សមាគមគ្រូបង្រៀនខកចិត្តចំពោះអាជ្ញាធរដែលមិនអនុញ្ញាតឱ្យប្រារព្ធទិវាគ្រូបង្រៀនពិភពលោកនៅទីលានប្រជាធិបតេយ្យ
2024.09.27
រូបឯកសារ៖ សមាគមគ្រូបង្រៀនកម្ពុជាឯករាជ្យប្រារព្ធធ្វើទិវាគ្រូបង្រៀនពិភពលោក នៅទីលានប្រជាធិបតេយ្យ កាលពីថ្ងៃទី៥ ខែតុលា ឆ្នាំ២០២៤។
រូបពីពលរដ្ឋ
សមាគមគ្រូបង្រៀនកម្ពុជាឯករាជ្យចាត់ទុកការបដិសេធរបស់សាលារាជធានីភ្នំពេញ ដែលមិនឱ្យប្រារព្ធទិវាគ្រូបង្រៀនពិភពលោកនៅទីលានប្រជាធិបតេយ្យនៅថ្ងៃទី៥ ខែតុលាខាងមុខថា ជាការរឹតត្បិតសេរីភាពសម្ដែងមតិ។
ប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី ប្រាប់វិទ្យុអាស៊ីសេរី នៅថ្ងៃទី២៧ ខែកញ្ញាថា អ្នកស្រីខកចិត្តចំពោះអាជ្ញាធររាជធានីភ្នំពេញ ដែលមិនអនុញ្ញាតឱ្យសមាគមគ្រូបង្រៀនសម្ដែងមតិនៅទីលានប្រជាធិបតេយ្យ។
អ្នកស្រីចាត់ទុកការមិនអនុញ្ញាតឱ្យសមាគមគ្រូបង្រៀនកម្ពុជាឯករាជ្យរៀបចំទិវាគ្រូបង្រៀនពិភពលោកនេះ គឺបង្ហាញថា លំហសេរីភាពក្នុងការសម្ដែងមតិនៅកម្ពុជាកាន់តែរួមតូច។
អ្នកស្រី អ៊ុក ឆាយ៉ាវី៖ «ជាការបិទសិទ្ធិសេរីភាព យើងឃើញលំហប្រជាធិបតេយ្យនៅកម្ពុជាយើងហ្នឹងកាន់តែរួមតូច។ ទីលានប្រជាធិបតេយ្យគឺជាទីលានដែលប្រជាពលរដ្ឋគ្រប់មជ្ឈដ្ឋានអាចទៅសម្ដែងមតិថា ដើរចុះក្រែងមិនឱ្យដើរ ប៉ុន្តែនេះគ្រាន់តែយើងទៅផ្ញើសារ ដើម្បីផ្ញើសារទៅរាជរដ្ឋាភិបាលពីទុក្ខកង្វល់របស់គ្រូបង្រៀនត្រូវបានហាមឃាត់ដែរ»។
ការលើកឡើងនេះ បន្ទាប់ពីរដ្ឋបាលរាជធានីភ្នំពេញកាលពីថ្ងៃទី២៦ ខែកញ្ញា បានបដិសេធសំណើរបស់សមាគមគ្រូបង្រៀនកម្ពុជាឯករាជ្យ ដែលស្នើសុំទីលានប្រជាធិបតេយ្យ ដើម្បីប្រារព្ធទិវាគ្រូបង្រៀនពិភពលោក ដែលគ្រោងធ្វើនៅថ្ងៃទី៥ ខែតុលាខាងមុខ។
ការបដិសេធរបស់សាលារាជធានីភ្នំពេញនេះ ក្រោមហេតុផលថា ទីលានប្រជាធិបតេយ្យជាទីតាំង សម្រាប់តែការធ្វើបាតុកម្មដោយសន្តិវិធី ឬជាកន្លែង បញ្ចេញមតិជាសាធារណៈ។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូ លោក អំ សំអាត ប្រាប់វិទ្យុអាស៊ីសេរីនៅថ្ងៃទី២៧ ខែកញ្ញា ថា ការបដិសេធ របស់សាលាក្រុងភ្នំពេញ ហាក់មិនសមហេតុផលឡើយ។ លោកថា ទីលានប្រជាធិបតេយ្យ គឺជាកន្លែងជួបជុំ ការប្រមូលផ្ដុំ និងការសម្ដែងមតិ ហើយការ ប្រារព្ធធ្វើទិវាគ្រូបង្រៀនពិភពលោកក៏ជាការសម្ដែងមតិដែរ។
លោក អំ សំអាត៖ «វាជាទិវាសកលមួយដែលទូទាំងពិភពលោក ត្រូវរំលឹកនិងធ្វើការចង់ចាំ។ ដូច្នេះ ខ្ញុំយល់ថា ហេតុផលនៅក្នុងការមិនឱ្យជួបជុំហ្នឹង ក៏វាមិនជាហេតុផលសមរម្យមួយដែរ ពីព្រោះដោយសារតែពួកគាត់ខ្វះប្រារព្ធហើយបានជារៀងរាល់ឆ្នាំ តែងតែស្នើសុំទៅសាលារាជធានីភ្នំពេញ ដើម្បីផ្ដល់ទីតាំងហ្នឹង ហើយសាលារាជធានីភ្នំពេញ តែងតែផ្ដល់ដល់ពេលឆ្នាំនេះ វានាំឱ្យមានរឿងជាការចម្លែកទៅវិញ»។
សមាគមគ្រូបង្រៀនកម្ពុជាឯករាជ្យ គ្រោងនឹងរៀបចំទិវាគ្រូបង្រៀនពិភពលោកនៅថ្ងៃទី៥ ខែតុលា ឆ្នាំ២០២៤ ក្រោមប្រធានបទ «សេរីភាពគ្រូបង្រៀន» ដែលមានអ្នកចូលរួមប្រមាណ ១៥០នាក់។ ក្រោយពីជួបជុំគ្នា សមាគមគ្រូបង្រៀន កម្ពុជាឯករាជ្យ ក៏គ្រោងដង្ហែញត្តិដាក់ជូនក្រសួងអប់រំ ខុទ្ទកាល័យនាយករដ្ឋមន្ត្រី និងរដ្ឋសភាដែរ។
ប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី បញ្ជាក់ថា សមាគមនឹងពិភាក្សាគ្នាបន្ថែមទៀត ក្រោយពីសាលារាជធានីភ្នំពេញមិនអនុញ្ញាតឱ្យប្រារព្ធទិវានេះនៅទីលានប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
- សមត្ថកិច្ចម៉ាឡេស៊ីបញ្ជូនពលករខ្មែរម្នាក់ដែលរិះគន់រដ្ឋាភិបាលលោក ហ៊ុន ម៉ាណែត មកកម្ពុជា
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- សកម្មជននិងសង្គមស៊ីវិលទទូចឱ្យរដ្ឋាភិបាលស្ដារទំនាក់ទំនងកម្ពុជា និងស៊ុយអែតឡើងវិញ