​ចុង​ឆ្នាំ២០១៧ រហូត​មក​ដល់​ពេល​បច្ចុប្បន្ន។

នាយក​ផ្នែក​ប្រព័ន្ធ​ផ្សព្វផ្សាយ​នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) លោក ណុប វី គាំទ្រ​ការ​អំពាវនាវ​របស់​លោក​នាយក​រដ្ឋ​មន្ត្រី ក៏​ប៉ុន្តែ​លោក​ស្នើ​ឱ្យ​រដ្ឋាភិបាល​បើក​លំហ​សេរីភាព​សារព័ត៌មាន​ឱ្យ​បាន​ពេញលេញ។ ជាពិសេស​លោក​ស្នើ​ឱ្យ​រដ្ឋាភិបាល​អនុញ្ញាត​ឱ្យ​ប្រព័ន្ធ​ផ្សព្វផ្សាយ​ឯករាជ្យ​អាច​បើក​ដំណើរ​ការ​នៅ​កម្ពុជា​ឡើង​វិញ​បាន និង​បញ្ឈប់​ការ​ធ្វើ​ទុក្ខបុកម្នេញ​ទៅលើ​អ្នក​សារព័ត៌មាន។

លោក​បន្ថែម​ថា ចំណុច​ដែល​លោក​ ហ៊ុន សែន​ ​លើក​ឡើង​នេះ គឺ​ជា​អ្វី​ដែល​អ្នក​សារព័ត៌មាន​​វិជ្ជាជីវៈ បាន​អនុវត្ត​ជា​ហូរហែ​រួច​មក​ហើយ ហើយ​អ្វី​ដែល​អ្នក​សារព័ត៌មាន​ចង់​បាន​បន្ថែម​ទៀត​នោះ គឺ​យន្តការ​គាំពារ​តាម​ផ្លូវ​ច្បាប់​ពី​សំណាក់​រដ្ឋាភិបាល៖ «ការ​បើក​លំហ​សេរីភាព​សម្រាប់​ការ​ផ្សព្វផ្សាយ​​ព័ត៌មាន​ពី​ស្ថាប័ន​សារព័ត៌មាន​ឯករាជ្យ​​​ទាំង​អស់​ទៅ​តាម​គ្រប់​មធ្យោបាយ​ ដូច​ជា ស្ថានីយ​វិទ្យុ​អេហ្វអឹម (FM Radio) និង​ការ​ប្រើ​មធ្យោបាយ​ផ្សេងៗ ទៀត​ហ្នឹង គឺ​រដ្ឋាភិបាល​គួរ​តែ​ផ្ដល់​ការ​គាំពារ និង​ផ្ដល់​ការ​សម្រប​សម្រួល​ឱ្យ​ច្រើន​ថែម​ទៀត ដើម្បី​ធានា​យ៉ាង​ណា​ឱ្យ​លំហូរ​ព័ត៌មាន​ពី​កម្រិត​ជាតិ​ហ្នឹង​បាន​ទៅ​ដល់​ប្រជា​ពលរដ្ឋ​នៅ​តាម​មូលដ្ឋាន​ទី​ជន​បទ​ដាច់​ស្រយាល»

ការ​វាយ​បង្ក្រាប​ប្រព័ន្ធ​ផ្សព្វផ្សាយ​ដោយ​របស់​របប​ក្រុង​ភ្នំពេញ​នោះ​​ មាន​ជាអាទិ៍ ការ​បិទ​កាសែត​ភាសា​អង់គ្លេស ឌឹ ខេមបូឌា ដេលី (The Cambodia Daily) ការ​បិទ​ហ្វ្រេកង់ (Frequency) វិទ្យុជាង៣០ ដែល​ផ្សាយ​បន្ត​កម្មវិធី​ព័ត៌មាន​របស់​ស្ថាប័ន​ព័ត៌មាន​ឯករាជ្យ ការ​ធ្វើ​ទុក​បុក​ម្នេញ​លើ​វិទ្យុ​អាស៊ី​រហូត​ដល់​បិទ​ការិយាល័យ​នៅ​ភ្នំពេញ ការ​ចាប់​ឃុំ​ខ្លួន​អតីត​អ្នក​យក​ព័ត៌មាន​អាស៊ី​សេរី​ពីរ​រូប​ដោយ​បំពាន និង​ការ​ចាប់​ខ្លួន​អ្នក​បង្ហោះ​សារ​រិះគន់​តាម​ហ្វេសប៊ុក​ ជាដើម​។ ស្ថានភាព​ធ្លាក់​ចុះ​ដុនដាប​នេះ នៅ​មិន​ទាន់​ត្រូវ​បាន​ស្ដារ​ឡើង​វិញ ដូច​អ្វី​ដែល​របប​ក្រុង​ភ្នំពេញ​បាន​គូស​បញ្ជាក់​​នៅ​ក្នុង​សេចក្ដី​ថ្លែង​ការណ៍​កាល​ពី​ចុង​ឆ្នាំ២០១៨ កន្លង​ទៅ​នោះ​ទេ។

