អតីត​អ្នក​យក​ព័ត៌មាន​អាស៊ីសេរី​រង់ចាំ​សវនាការ ក្រោយ​មេធាវី​ដាក់​សារណា​រួចរាល់​ទៅ​តុលាការ​កំពូល

ដោយ សេក បណ្ឌិត
2020-04-19
អ៊ីម៉ែល
មតិ
Share
បោះពុម្ព
អតីត​អ្នករាយការណ៍​ព័ត៌មាន​អាស៊ីសេរី ២​រូប គឺ​លោក អ៊ួន ឈិន និង​លោក យាង សុធារិន្ទ ហៅ​យាង សុជាមេត្តា នៅ​មុខ​សាលាឧទ្ធរណ៍ នៅ​ថ្ងៃ​ទី២០ មករា ២០២០។
អតីត​អ្នករាយការណ៍​ព័ត៌មាន​អាស៊ីសេរី ២​រូប គឺ​លោក អ៊ួន ឈិន និង​លោក យាង សុធារិន្ទ ហៅ​យាង សុជាមេត្តា នៅ​មុខ​សាលាឧទ្ធរណ៍ នៅ​ថ្ងៃ​ទី២០ មករា ២០២០។
RFA

មេធាវី​ការពារ​ក្តី​ឱ្យ​អតីត​អ្នកយកព័ត៌មាន​អាស៊ីសេរី បាន​ដាក់​សារ​ណា​ការពារ​ក្តី​ករណី​ស្នើសុំ​បដិសេធ​សាលក្រម​ចាត់​របៀប​របស់​តុលាការ​ក្រុង​ភ្នំពេញ ទៅ​តុលាការ​កំពូល​រួចហើយ កាល​ពី​ពេល​ថ្មីៗ​នេះ​។ អតីត​អ្នកយកព័ត៌មាន​អាស៊ីសេរី​អំពាវនាវ​ដល់​តុលាការ​កំពូល​ឱ្យ​ពន្លឿន​សវនាការ​រឿង​ក្តី​នេះ។

មេធាវី​ការពារ​ក្តី​ឱ្យ​អតីត​អ្នកយកព័ត៌មាន​អាស៊ីសេរី លោក សំ ចំរើន ឱ្យ​ដឹង​នៅ​ថ្ងៃ​ទី​១៩ មេសា​ថា ការដាក់​សារ​ណា​ទៅ​តុលាការ​កំពូល​នេះ គឺ​ទាំង​សំណុំរឿង​ចារកម្ម និង​ការផលិត​វីដេអូ​អាសអាភាស​។ លោក​ថា តាម​នីតិវិធី តុលាការ​កំពូល​ត្រូវ​បើកសវនាការ​ក្នុង​រយៈពេល​៦ ខែ​យ៉ាង​យូរ ក្រោយពេល​ទទួល​បាន​សំណុំរឿង ហើយ​ពេលនេះ​ទាំង​លោក និង​កូន​ក្តី​ទាំង​ពីរ​​​​​រូប កំពុង​រង់ចាំ​សវនាការ។

មេធាវី សំ ចំរើន ថ្លែង​ទៀត​ថា លោក​បាន​ដាក់​ពាក្យ​ស្នើសុំ​ចៅក្រម​ស៊ើបសួរ​តុលាការ​ក្រុង​ភ្នំពេញ ឱ្យ​បង្អង់​នីតិវិធី​ស៊ើបសួរ​បន្ថែម​ហើយ ដោយ​រង់ចាំ​សេចក្តី​សម្រេច​ពី​តុលាការ​កំពូល​ជាមុន​សិន៖ «នៅ​ពេល​ដែល​សាលក្រម​នោះ​ត្រូវ​បាន​ប្តឹង​ឧទ្ធរណ៍ ឬក៏​ប្ដឹង​សាទុក្ខ​ទៅ​តុលាការ​កំពូល ចៅក្រម​ស៊ើបសួរ​នៅ​ក្នុង​​រឿងក្តី​ហ្នឹង អត់​ទាន់​មាន​សមត្ថកិច្ច​អនុវត្ត​ទៅតាម​ក្តី​សម្រេច​នៅ​ក្នុង​សាលក្រម​របៀប​ដែល​ចាត់​ឱ្យ​គាត់​ស៊ើបសួរ​បន្ថែម​ហ្នឹង​ទេ​។ គឺ​រង់ចាំ សេចក្ដី​​សម្រេច​របស់​តុលាការ​កំពូល សម្រេច​ថា យ៉ាងម៉េច​សិន ទើប​គាត់​មាន​សិទ្ធិ​ចាត់ការ​ទៅតាម​ការ​បង្គាប់​របស់​សាលក្រម​របៀប​ហ្នឹង»

