មន្ត្រីអង្គការសិទ្ធិមនុស្សជំរុញឱ្យក្រសួងមហាផ្ទៃស៊ើបអង្កេត និងចាត់វិធានការទៅលើមន្ត្រីនគរបាលមួយចំនួន ដែលផ្ញើសារប្រមាថ និងគំរាមកំហែងទៅលើសកម្មជនគណបក្សសង្គ្រោះជាតិល្បីឈ្មោះម្នាក់នៅខេត្តបាត់ដំបង គឺកញ្ញា ស៊ិន ចាន់ពៅរ៉ូហ្សេត។ ការលើកឡើងនេះ គឺបន្ទាប់ពីកញ្ញា ស៊ិន ចាន់ពៅរ៉ូហ្ស៊េត បានបង្ហោះសារស្នើសុំឱ្យរដ្ឋមន្ត្រីក្រសួងមហាផ្ទៃ ពិនិត្យករណីមន្ត្រីរាជការមួយចំនួន បានយកម៉ោងការងាររដ្ឋ ផ្ញើសារប្រមាថ និងគំរាមកំហែងដោយពាក្យសម្តីអសុរោះលើនាង និងម្តាយរបស់នាងជាបន្តបន្ទាប់។
មន្ត្រីការពារសិទ្ធិមនុស្ស សោកស្តាយដែលមន្ត្រីរាជការមួយចំនួន នៅតែបំពានតួនាទី ដោយផ្ញើសារទៅជេរប្រមាថ និងគំរាមកំហែងទៅលើសកម្មជនគណបក្ស សង្គ្រោះជាតិនៅខេត្តបាត់ដំបង គឺកញ្ញា ស៊ិន ចាន់ពៅរ៉ូហ្ស៊េត បើទោះបីជាកន្លងមករដ្ឋមន្ត្រីក្រសួងមហាផ្ទៃ លោក ស ខេង តែងក្រើនរំលឹកឱ្យមន្ត្រីនគរបាលគ្រប់ជាន់ថ្នាក់ត្រូវមានជំហរអព្យាក្រឹត្យ កុំឱ្យជេរប្រមាថ លាបពណ៌ និងបែងចែកនិន្នាការនយោបាយចំពោះប្រជាពលរដ្ឋក្តី។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែន ករុណា មានប្រសាសន៍ថា ក្រសួងមហាផ្ទៃ គួរតែបើកការស៊ើបអង្កេតចំពោះមន្ត្រីនគរបាលដែលផ្ញើសារតាមហ្វេសប៊ុក (Facebook) ទៅជេរប្រមាថ និងគំរាមកំហែងកញ្ញា កញ្ញា ស៊ិន ចាន់ពៅរ៉ូហ្ស៊េត និងត្រូវចាត់វិធានការរដ្ឋបាល ឬតាមផ្លូវច្បាប់ ប្រសិនបើរកឃើញទោសកំហុសរបស់មន្ត្រីរូបនោះ៖ «បើជាអំពើមួយគ្មានសីលធម៌ក្នុងនាមជាមន្ត្រីមានតួនាទី មានសមត្ថកិច្ច ហើយប្រើតួនាទីរបស់ខ្លួនដែលផ្តល់ដោយរដ្ឋាភិបាល ក្នុងការអនុវត្តតួនាទីទាំងអស់ហ្នឹង ខ្ញុំគិតថា គួរតែពិនិត្យមើល គួរតែមានចំណាត់ការរដ្ឋបាល ឬក៏ចំណាត់ការតាមផ្លូវច្បាប់យ៉ាងណាបាន ដើម្បីកុំឱ្យមានការប្រព្រឹត្តនូវអំពើខុសឆ្គងអ៊ីចឹងតទៀត ហើយគំរូមួយមិនល្អដែរ ធ្វើឱ្យប៉ះពាល់ដល់សមត្ថកិច្ចផ្សេងៗទៀតដែលគេមានសីលធម៌ និងគោរពប្រជាពលរដ្ឋ»។
លោក ស៊ឹង សែនករុណា ពិនិត្យឃើញថា ភាសាជេរប្រមាថ ដោយពាក្យសម្តីអសុរោះ របស់មន្ត្រីរាជកានេះ ធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់កញ្ញា កញ្ញា ស៊ិន ចាន់ពៅរ៉ូហ្ស៊េត។
