មន្ត្រីសិទ្ធិមនុស្សលើកឡើងថា អាវុធហត្ថគួរតែពិនិត្យមើលបទល្មើសព្រហ្មទណ្ឌថែមលើទណ្ឌកម្មរដ្ឋបាលករណីមេបញ្ជាការរងនៃកងរាជអាវុធហត្ថខេត្តប៉ៃលិន លោក ស ប៊ុនសឿង គំរាមកំហែងលើអ្នករត់តាក់ស៊ី។
ការលើកឡើងនេះ គឺក្រោយពីកងរាជអាវុធហត្ថលើផ្ទៃប្រទេសស្នើទៅកាន់អគ្គបញ្ជាការដ្ឋានកងយោធពលខេមរភូមិន្ទ ឱ្យផ្អាកមុខតំណែងមេបញ្ជាការរងប៉េអិមរូបនេះ។
សេចក្ដីប្រកាសព័ត៌មានរបស់កងរាជអាវុធហត្ថលើផ្ទៃប្រទេសនៅថ្ងៃទី២៤ ខែមិថុនា ឱ្យដឹងថា ខ្លួននឹងធ្វើសំណើទៅអគ្គបញ្ជាការដ្ឋាននៃកងយោធពលខេមរភូមិន្ទ ដើម្បីផ្អាកមុខតំណែងមេបញ្ជាការរងកងរាជអាវុធហត្ថខេត្តប៉ៃលិន លោក ស ប៊ុនសឿង និងធ្វើសំណើបង្កើតក្រុមប្រឹក្សាវិន័យ ដើម្បីពិនិត្យមើលការដាក់ទណ្ឌកម្មអនុលោមតាមច្បាប់ស្ដីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ។
កងរាជអាវុធហត្ថលើផ្ទៃប្រទេសសម្រេចដូច្នេះ គឺនៅក្រោយពីបានស្ដាប់របាយការណ៍របស់ការិយាល័យនីតិកម្ម និងអធិការកិច្ចនៃកងរាជអាវុធហត្ថលើផ្ទៃប្រទេស។
ជាការឆ្លើយតបចំពោះចំណាត់ការនេះ អ្នករត់តាក់ស៊ីលោក ហួរ ទ្រី ដែលជាជនរងគ្រោះប្រាប់វិទ្យុអាស៊ីសេរី នៅថ្ងៃទី២៤ ខែមិថុនាថា វាជារឿងល្អ ដែលស្ថាប័នមានសមត្ថកិច្ចដាក់ទណ្ឌកម្មលើមន្ត្រីប្រើតួនាទីគំរាមកំហែងលើប្រជាពលរដ្ឋ។
លោក ហួរ ទ្រី៖ «ជាមន្ត្រីរាជការ អ្នកមន្ត្រីរាជការបើមកធ្វើលើប្រជាពលរដ្ឋអ៊ីចឹង គួរតែដកអ៊ីចឹងល្អទាំងអស់ ហើយប្រជាពលរដ្ឋគ្រប់រូប ក៏គេចូលតែអ៊ីចឹងដែរ ចង់បានអ៊ីចឹងដែរ»។
លោក ហួរ ទ្រី លើកឡើងថា កាលពីថ្ងៃទី១១ ខែមិថុនា មេប៉េអឹមរងខេត្តប៉ៃលិន លោក ស ប៊ុនសឿង បាននាំកូនចៅចុះទៅដល់ផ្ទះរបស់លោក និងគំរាមចាប់ខ្លួនលោករឿងលោកទារលុយពីលោក ស ប៊ុនសឿន ចំនួន ២ម៉ឺនរៀលបន្ថែមទៀត ជាប្រាក់ដែលមេប៉េអិមរងរូបនេះ មិនទាន់បានបង់គ្រប់ចំនួន សម្រាប់ថ្លៃសេវាដឹកកង់ហាត់ប្រាណ និងកញ្ចក់។
អនុប្រធានផ្នែកសិទ្ធិមនុស្សដីធ្លីធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី បានលើកឡើងថា បើត្រឹមតែដាក់ទណ្ឌកម្មរដ្ឋបាល វានៅមិនទាន់គ្រប់គ្រាន់នោះទេ។ លោកថា កងរាជអាវុធហត្ថគួរតែពិនិត្យមើលបទល្មើសព្រហ្មទណ្ឌលើមេប៉េអិមរងខេត្តរូបនេះ។