ក្រៅពី​បាន​ណែ​នាំ​អ្នក​សារព័ត៌មាន​ឱ្យ​គោរព​ច្បាប់ និង​ក្រម​សីលធម៌​ហើយ លោក​ ហ៊ុន សែន ក៏​បាន​សង្កត់​ធ្ងន់​ទៅលើ​រឿង​ឧក្រិដ្ឋ​កម្ម​ព័ត៌មាន​វិទ្យា​ផង​ដែរ។ លោក​បាន​ថ្លែង​ថា ឧក្រិដ្ឋ​កម្ម​ព័ត៌មាន​វិទ្យា​ ដូច​ជា ការ​ហែក​ចូល​បំផ្លាញ​ឯកសារ​សាធារណៈ ការ​ជំរិត​ទារ​ប្រាក់​តាម​ប្រព័ន្ធ​អនឡាញ និង​ការ​រំលោភ​លើ​សិទ្ធិ​ឯកជន​ជាដើម កំពុង​តែ​គំរាម​កំហែង​ដល់​សន្តិសុខ​តំបន់ និង​ពិភពលោក​ទាំងមូល។ លោក​ស្នើ​ឱ្យ​ភាគី​ពាក់ព័ន្ធ​ទាំង​អស់​បង្កើន​កិច្ច​សហប្រតិបត្តិការ​ឱ្យ​កាន់​តែ​ជិត​ស្និទ្ធ​ថែម​ទៀត ដើម្បី​ប្រយុទ្ធ​ប្រឆាំង​នឹង​ព័ត៌មាន​ក្លែង​ក្លាយ​ និង​ឧក្រិដ្ឋ​កម្ម​ព័ត៌មាន​បច្ចេកវិទ្យា​នេះ៖ «ត្រូវ​រួម​គ្នា​កសាង​ក្របខណ្ឌ​គោល​នយោបាយ យុទ្ធសាស្ត្រ​ បទ​បញ្ញត្តិ​ច្បាប់​សម្រាប់​ប្រជែង​ផ្សព្វផ្សាយ​ព័ត៌មាន និង​បទ​បញ្ញត្តិ​ស្តង់ដារ​សុវត្ថិភាព​ឌីជីថល ដែល​ជា​កត្តា​ចាំបាច់​សម្រាប់​ការ​គ្រង់​គ្រង​សុវត្ថិភាព​ទិន្នន័យ​ក្នុង​ការ​ធ្វើ​ពាណិជ្ជកម្ម​ ការ​ទូទាត់​តាម​ប្រព័ន្ធ​អេឡិចត្រូនិក​ និង​សន្តិសុខ​តាម​ប្រព័ន្ធ​អ៊ិនធើណិត ដើម្បី​ប្រឆាំង​នឹង​ព័ត៌មាន​ក្លែង​បន្លំ និង​ឧក្រិដ្ឋ​កម្ម​ព័ត៌មាន​វិទ្យា»

តាម​រយៈ​សុន្ទរកថា​នេះ លោក ហ៊ុន សែន ហាក់​ដូចជា​មាន​បំណង​ចង់​ឱ្យ​ច្បាប់​ប្រឆាំង​នឹង​ព័ត៌មាន​ក្លែង​ក្លាយ និង​ឧក្រិដ្ឋកម្ម​ព័ត៌មាន​វិទ្យា លេច​ចេញ​ជា​រូប​រាង​ក្នុង​ពេល​ឆាប់ៗ ខណៈ​លោក​ធ្លាប់​បាន​ជំរុញ​ឱ្យ​មន្ត្រី​ជំនាញ​គិតគូរ​ពី​ការ​តាក់តែង​ច្បាប់​នេះ​ចំនួន​ពីរ​ដង​រួច​មក​ហើយ។

អ្នក​ជំនាញ​ខាង​សារព័ត៌មាន​លោក ណុប វី ថ្លែង​ថា ច្បាប់​ប្រភេទ​នេះ​អាច​នឹង​រឹតត្បិត​បន្ថែម​ទៀត​លើ​សិទ្ធិ​សេរីភាព​លើ​ប្រព័ន្ធ​អ៊ិនធើណិត ប្រសិន​បើ​មិន​មាន​ការ​ចូល​រួម​ពិគ្រោះ​យោបល់​ពី​គ្រប់​ភាគី​ពាក់ព័ន្ធ​ទេ​នោះ៖ «ប្រសិន​បើ​ច្បាប់​ត្រូវ​បាន​បង្កើត​ឡើង​ដើម្បី​រឹតត្បិត​ដល់​សេរីភាព​នៃ​អ្នក​ប្រើប្រាស់​អ៊ីនធើណិត​​ថែម​ទៀត ខ្ញុំ​គិត​ថា អា​ហ្នឹង​វា​ធ្វើ​ឱ្យ​រូប​ភាព​នៃ​ស្ថានភាព​សេរីភាព​បញ្ចេញ​មតិ និង​សេរីភាព​សារព័ត៌មាន​នៅ​ក្នុង​ប្រទេស​យើង​ហ្នឹង វា​កាន់​តែ​មាន​សភាព​យ៉ាប់យ៉ឺន​ជាង​ពេល​បច្ចុប្បន្ន​នេះ​ទៀត»

ថ្វី​ត្បិត​តែ​កម្ពុជា​​មិន​ទាន់​មាន​ច្បាប់​ស្ដីពី​ការ​គ្រប់​គ្រង​ប្រព័ន្ធ​អ៊ិនធើណិត​ក្ដី ក៏​អាជ្ញាធរ​របប​ក្រុង​ភ្នំពេញ​បាន​ចាត់​វិធានការ​លើ​អ្នក​ប្រើប្រាស់​ហ្វេសប៊ុក​ ដែល​ហ៊ាន​រិះគន់ ឬ​វាយ​ប្រហារ​របប​នេះ អស់​ជា​ច្រើន​នាក់​រួច​មក​ហើយ។ ជាឧទាហរណ៍ របប​ក្រុង​ភ្នំពេញ​បាន​ចាប់​ខ្លួន និង​ចោទ​ប្រកាន់​សកម្មជន​គណបក្ស​សង្គ្រោះ​ជាតិ​ខេត្ត​ស្វាយរៀង លោក គង់ ម៉ាស់ ដែល​បាន​សរសេរ​សារ​រិះគន់​របប​លោក ហ៊ុន សែន ជុំ​វិញ​រឿង​អសមត្ថភាព​ក្នុង​ការ​​ដោះស្រាយ​បញ្ហា​ប្រឈម​របស់​ជាតិ។ បទ​ចោទ​ដ៏​ពេញ​និយម​បំផុត​ដែល​​អាជ្ញាធរ​របប​ក្រុង​ភ្នំពេញ​ប្រើប្រាស់​ដើម្បី​ចាត់​ការ​អ្នក​ដែល​ហ៊ាន​បញ្ចេញ​មតិ​រិះគន់​នោះ​ គឺ​បទ​ញុះញង់ ដែល​មាន​ចែង​នៅ​ក្នុង​ក្រមព្រហ្មទណ្ឌ។

ទាក់ទង​នឹង​រឿង​នេះ​ដែរ អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) បាន​ចាត់​ទុក​ការ​រៀប​ចំ​កិច្ច​ប្រជុំ​កំពូល​សារព័ត៌មាន​អាស៊ី​លើក​ទី១៦ នេះ ថា ជា​ការ​​ចំអក​ឡកឡឺយ​ដល់​សេរីភាព​បញ្ចេញមតិ​ និង​សេរីភាព​សារព័ត៌មាន។ យូមែន រ៉ៃត៍ វ៉ច្ឆ វាយ​តម្លៃ​យ៉ាង​ដូច្នេះ​ ដោយ​សារ​តែ​រដ្ឋាភិបាល​កម្ពុជា​ដែល​ជា​ម្ចាស់​ផ្ទះ​នៃ​កិច្ច​ប្រជុំ​ថ្នាក់​អន្តរជាតិ​នេះ គឺ​ជា​អ្នក​ដែល​បាន​វាយ​បង្ក្រាប​ឥត​ស្រាកស្រាន្ត​ទៅ​លើ​ស្ថាប័ន​ព័ត៌មាន​ឯករាជ្យ និង​បំបិទ​មាត់​អ្នក​ហ៊ាន​រិះគន់​ការ​ដឹកនាំ​របស់​លោក ហ៊ុន សែន។ ម្យ៉ាង​វិញ​ទៀត ព្រឹត្តិការណ៍​នេះ ត្រូវ​បាន​រៀប​ចំ​ឡើង​ដោយ​វិទ្យាស្ថាន​អាស៊ី​ប៉ាស៊ីហ្វិក ដើម្បី​អភិវឌ្ឍន៍​ការ​ផ្សព្វផ្សាយ (AIBD) ដែល​ទទួល​បាន​ជំនួយ​ឧបត្ថម្ភ​ពី​អង្គការ​យូណេស្កូ (UNESCO) ដែល​ជា​ភ្នាក់ងារ​របស់​អង្គការ​សហប្រជាជាតិ មាន​អាណត្តិ​ការងារ​មួយ​ផ្នែក​ផ្ដោត​លើ​ការ​ការពារ​សេរីភាព​សារព័ត៌មាន។

យូមែន រ៉ៃត៍ វ៉ច្ឆ (Human Rights Watch) ​ជំរុញ​​ឱ្យ​សហគមន៍​អន្តរជាតិ​ ដាក់​ចេញ​នូវ​វិធាន​ការ​ច្បាស់លាស់​លើ​របប​លោក ហ៊ុន សែន ដើម្បី​ទាម​ទារ​ឱ្យ​របប​នេះ​បញ្ឈប់​ទង្វើ​យាយី​លើ​អ្នក​សារព័ត៌មាន និង​អនុញ្ញាត​ឱ្យ​ស្ថាប័ន​​ព័ត៌មាន​ឯករាជ្យ​ អាច​​បើក​ដំណើរ​ការ​ឡើង​វិញ​បាន

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល