សមត្ថកិច្ច​ចាប់ខ្លួន​ពលរដ្ឋ​ម្នាក់​ដែលរិះគន់​រឿង​គ្រឿងញៀន​និង​លំហូរ​ជនបរទេស​ខុសច្បាប់

ដោយ ខាន់ លក្ខិណា
2023.11.25
សមត្ថកិច្ច​ចាប់ខ្លួន​ពលរដ្ឋ​ម្នាក់​ដែលរិះគន់​រឿង​គ្រឿងញៀន​និង​លំហូរ​ជនបរទេស​ខុសច្បាប់ លោក កង សារ៉ន ពលរដ្ឋដែលត្រូវចាប់ខ្លួន និងផ្ដន្ទាទោស​ករណីរិះគន់គណបក្សប្រជាជនកម្ពុជា​ នៅខេត្ត​បន្ទាយមានជ័យ។
រូប៖ ហ្វេសប៊ុកលោក កង សារ៉ន

សមត្ថកិច្ច​ខេត្ត​បន្ទាយមានជ័យ នៅ​ល្ងាច​ថ្ងៃទី​២៥ វិច្ឆិកា បាន​ចាប់ខ្លួន​ពលរដ្ឋ​ម្នាក់ ក្រោយ​តុលាការ​ផ្ដន្ទាទោស​ឱ្យ​លោក​ជាប់​ពន្ធនាគារ ៣​ឆ្នាំ ករណី​រិះគន់​បក្ស​ប្រជាជន​កម្ពុជា រឿង​អសមត្ថភាព ក្នុង​ការ​ទប់ស្កាត់​បញ្ហា​គ្រឿងញៀន និង​លំហូរ​ចូល​ជនបរទេស​រស់នៅ​កម្ពុជា​ខុសច្បាប់។

ការ​ចាប់ខ្លួន​នេះ ក្រោយពី​លោក កង សារ៉ន កាល​ថ្ងៃទី​២៥ វិច្ឆិកា បាន​បញ្ជាក់​ជំហរ និង​ប្ដេជ្ញា​មិន​ចាក​ចេញ​ទៅណា​ឡើយ បើ​ទោះ​បី​ជា​តុលាការខេត្ត​បន្ទាយមានជ័យ​បាន​ផ្ដន្ទាទោស​លោក​ឱ្យ​ជាប់​ពន្ធនាគារ ៣​ឆ្នាំ និង​ចេញ​ដីកា​ឱ្យ​ចាប់ខ្លួន​លោក​ក៏ដោយ។

វីដេអូលោក កង សារ៉ន មុនពេលត្រូវសមត្ថកិច្ចចាប់ខ្លួន៖

នាយក​ទទួលបន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិមនុស្ស​លីកាដូ (Licadho) លោក អំ សំអាត ប្រាប់​វិទ្យុ​អាស៊ីសេរី នៅ​ថ្ងៃទី​២៥ វិច្ឆិកា ថា លោក កង សារ៉ន ត្រូវ​សមត្ថកិច្ច​ចាប់ខ្លួន​នៅ​ស្រុក​ម៉ាឡៃ ហើយ​បញ្ជូន​ទៅ​ខេត្ត​បន្ទាយមានជ័យ​ភ្លាមៗ​នៅ​ល្ងាច​ថ្ងៃទី​២៥ វិច្ឆិកា​នេះ។

លោក អំ សំអាត៖ «ហ្នឹងហើយ ចាប់​ល្ងាច​ហ្នឹង ហើយ​បញ្ជូន​ទៅ​ខេត្ត​បន្ទាយមានជ័យ បញ្ជូន​ស្នងការ ប៉ុន្តែ មិន​ដឹង​ថា ទៅ​ដល់​ពន្ធនាគារ ឬ​នៅ​ស្នងការ​នៅ​ឡើយ»

វិទ្យុ​អាស៊ីសេរី​មិន​ទាន់​អាច​សុំ​ការ​ឆ្លើយ​តប​ពី​គ្រួសារ​របស់​លោក កង សារ៉ន បាន​នៅ​ឡើយ កាល​ពី​ថ្ងៃទី​២៥ វិច្ឆិកា។

