ក្រុមអង្គការការពារសិទ្ធិមនុស្សក្នុងស្រុក បានបន្ទោសរដ្ឋាភិបាលថៃ ថាបានបំពានដល់សិទ្ធិពលករធ្ងន់ធ្ងរ ក្នុងការបញ្ជូនពលករខ្មែរដែលខ្វះលិខិតស្នាមទាំងបង្ខំមកកម្ពុជា វិញដ៏ច្រើនណែនតាន់តាប់តាមរយៈឡានទ្រុង ឡានដឹកដី ឬឡានដឹកទំនិញក្នុងខែមិថុនា នេះ។
ជាមួយនេះ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch = HRW) បានទាមទារឲ្យរដ្ឋាភិបាលថៃ គោរពសិទ្ធិពលករអន្តោប្រវេសន៍ និងផ្តល់សិទ្ធិគ្រប់គ្រាន់ឲ្យពួកគេ មានលទ្ធភាពក្នុងការស្នាក់នៅប្រទេសថៃ រយៈពេលយូរ និងអាចចូលរួមបង្កើតសហជីព ដើម្បីការពារសិទ្ធិកម្មករ។
ការរំលោភសិទ្ធិមនុស្សទាំងនោះរួមមាន ការបន្ទាបបន្ថោក ការចាប់បង្ខំមនុស្សឲ្យឡើងឡានដោយមិនឲ្យពួកគេត្រៀមលក្ខណៈជាមុន ការបង្អត់បាយក្រហាយទឹក និងការដាក់ឲ្យមនុស្សជិះប្រជ្រៀតណែនណាន់តាន់តាប់លំបាកដកដង្ហើម។ មនុស្សចាស់ជរា ក្មេងៗ និងស្ត្រីមានផ្ទៃពោះជាច្រើន ត្រូវបានគេដាក់ឲ្យជិះក្នុងរថយន្តទ្រុងក្នុងអាកាសធាតុដ៏ក្តៅហួតហែង ហើយធ្វើដំណើរដ៏ឆ្ងាយ។
មន្ត្រីស៊ើបអង្កេតរបស់អង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា រដ្ឋាភិបាលយោធាថៃ មិនបានយោគយល់ដល់កម្ពុជា ដែលជាប្រទេសសមាជិកអាស៊ានដូចគ្នា។ លោកបន្តថា ការបញ្ជូនពលករខ្មែរមកកម្ពុជា វិញនេះ ធ្វើឡើងដោយមិនបានសហការជាមួយស្ថានទូតរបស់កម្ពុជា ប្រចាំក្នុងទីក្រុងបាងកក ដែលជាតំណាងស្របច្បាប់របស់ប្រទេសកម្ពុជា។
រហូតមកទល់ពេលនេះ យ៉ាងហោចណាស់មានពលករដែលខ្វះលិខិតស្នាមជាង ២សែននាក់ ត្រូវបានរដ្ឋាភិបាលយោធាថៃ ដែលទើបឡើងកាន់អំណាចចាប់បញ្ជូនមកកម្ពុជា វិញទាំងបង្ខំ និងដោយអំពើហិង្សា។
កាលពីសប្ដាហ៍កន្លងទៅ រដ្ឋាភិបាលថៃ បដិសេធថា ថៃ មិនបានរំលោភសិទ្ធិមនុស្ស និងប្រើអំពើហិង្សាទៅលើពលករខ្មែរដូចការចោទប្រកាន់នោះឡើយ។ ហើយថា ពលករខ្មែរជាអ្នកស្ម័គ្រចិត្តវិលត្រឡប់ទៅកម្ពុជា វិញដោយខ្លួនឯង។
កាសែតបាងកកប៉ុស្តិ៍របស់ថៃ បានចុះផ្សាយថា ឯកអគ្គរាជទូតខ្មែរប្រចាំទីក្រុងបាងកក អ្នកស្រី អ៊ាត សោភា បានយល់ស្របជាមួយរដ្ឋាភិបាលថៃ ថាថៃ ពុំបានវាយធ្វើបាបបាញ់សម្លាប់ ឬរំលោភសិទ្ធិពលករខ្មែរនោះឡើយ។
រដ្ឋសភាថៃ កន្លងមក បានអនុម័តឲ្យមានការបញ្ជូនជនអន្តោប្រវេសន៍ខ្មែរខុសច្បាប់ទាំងអស់ ដែលកំពុងធ្វើការនៅប្រទេសថៃ ឲ្យទៅស្រុកកំណើតវិញ ដោយហេតុផលថាថៃ ចង់ឲ្យពលករខុសច្បាប់ទាំងអស់ ធ្វើលិខិតស្នាមស្របច្បាប់ក្នុងប្រទេសរបស់ខ្លួនឡើងវិញ។
អ្នកនាំពាក្យក្រសួងការបរទេសកម្ពុជា លោក កុយ គួង ធ្លាប់ប្រាប់វិទ្យុអាស៊ីសេរី ថា កម្ពុជា បានស្នើឲ្យភាគីថៃ ធ្វើយ៉ាងណាកុំយកទោសពៃរ៍បន្ថែមចំពោះពលករខ្មែរខុសច្បាប់ទាំងនោះ។
រដ្ឋាភិបាលថៃ ធ្លាប់ប្រកាសថាអ្នកដែលមានលិខិតស្នាមត្រឹមត្រូវអាចវិលត្រឡប់ទៅធ្វើការនៅប្រទេសថៃ វិញបាន។
ទោះជាយ៉ាងណាក៏ដោយ លោក អំ សំអាត ផ្តល់អនុសាសន៍ថា មុននឹងរដ្ឋាភិបាលកម្ពុជា បញ្ជូនពលកររបស់ខ្លួនត្រឡប់ទៅធ្វើការនៅប្រទេសថៃ វិញ ត្រូវតែមានការចរចា ឬអនុសារណៈបន្ថែមទៀត ក្នុងការធានាឲ្យបានថា ថៃ ត្រូវតែគោរពសិទ្ធិកម្មករ គោរពសិទ្ធិមនុស្ស គោរពសិទ្ធិពលរដ្ឋខ្មែរក្នុងនាមជាប្រទេសដែលជាសមាជិកអាស៊ានដូចគ្នា។
ពលរដ្ឋខ្មែរខ្លះមិនត្រឹមតែអស់ការងារធ្វើនៅប្រទេសថៃ ហើយត្រូវវិលត្រឡប់មកកម្ពុជា ប៉ុណ្ណោះទេ តែអ្នកខ្លះត្រូវបានតម្រួតថៃ យកលុយអស់គ្មានសល់ ផុតពីតម្រួតថៃ មកជួបនឹងក្រុមតម្រួតខ្មែរម្តង។ ពួកគេចោទប្រកាន់ក្រុមសមត្ថកិច្ចខ្មែរនៅតាមច្រកព្រំដែនខ្មែរថៃ ថាបានជំរិតទារប្រាក់ឥតសំចៃថែមទៀត។
កាសែតបាងកកប៉ុស្តិ៍របស់ថៃ បានដកស្រង់សម្ដីរបស់រដ្ឋមន្ត្រីក្រសួងមហាផ្ទៃ លោក ស ខេង ចុះផ្សាយថា រដ្ឋាភិបាលយោធាថៃ បានប្រញាប់ប្រញាល់បញ្ជូនពលករអន្តោប្រវេសន៍ខ្មែរមកកម្ពុជា វិញ ដោយមិនបានពិភាក្សាជាមួយកម្ពុជា ជាមុន។
របាយការណ៍របស់ការិយាល័យទំនាក់ទំនងព្រំដែនកម្ពុជាថៃ ឲ្យដឹងថា គិតពីថ្ងៃទី១ រហូតមកដល់ថ្ងៃទី១៩ ខែមិថុនា ឆ្នាំ២០១៤ មានសាកសពពលករខ្មែរចំនួន ១៦នាក់ ត្រូវអាជ្ញាធរថៃ ដឹកបញ្ជូនមកប្រគល់ឲ្យអាជ្ញាធរកម្ពុជា។ សាកសពទាំងនោះ បានស្លាប់ជាបន្តបន្ទាប់ដោយសារគ្រោះថ្នាក់ចរាចរណ៍ និងអ្នកខ្លះរងគ្រោះស្លាប់ដោយសារការលង់ទឹក និងមានជំងឺដង្កាត់នៅក្នុងប្រទេសថៃ។
លោក ស ខេង បានទាមទារឲ្យរដ្ឋាភិបាលយោធាថៃ ទទួលខុសត្រូវចំពោះអ្វីដែលបានកើតឡើងមកលើពលរដ្ឋខ្មែរទាំងនេះ។
មន្ត្រីនៃអង្គការឃ្លាំមើលសិទ្ធិមនុស្ស យូមែន រ៉ៃត៍ វ៉ច្ឆ ប្រចាំទីក្រុងបាងកក លោក Phil Robertson បានប្រាប់វិទ្យុអាស៊ីសេរី តាមទូរស័ព្ទកាលពីថ្ងៃច័ន្ទ ថា រដ្ឋាភិបាលយោធាថៃ គួរធ្វើការផ្លាស់ប្ដូរគោលនយោបាយរបស់ខ្លួន ចំពោះពលករអន្តោប្រវេសន៍។ លោក Phil Robertson ក៏បានជំរុញឲ្យរដ្ឋាភិបាលថៃ ធ្វើការពិចារណាជាថ្មីឡើងវិញ ចំពោះច្បាប់ទាំងឡាយណាដែលរឹតត្បិត ឬរារាំងដល់ពលករអន្តោប្រវេសន៍ទាំងអស់ក្នុងការបង្កើតសហជីព។
លោក Phil Robertson៖ «រដ្ឋាភិបាលថៃ ត្រូវតែធ្វើការកែទម្រង់ប្រព័ន្ធការងាររបស់ខ្លួនទាំងស្រុងតែម្តង។ រដ្ឋាភិបាលថៃ ត្រូវអនុញ្ញាតឲ្យពលករអន្តោប្រវេសន៍ទាំងអស់អាចស្នាក់នៅប្រទេសថៃ ក្នុងរយៈពេលយូរ ហើយមិនចាំបង្ខំបណ្ដេញពួកគេស្រុកកំណើតវិញ ដើម្បីយកលេសថាឲ្យទៅធ្វើលិខិតការងារស្របច្បាប់នោះទេ។ រដ្ឋាភិបាលថៃ ត្រូវធ្វើការលុបបំបាត់អំពើពុករលួយក្នុងការរកស៊ីចុះឈ្មោះពលករអន្តោប្រវេសន៍ និងលុបបំបាត់មន្ត្រីពុករលួយ។ លើសពីនេះទៅទៀត រដ្ឋាភិបាលថៃ ត្រូវទទួលស្គាល់សិទ្ធិរបស់ពលករអន្តោប្រវេសន៍ ដូចជា សិទ្ធិក្នុងការផ្លាស់ប្ដូរថៅកែ ឬសេរីភាពក្នុងការចូលរួមសកម្មភាពតវ៉ាផ្សេង ជាពិសេស គឺសិទ្ធិរបស់ពលករអន្តោប្រវេសន៍ ក្នុងការបង្កើតសហជីព ដើម្បីតថ្លៃការងារ និងជាតំណាងក្នុងការតវ៉ាជាមួយថៅកែ ឬនិយោជកថៃ»។
ជាងនេះទៅទៀត មន្ត្រីសមាគមការពារសិទ្ធិមនុស្សអាដហុក (adhoc) លោក ចាន់ សុវ៉េត មានប្រសាសន៍ថា ក្នុងនាមថៃ ជាសមាជិកអាស៊ាន ថៃ គ្មានភាពស៊ីវិល័យ ឬគ្មានភាពចេះដឹងទេក្នុងការបញ្ជូនពលករអន្តោប្រវេសន៍យ៉ាងតក់ក្រហល់យ៉ាងដូច្នេះ។ ក្រៅតែពីការបញ្ជូនពលករអន្តោប្រវេសន៍ខ្មែរដ៏ច្រើនសន្ធឹកសន្ធាប់មកកម្ពុជា វិញ ហើយបណ្ដាលឲ្យមនុស្ស ៨នាក់ស្លាប់នោះ កន្លងមកក៏មានរបាយការណ៍របស់សមាគមអាដហុក រកឃើញថា ចាប់តាំងពីឆ្នាំ២០០៨ ដល់ឆ្នាំ២០១៤ យ៉ាងហោចណាស់មានពលរដ្ឋចំនួន ១២២នាក់ ត្រូវបានយោធាថៃ បាញ់សម្លាប់ដោយសារការឆ្លងចូលកាប់ឈើខុសច្បាប់ក្នុងទឹកដីថៃ។ ហើយរហូតមកទល់ពេលនេះ គេនៅមិនទាន់ឃើញចំណាត់ការណាមួយពីរដ្ឋាភិបាលថៃ ក្នុងការវែកមុខជនដៃដល់យកផ្ដន្ទាទោសតាមផ្លូវច្បាប់នោះឡើយ។
ពលករខ្មែរក្រីក្រខ្មែររាប់សែននាក់ ត្រូវបានរដ្ឋាភិបាលយោធាថៃ ចាប់បញ្ជូនមកស្រុកកំណើតវិញទាំងបង្ខំក្នុងពេលថ្មីៗនេះ បានត្អូញត្អែរថា ទង្វើរបស់ក្រុមយោធាថៃ ជាការសម្លាប់ជីវភាព និងជីវិតរបស់ពួកគេទាំងរស់។
នេះមិនមែនជាលើកទីមួយទេ ដែលក្រុមយោធាថៃ ចាប់បញ្ជូនពលរដ្ឋខ្មែរមកស្រុកកំណើតវិញ។ កាលពីឆ្នាំ១៩៧៩ ក្រុមយោធាថៃ បញ្ជូនជនភៀសខ្លួនខ្មែរជាច្រើនម៉ឺននាក់ មកចាក់ទម្លាក់ពីលើខ្នងភ្នំដងរែក ចូលចម្ការមីនក្នុងប្រទេសកម្ពុជា។ ក្រុមយោធាថៃ បានចាប់រំលោភលើស្ត្រីភេទ ប្លន់យកទ្រព្យ បាញ់ទម្លាក់ និងបង្អត់បាយក្រហាយទឹកលើជនភៀសខ្លួនខ្មែររាប់ម៉ឺននាក់ពីលើភ្នំដងរែក ក្នុងទឹកដីកម្ពុជា ដោយគ្មានត្រាប្រណី។
របាយការណ៍របស់អង្គការសហប្រជាជាតិ ទទួលបន្ទុកជនភៀសខ្លួន (UNHCR) បានចេញផ្សាយនៅឆ្នាំ១៩៩៧ ថា យោធាថៃ បានភ្ជង់ និងរុញទម្លាក់ជនភៀសខ្លួនខ្មែរប្រមាណ ៤ម៉ឺន ៥ពាន់នាក់ មានកូនក្មេង មនុស្សចាស់ជរា និងស្ត្រីមានផ្ទៃពោះ ពីលើខ្នងភ្នំដងរែក ចូលចម្ការមីន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។