អភិបាល​ខេត្តព្រះសីហនុ​ប្រាប់​អ្នករាយការណ៍​ពិសេស អ.ស.ប ថា គ្មាន​ករណី​ចាប់​បង្ខាំង​មនុស្ស​ខុស​ច្បាប់​នៅក្នុង​ខេត្តព្រះសីហនុទេ

ដោយ មាន ឫទ្ធិ
2022.08.21
Share on WhatsApp
Share on WhatsApp
អភិបាល​ខេត្តព្រះសីហនុ​ប្រាប់​អ្នករាយការណ៍​ពិសេស អ.ស.ប ថា គ្មាន​ករណី​ចាប់​បង្ខាំង​មនុស្ស​ខុស​ច្បាប់​នៅក្នុង​ខេត្តព្រះសីហនុទេ (ឆ្វេង) ក្រុមមន្ត្រីអង្គការសិទ្ធិមនុស្សរបស់អង្គការសហប្រជាជាតី ជួបប្រជុំជាមួយអភិបាលខេត្តព្រះសីហនុ កាលពីថ្ងៃទី២០ ខែសីហា ឆ្នាំ២០២២។
រូប៖ រដ្ឋបាលខេត្តព្រះសីហនុ

អភិបាល​ខេត្តព្រះសីហនុ បាន​ថ្លែង​ការពារ និង​បដិសេធ​ប្រាប់​អ្នករាយការណ៍​ពិសេស​របស់​អង្គការ​សហប្រជាជាតិ​ស្តីពី​សិទ្ធិមនុស្ស​នៅ​កម្ពុជា​ថា ពុំមាន​ករណី​ចាប់​បង្ខាំង​មនុស្ស​ខុស​ច្បាប់​នៅ​តាម​ទីតាំង​អាជីវកម្ម​មួយ​ចំនួន​ក្នុងទឹកដី​ខេត្តព្រះសីហនុ​ដូច​ដែល​សេចក្តីរាយការណ៍​មួយ​ចំនួន​លើក​ឡើង​នោះ​ទ។

អភិបាល​ខេត្តព្រះសីហនុ លោក គួច ចំរើន ថ្លែងយ៉ាង​ដូច្នេះ​នៅក្នុង​ជំនួប​មួយ​ជា​មួយ​គណៈប្រតិភូ​អ្នករាយការណ៍​ពិសេស​របស់​អង្គការ​សហប្រជាជាតិ​ស្តីពី​សិទ្ធិមនុស្ស​នៅ​កម្ពុជា ដឹកនាំ​ដោយ​លោក វិទិត មុនតាប៊ន (Vitit Muntarbhorn) កាលពី​ថ្ងៃទី១៩ ខែសីហា។ កិច្ចប្រជុំនេះ អ្នក​រាយការណ៍​ពិសេស​របស់​អង្គការ​សហប្រជាជាតិ មាន​គោលដៅ​សិក្សា​ឈ្វេង​យល់​អំពី​កង្វល់ និង​បញ្ហា​ប្រឈម​នានា​ដើម្បី​ដោះស្រាយ​ឱ្យ​បាន​ទាន់​ពេល​វេលា ក្នុង​នោះ មាន​ដូចជា​ស្ថានភាព​សិទ្ធិមនុស្ស ការ​បង្ខិត​បង្ខំ​ឱ្យ​ប្រព្រឹត្តបទល្មើស ការជួញដូរមនុស្ស ឧក្រិដ្ឋកម្ម​តាម​ប្រព័ន្ធអ៊ីនធឺណិត ការ​បោក​ប្រាស់​តាម​ប្រព័ន្ធ​អនឡាញ និង​ស្ថានភាព​ជនរងគ្រោះ ដែលត្រូវ​បាន​ជួយ​សង្គ្រោះជាដើម។

ទំព័រហ្វេសប៊ុក (Facebook) របស់រដ្ឋបាល​ខេត្តព្រះសីហនុ ផ្សាយ​កាល​ពី​ថ្ងៃទី១៩ ខែសីហា ថា លោក គួច ចំរើន បានអះអាង​ថា កម្ពុជា​ប្តេជ្ញា​ចិត្តខ្ពស់​ប្រឆាំង​នឹង​អំពើ​ទាំង​នេះ ខណៈអាជ្ញាធរ​ខេត្ត​គ្រប់​ជាន់​ថ្នាក់ មិនដែល​គេចវេះ​ពី​តួនាទី​របស់​ខ្លួន​ឡើយ ពោលគឺ តែងតែសហការ និង​បង្ក្រាប​នូវ​រាល់​បទល្មើស​ដោយ​គ្មាន​ការ​បន្ធូរបន្ថយ​ដៃ​ឡើយ។ លោកថា ២០ឆ្នាំមុន​ ពលរដ្ឋ​ខ្មែរ​ជាច្រើន​បាន​រង​នូវ​ការ​ធ្វើ​ទុក្ខបុកម្នេញ ឬជួញដូរនៅ​ប្រទេស​ជិត​ខាង​ ដូចជា​ នៅ​ថៃ (Thailand) ​ម៉ាឡេស៊ី (Malaysia) ​តៃវ៉ាន់ (Taiwan) ​និងចិន (China) ជាដើម ដែល​ជាការ​គួរ​ឱ្យ​ឈឺចាប់​ក្នុង​នាម​ជា​ខ្មែរ។ ដូច្នេះ លោក​អះអាង​ថា កម្ពុជា​នឹង​មិន​ឱ្យ​មាន​ការ​ឈឺ​ចាប់​នេះ​កើត​មាន​ទៀត​នោះ​ឡើយ។ អភិបាល​ខេត្តព្រះសីហនុ​រូប​នេះ ផ្តល់​អំណះអំណាង​ថា កន្លងទៅ​មានការលើក​ឡើងថា មាន​ករណី​ចាប់​បង្ខាំង​មនុស្ស​ដោយ​ខុស​ច្បាប់​នៅតាម​ទីតាំង​អាជីវកម្ម​មួយ​ចំនួន​ក្នុង​ខេត្តព្រះសីហនុ ក៏​ប៉ុន្តែ ពេល​សមត្ថកិច្ច​ចុះ​ទៅ​ដល់ លោក​ថា អ្នក​ដែល​តាំង​ខ្លួន​ជា​ជនរងគ្រោះ​ទាំង​នោះ​កំពុង​ធ្វើការ​ជា​ធម្មតា ហើយ​អ្នកខ្លះ​ទៀត​កំពុង​សម្រាក​លេង​ទូរស័ព្ទ​ជាដើម។ លោកបន្តថា បន្ទាប់ពី​សមត្ថកិច្ចសួរនាំ គឺពួកគេ​ចង់​ប្តូរ​កន្លែង​ធ្វើការ ទើប​ប្តឹង​សមត្ថកិច្ចថា មាន​ករណី​ចាប់​បង្ខាំង រីឯ​អ្នក​ផ្សេងទៀត​ធ្វើការ​ដោយ​ស្ម័គ្រចិត្ត។

គិតត្រឹម​ម៉ោងផ្សាយ​នេះ អ្នករាយការណ៍​ពិសេស​របស់​អង្គការ​សហប្រជាជាតិ​ស្តីពី​សិទ្ធិមនុស្ស​នៅ​កម្ពុជា​លោក វិទិត មុនតាប៊ន នៅមិនទាន់លើកឡើង​ពីប្រតិកម្ម​របស់​លោក​ពាក់ព័ន្ធ​នឹង​ជំនួប​នេះ​ឡើយ ខណៈលោក​នឹងត្រៀមបញ្ចេញ​របាយការណ៍​ដំបូងពី​ការ​រកឃើញ​របស់​លោក​នៅ​ថ្ងៃ​ចុង​ក្រោយ​នៃ​បេសកកម្ម​ការងារ​រយៈពេល​ ១១ថ្ងៃនៅ​កម្ពុជា គឺនៅ​ថ្ងៃទី២៦ ខែសីហាខាងមុខ។

មិនមែន​មាន​តែ​អភិបាល​ខេត្តព្រះសីហនុទេ ដែល​បដិសេធ​នឹង​បញ្ហា​បង្ខាំង​មនុស្ស​ខុស​ច្បាប់​ បញ្ហា​នៃការ​ជួញ​ដូរ​មនុស្ស ឧក្រិដ្ឋកម្ម​តាម​ប្រព័ន្ធអ៊ីនធឺណិត និង​ការ​បោកប្រាស់​តាម​ប្រព័ន្ធ​អនឡាញ ដែល​សេចក្តីរាយការណ៍​នានា​បង្ហាញ​ថា ភាគច្រើន​ប្រព្រឹត្ត​ដោយ​ថៅកែ​ជនជាតិ​ចិន និង​ម្ចាស់​បនល្បែង​កាស៊ីណូ​ចិន​នៅ​កម្ពុជា​នោះ

អ្នកនាំ​ពាក្យ​ក្រសួង​មហាផ្ទៃលោក ខៀវ សុភ័គ ធ្លាប់​ប្រាប់​វិទ្យុអាស៊ីសេរី​កាលពី​ពេលថ្មីៗ​ នេះ​ថា ការ​ផ្សព្វផ្សាយ​របស់​សារព័ត៌មាន​អន្តរជាតិ​មួយ​ចំនួន​ដែល​និយាយ​អំពី​ក្រុម​មន្ត្រី និង​ឧកញ៉ា​ដែល​ស្និទ្ធ​នឹង​លោកនាយករដ្ឋមន្ត្រី ហ៊ុន សែន ថាមាន​ជាប់ពាក់​ព័ន្ធជាមួយ​ជនជាតិ​ចិន​ធ្វើ​ជំនួញ​ជួញដូរ​មនុស្ស​នៅ​កម្ពុជា ឬ​កំពុង​ប្រតិបត្តិការ​ក្រុមហ៊ុន​ឆបោក​ទ្រង់ទ្រាយ​ធំ​តាម​ប្រព័ន្ធអ៊ីនធឺណិត គឺជា​រឿង​បំភ្លៃ​ខុស​ពី​ការ​ពិត និង​មាន​ចេតនា​អាក្រក់​មក​លើ​កម្ពុជា​ដើម្បី​ឱ្យ​ពិភពលោក​មើល​ឃើញ​ថា កម្ពុជា​ជាប្រទេស​មួយ​ដែល​មាន​កេរ្តិ៍​ឈ្មោះ​មិន​ល្អ​តែ​ប៉ុណ្ណោះ

ផ្ទុយ​ពី​ការ​អះអាង​នេះ រឿងរ៉ាវ​ដែល​កម្ពុជា​កំពុង​តែត្រូវ​បាន​ប្រែក្លាយ​ជា​មជ្ឈមណ្ឌល​សម្រាប់​ក្រុម​ឧក្រិដ្ឋជន​ជនជាតិ​ចិន​រក​ស៊ី​ប្រតិបត្តិការ​ឆបោក​ទ្រង់ទ្រាយ​ធំ​តាម​ប្រព័ន្ធអ៊ីនធឺណិត កំពុង​ក្លាយជា​ប្រធាន​បទស្ទើ​រ​តែប្រចាំថ្ងៃ​ទៅហើយ ​ដែល​ត្រូវ​បាន​សារព័ត៌មាន​ធំៗ​ របស់​អន្តរជាតិ​យក​ទៅ​ចុះ​ផ្សាយ​នៅ​លើ​ទំព័រ​មុខ​ធ្វើ​ឱ្យ​កក្រើក​ពិភពលោក ខណៈរដ្ឋាភិបាល​បរទេស​ពាក់ព័ន្ធ​បន្ត​លើក​ឡើង​ពី​កង្វល់​ទាំង​នេះ​ប្រាប់​ទៅ​ភាគី​កម្ពុជា​ឱ្យ​ដោះស្រាយ។

ជាក់ស្តែង សារព័ត៌មាន​អន្តរជាតិ អាល់ ហ្សាហ្ស៊ីរ៉ា (Al Jazeera) ​របស់​រដ្ឋកាតា (Qatar)​ កាល​ពី​ពាក់​កណ្តាល​ខែកក្កដា បាន​រាយការណ៍​ថា កម្ពុជាក្លាយ​ជា​កន្លែង​ប្រព្រឹត្ត​ទាសភាព​តាម​ប្រព័ន្ធអ៊ីនធឺណិត ដូចជា​ការ​ចាប់​ជំរិត និង​បង្ខាំង​មនុស្ស​មកពី​បណ្តា​ប្រទេស​នានា​ជុំវិញ​តំបន់​អាស៊ី​រាប់​ពាន់​នាក់​ឱ្យ​ធ្វើ​ការងារ​ឆបោក​មនុស្ស​នៅតាម​អនឡាញ ប្រព្រឹត្ត​ដោយ​ក្រុមហ៊ុន​ចិន​ដែល​មាន​ទំនាក់​ទំនង​ជា​មួយ​អ្នក​មាន​លុយ​មាន​អំណាច​នៃ​រដ្ឋាភិបាលលោក​នាយករដ្ឋមន្ត្រី ហ៊ុន សែន។ ​សេចក្ដីរាយការណ៍​ស៊ើបអង្កេត​ជា​វីដេអូ របស់​អាល់ ហ្សាហ្ស៊ីរ៉ា ថែមទាំង​បង្ហាញ​នូវរូបភាព​ធ្វើទារុណកម្ម​មនុស្ស​ដែល​មាន​ជនរង​គ្រោះ​ដៃ​ជាប់​ខ្នោះ និង​រង​ការ​វាយ​នឹង​ដំបង ហើយ​ឆក់​ខ្សែ​ភ្លើង​ថែម​ទៀត​ផង។

