មន្ត្រី​សិទ្ធិ​មនុស្ស និង​អ្នកឃ្លាំមើល​បញ្ហា​សង្គម សម្ដែង​ក្ដី​បារម្ភ​ក្រោយពេល​ក្រុម​ប្រទេស​កុម្មុយនិស្ត​ធំៗ បាន​ជាប់​ឆ្នោត​ធ្វើ​ជា​សមាជិក​ក្រុមប្រឹក្សា​សិទ្ធិ​មនុស្ស អ.ស.ប

ដោយ មាន ឫទ្ធិ
2020-10-16
អ៊ីម៉ែល
មតិ
Share
បោះពុម្ព
អ្នកនាំពាក្យ​សមាគម​សិទ្ធិមនុស្ស​អាដ​ហុក (ADHOC) លោក ស៊ឹង សែនករុណា ផ្ដល់​បទសម្ភាសន៍​ដល់​អ្នក​កាសែត នៅ​ខាង​ក្រៅ​របង​សាលាឧទ្ធរណ៍ កាល​ពីថ្ងៃ​ទី២១ មិថុនា ២០១៩។
អ្នកនាំពាក្យ​សមាគម​សិទ្ធិមនុស្ស​អាដ​ហុក (ADHOC) លោក ស៊ឹង សែនករុណា ផ្ដល់​បទសម្ភាសន៍​ដល់​អ្នក​កាសែត នៅ​ខាង​ក្រៅ​របង​សាលាឧទ្ធរណ៍ កាល​ពីថ្ងៃ​ទី២១ មិថុនា ២០១៩។
Radio Free Asia

មន្ត្រី​សិទ្ធិ​មនុស្ស និង​អ្នកឃ្លាំមើល​បញ្ហា​សង្គម សម្ដែង​ក្ដី​បារម្ភ​ក្រោយ​ពេល​ក្រុម​ប្រទេស​មាន​និន្នាការ​កុម្មុយនិស្ត​រួមមាន ចិន (China) រុស្ស៊ី (Russia) និង គុយបា (Cuba) បាន​ជាប់​ឆ្នោត​ធ្វើ​ជា​សមាជិក​ក្រុម​ប្រឹក្សា​សិទ្ធិ​មនុស្ស​របស់​អង្គការ​សហប្រជាជាតិ សម្រាប់​អាណត្តិ​ថ្មី​នេះ។ ពួកគេ​ថា ការ​កាន់​កាប់​តំណែង​កំពូល​ផ្នែក​សិទ្ធិ​មនុស្ស​របស់​ប្រទេស​ទាំងនោះ នឹង​រឹត​ធ្វើ​ឲ្យ​ក្រុម​ប្រទេស​តូចតាច​ដែល​រំលោភ​សិទ្ធិ​មនុស្ស ដូច​ជា កម្ពុជា បង្កើន​ករណី​រំលោភ​បំពាន​សិទ្ធិ​មនុស្ស​នៅ​ក្នុង​ស្រុក ដោយសារ​តែ​មាន​ប្រទេស​កុម្មុយនិស្ត​ទាំង​នោះ ចាំ​ជួយ​ការពារ​នៅ​លើ​ឆាក​អន្តរជាតិ។

អ្នកនាំពាក្យ​សមាគម​ការពារ​សិទ្ធិ​មនុស្ស អាដហុក លោក ស៊ឹង សែនករុណា ​ព្រួយបារម្ភ​ចំពោះ​ដំណើរ​វិវត្ត​ថ្មី សម្រាប់​យន្តការ​សិទ្ធិ​មនុស្ស​របស់​អង្គការ​សហប្រជាជាតិ។ លោក​ថា ក្រុម​ប្រទេស​កុម្មុយនិស្ត​ទាំង​នេះ មិន​អាច​ធ្វើ​ជា​តំណាង​ការពារ​វិស័យ​សិទ្ធិ​មនុស្ស​របស់​ពិភពលោក​បានទេ ព្រោះ​ក្នុង​ប្រទេស​របស់​ពួកគេ ក៏​សុទ្ធ​តែ​ពោរពេញ​ដោយ​អំពើ​រំលោភ​សិទ្ធិ​មនុស្ស​ស្រាប់៖ «ប្រព័ន្ធ​នៃ​ការដឹកនាំ​តាម​បែប​ប្រជាធិបតេយ្យ កំពុង​តែ​មាន​ហានិភ័យ​ខ្លាំង ហើយ​បែរជា​រដ្ឋ​កុម្មុយនិស្ត​ទាំងអស់​នេះ ទៅជា​បាន​ជា​សមាជិក​របស់​អង្គការ​សហប្រជាជាតិ ខាង​ក្រុមប្រឹក្សា​សិទ្ធិ​មនុស្ស​នេះ ទៅទៀត។ យើង​ឃើញ​ហើយ ជា​ធម្មតា​ប្រទេស​បណ្ដា​កុម្មុយនិស្ត​ទាំងអស់​នេះ គាត់​មាន​ការរំលោភ​បំពាន​ទៅលើ​សិទ្ធិ​របស់​ពលរដ្ឋ​គាត់​រួច​ទៅ​ហើយ តើ​គាត់​ជួយ​លើកស្ទួយ និង​ការពារ​គោរព​សិទ្ធិមនុស្ស​អី​ដោយ​របៀប​ម៉េច? អ៊ីចឹង យើង​មាន​ការ​ព្រួយ​បារម្ភ​មែនទែន​នៅ​ក្នុង​រឿង​នេះ»

កាល​ពី​ថ្ងៃ​ទី១៣ តុលា សម័យ​ប្រជុំ​មហាសន្និបាត​អង្គការ​សហប្រជាជាតិ​លើក​ទី៧៥ នៅ​ទីក្រុង​ញ៉ូវយក បាន​រៀបចំ​ឲ្យ​មាន​ការបោះឆ្នោត​ជា​សម្ងាត់​ជ្រើសរើស​សមាជិក​ចំនួន​១៥ នៃ​ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ សម្រាប់​អាណត្តិ​ថ្មី​ឆ្នាំ២០២១ ដល់​ឆ្នាំ២០២៣។ តំណាង​កម្ពុជា និង​ជា​លេខាធិការ​ទី១ នៃ​ស្ថាន​បេសកកម្ម​អចិន្ត្រៃយ៍​របស់​កម្ពុជា​ប្រចាំ​អង្គការ​សហប្រជាជាតិ​នៅ​ទីក្រុង​ញូវយ៉ក លោក សុខ សុភា បាន​ចូលរួម​ក្នុង​ការបោះឆ្នោត​នេះ ក៏​ប៉ុន្តែ ពុំ​មាន​ការ​បញ្ជាក់​ថា តើ​កម្ពុជា​បោះឆ្នោត​ឲ្យ​ប្រទេស​ណា​មួយ​នោះ​ទេ ដើម្បី​ធ្វើ​ជា​តំណាង​សម្រាប់​ប្រទេស​មកពី​តំបន់​អាស៊ីប៉ាស៊ីហ្វិក។

អាស៊ី​សេរី​មិន​អាច​ទាក់ទង​អ្នកនាំពាក្យ​ក្រសួង​ការបរទេស លោក កុយ គួង ជុំវិញ​រឿង​នេះ​បាន​ទេ ដោយសារ​តែ​លោក​ពុំ​លើក​ទូរស័ព្ទ កាល​ពី​ថ្ងៃ​ទី១៥ តុលា។ ដោយឡែក សមាជិក និង​ជា​អ្នក​នាំ​ពាក្យ​គណៈកម្មាធិការ​សិទ្ធិ​មនុស្ស​របស់​រដ្ឋាភិបាល លោក កត្តា អ៊ន ក៏​មិន​អាច​ទាក់ទង​បាន​ដើម្បី​សុំ​អត្ថាធិប្បាយ​ជុំវិញ​រឿង​នេះ​បាន​ដែរ ដោយសារ​តែ​លោក​ពុំ​លើក​ទូរស័ព្ទ​កាលពី​ថ្ងៃ​ដដែល។

យ៉ាង​ណា កាល​ពី​ពេល​ថ្មីៗ នេះ កម្ពុជា​បាន​នាំចេញ​ករណី​រំលោភ​បំពាន​សិទ្ធិ​មនុស្ស​ ពាក់ព័ន្ធ​នឹង​សេរីភាព​នៃ​ការ​បញ្ចេញ​មតិ ទៅដល់​បេះដូង​នៃ​ទីស្នាក់ការ​អង្គការ​សហប្រជាជាតិ​ នៅ​ទីក្រុង​ហ្សឺណែវ (Geneva) ប្រទេស​ស្វីស (Switzerland)។ កាល​នោះ តំណាង​កម្ពុជា លោក អាន សុខឿន បាន​រារាំង​មិន​ឲ្យ​ព្រះអង្គ លួន សុវ៉ាត អាច​ថ្លែងការណ៍​បាន ដោយ​មាន​ការ​គាំទ្រ​ពី​ក្រុម​ប្រទេស​ប្លុក​កុម្មុយនិស្ត​ទាំង​នោះ។ ក៏​ប៉ុន្តែ ទង្វើ​របស់​លោក​បាន​ទទួល​នូវ​ភាព​អាម៉ាស់ និង​បរាជ័យ​ក្រោយ​មាន​អន្តរាគមន៍​ពី​ក្រុម​ប្រទេស​និយម​ប្រជាជាតិ ដែល​ទីបំផុត​ទៅ​ព្រះអង្គ លួន សុវ៉ាត នៅ​តែ​អាច​ថ្លែង​ការណ៍​បាន។

នេះ​ជា​ឧទាហរណ៍​ជាក់​ស្តែង​នៃ​គ្រោះថ្នាក់​ដែល​ក្រុម​ប្រទេស​មាន​និន្នាការ​កុម្មុយនិស្ត តែងតែ​ព្យាយាម​ជួយ​ការពារ​មុខមាត់​ឲ្យ​គ្នា ​ដើម្បី​បិទបាំង​ទង្វើ​រំលោភ​សិទ្ធិ​មនុស្ស​ធ្ងន់ធ្ងរ​នៅ​ក្នុង​ប្រទេស​របស់​ពួកគេ​រៀងៗខ្លួន។ ឥឡូវនេះ ក្រុម​ប្រទេស​កុម្មុយនិស្ត​ទាំងនេះ មាន​ដូច​ជា ចិន រុស្ស៊ី និង​គុយបា បាន​ឈ្នះ​ឆ្នោត​កាន់កាប់​​កៅអី​ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ សម្រាប់​អាណត្តិ​ថ្មី​នេះ។

លោក ស៊ឹង សែនករុណា មាន​ប្រសាសន៍​ថា ប្រទេស​ទាំង​នឹង​ជួយ​ចាំ​ការពារ​ផលប្រយោជន៍​ និង​បិទបាំង​អំពើ​រំលោភ​សិទ្ធិ​មនុស្ស​ឲ្យ​ក្រុម​ប្រទេស​ដែល​មាន​និន្នាការ​កុម្មុយនិស្ត ឬ​ផ្ដាច់ការ​ដូចគ្នា៖ «យើង​មាន​សង្ឃឹម​តិចតួច​ណាស់​ដោយសារតែ​ជា​ធម្មតា​អ្នក​ដែល​បាន​ទៅ​ក្នុង​តួនាទី​ហ្នុង គឺ​ច្បាស់​ណាស់​ ច្បាស់​ជា​គាត់​ទៅ​ការពារ​មេដឹកនាំ​របស់​បណ្ដា​ប្រទេស​រំលោភ​សិទ្ធិ​មនុស្ស​ហើយ។ អ៊ីចឹង ចង់​មិន​ចង់ ជៀស​មិន​ផុត​ទេ វា​អាច​បន្ថែម​នូវ​សំឡេង​សម្រេច​ណា​មួយ​នៅ​ពេល​ដែល​អង្គការ​សហប្រជាជាតិ​ធ្វើ​កិច្ច​អន្តរាគមន៍​ ទៅ​លើ​បណ្ដា​ប្រទេស​ដែល​កំពុង​តែ​ទទួល​រង​ការរំលោភ​សិទ្ធិ​មនុស្ស​អី​ជាដើម​ទាំងអស់​នេះ»

រីឯ​អ្នក​សិក្សា​ស្រាវជ្រាវ​បញ្ហា​សង្គម និង​នយោបាយ បណ្ឌិត សេង សារី លើក​យក​ករណី​តំណាង​កម្ពុជា​ព្យាយាម​រារាំង​មិន​ឲ្យ​ព្រះអង្គ លួន សុវ៉ាត មិន​ឲ្យ​ថ្លែងការណ៍​នៅ​ឯ​សម័យ​ប្រជុំ​ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ​ជុំវិញ​បញ្ហា​កម្ពុជា ដោយ​មាន​ប្រទេស​ចិន និង​គុយបា បាន​ចេញ​មុខ​ការពារ​តំណាង​កម្ពុជា ធ្វើជា​ឧទាហរណ៍។ លោក​ថា នៅ​ពេល​ដែល​ប្រទេស​កុម្មុយនិស្ត​ទាំងនេះ កាន់​តំណែង​ជា​ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ​ទៀត នោះ​សណ្ដាប់ធ្នាប់​ផ្នែក​សិទ្ធិ​មនុស្ស​របស់​ពិភពលោក នឹង​មាន​ការ​ប្រែប្រួល៖ «...មតិ​អន្តរាគមន៍​របស់​ព្រះតេជព្រះគុណ លួន សុវ៉ាត ក៏​ឃើញ​មាន​ប្រទេស​គុយបា ប្រទេស​ចិន​គាំទ្រ​ភាគី​កម្ពុជា​ដែរ។ នេះ​ហើយ​ជា​សញ្ញា​បង្ហាញ​ឲ្យ​ឃើញ​ច្បាស់​ណាស់​យើង​ឃើញ​ឧទាហរណ៍​ស្រេច​ហើយ​ថា សូម្បី​តែ​នៅ​ក្នុង​កៅអី​អង្គការ​សហប្រជាជាតិ នៅតែ​មាន​ការរំលោភ​បំពាន​ទៅលើ​សិទ្ធិ​ក្នុង​ការ​បញ្ចេញ​មតិ ចុះ​ទម្រាំ​ប្រទេស​ដែល​កាន់​លទ្ធិ​កុម្មុយនិស្ត​ក្លាយ​ទៅ​ជា​តួអង្គ​សំខាន់​ក្នុង​រឿង​សិទ្ធិមនុស្ស​របស់​ពិភពលោក​នោះ គឺ​បែបបទ​ឬក៏​របៀបរបប​របស់​ពិភពលោក​ផ្នែក​ខាង​សិទ្ធិ​មនុស្ស​នឹង​មាន​ការប្រែប្រួល​ហើយ»