លោកបន្តថា ប្រសិនបើក្រសួងមហាផ្ទៃ មិនចាត់វិធានការតាមការស្នើសុំរបស់នាងទេ គឺបង្ហាញពីការរើសអើងនិន្នាការនយោបាយ និងការអនុវត្តច្បាប់ស្តង់ដារពីរ៖ «បើសមត្ថកិច្ចទាំងអស់ហ្នឹង អត់ចាត់ការទៅលើរឿងហ្នឹង មានន័យថា ជាការរើសអើងទៅលើសកម្មជននយោបាយដែលគេមាននិន្នាការផ្ទុយនេះ ហើយការអនុវត្តបែបនេះ ដោយមិនអនុវត្តទៅតាមច្បាប់ទេ ដូច្នេះវាជាការអនុវត្តដោយស្តង់ដារពីរ»។
កញ្ញា ស៊ិន ចាន់ពៅរ៉ូហ្ស៊េត គឺជាចៅសង្កាត់ជាប់ឆ្នោតរបស់គណបក្សសង្គ្រោះជាតិនៅសង្កាត់អូរចារ ក្រុងបាត់ដំបង ខេត្តបាត់ដំបង។ កាលពីថ្ងៃទី៩ ខែមេសា កញ្ញា ស៊ិន ចាន់ពៅរ៉ូហ្ស៊េត បានផ្ញើសារតាមហ្វេសប៊ុក ជូនរដ្ឋមន្ត្រីក្រសួងមហាផ្ទៃ លោក ស ខេង អំពីករណីម្ចាស់អាខោនហ្វេសប៊ុកឈ្មោះ ផានី ផានី ជាមន្ត្រី ប៉ូលិស មានតួនាទីជាស្នងការរងនគរបាលខេត្តរតនគិរី បានយកម៉ោងការងាររដ្ឋ ចូលខមមិន (Comment) ប្រមាថនាង និងម្តាយរបស់នាងដោយពាក្យសម្តីអសុរោះជាទីបំផុត ដែលនាង និងម្តាយមិនអាចទទួលយកបានឡើយ។ កញ្ញាសរសេរបន្តថា ទង្វើរបស់មន្ត្រីប៉ូលិសរូបនេះ ក៏ធ្វើឱ្យប៉ះពាល់ធ្ងន់ធ្ងរទៅដល់វិជ្ជាជីវៈ កិត្តិយសស្ថាប័ន និងសេចក្តីថ្លៃថ្នូររបស់មន្ត្រីប៉ូលិសដទៃទៀត។ ក្នុងនាមជាប្រជាពលរដ្ឋម្នាក់ នាងស្នើសុំឱ្យរដ្ឋមន្ត្រីក្រសួងមហាផ្ទៃ ជួយពិនិត្យករណីនេះ និងជួយតម្រង់ទិសមន្ត្រីប៉ូលិសម្នាក់នេះផង ដើម្បីកុំឱ្យអាប់ឱនដល់កិត្តិយសរបស់ស្ថាប័ន។
ការស្នើសុំអន្តរាគមន៍ពីក្រសួងមហាផ្ទៃនេះ ធ្វើឡើងក្រោយពីម្ចាស់ហ្វេសប៊ុកឈ្មោះ ផានី ផានី ដែលគេស្គាល់ថា ជាស្នងការរងនគរបាលខេត្តរតនគិរី មានឈ្មោះ ពិតថា អ៊ឹម ផានី បានសរសេរមាក់ងាយថា កញ្ញា ស៊ិន ចាន់ពៅរ៉ូហ្ស៊េត គឺជាក្រមុំសៅកែ និងបន្តថា នាងឯងបើកវចនានុក្រមមើលទៅ ក្រមុំសៅកែមានអីមិនល្អ លើកលែងតែនាងឯងអស់ក្រមុំទើបវាមិនល្អ។ នគរបាលរូបនេះ ថែមទាំងប្រមាថថា សរសើរម្តាយនាងដែលគេចផុតពីត្បូងចបរបស់ប៉ុល ពត តែអាណិតគាត់មិនគួរមានកូនជាស្រីចង្រៃសេពគប់ពូជក្បត់ជាតិដូចរាំងស៊ី (សម រង្ស៊ី)។ បុគ្គលដដែលនេះ បន្តប្រមាថទៀតថា អ្នកណាបាននាងឯងធ្វើជាប្រពន្ធចង្រៃតពូជ។ ក្រោយពេល កញ្ញា ស៊ិន ចាន់ពៅរ៉ូហ្ស៊េត ផ្ញើសារទៅលោក ស ខេង នោះ ស្នងការរងនគរបាលខេត្តរតនគិរីរូបនេះ ទំនងជាភ័យខ្លួន ទើបផ្ញើសារឆ្លើយតបទៀតថា លោកនិយាយក្នុងនាមពលរដ្ឋ ដូច្នេះនាងឯងកុំយករូបឯកសណ្ឋាននគរបាលមកជាប់បញ្ហា។ ទោះជាយ៉ាងណាក្ដី នគរបាលរូបនេះ នៅតែបន្តជេរប្រមាថ និងគំរាមកំហែងដល់កញ្ញា ស៊ិន ចាន់ពៅរ៉ូហ្ស៊េត និងអ្នកប្រើប្រាស់បណ្ដាញហ្វេសប៊ុកមួយចំនួនទៀត ក្រោមហេតុផលថា លោកធ្វើដើម្បីការពាររាជរដ្ឋាភិបាល។
