សកម្មជនដីធ្លីនៅសហគមន៍បឹងកក់ ថ្មគោល ៦នាក់ និងអ្នកលក់ប៉េងប៉ោង ៤នាក់ សរុបចំនួន ១០នាក់ រួមទាំងដូនចាស់ និងកុមារផង ត្រូវកងកម្លាំងសន្តិសុខខណ្ឌដង្កោ ចាប់ឃាត់ខ្លួនទុកនៅអធិការខណ្ឌដង្កោ នៅពេលសហគមន៍មានជម្លោះដីធ្លីរៀបចំបាតុកម្មអហិង្សានៅមុខមណ្ឌលអប់រំកែប្រែ២ (ម២) នៃពន្ធនាគារព្រៃស នៅថ្ងៃទី៤ កញ្ញា។
មន្ត្រីអធិការខណ្ឌដង្កោ បានចោទសមាជិកសហគមន៍មានជម្លោះដីធ្លី ថារៀបចំបាតុកម្មដោយខុសច្បាប់ តែមិនបានបញ្ជាក់ថាខុសច្បាប់មួយណានោះទេ ហើយចោទអ្នកលក់ប៉េងប៉ោងថាបានលក់ខ្យល់ឲ្យអ្នកតវ៉ាខុសច្បាប់។
បន្ទាប់ពីឃាត់ខ្លួនអ្នកទាំងនោះរយៈពេល ៣ម៉ោង អាជ្ញាធរសម្រេចដោះលែងអ្នកលក់ប៉េងប៉ោងទាំង ៤នាក់។
ដោយឡែកចំពោះសហគមន៍បឹងកក់ និងថ្មគោលវិញ មន្ត្រីអធិការខណ្ឌដង្កោ បានឲ្យសរសេរកិច្ចសន្យាផ្ទាល់ដៃជាថ្នូរនឹងការដោះលែង។
មកដល់ម៉ោង ៣រសៀល តំណាងសហគមន៍បឹងកក់ម្នាក់ និងតំណាងសហគមន៍ថ្មគោល ៥នាក់ផ្សេងទៀត មិនទាន់ត្រូវបានអាជ្ញាធរដោះលែងនៅឡើយ។
តំណាងសហគមន៍បឹងកក់ អ្នកស្រី បូវ សោភា ដែលទើបចេញពីពន្ធនាគារកាលពី ២សប្ដាហ៍មុន ហៅការចាប់ខ្លួនសមាជិកសហគមន៍ និងអ្នកលក់ប៉េងប៉ោង ថាជាការរឹតត្បិតសិទ្ធិបញ្ចេញមតិដោយធ្វើការគំរាមកំហែង បំបិទមាត់សំឡេងរិះគន់៖ « បញ្ចប់វិវាទដីធ្លីជាមួយប្រជាពលរដ្ឋ បញ្ចប់បញ្ហាជាមួយប្រជាពលរដ្ឋ។ គាត់ ( លោក ហ៊ុន សែន ) ជានាយករដ្ឋមន្ត្រីមួយដែលមានព្រហ្មវិហារធម៌ ប្រជាពលរដ្ឋនៅតែគោរព ស្ងើចសរសើរដើម្បីបន្តបោះឆ្នោតឲ្យទៀតដែរ »។
សមាជិកសហគមន៍ដីធ្លីនៅភ្នំពេញ មានសហគមន៍បឹងកក់ និងថ្មគោល ប្រមាណ ១០០នាក់ ប្រមូលផ្តុំគ្នានៅខាងមុខមណ្ឌលកែប្រែ២ នៅពេលព្រឹកដោយមានកាន់រូបថតសមាជិកសហគមន៍ត្រូវអាជ្ញាធរវាយដំ កាន់ផ្កាឈូកស ទង់ជាតិ ទង់សាសនា កាន់មេក្រូ គ្រោងបង្ហោះប៉េងប៉ោងចំនួន ៣០០ ដើម្បីផ្ញើសារលើកទឹកចិត្តដល់អ្នកស្រី ទេព វន្នី សកម្មជនតវ៉ាដីធ្លីនៃសហគមន៍បឹងកក់ និងអ្នកស្រី លឹម មុន្នី អ្នកការពារសិទ្ធិមនុស្សនៃសមាគមអាដហុក (ADHOC) ដែលអ្នកទាំងពីរកំពុងជាប់ឃុំនៅក្នុងមណ្ឌលអប់រំកែប្រែ២ នៃពន្ធនាគារព្រៃស។
មុនពេលបាតុកម្មកើតឡើង អាជ្ញាធរប្រហែល ១០០នាក់ មានកងប្រជាការពារ កងសន្តិសុខខណ្ឌដង្កោ ដាក់ប្រមូលផ្តុំពិភាក្សាគ្នា ហើយដាក់ពង្រាយកម្លាំងតាមឃ្លាំមើលក្បួនសហគមន៍ដីធ្លី។ អាជ្ញាធរមិនបានបំបែកក្បួនបាតុកម្មនោះទេ តែបានចាប់យកប៉េងប៉ោងដែលអ្នកតវ៉ារៀបចំសម្រាប់បង្ហោះសារគាំទ្រដល់អ្នកដែលកំពុងជាប់ឃុំដើម្បីឲ្យពួកគេបានឃើញ។