យ៉ាងណាក៏ដោយ បើ​ទោះបី​ជា​មានការ​ប្រែប្រួល​បែបនេះ​ក៏ដោយ សម្រាប់​នាយករង​ទទួល​បន្ទុក​ផ្នែក​ឃ្លាំមើល​សិទ្ធិ​មនុស្ស​នៃ​អង្គការ​លីកាដូ (LICADHO) លោក អំ សំអាត លោក​នៅតែ​មាន​សង្ឃឹមថា ស្មារតី​និង​យន្តការ​សិទ្ធិ​មនុស្ស​របស់​អង្គការ​សហប្រជាជាតិ​នៅ​អាច​រក្សា​លំនឹង​បាន​ដដែល ដោយសារតែ​នៅ​មាន​អ្នក​ជំនាញ​ការ​សិទ្ធិ​មនុស្ស​ជា​ច្រើន​ទៀត​របស់​អង្គការសហប្រជាជាតិ​ចាំ​ចូល​រួម​នៅ​ក្នុង​ដំណើរការ​នេះ៖ «ខ្ញុំ​នៅ​តែ​យល់​ថា នៅ​ក្រុមប្រឹក្សា​សិទ្ធិមនុស្ស​នេះ នៅតែ​មាន​ក្រុម​អ្នក​ជំនាញ​ជាច្រើន ដែល​មកពី​ខាង​ប្រទេស​ប្រកាន់​លទ្ធិ​ប្រជាធិបតេយ្យ។ ដូច្នេះ បញ្ហា​នេះ បើ​សិន​ជា​ ការ​លើក​ឡើង​របស់​អ្នក​ជំនាញ​ច្រើន នោះ​វា​នឹង​នៅ​តែ​ជា​ការ​ការពារ​ទៅដល់​ស្មារតី ឬក៏​គោលការណ៍​នៃ​យន្តការ​សិទ្ធិ​មនុស្ស​ដដែល​នេះ​ទេ»

ប្រទេស​ចិន​ធ្លាប់​ត្រូវ​បាន​បោះឆ្នោត​ឲ្យ​ក្លាយ​ជា​សមាជិក​ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ​នេះ ជាច្រើន​ដង​រួចមក​ហើយ កាល​ពី​ឆ្នាំ២០០៦ ឆ្នាំ២០០៩ ឆ្នាំ២០១៣ និង​ឆ្នាំ២០១៦ កន្លងទៅ។ ក្រុមប្រឹក្សា​សិទ្ធិ​មនុស្ស​អង្គការ​សហប្រជាជាតិ​មាន​សមាជិក​សរុប ៤៧ប្រទេស​តំណាង​ឲ្យ​ប្រទេស​នានា​មកពី​តំបន់​ផ្សេងៗ​នៅ​លើ​ពិភពលោក។ កាល​ពី​ឆ្នាំ២០១៨ សហរដ្ឋអាមេរិក​បាន​ដក​ខ្លួន​ចេញ​ពី​ក្រុម​ប្រឹក្សា​នេះ ដោយសារ​តែ​យន្តការ​សិទ្ធិមនុស្ស​អង្គការ​សហប្រជាជាតិ​នេះ អនុញ្ញាត​ឲ្យ​ប្រទេស​ដែល​រំលោភ​សិទ្ធិមនុស្ស​អាក្រក់​បំផុត អាច​ធ្វើ​ជា​តំណាង​នៅ​ក្នុង​ក្រុម​ប្រឹក្សា​នេះ​បាន តាមរយៈ​ការបោះឆ្នោត។ នៅ​មុន​ការ​បោះ​ឆ្នោត​នេះ សហរដ្ឋ​អាមេរិក​បាន​អំពាវនាវ​ឲ្យ​រដ្ឋ​សមាជិក​ទាំងអស់​នៃ​អង្គការ​សហប្រជាជាតិ​ចាត់វិធានការ​ជាបន្ទាន់​ដើម្បី​ធ្វើ​កំណែទម្រង់​ក្រុមប្រឹក្សា​សិទ្ធិមនុស្ស​របស់​អង្គការ​សហប្រជាជាតិ​នេះ មុន​ពេល​ដែល​ស្ថាប័ន​នេះ​មិន​អាច​កែ​លម្អ​បាន៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល