មជ្ឈមណ្ឌលសិទ្ធិមនុស្សកម្ពុជារកឃើញថា ការអភិវឌ្ឍន៍ដោយបង្កើតអោយមានតំបន់សេដ្ឋកិច្ចពិសេសនៅកម្ពុជា មានបញ្ហាមួយចំនួនទាក់ទិននឹងការរំលោភសិទ្ធិមនុស្ស ដែលអាជ្ញាធរត្រូវយកចិត្តទុកដាក់កែលម្អ ដើម្បីធានាថាប្រយោជន៍ ដែលបានពីការអភិវឌ្ឍន៍ បានដល់ពលរដ្ឋពិតប្រាកដ។
កម្រងឯកសារស្ដីពីធុរកិច្ច និងសិទ្ធិមនុស្សចេញផ្សាយសម្រាប់ខែ កញ្ញារបស់មជ្ឈមណ្ឌលសិទ្ធិមនុស្សកម្ពុជារកឃើញបញ្ហាចំនួន ៤ទាក់ទងដល់ការរំលោភសិទ្ធិមនុស្សនៅពេលមានតំបន់សេដ្ឋកិច្ចពិសេសក្នុងនោះ រួមមាន ខ្វះតម្លាភាព និងការផ្សព្វផ្សាយ ដែលនាំឲ្យសហគមន៍ទទួលរងផលប៉ះពាល់ មិនបានទទួលព័ត៌មានពីការអភិវឌ្ឍន៍តំបន់ពួកគេរស់នៅ។ ការបណ្តេញចេញដោយបង្ខំដែលតែងតែកើតឡើងនៅពេល ដែលតំបន់សេដ្ឋកិច្ចពិសេសដំណើរការដោយពុំមានយុត្តិធម៌ ដោយមិនបានពិគ្រោះយោបល់ជាមុន និងសំណងត្រឹមត្រូវ។ មួយទៀត គឺអ្នកដែលបម្រើការក្នុងតំបន់សេដ្ឋកិច្ចពិសេសបានប្រាក់ឈ្នួលទាប និងលក្ខខណ្ឌការងារមិនល្អ ក្នុងនោះបណ្ដាលពីការមិនកំណត់ប្រាក់ឈ្នួលអប្បបរមា និងការកេងប្រវញ្ចកម្លាំងពលកម្ម។ ព្រមជាមួយគ្នានេះ ក៏មានការរឹតបន្តឹងធ្ងន់ធ្ងរលើសេរីភាពបញ្ចេញមតិ និងជួបប្រជុំ និងសមាគម ដោយការរើសអើង ការបំភិតបំភ័យ ហើយជួនកាលក៏មានអំពើហិង្សា ការរំខានយាយីពីប្រព័ន្ធតុលាការផង។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា មជ្ឈមណ្ឌលសិទ្ធិមនុស្សកម្ពុជាទទួលស្គាល់ថា តំបន់សេដ្ឋកិច្ចពិសេសបានជួយច្រើនទៅដល់សេដ្ឋកិច្ចជាតិ និងផ្ដល់ការងារច្រើនដល់ពលរដ្ឋជាពិសេសគឺក្រុមស្រ្ដី ប៉ុន្តែផលប៉ះពាល់ក៏ធ្ងន់ធ្ងរដែរទៅលើសិទ្ធិមូលដ្ឋានសហគមន៍ ប្រសិនបើតំបន់សេដ្ឋកិច្ចពិសេសទាំងនោះបង្កើតឡើងដោយមិនផ្សាភ្ជាប់នឹងគោលការណ៍គោរពសិទ្ធិមនុស្ស។ លោកថា ដើម្បីធានានូវផលវិជ្ជមាន ដែលទទួលបានពីការអភិវឌ្ឍនេះអាជ្ញាធរត្រូវកែលំអចំនួន ៥ចំណុច៖ ពិភាក្សាជាមួយសហគមន៍ជាពិសេសតំបន់ ដែលមានជនជាតិដើមភាគតិច ពិចារណាអនុវត្តសិទ្ធិមនុស្ស និងគោលការណ៍វិនិយោគប្រកបដោយសក្ដានុពលដកចេញវិនិយោគិន ដែលមិនល្អ វាយតម្លៃផលប៉ះពាល់បរិស្ថាន និងសង្គម ធ្វើកំណែទម្រង់របបច្បាប់គ្រប់គ្រងតំបន់សេដ្ឋកិច្ចពិសេស កំណត់ព្រំប្រទល់ច្បាស់លាស់ ធានាសេរីភាពខាងសមាគម បង្កើតអោយមានយន្តការបណ្ដឹងឯករាជ្យ មានប្រសិទ្ធភាព៖ « រឹតបន្តឹងក្នុងការគ្រប់គ្រងតំបន់សេដ្ឋកិច្ចពិសេសឲ្យមានការគោរពសិទ្ធិមនុស្សរបស់កម្មករ គឺមានន័យថា ឈានទៅដល់គោលដៅមួយរបស់រដ្ឋាភិបាល គឺការអភិវឌ្ឍនប្រកបដោយនិរន្តរភាព មានន័យថាមានការអភិវឌ្ឍកុំឲ្យមានផលប៉ះពាល់។ អ្នកដែលជាម្ចាស់ក្រុមហ៊ុន និងរដ្ឋាភិបាលអត់មានការភ័យបារម្ភអត់មានការតវ៉ាបពីពលរដ្ឋ ពីកម្មករ ហើយការអភិវឌ្ឍន៍ទៅដោយរលូន » ។
របាយការណ៍ស្រាវជ្រាវអំពីតំបន់សេដ្ឋកិច្ចពិសេសនៅទូទាំងអាស៊ីបង្ហាញថា កម្ពុជាមានតំបន់សេដ្ឋកិច្ចពិសេសចំនួន៣៨ គិតត្រឹមឆ្នាំ២០១៦។ ចំណែកឯកសារផ្លូវការរបស់រដ្ឋាភិបាលវិញអោយដឹងថាត្រឹមឆ្នាំ២០១៣ កម្ពុជាមានតំបន់សេដ្ឋកិច្ចពិសេសចំនួន៣០ ក្នុងនោះមាន ៩កន្លែងបានប្រតិបត្តិការ ៤កន្លែងកំពុងដំណើរការសាងសង់ ៧កន្លែងកំពុងដំណើការ និង ១០កន្លែងមានឈ្មោះនៅក្នុងបញ្ជីតែអសកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។