ថ្មីៗនេះ​ទៀត​សោត កាលពីថ្ងៃទី១៨ ខែសីហា សារព័ត៌មាន​តៃវ៉ាន់​រាយការណ៍ថា យ៉ាងហោច​ណាស់​មាន​ពលរដ្ឋតៃវ៉ាន់ ៣៧៣នាក់ ត្រូវបានគេ​បោកបញ្ឆោត​ឱ្យធ្វើការ​ឱ្យក្រុមហ៊ុន​ឆបោក​តាម​អនឡាញ​នៅ​កម្ពុជា តាមរយៈ​ការ​ផ្សាយ​ពាណិជ្ជកម្ម​ការងារ​ក្លែងក្លាយ និង​ក្នុង​នោះមាន​ពលរដ្ឋ​តៃវ៉ាន់​ចំនួន ១៤៤​នាក់​ត្រូវ​បាន​បង្ខាំង​ទុក​ដោយ​ខុស​ច្បាប់​នៅ​កម្ពុជា។ រីឯ​ទីភ្នាក់ងារសារព័ត៌មាន​បារាំង អា.អេហ្វ.ប៉េ (AFP) ​បាន​រាយការណ៍​កាលពី​ថ្ងៃទី១៩ ខែសីហា ថា កម្មករ​កាស៊ីណូ​ជនជាតិ​វៀតណាម​ប្រមាណ ៤០នាក់ ធ្វើការ​ឱ្យ​កាស៊ីណូ​មួយ​ឈ្មោះ Golden Phoenix Entertainment Casino នៅ​ឃុំជ្រៃធំ ស្រុកកោះធំ ខេត្តកណ្តាល ត្រូវបាន​គេ​បង្ខំ​ឱ្យ​ធ្វើការ​ដោយ​ពុំបើក​ប្រាក់​ឈ្នួល ហើយ​ពួកគេ​សម្រុក​រត់គេចចេញ​ពី​ទីតាំង​កាស៊ីណូនេះ​ ដោយបាន​លោត​ចូល​ក្នុង​ទឹក​ទន្លេ ឆ្លង​ទៅ​ត្រើយ​ម្ខាង​ទៀត​នៃ​ប្រទេស​វៀតណាម​វិញ

នៅឯ​កិច្ចប្រជុំ​ថ្នាក់​រដ្ឋមន្ត្រី​ការបរទេស​អាស៊ាន​កាលពីដើមខែសីហា​នេះ រដ្ឋមន្ត្រី​ការបរទេស​ឥណ្ឌូនេស៊ី (Indonesia) ​អ្នកស្រី រិតណូ ម៉ារស៊ូឌី (Retno Marsudi) ​ក៏បានលើក​ឡើង​ពី​កង្វល់​របស់​ឥណ្ឌូនេស៊ី​ជុំវិញ​បញ្ហា​នេះទៅ​កាន់​រដ្ឋមន្ត្រីការបរទេស​កម្ពុជា​លោក ប្រាក់ សុខុន ដោយ​បាន​ជំរុញ​ឱ្យ​ភាគី​កម្ពុជា​ផ្តល់​កិច្ចសហប្រតិបត្តិការ​ប្រឆាំង​នឹង​អំពើ​ជួញដូរ​មនុស្ស​នេះ ក្រោយ​ពលរដ្ឋ​ឥណ្ឌូនេស៊ី​ប្រមាណ ៦០នាក់ ត្រូវបានបង្ខាំង​ខុសច្បាប់​ដោយក្រុមហ៊ុន​ឆបោក​អនឡាញ​មួយ​នៅ​ខេត្តព្រះសីហនុ ហើយ​ក្រោយ​មក​ត្រូវ​បាន​អាជ្ញាធរ​កម្ពុជា​ជួយ​សង្គ្រោះ រួចបញ្ជូន​ពួកគេ​ត្រលប់​ទៅ​ប្រទេស​ឥណ្ឌូនេស៊ីវិញ ខណៈព័ត៌មាន​នេះ​ត្រូវ​បាន​អាជ្ញាធរ​កម្ពុជា​ព្យាយាម​បិទបាំងសារព័ត៌មាន​ឥណ្ឌូនេស៊ី​រាយការណ៍​កាលពីថ្ងៃទី៦ ខែសីហា ថា ផ្អែកតាមទិន្នន័យ​ពី​អគ្គនាយកដ្ឋាន​គាំពារ​ពលរដ្ឋ​ឥណ្ឌូនេស៊ី យ៉ាងហោច​ណាស់​មាន​ជនជាតិ​ឥណ្ឌូនេស៊ី​ ២៩៨នាក់ ​បាន​ធ្លាក់​ខ្លួន​ក្លាយ​ជាជ​នរ​​ង​គ្រោះនៃអំពើ​ឆបោក និង​អំពើ​ជួញដូ​រមនុស្ស​នៅ​កម្ពុជា គិត​ត្រឹម​ខែ​កក្កដា ដែល​ចំនួន​នេះកើន​ឡើង​ពី​ចំនួន​ពលរដ្ឋ​រងគ្រោះ​ឥណ្ឌូនេស៊ី ១១៩នាក់ កាលពីឆ្នាំ២០២១។ ក្រៅពីករណី​ជនជាតិ​ឥណ្ឌូនេស៊ី​ វៀតណាម តៃវ៉ាន់ដែលបាន​រងគ្រោះ​ដោយ​ក្រុមហ៊ុន​ឆបោក​អនឡាញ​រប​ស់ចិន​នៅកម្ពុជា​នេះ ក៏មាន​សេចក្តីរាយការណ៍​ជាច្រើន​ពាក់ព័ន្ធ​នឹង​ជនរងគ្រោះ​ជាជន​ជាតិ​ថៃ ម៉ាឡេស៊ី ហ្វីលីពីន និង​ជនជាតិអាព្រិក​មួយចំនួន​ទៀត​ផងដែរ ដែលបាន​រង​គ្រោះ​ក្នុង​រឿងរ៉ាវ​ស្រដៀង​គ្នា​នេះ​នៅ​កម្ពុជា

របាយការណ៍​ស្ដីពីការ​ជួញដូរ​មនុស្ស​ឆ្នាំ២០២២ របស់ក្រសួង​ការបរទេសអាមេរិក ទើប​នឹង​ចេញ​ផ្សាយ​កាលពី​ថ្ងៃទី១៩ ខែកក្កដា បានទម្លាក់ចំណាត់​ថ្នាក់​កម្ពុជា​មក​កម្រិត​ទី៣​ អាក្រក់​បំផុត ពុំធ្លាប់​មាន​តាំងពី​ឆ្នាំ២០១៥ ​មក និង​ក្រោយពេល​ដែលកម្ពុជា​ស្ថិតក្នុង​ចំណាត់​ថ្នាក់​កម្រិត​ទី​២​ ក្រោម​ការ​ឃ្លាំមើល​អស់រយៈពេល ​៣​ឆ្នាំ​ជាប់ៗ ​គ្នា​ ចាប់​តាំងពី​ឆ្នាំ២០១៩ មក។ របាយការណ៍​លើកឡើង​ថា រដ្ឋាភិបាល​កម្ពុជាពុំ​បាន​គោរព​តាម​ពេញ​លេញនូវ​ស្តង់ដារ​អប្បបរមា​ដើម្បី​បំបាត់​នូវ​អំពើ​ជួញដូរ​មនុស្ស និងពុំបាន​ខិតខំប្រឹងប្រែង​គួរឱ្យកត់​សម្គាល់​ក្នុង​ការ​ប្រយុទ្ធប្រឆាំង​នឹង​អំពើ​ជួញដូរ​មនុស្ស​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។