អាជ្ញាធរបានទូរស័ព្ទមកតំណាងសហគមន៍ឲ្យទៅយកប៉េងប៉ោងវិញ ដែលគេដាក់នៅក្នុងវត្តមួយខាងមុខពន្ធនាគារ។ ទីនោះហើយដែលអាជ្ញាធរចាប់ប្រជាពលរដ្ឋដែលជាអ្នកតវ៉ា និងអ្នកលក់ប៉េងប៉ោង ព្រមទាំងម៉ូតូដាក់បំពង់ខ្យល់សម្រាប់សប់ប៉េងប៉ោងដាក់ចូលឡានសន្តិសុខ បញ្ជូនមកអធិការដ្ឋាននគរបាលខណ្ឌដង្កោ។
នៅខាងមុខមណ្ឌលអប់រំកែប្រែ២ នៃពន្ធនាគារព្រៃស ឯណោះវិញ សហគមន៍មានជម្លោះដីធ្លីរៀបចំបាតុកម្មអហិង្សាទាមទារឲ្យដោះលែងអ្នកជាប់ឃុំក្នុងពន្ធនាគារ និងស្នើឲ្យអាជ្ញាធរដោះស្រាយជម្លោះដីធ្លីរ៉ាំរ៉ៃជូនពួកគេ។
ក្រោយពីអាជ្ញាធរចាប់ខ្លួនសកម្មជនដីធ្លី និងអ្នកលក់ប៉េងប៉ោងបញ្ជូនទៅអធិការដ្ឋានខណ្ឌដង្កោ សហគមន៍មានជម្លោះដីធ្លីផ្អាកការតវ៉ានៅខាងមុខពន្ធនាគារ ហើយបានលើកគ្នាទៅតវ៉ានៅខាងមុខអធិការដ្ឋានខណ្ឌដង្កោ។
ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត មើលឃើញថា មូលហេតុដែលអាជ្ញាធរចាប់ឃាត់ខ្លួនប្រជាពលរដ្ឋមិនឲ្យធ្វើការតវ៉ា មិនមានហេតុផលគ្រប់គ្រាន់។ លោកថា ការប្រមូលបញ្ចេញមតិជាសិទ្ធិសេរីភាពរបស់ពលរដ្ឋ ដែលធានាដោយច្បាប់។ លោកហៅការឃាត់ខ្លួនប្រជាពលរដ្ឋនេះ នឹងធ្វើឲ្យស្ថានភាពសិទ្ធិមនុស្សនៅប្រទេសកម្ពុជា កាន់តែមានស្ថានភាពអាក្រក់ទៅ ខណៈការបោះឆ្នោតខិតចូលមកដល់៖ « អាជ្ញាធរប្រហែលជាគាត់បារម្ភពេក។ យើងឃើញថា បើទោះជាប្រជាជនអាចរៀបចំបានតែមនុស្សមួយចំនួន ត្រូវបានចាប់ខ្លួន »។
អ្នកស្រី ទេព វន្នី ត្រូវគេឃុំខ្លួនកាលពីថ្ងៃទី១៧ សីហា ករណីប្រើហិង្សាលើអាជ្ញាធរនៅខាងមុខផ្ទះនាយករដ្ឋមន្ត្រី ក្បែរវិមានឯករាជ្យកាលពីឆ្នាំ២០១៣ ហើយអ្នកស្រីទើបត្រូវគេចោទករណីថ្មីមួយទៀតជាប់ពាក់ព័ន្ធករណីហិង្សាកាលពីឆ្នាំ២០១១ ដែលអ្នកស្រីនឹងត្រូវឡើងតុលាការនៅថ្ងៃទី៨ និងទី១៩ កញ្ញា ខាងមុខ។ ចំណែកមន្ត្រីសិទ្ធិមនុស្សនៃសមាគមអាដហុក នឹងត្រូវតុលាការកំពូលជំនុំជម្រះនៅថ្ងៃទី៥ កញ្ញា។
ទាក់ទងនឹងយុទ្ធនាការថ្ងៃច័ន្ទពណ៌ខ្មៅវិញ អ្នកស្រី បូវ សោភា តំណាងសហគមន៍បឹងកក់ មិនទាន់ច្បាស់ថា នឹងរៀបចំយុទ្ធនាការនេះ ឬយ៉ាងណាទេ? អ្នកស្រីបញ្ជាក់ថា សហគមន៍អ្នកស្រីនៅថ្ងៃច័ន្ទស្អែក នឹងរៀបចំលិខិតមួយសម្រាប់ដាក់ជូនធនាគារពិភពលោក (World Bank) នៅថ្ងៃអង្គារ ទី៦ កញ្ញា ដើម្បីសុំអន្តរាគមន៍ដំណោះស្រាយដីធ្លីនៅតំបន់បឹងកក់។
ទោះបីជាយ៉ាងណា សហគមន៍បុរីកីឡា នឹងរៀបចំធ្វើយុទ្ធនាការថ្ងៃច័ន្ទពណ៌ខ្មៅនៅក្នុងសហគមន៍បុរីកីឡាផ្ទាល់ នៅថ្ងៃច័ន្ទ ទី៥ កញ្ញា ស្អែក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។