លោក វន់ ពៅ សង្ឃឹមថា តុលាការកំពូលផ្ដល់យុត្តិធម៌ដោយទម្លាក់បទចោទប្រកាន់លើរូបលោក
2024.09.03
ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ ឬកាត់ហៅថា IDEA លោក វន់ ពៅ។
រូប៖ ហ្វេសប៊ុកលោក វន់ ពៅ
ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ ឬកាត់ហៅថា IDEA លោក វន់ ពៅ ស្នើឱ្យតុលាការកំពូលទម្លាក់ចោលបទចោទប្រកាន់លើរូបលោក ពីព្រោះលោកជាជនរងគ្រោះ មិនមែនជាអ្នកប្រព្រឹត្តបទល្មើសដូចតុលាការថ្នាក់ក្រោមចោទប្រកាន់ឡើយ។
សំណើនេះ ធ្វើឡើងបន្ទាប់ពីតុលាការកំពូលគ្រោងនឹងប្រកាសសាលដីកាបណ្ដឹង សាទុក្ខរបស់លោក វន់ ពៅ ក្នុងសំណុំរឿង «ញុះញង់» ពាក់ព័ន្ធនឹងការចូលរួម តវ៉ានៅរោងចក្រកាត់ដេរ យ៉ាកជីន កាលពីឆ្នាំ២០១៤ នៅសប្ដាហ៍ក្រោយ។
លោក វន់ ពៅ ប្រាប់អ្នកសារព័ត៌មាន បន្ទាប់ពីបញ្ចប់សវនាការនៅថ្ងៃទី០២ ខែកញ្ញា ថា រយៈពេល ១០ ឆ្នាំហើយ ដែលលោករង់ចាំយុត្តិធម៌នៅក្នុងសំណុំរឿង ដែលលោកមិនបានប្រព្រឹត្តបទល្មើស។ លោកសង្ឃឹមថា តុលាការកំពូលនឹងទម្លាក់ ចោលបទចោទប្រកាន់លើរូបលោកឱ្យមានសេរីភាពពេញលេញ ពីព្រោះការតស៊ូរបស់លោក ដើម្បីយុត្តិធម៌កម្មករសេដ្ឋកិច្ចក្រៅប្រព័ន្ធផង ហើយក៏រួមចំណែកជួយដល់រដ្ឋាភិបាលផងដែរ។
លោក វន់ ពៅ៖ «ខ្ញុំស្នើទៅទាំងរដ្ឋាភិបាលអាណត្តិទី៧ ទាំងសម្ដេចធិបតី ទាំងតុលាការជាពិសេសឯកឧត្ដមចៅក្រមតុលាការកំពូល សូមផ្ដល់យុត្តិធម៌ឱ្យខ្ញុំ ដែលខ្ញុំជាជនរងគ្រោះ កុំឱ្យជនរងគ្រោះហើយ បែរជារងការចោទប្រកាន់។ សូមផ្ដល់យុត្តិធម៌ឱ្យខ្ញុំ ដើម្បីខ្ញុំរស់ក្នុងប្រទេសមួយដែលមានសន្តិភាពទាំងអស់គ្នាផង»។
ការស្នើសុំនេះ ក្រោយពីប្រធានក្រុមប្រឹក្សាជំនុំជម្រះតុលាការកំពូល បើកសវនាការនៅថ្ងៃទី០២ ខែកញ្ញា ហើយសម្រេចថា នឹងប្រកាសសាលដីកាបណ្ដឹង សាទុក្ខរបស់លោក វន់ ពៅ ប្រឆាំងនឹងសេចក្ដីសម្រេចរបស់តុលាការថ្នាក់ក្រោម នៅថ្ងៃទី៩ ខែកញ្ញា ខាងមុខ។
កាលពីថ្ងៃទី៣០ ខែឧសភា ឆ្នាំ២០១៤ លោក វន់ ពៅ និងជនជាប់ចោទផ្សេងទៀត ត្រូវបានសាលាដំបូងរាជធានីភ្នំពេញសម្រេចផ្ដន្ទាទោសដាក់ពន្ធនាគារចន្លោះពី ៤ ដល់ ៥ឆ្នាំ និងពិន័យចំនួន ៨លាន រៀលពីបទ«ញុះញង់» ពាក់ព័ន្ធនឹងការធ្វើបាតុកម្មរបស់កម្មករ ដែលទាមទារដំឡើងប្រាក់ឈ្នួល ១៦០ ដុល្លារកាលពីឆ្នាំ២០១៤ ដែលកាលនោះលោកត្រូវបានទាហានឆ័ត្រយោង ៩១១ វាយឱ្យរងរបួសធ្ងន់។
នៅថ្ងៃទី២៩ ខែកញ្ញា ឆ្នាំ២០២៣ សាលាឧទ្ធរណ៍ភ្នំពេញបានសម្រេចលុបចោល ប្រាក់ពិន័យចំនួន ៨លានរៀល ប៉ុន្តែតម្កល់សាលក្រមផ្ដន្ទាទោសដាក់ពន្ធនាគារ ចន្លោះពី ៤ ដល់ ៥ឆ្នាំលើលោក វន់ ពៅ និងជនជាប់ចោទផ្សេងទៀតដូចសាលាដំបូងរាជធានីភ្នំពេញដដែល។
មេធាវីការពារក្ដីឱ្យលោក វន់ ពៅ គឺលោក សឺន ជុំជួន លើកឡើងថា ការសម្រេចសេចក្ដីរបស់សាលាដំបូងរាជធានីភ្នំពេញ និងសាលាឧទ្ធរណ៍ គឺមិនឆ្លើយតបនិងអង្គហេតុ ហើយផ្ទុយនិងអង្គហេតុ រីឯសំអាងហេតុវិញ គឺផ្ទុយនឹងអង្គច្បាប់។
លោក សឺន ជុំជួន៖ «ក្នុងនាមយើងជាសហមេធាវីការពារសិទ្ធិឱ្យលោក វន់ ពៅ យើងស្នើសុំឱ្យក្រុមប្រឹក្សាជំនុំជម្រះសម្រេចឱ្យលោក វន់ ពៅ គាត់រួចផុតពីបទចោទ ហើយចំណុចទី ២ សូមឱ្យមោឃៈសាលដីកាសាលាឧទ្ធរណ៍រាជធានីភ្នំពេញ។ នេះជាអ្វីដែលយើងបានចូលរួមនៅក្នុងសវនាការព្រឹកហ្នឹង»។
ចំណែកមេធាវីដើមបណ្ដឹងវិញ បានស្នើទៅប្រធានក្រុមប្រឹក្សាជំនុំជម្រះតុលាការ កំពូលឱ្យរក្សាបទចោទប្រកាន់លើលោក វន់ ពៅ ដូចតំណាងមហាអយ្យការស្នើសុំដែរ។
នៅក្នុងសំណុំរឿង«ញុះញង់» នេះ អ្នកពាក់ព័ន្ធដែលត្រូវបានតុលាការចោទប្រកាន់មានប្រមាណ ២៥នាក់ ក្នុងនោះរួមមាន ប្រធានសមាគមសម្ព័ន្ធសហគមន៍ កសិករកម្ពុជា(CCFC)លោក ថេង សាវឿន អតីតអ្នករងគ្រោះក្នុងតំបន់បឹងកក់ លោក ចាន់ ពុទ្ធិស័ក្ក និងលោក វន់ ពៅ ជាដើម ប៉ុន្តែសវនាការថ្ងៃទី០២ ខែកញ្ញានេះ មានតែលោក វន់ ពៅ ម្នាក់ដែលចូលរួមសវនាការ ខណៈអ្នកផ្សេងទៀត ពុំទទួលដីកាកោះហៅពីតុលាការនោះឡើយ។
លោក វន់ ពៅ ចាត់ទុកការលើកឡើងរបស់មេធាវីរដ្ឋាភិបាល ដែលចោទប្រកាន់ និងដាក់បន្ទុកលើរូបលោកថា ជារឿងមិនត្រឹមត្រូវ។ លោកថា កាលនោះ លោករងអំពើហិង្សាស្ទើរតែបាត់បង់ជីវិតនៅមុខរោងចក្រកាត់ដេរយ៉ាកជីន ហើយត្រូវបញ្ជូនទៅឃុំខ្លួននៅពន្ធនាគារត្រពាំងផ្លុងតែម្ដង ខណៈរឿងផ្លូវវេងស្រេងកើតក្រោយព្រឹត្តិការណ៍នោះ។
លោក វន់ ពៅ៖ «ការចោទខ្ញុំជាអ្នកផ្ដើមគំនិតអីគឺមិនត្រឹមត្រូវទេ អង្គហេតុរឿងហ្នឹង គឺខ្ញុំគ្រាន់តែអ្នកឃ្លាំមើលហើយបញ្ជាក់ឱ្យបងប្អូនកម្មករ បញ្ជាក់ឱ្យទាហានឆ័ត្រយោង ៩១១ កុំឱ្យប្រើអំពើហិង្សាមកលើកម្មករ កុំកម្មករប្រើអំពើហិង្សាដាក់គ្នាប៉ុណ្ណោះ។ ក្នុងនាមយើងជាអ្នកកាន់ព្រះពុទ្ធសាសនាយើងចង់ឱ្យអ្វីក៏ដោយធ្វើដោយអហិង្សា ដោយសន្តិភាពទាំងអស់គ្នា»។
នាយកទទួលបន្ទុកកិច្ចការទូទៅនៃអង្គការលីកាដូ (Licadho) លោក អំ សំអាត សង្ឃឹមថា តុលាការកំពូលនឹងផ្ដល់យុត្តិធម៌ដល់លោក វន់ ពៅ និងអ្នកផ្សេងទៀត ឱ្យមានសេរីភាពពេញលេញ។ ចំពោះករណីវាយដំកាលពីឆ្នាំ២០១៤ វិញ លោកថា ប្រសិនបើមានការស្វែងរកយុត្តិធម៌សម្រាប់លោក វន់ ពៅ និងអ្នកផ្សេងទៀត ពួកគេអាចនឹងទទួលបានយុត្តិធម៌ បន្ទាប់ពីលោក វន់ ពៅ និងអ្នកផ្សេងទៀតបានប្ដឹង ពីព្រោះរឿងវាយដំនេះ គឺជាទង្វើខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
- សមត្ថកិច្ចម៉ាឡេស៊ីបញ្ជូនពលករខ្មែរម្នាក់ដែលរិះគន់រដ្ឋាភិបាលលោក ហ៊ុន ម៉ាណែត មកកម្ពុជា
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- សកម្មជននិងសង្គមស៊ីវិលទទូចឱ្យរដ្ឋាភិបាលស្ដារទំនាក់ទំនងកម្ពុជា និងស៊ុយអែតឡើងវិញ