សហភាពការងារកម្ពុជា (CLC) គ្រោងជួបជុំគ្នាប្រមាណ ២ពាន់នាក់ នៅសួនច្បារក្រុមប្រឹក្សាអភិវឌ្ឍន៍កម្ពុជា (CDC) នាឱកាសទិវាពលកម្មអន្តរជាតិនៅថ្ងៃទី១ ឧសភា ខាងមុខនេះ។
ការជួបជុំគ្នានេះ នឹងចាប់ផ្ដើមនៅម៉ោង ៦កន្លះព្រឹក រហូតដល់ម៉ោង ១១កន្លះថ្ងៃត្រង់ ដោយមានការដង្ហែក្បួនលើកកម្ពស់សិទ្ធិការងារ និងសេរីភាព សហជីព ចាប់ពីសួនច្បារក្រុមប្រឹក្សាអភិវឌ្ឍន៍កម្ពុជា ឆ្ពោះទៅរមណីយដ្ឋានវត្តភ្នំ រួចវិលមកសួនច្បារក្រុមប្រឹក្សាអភិវឌ្ឍន៍កម្ពុជាវិញ។
ប្រធានសហភាពការងារកម្ពុជា លោក អាត់ ធន់ ប្រាប់វិទ្យុអាស៊ីសេរី នៅថ្ងៃទី២៨ មេសា ថា ពិធីនេះ មានការជួបជុំគ្នារវាងសហជីព និងកម្មករមកពី ៩វិស័យផ្សេងគ្នា។
លោកបន្តថា ការប្រារព្ធកម្មវិធីគំរប់ខួបទី១៣៧ នៃទិវាពលកម្មអន្តរជាតិនេះ គឺមានគោលបំណងសំខាន់ ដើម្បីរំលឹកដល់វីរភាពអ្នក ដែលហ៊ានលះបង់ជីវិត ដើម្បីទាមទារសិទ្ធិសេរីភាពការងារ និងដើម្បីផ្សព្វផ្សាយអំពីសារៈសំខាន់ នៃទិវាពលកម្មអន្តរជាតិ។
ម្យ៉ាងវិញទៀត លោក អាត់ ធន់ អះអាងថា សេរីភាពសហជីពនៅកម្ពុជា គឺមានការរឹតត្បិត។
លោក អាត់ ធន់៖ «វាសំខាន់ណាស់ ដែលយើងត្រូវរៀបចំពិធីនេះ វាខុសពីថ្ងៃផ្សេងៗទៀត ដែលជា សិទ្ធិមនុស្សទូទៅ ឬក៏សិទ្ធិស្ត្រី ឬក៏ថ្ងៃផ្សេងៗទៀត ដែលជាថ្ងៃជាក់លាក់ មិនមែនជារឿង ថ្ងៃសិទ្ធិការងារហ្នឹង ហើយប្រធានបទ ដែលយើងដាក់ឆ្នាំនេះ គឺដោយសារតែយើងមើលឃើញអំពីការប្រឈមទៅលើសិទ្ធិការងារ និងសេរីភាពសហជីពហ្នឹង វាធ្ងន់ធ្ងរជាងគេក្នុងឆ្នាំ២០២៣ហ្នឹងបាទ»។
លោក អាត់ ធន់ អំពាវនាវឱ្យក្រុមអង្គការសង្គមស៊ីវិល សមាគម សហជីព និងកម្មករ និយោជិកនានា ចូលរួមពិធីនេះឱ្យបានច្រើនកុះករ នៅថ្ងៃទី១ ឧសភា ខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។