លោកប្រាប់វិទ្យុអាស៊ីសេរីនៅថ្ងៃទី២៤ ខែមិថុនា ថា ការប្រើតែទណ្ឌកម្មរដ្ឋបាល អាចធ្វើឱ្យមន្ត្រីមិនខ្លាចរអារ អាចកើតមាននិទណ្ឌភាពនិងការអនុវត្តច្បាប់មិនស្មើភាពគ្នារវាងប្រជាពលរដ្ឋ និងមន្ត្រី។
លោក យិន ម៉េងលី៖ «វាមានរឿងរ៉ាវជាមួយតាក់ស៊ី វាមានការលើកឡើងទាក់ទងទៅនឹងការគំរាមកំហែង។ អ៊ីចឹងការដាក់ទណ្ឌកម្មហ្នឹង គឺជារឿងរដ្ឋបាលរបស់អង្គភាព អ៊ីចឹងពិនិត្យមើលទៅទៀត ថាតើពាក់ព័ន្ធទៅនឹងរឿងរ៉ាវរវាងលោកមេបញ្ជាការរង ហើយនិងអ្នករត់តាក់ស៊ីនេះ មានបទល្មើសព្រហ្មទណ្ឌអត់។ អ៊ីចឹង បើសិនជាកើតមានបទល្មើសព្រហ្មទណ្ឌកើតឡើង យើងអត់អាចយកតែទណ្ឌកម្មរដ្ឋបាល ដែលយើងហៅថា វិន័យរបស់អង្គភាពបានទេ ត្រូវទាក់ទងទៅដល់បទល្មើសព្រហ្មទណ្ឌទៅទៀត»។
ទោះជាយ៉ាងណាក្ដី ឆ្លើយតបចំពោះការលើកឡើងនេះ អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី បញ្ជាក់ប្រាប់វិទ្យុអាស៊ីសេរី នៅថ្ងៃទី២៤ ខែមិថុនាថា ករណីនេះ មិនដល់កម្រិតត្រូវរៀបចំសំណុំរឿងបញ្ជូនទៅតុលាការនោះទេ។
លោក អេង ហ៊ី៖ «ដូចជាអត់មានបទល្មើសអីដល់ទៅតុលាការនោះទេ អត់មានបទល្មើសព្រហ្មទណ្ឌនេះ គ្រាន់តែពាក់ព័ន្ធនឹងក្រមសីលធម៌ និងបទវិន័យទូទៅ»។
កាលពីចុងឆ្នាំ ២០១៩ មេបញ្ជាការរងនៃកងរាជអាវុធហត្ថខេត្តប៉ៃលិន លោក ស ប៊ុនសឿង ធ្លាប់ត្រូវបានតុលាការកាត់ទោសឱ្យជាប់ពន្ធនាគារ ៤ឆ្នាំ អំពីបទ «ហិង្សា ដោយចេតនាមានស្ថានទម្ងន់ទោស» ពាក់ព័ន្ធនឹងប្រើហិង្សាលើជនសង្ស័យ ៥នាក់ ក្នុងនោះ ជនសង្ស័យម្នាក់ឈ្មោះ ទុយ ស្រស់ ស្លាប់នៅកន្លែងឃុំឃាំងបណ្ដោះអាសន្ននៅខេត្តបន្ទាយមានជ័យ។
ជនរងគ្រោះឈ្មោះ ទុយ ស្រស់ ត្រូវសមត្ថកិច្ចខេត្តបន្ទាយមានជ័យចាប់ខ្លួន កាលពីថ្ងៃទី២៨ ខែធ្នូ ឆ្នាំ២០១៩ ពាក់ព័ន្ធនឹងរឿងជម្លោះដីធ្លី។
ទោះបីជាលោក ស ប៊ុនសឿង ត្រូវតុលាការកាត់ទោសឱ្យជាប់ពន្ធនាគារកាលពីចុងឆ្នាំ២០១៩ ក៏ដោយ ប៉ុន្តែតួនាទីនិងតំណែងរបស់លោក គឺនៅរក្សាដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។