តុលាការ​ខេត្ត​បន្ទាយមានជ័យ កាល​ពី​ថ្ងៃទី​២២ វិច្ឆិកា បាន​កាត់​ទោស​លោក កង សារ៉ន ឱ្យ​ជាប់​ពន្ធនាគារ ៣​ឆ្នាំ ក្រោម​បទ​ចោទ​ប្រកាន់ «​ជេរប្រមាថ​តាម​ទី​សាធារណៈ បទ​បរិហារកេរ្តិ៍ និង​ញុះញង់ និង​បទ​ប្រមាថ​អង្គ​ព្រះមហាក្សត្រ​» ពាក់ព័ន្ធ​នឹង​លោក រិះគន់​បក្ស ប្រជាជន​កម្ពុជា រឿង​អសមត្ថភាព ក្នុង​ការ​ទប់ស្កាត់ បញ្ហា​គ្រឿងញៀន និង លំហូរ​ពលរដ្ឋ វៀតណាម រស់នៅ​កម្ពុជា​ខុសច្បាប់។

ការ​ចោទ​ប្រកាន់​នេះ បន្ទាប់​ពី​លោក កង សារ៉ន បាន​ផ្សាយ​ផ្ទាល់​នៅ​លើ​បណ្តាញ​សង្គម​ហ្វេសប៊ុក (Facebook) និយាយ​រិះគន់​ការ​ដឹកនាំ​ប្រទេស​របស់​គណបក្ស​ប្រជាជន​កម្ពុជា ក្នុង​អំឡុង​ពេល​ឃោសនា​រក​សំឡេងឆ្នោត កាល​ពី​ថ្ងៃទី​២ ខែ​កក្កដា ឆ្នាំ​២០២៣។

នៅក្នុង​វីដេអូ ផ្សាយ​ផ្ទាល់​នោះ លោក​បាន​ចោទ​ជា​សំណួរ​ថា តើ​ថា​ក្រោយពី​បក្ស​ប្រជាជន​នេះ ឈ្នះ​ឆ្នោត នឹង​មាន​វិធានការ​ដេញ​ពលរដ្ឋ​វៀតណាម ចេញ ឬ​បន្ត​ឱ្យ​ហូរ​ចូល​ដោយ​ខុសច្បាប់​បន្ត​ទៀត? ហើយ​នៅ​ក្នុង​នោះ លោក​ក៏បាន​រិះគន់​ពី​បញ្ហា​គ្រឿងញៀន អំពើពុករលួយ​និង​បញ្ហា​អសន្តិសុខ​មួយ ចំនួន​ទៀត។

នៅក្នុង​ថ្ងៃ​ដដែល​នោះ ក្រោយ​វីដេអូ​នេះ​បាន​ផ្សព្វផ្សាយ​ជា​សាធារណៈ រយៈពេល ១​ម៉ោង នៅ​លើ​បណ្ដាញ​សង្គម សមត្ថកិច្ច​ខេត្ត​បន្ទាយមានជ័យ បាន​ចាប់ និង​ឃុំ​លោក​រយៈពេល​១០​ថ្ងៃ ដោយ​ចោទ​ប្រកាន់​ពី​បទ​ជេរ​ប្រមាថ ជា​សាធារណៈ និង​ញុះញង់ ប៉ុន្តែ​នៅ​ថ្ងៃទី​១១ ខែ​កក្កដា លោក​ត្រូវ​បាន​ដោះ​លែងឱ្យ​នៅ​ក្រៅ​ឃុំ​វិញ។

តែ​យ៉ាងណា នៅ​ថ្ងៃទី២៥ វិច្ឆិកា នេះ សមត្ថកិច្ច​បាន​ចាប់ខ្លួន​លោក កង សារ៉ន ជា​ថ្មី​ទៀត ក្រោយ​លោក​ប្រកាស​មិន​គេច​ខ្លួន ខណៈ​តុលាការ​កាត់​ទោស​ឱ្យ​គាត់​ជាប់​ពន្ធនាគារ ៣ឆ្នាំ។

លោក កង សារ៉ន ប្រាប់​វិទ្យុ​អាស៊ីសេរី កាលពី​ថ្ងៃទី​២២ វិច្ឆិកា ដោយ​ចាត់ទុក​ការ​កាត់​ទោស​ឱ្យ​គាត់​ជាប់​ពន្ធនាគារ​ថា ជា​ទង្វើ​ដ៏​អាក្រក់ លើ​អ្នក​ស្នេហា​ជាតិ និង​បង្ហាញ​ឱ្យ​ឃើញ​ថា អាជ្ញាធរ​មិន​ខ្វល់ខ្វាយ​ពី​បញ្ហា​សង្គម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។