មជ្ឈមណ្ឌលសិទ្ធិមនុស្សដាក់ឲ្យប្រើប្រាស់គេហទំព័រថ្មីបង្ហាញពីការរំលោភសិទ្ធិកម្មករ
2014.02.28
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា (CCHR) លោក ឌុច ពិសិដ្ឋ ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៧ ខែមករា ឆ្នាំ២០១៤។
មជ្ឈមណ្ឌលសិទ្ធិមនុស្សកម្ពុជា នៅថ្ងៃទី២៨ កុម្ភៈ បានចេញគេហទំព័រថ្មីមួយ ដើម្បីតាមដានអំពីការរំលោភសិទ្ធិមនុស្ស ចំពោះការធ្វើអាជីវកម្មរបស់បណ្ដារោងចក្រកាត់ដេរនៅប្រទេសកម្ពុជា។ គោលបំណងរបស់គេហទំព័រនេះ គឺបង្ហាញទៅសាធារណជននូវបញ្ហាកូដកម្ម បាតុកម្ម ការដួលសន្លប់ និងការរើសអើងសហជីព។
ជម្លោះរវាងថៅកែរោងចក្រកាត់ដេរ និងកម្មករ កំពុងកើតឡើងជាបន្តបន្ទាប់ ដែលឈានដល់អំពើហិង្សា និងបង្កឲ្យមានមនុស្សស្លាប់។ ដើម្បីតាមដានអំពីបញ្ហានេះ មជ្ឈមណ្ឌលសិទ្ធិមនុស្សកម្ពុជា បានដាក់ឲ្យប្រើប្រាស់គេហទំព័រថ្មីមួយ នាថ្ងៃទី២៨ កុម្ភៈ ដើម្បីបង្ហាញអំពីការរំលោភសិទ្ធិនានាលើកម្មករនៅតាមបណ្ដារោងចក្រកាត់ដេរ ដែលកំពុងប្រកបអាជីវកម្មនៅក្នុងប្រទេសកម្ពុជា។
សេចក្ដីប្រកាសព័ត៌មានរបស់មជ្ឈមណ្ឌលសិទ្ធិមនុស្សកម្ពុជា បង្ហាញថា គេហទំព័រនេះផ្ដោតលើបញ្ហាធុរកិច្ច និងសិទ្ធិមនុស្ស រួមទាំងបង្ហាញអំពីទិន្នន័យបច្ចុប្បន្នភាពរបស់រោងចក្រកាត់ដេរកម្ពុជា។ កិច្ចប្រឹងប្រែងនៃការបង្កើតគេហទំព័រនេះ ដើម្បីលើកទឹកចិត្តដល់ស្ថាប័នសង្គមស៊ីវិល រដ្ឋាភិបាល និងអ្នកពាក់ព័ន្ធទាំងអស់ លើការប្ដេជ្ញាចិត្តលើកស្ទួយបញ្ហាសិទ្ធិមនុស្សនៅក្នុងវិស័យកាត់ដេរសម្លៀកបំពាក់។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក ឌុច ពិសិដ្ឋ មានប្រសាសន៍ថា ការបង្កើតគេហទំព័រនេះ ដើម្បីផ្សព្វផ្សាយលើដំណើរអាជីវកម្មដែលប្រាសចាកពីគោលការណ៍ច្បាប់ជាតិ និងអន្តរជាតិ រួមទាំងចងក្រងអំពីការរាយការណ៍របស់សារព័ត៌មានជាតិ និងអន្តរជាតិ អំពីបញ្ហារំលោភសិទ្ធិមនុស្សនៅក្នុងសង្វាក់ផលិតកម្មរោងចក្រកាត់ដេរកម្ពុជា។
«សំឡេង»
លោក ឌុច ពិសិដ្ឋ បានបន្ថែមទៀតថា បច្ចុប្បន្នគេហទំព័របានបន្ថែមចំនួនរោងចក្រចំនួន ៥៨ថ្មី ទៅលើរោងចក្រចំនួន ៥៥៨រោងចក្រ។ ទិន្នន័យរោងចក្រកាត់ដេរនេះ នឹងផ្ដល់ព័ត៌មានកាន់តែទូលាយចំពោះវិស័យកាត់ដេរកម្ពុជា និងការរំលោភបំពានសិទ្ធិមនុស្ស ដែលកំពុងប៉ះពាល់ដល់វិស័យកាត់ដេរកម្ពុជា។