ក្រោយ​ចំណាយ​ពេល​ស៊ើបអង្កេត​ជាង​១ ឆ្នាំ និង​បើកសវនាការ​២ ដង នៅ​ខែ​តុលា ឆ្នាំ​២០១៩ ស្រាប់តែ​តុលាការ​ក្រុងភ្នំពេញ​បាន​ចេញ​សាលក្រម​ចាត់​របៀប បង្គាប់​ឱ្យ​ចៅក្រម​ស៊ើបសួរ​បន្ត​ស៊ើបអង្កេត និង​ពិនិត្យ​អង្គហេតុ​មួយ​ចំនួន​ទៀត​នៃ​សំណុំ​រឿង​នេះ​ទៅវិញ​។ ក្រុម​មន្ត្រី​សិទ្ធិមនុស្ស​ជាតិ និង​អន្តរជាតិ​បាន​ថ្កោលទោស​តុលាការ​ក្រុង​ភ្នំពេញ​ចំពោះ​សេចក្ដី​សម្រេច​នេះ ពីព្រោះ​ពួកគេ​ពិនិត្យ​ឃើញ​ថា តុលាការ​គ្មាន​ភស្តុតាង​គ្រប់គ្រាន់​ដើម្បី​ដាក់​បន្ទុក​លោក អ៊ួន ឈិន និង​លោក យាង សុធារិន្ទ ឡើយ ដូច្នេះ​គួរ​ណាស់​តែ​ទម្លាក់​ចោល​បទចោទប្រកាន់​នេះ។

អតីត​អ្នកយកព័ត៌មាន​អាស៊ីសេរី​ទាំងពីរ​រូប​បាន​ប្ដឹង​ឧទ្ធរណ៍​ប្រឆាំង​សាលក្រម​ចាត់​របៀប​នេះ ក៏ប៉ុន្តែ​ក្រុមប្រឹក្សា​ជំនុំជម្រះ​សាលាឧទ្ធរណ៍​បាន​តម្កល់​សាលក្រម​នេះ​ទុក​ជា​បាន​ការ​ដដែល ក្រោម​ហេតុផល​ថា ការស៊ើបអង្កេត​បន្ថែម​មិន​ប៉ះពាល់​ដល់​សិទ្ធិ​សេរីភាព​របស់​អ្នក​ទាំងពីរ​ឡើយ។

អតីត​អ្នកយកព័ត៌មាន​អាស៊ីសេរី លោក យាង សុធា​រិន្ទ ស្នើសុំ​យ៉ាង​ទទូច​ដល់​តុលាការ​កំពូល បើក​ការ​ជំនុំជម្រះ​ករណី​នេះ​ឱ្យ​បាន​ឆាប់ ដើម្បី​បើកផ្លូវ​ឱ្យ​នីតិវិធី​ទាំងឡាយ​នៅ​តុលាការ​ក្រុង​ភ្នំពេញ​មានដំណើរ​ការ​៖ «​តុលាការ​កំពូល​មេត្តា​ជួយ​ពន្លឿន​នីតិវិធី​បើកសវនាការ​ជំនុំជម្រះ​ទាក់ទង​នឹង​ការ​មិន​យល់ព្រម​ការ​ស៊ើបអង្កេត​ឡើងវិញ​ហ្នឹង អ៊ីចឹង​សូម​ធ្វើ​ឱ្យ​បាន​លឿន​ទៅ​។ មែនទែន​ទៅ យើង​កំពុង​រង់ចាំ​ការសម្រេច​របស់​តុលាការ​កំពូល ហើយ​ការសម្រេច​របស់​តុលាការ​កំពូល​បែប​ណា​នោះ នឹង​ជួយ​ជំរុញ​បន្ថែម​ទៀត​ដល់​ការ​ស៊ើបអង្កេត​បន្ថែម​នៅ​សាលាដំបូង​ហ្នឹងឯង»

អាស៊ីសេរី​មិន​អាច​ទាក់ទង​អ្នកនាំពាក្យ​តុលាការ​កំពូល លោក អ៊ុក គឹម​សិទ្ធិ ដើម្បី​សាកសួរ​រឿង​នេះ​​បានទេ នៅ​ថ្ងៃទី​១៩ មេសា ដោយ​លោក​មិន​លើក​ទូរស័ព្ទ។

អតីត​អ្នកយកព័ត៌មាន​អាស៊ីសេរី​លោក អ៊ួន ឈិន និង​លោក យាង សុធារិន្ទ ត្រូវ​តុលាការ​ក្រុងភ្នំពេញ​ចោទប្រកាន់​ពី​បទ «​ផ្តល់​ឱ្យ​រដ្ឋ​បរទេស​នូវ​ព័ត៌មាន​ជាអាទិ៍​ដែល​​នាំឱ្យ​អន្តរាយ​ការ​ការពារ​ជាតិ​» និង​បទ «​ផលិត​វីដេអូ​អាសអាភាស​»​។ តុលា​ការដែល​ស្ថិត​ក្រោម​ឥទ្ធិពល​គណបក្ស​កាន់​អំណាច បាន​ឃុំឃាំង​អ្នក​ទាំងពីរ​ជាង​៩ ខែ ទើប​អនុញ្ញាត​ឱ្យ​នៅ​ក្រៅ​ឃុំ​បណ្ដោះអាសន្ន​។

ទោះជា​យ៉ាងណា តុលាការ​នៅតែ​បន្ត​គាបសង្កត់​សេរីភាព​ដើរហើរ និង​ការ​ប្រកប​មុខរបរ​របស់​អ្នក​ទាំងពីរ​ដដែល ព្រោះ​តុលាការ​មិនបាន​ប្រគល់​អត្តសញ្ញាណប័ណ្ណ និង​លិខិតឆ្លងដែន​ឱ្យ​ពួក​លោក​វិញ​នោះ​ឡើយ​។ បច្ចុប្បន្ន​នេះ បណ្ដឹង​ស្នើសុំ​លិខិតឆ្លងដែន និង​អត្តសញ្ញាណប័ណ្ណ​របស់​អ្នក​ទាំងពីរ ក៏​កំពុង​ស្ថិត​ក្នុង​ដៃ​តុលាការ​កំពូល​ដែរ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល