ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស ហៅការបញ្ជារបស់លោកនាយករដ្ឋមន្ត្រី ហ៊ុន សែន ឱ្យបិទវិទ្យុសំឡេងប្រជាធិបតេយ្យ វីអូឌី (VOD) ថា ទំនងជាធ្វើឡើងតាម «ទំនើងចិត្ត»។
ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក វ៉ូលឃើ ធើក (Volker Türk) ថ្លែងក្នុងសេចក្ដីថ្លែងការណ៍ផ្សាយកាលពីថ្ងៃទី១៣ ខែកុម្ភៈ ថា លោកភ្ញាក់ផ្អើលចំពោះចំណាត់ការរបស់រដ្ឋាភិបាលបែបនេះ។
លោកព្រួយបារម្ភដែលថា ការសម្រេចចិត្តបែបនេះទំនងជាធ្វើឡើងតាម«ទំនើងចិត្ត» ដោយសារតែការសម្រេចចិត្តបែបនេះមិនត្រូវបានធ្វើឡើងតាមដំណើរការមួយប្រកបដោយភាពហ្មត់ចត់ និងតម្លាភាព ដូចដែលតម្រូវដោយច្បាប់ស្ដីពីរបបសារព័ត៌មានរបស់កម្ពុជានោះទេ។ មន្ត្រីជាន់ខ្ពស់របស់អង្គការសហប្រជាជាតិរូបនេះ គូសបញ្ជាក់ថា ការសម្រេចចិត្តរបស់លោក ហ៊ុន សែន បែបនេះ គឺមិនបានបំពេញតាមលក្ខខណ្ឌនៃភាពស្របច្បាប់ភាពចាំបាច់ និងភាពសមាមាត្រ ដូចដែលច្បាប់សិទ្ធិមនុស្សអន្តរជាតិតម្រូវ ចំពោះការរឹតបន្តឹងណាមួយដែលអាចត្រូវបានអនុញ្ញាតទៅលើសេរីភាពនៃការបញ្ចេញមតិ។
ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សរូបនេះ អំពាវនាវដល់រដ្ឋាភិបាលកម្ពុជា ឱ្យលុបចោលនូវសេចក្តីសម្រេចចិត្តដ៏គួរឱ្យព្រួយបារម្ភនេះ។ លោកក៏អំពាវនាវដល់រដ្ឋាភិបាលកម្ពុជា ឱ្យគោរពសិទ្ធិពលរដ្ឋ និងសិទ្ធិនយោបាយសម្រាប់ពលរដ្ឋកម្ពុជាគ្រប់រូប និងត្រូវធានាឱ្យមាននូវបរិយាកាសអំណោយផលសម្រាប់សង្គមស៊ីវិល រួមទាំងប្រព័ន្ធផ្សព្វផ្សាយឯករាជ្យផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។