ឆ្លើយតបទៅនឹងបញ្ហានេះ មន្ត្រីជាន់ខ្ពស់នៃសមាគមរោងចក្រកាត់ដេរនៅកម្ពុជា លោក ជាតិ ខេមរា បានអះអាងថា ការធ្វើអាជីវកម្មនៅក្នុងវិស័យកាត់ដេរសម្លៀកបំពាក់ មិនមានការរំលោភសិទ្ធមនុស្សទេ។ បញ្ហាដែលបានកើតឡើងកន្លងទៅ គឺបណ្ដាលមកពីការញុះញង់ ស្របពេលដែលកម្មករមិនយល់អំពីច្បាប់ការងារ។ ដើម្បីកាត់បន្ថយការវិវាទរវាងកម្មករ និងថៅកែរោងចក្រ គឺការអនុវត្តទៅតាមច្បាប់ដែលបានកំណត់។ លោកបញ្ជាក់ទៀតថា ការបង្កើតគេហទំព័រដែលផ្សព្វផ្សាយបញ្ហានានារបស់រោងចក្រកាត់ដេរ អាចជារឿងល្អ ប្រសិនបើប្រភពព័ត៌មានដែលយកទៅផ្សព្វផ្សាយនោះមានគុណភាព។
«សំឡេង»
ទោះជាយ៉ាងណាក៏ដោយ របាយការណ៍សិទ្ធិមនុស្សប្រចាំឆ្នាំដែលចេញផ្សាយដោយក្រសួងការបរទេសសហរដ្ឋអាមេរិក កាលពីថ្ងៃទី២៧ កុម្ភៈ បង្ហាញថា ប្រទេសកម្ពុជា មានការរំលោភសិទ្ធិមនុស្សដោយកងកម្លាំងសន្តិសុខ គេរាយការណ៍បានបាញ់សម្លាប់មនុស្សយ៉ាងអនាធិបតេយ្យ រួមមានការរំលោភសិទ្ធិកម្មកររោងចក្រក្នុងការតវ៉ាដំឡើងប្រាក់ខែគោលអប្បបរមា ដោយមានការរំខានពីថៅកែរោងចក្រ។
ស្របពេលដែលបញ្ហារំលោភសិទ្ធិមនុស្សនៅក្នុងវិស័យរោងចក្រ មិនទាន់ដោះស្រាយបាន អ្នកសេដ្ឋកិច្ចបានស្នើឲ្យភាគីពីគ្រប់ស្ថាប័នទាំងអស់ ពិចារណាលើចំណុច៤ រួមមាន ទីមួយ គឺផលចំណេញរបស់សហគ្រាសរោងចក្រ។ ទីពីរ ការចំណាយក្រៅផ្លូវការ និងចំណាយផ្សេងៗរបស់រោងចក្រ។ ទីបី ភាពប្រកួតប្រជែងផលិតភាពរបស់រោងចក្រ (country comparative advantage) និងទីបួន ផលិតភាពរបស់កម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
អត្ថបទពេញនិយម
សិទ្ធិមនុស្ស
- សង្គមស៊ីវិលស្នើអគ្គនាយកដ្ឋានពន្ធនាគារឆ្លើយតបភាពមិនប្រក្រតីលើកញ្ញា សេង ធារី
- អង្គការអន្តរជាតិផ្នែកសិទ្ធិពលរដ្ឋថា កម្ពុជាជាប្រទេសកៀបសង្កត់សិទ្ធិសេរីភាពកាន់តែធ្ងន់ធ្ងរ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- ក្រុមអង្គការអន្តរជាតិថ្កោលរដ្ឋាភិបាលកម្ពុជា និងថៃ ដែលនិរទេសជនភៀសខ្លួនខ្មែរ ៦នាក់ទាំងបង្ខំ
- ពលរដ្ឋខ្មែរចំណាកស្រុកយូរឆ្នាំគ្រោងនាំគ្នាដាក់ពាក្យស្នើសុំសញ្ជាតិថៃ