អង្គការឃ្លាំមើលសិទ្ធិមនុស្ស យូមែន រ៉ៃ វ៉ច្ឆ (Human Rights Watch) ទាមទារឱ្យរដ្ឋាភិបាលលើក លែងការផ្ដន្ទាទោសសកម្មជនសិទ្ធិមនុស្ស កម្មកររោងចក្រ និងមនុស្សផ្សេងទៀតចំនួន ២៥នាក់ ដែលតុលាការទើបដោះលែងពីពន្ធនាគារកាលពីចុងសប្ដាហ៍មុននេះ។
តាមរយៈសេចក្ដីប្រកាសព័ត៌មានដែលចេញផ្សាយនៅថ្ងៃទី១ មិថុនា អង្គការឃ្លាំមើលសិទ្ធិមនុស្ស យូមែន រ៉ៃ វ៉ច្ឆ សរសេរថា រដ្ឋាភិបាលកម្ពុជា គួរតែលើកលែងការផ្ដន្ទាទោសសកម្មជនសិទ្ធិមនុស្ស និងកម្មកររោងចក្រទាំង ២៥នាក់នោះ ដោយសារតែមិនមានភស្តុតាងគ្រប់គ្រាន់បង្ហាញនៅក្នុងសវនាការដែលជំរុញដោយហេតុផលនយោបាយ។
កាលពីថ្ងៃទី៣០ ឧសភា សាលាដំបូងរាជធានីភ្នំពេញ បានផ្ដន្ទាទោសសកម្មជន និងកម្មករទាំងនោះក្នុងអំពើហិង្សា ៣ករណី នៅក្នុងអំឡុងពេលធ្វើបាតុកម្ម ហើយសម្រេចដាក់ទោសព្យួររហូតដល់ ៤ឆ្នាំកន្លះ។ អ្នកដែលមិនជាប់ឃុំឃាំង ត្រូវផ្ដន្ទាទោសហាមមិនឱ្យធ្វើជាអ្នកដឹកនាំសហជីព។
នាយកអង្គការឃ្លាំមើលសិទ្ធិមនុស្ស យូមែន រ៉ៃ វ៉ច្ឆ លោក ប្រ៊ែដ អាដាម (Brad Adams) ថ្លែងក្នុងសេចក្ដីប្រកាសព័ត៌មានថា លោកស្វាគមន៍ចំពោះការដោះលែងមនុស្សជាប់ឃុំឃាំងទាំង ២៥នាក់នោះឲ្យមានសេរីភាពវិញ។ ក៏ប៉ុន្តែលោកថា ការចោទប្រកាន់ និងលិខិតថ្កោលទោស គួរតែតុលាការលុបចោល៖ «ការចោទប្រកាន់ដោយសារហេតុផលនយោបាយ ហើយការធ្វើឱ្យមានលេសច្បាប់ខុស ដើម្បីដាក់កំហិតសិទ្ធិមូលដ្ឋានរបស់ពួកគេ គឺមិនត្រូវឱ្យមានទេ»។
សេចក្ដីប្រកាសព័ត៌មានរបស់អង្គការឃ្លាំមើលសិទ្ធិមនុស្ស យូមែន រ៉ៃ វ៉ច្ឆ សរសេរថា ប្រទេសផ្ដល់ជំនួយដល់កម្ពុជា គួរតែប្រកាសថ្កោលទោសជាសាធារណៈចំពោះការកាត់ទោសនោះ ហើយអំពាវនាវឱ្យលើកលែងទោសដល់អ្នកទាំង ២៥នាក់នោះ។ អង្គការឃ្លាំមើលសិទ្ធិមនុស្ស យូមែន រ៉ៃ វ៉ច្ឆ បន្តទៀតថា ក្រុមប្រទេសផ្ដល់ជំនួយ គួរតែរួមគ្នាទាមទារឱ្យគណបក្សប្រជាជនកម្ពុជា ឈប់ត្រួតត្រាកម្លាំងនគរបាល និងតុលាការតទៅទៀត។
មន្ត្រីនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា ការកាត់ទោសនោះ គឺចៅក្រមផ្អែកលើខ្លឹមសារច្បាប់ និងភស្តុតាង ហើយមិនមាននរណាអាចជ្រៀតជ្រែកបានទេ៖ «ការលើកឡើងនេះជាការលើកឡើងផលប្រយោជន៍របស់អ្នកលើកឡើងនោះទេ។ ក៏ប៉ុន្តែកងកម្លាំងប្រដាប់អាវុធ ហើយនិងតុលាការហ្នឹង គេមានការងារឯករាជ្យរបស់គេផ្ទាល់មួយ ដែលគេទទួលខុសត្រូវចំពោះមុខច្បាប់ គឺមិនមែនទទួលខុសត្រូវចំពោះមុខគណបក្សប្រជាជនទេ។ នេះគ្រាន់តែជាការលើកឡើងមានភាពជាសត្រូវជាមួយគណបក្សប្រជាជន។ ការដោះលែងជាការសម្រេចរបស់ចៅក្រម ហើយប្រសិនបើព្រះរាជអាជ្ញាលោកមិនសប្បាយចិត្តនៅក្នុងការធ្វើឱ្យមនុស្សដែលនៅក្នុងបន្ទុកហ្នឹងនៅខាងក្រៅ អាហ្នឹងគាត់បន្តការកាត់ក្ដីបន្តទៅទៀត។ អាហ្នឹងជាការងាររបស់ប្រព័ន្ធយុត្តិធម៌»។
លោក ផៃ ស៊ីផាន ថ្លែងទៀតថា ការសម្រេចនេះ គឺមិនមែនសម្រេចតាមហេតុផលនយោបាយ ឬមានអ្នកទី៣ ដាក់សម្ពាធលើតុលាការដែរ។ លោកថា ព្រះរាជអាជ្ញាឃុំខ្លួនមនុស្ស ២៥នាក់នោះ គឺដើម្បីហេតុផលសណ្ដាប់សាធារណៈ ហើយក៏ខំរកបន្ទុកដាក់លើអ្នកទាំងនោះដែរ ប៉ុន្តែសម្រេចតាមឆន្ទានុសិទ្ធិរបស់ខ្លួន។
អង្គការឃ្លាំមើលសិទ្ធិមនុស្ស យូមែន រ៉ៃ វ៉ច្ឆ សរសេរថា ការកាត់ទោស ជាផ្នែកមួយនៃកិច្ចប្រឹងប្រែងជាប្រព័ន្ធរបស់រដ្ឋាភិបាលលោក ហ៊ុន សែន ដើម្បីបិទបាំងការប្រើកម្លាំងហួសហេតុរបស់ក្រុមសន្តិសុខ ធ្វើឱ្យស្លាប់មនុស្ស ៧នាក់ និងជាច្រើននាក់ទៀតរងរបួស។ អង្គការនេះបន្តថា រដ្ឋាភិបាលប្រើតុលាការដើម្បីចោទប្រកាន់សកម្មជនដោយអយុត្តិធម៌ ហើយទម្លាក់កំហុសហិង្សាទៅលើពួកគេ ប៉ុន្តែមិនចាត់វិធានការណាមួយចំពោះការប្រើកម្លាំងខុសច្បាប់របស់កងសន្តិសុខទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។