អ្នកប្រើប្រាស់បណ្ដាញហ្វេសប៊ុកជាច្រើន ក៏បានបញ្ចេញមតិរិះគន់ព្រោងព្រាតចំពោះ មន្ត្រីប៉ូលិសរូបនេះ ដោយអ្នកខ្លះសរសេរថា កុំយកឈ្មោះរាជរដ្ឋាភិបាល មកធ្វើជាខែលការពារ និងបិទបាំងនូវទង្វើអាក្រក់ថោកទាបរបស់ខ្លួនឯងឱ្យសោះ។
ក្រៅពីករណីនេះ កាលពីថ្ងៃទី៦ ខែមេសា កញ្ញា ស៊ិន ចាន់ពៅរ៉ូហ្ស៊េត ក៏បានបង្ហោះសារថា ម្ចាស់ហ្វេសប៊ុក ឈ្មោះ ថារិទ្ធិ ធឹម (Tharith Thim ) ជាមន្ត្រីរាជការបានផ្ញើសារក្រោមអត្ថន័យគំរាមកំហែងនិងបំភិតបំភ័យលើរូបនាងដែរ។
ជុំវិញករណីនេះ វិទ្យុអាស៊ីសេរី មិនអាចទាក់ទងស្នងការនគរបាលខេត្តរតនគិរី លោក យិន ចំណាន និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ដើម្បីឆ្លើយតបរឿងនេះបានទេ ដោយទូរស័ព្ទចូលច្រើនដង តែពុំមានអ្នកទទួល។
នាយិកាអង្គការក្លាហាន កញ្ញា បុណ្យ រចនា ថ្លែងថា កញ្ញា មិនទាន់បានដឹងរឿងនេះ លម្អិតនៅឡើយទេ ប៉ុន្តែប្រសិនបើមន្ត្រីអនុវត្តច្បាប់ ផ្ញើសារប្រមាថ និងគំរាមកំហែងទៅលើស្ត្រីបែបនេះ ខាងក្រសួងមហាផ្ទៃគួរតែស៊ើបអង្កេត និងមានវិធានការជាក់លាក់ទៅលើមន្ត្រីរូបនោះ៖ «តាមក្រមព្រហ្មទណ្ឌរបស់យើង ការប្រមាថក៏ជាបទល្មើសដែរ ជាពិសេសទៀត បើនៅក្នុងក្របខណ្ឌមន្ត្រីរាជការសាធារណៈ ធ្វើការប្រមាថមាក់ងាយដល់ស្ត្រី គឺរឿងនេះ ប៉ះពាល់ខ្លាំងមែនទែនទៅដល់ស្ត្រី ហើយម្យ៉ាងទៀត ការដែលយកស្ថានភាពស្ត្រី មានប្តី ឬមិនមានប្តីអី យកមកប្រមាថជាសាធារណៈនេះ វាប្រមាថទៅលើសិទ្ធិបូរណភាពរាងកាយ និងសិទ្ធិផ្លូវភេទរបស់ស្ត្រីដែរ នៅក្នុងការធ្វើការជ្រើសរើស និងសម្រេចថា តើគាត់ចង់រៀបការ ឬមិនចង់រៀបការ»។
មាត្រា៣០៧ នៃក្រមព្រហ្មទណ្ឌ ចែងថា គ្រប់ពាក្យប្រមាថ គ្រប់ពាក្យមើលងាយ ឬគ្រប់ពាក្យទ្រគោះ ដែលគ្មានការទំលាក់កំហុសទៅលើអំពើណាមួយ គឺជាការប្រមាថ ។ បទប្រមាថជាសាធារណៈនេះ ត្រូវពិន័យជាប្រាក់ពី ១សែនរៀល ទៅ ១០លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។