ថ្ងៃទី២ នៃយុទ្ធនាការជិះកង់ប្រវែងជាង៣០០គីឡូម៉ែត្រពីខេត្តសៀមរាបទៅកាន់រាជធានីភ្នំពេញរបស់ក្រុមសកម្មជនសិទ្ធិមនុស្សបានធ្វើដំណើរដល់ព្រំប្រទល់ស្រុកស្ទោងនិងស្រុកកំពង់ស្វាយខេត្តកំពង់ធំហើយនៅរសៀលថ្ងៃទី៧ ខែធ្នូ ក្រោមការឃ្លាំមើលនិងសួរនាំពីអាជ្ញាធរតាមដងផ្លូវជាហូរហែ។ យុទ្ធនាការថ្ងៃដដែលនេះក្រុមយុវជនផ្ញើសារទៅកាន់រដ្ឋាភិបាលឱ្យចាប់អារម្មណ៍ជួយជ្រោមជ្រែងយុត្តិធម៌សង្គមឡើងវិញ។
ក្រុមយុវជននិងសកម្មជនសិទ្ធិមនុស្ស ៣០នាក់ បន្តជិះកង់ក្នុងចម្ងាយជាង ៩០ គីឡូម៉ែត្រ នៅថ្ងៃទី៧ ខែធ្នូ ដោយផ្តើមចេញដំណើរពីផ្សារកំពង់ក្ដី ស្រុកជីក្រែង ខេត្តសៀមរាប បោះពួយទៅកៀកទីរួមខេត្តកំពង់ធំដើម្បីអបអរទិវាសិទ្ធិមនុស្សអន្តរជាតិថ្ងៃទី១០ ខែធ្នូខាងមុខនេះ។
ពួកគាត់សង្កេតឃើញថាបច្ចុប្បន្នស្ថានភាពសិទ្ធិមនុស្សនៅកម្ពុជាកាន់តែធ្ងន់ធ្ងរទៅពុំធូរស្បើយឡើយដោយសារមានក្រុមឧកញ៉ា និង អ្នកមានអំណាចខ្លះបន្តប្រើឥទ្ធិពលរំលោភយកដីធ្លីដោយខុសច្បាប់ បំផ្លាញព្រៃឈើ ធនធានធម្មជាតិ និង កាប់ទន្ទ្រានព្រៃឈើស្ទើរគ្រប់តំបន់ជាប់ដែនអភិរក្ស។ រីឯពលរដ្ឋក្រីក្រតែងតែរងគ្រោះដដែលៗដោយសារបាត់បង់ដីធ្លីធនធានធម្មជាតិនិងព្រៃឈើកើនឡើងច្រើនគ្មានយន្តការលុបបំបាត់នៅឡើយទេ។
យុវជនចូលរួមយុទ្ធនាការកញ្ញា ឡុង សុខលីន សង្កេតឃើញថាពលរដ្ឋនៅតែភ័យខ្លាចក្នុងការសម្តែងមតិសូម្បីតែការចែករំលែកភាពអយុត្តិធម៌សង្គមតាមបណ្តាញសង្គមហ្វេសបុក(Facebook) ក៏ពួកគាត់ខ្លាចរអាដែរព្រោះខ្លាចអាជ្ញាធរធ្វើបាប។ កញ្ញាបញ្ជាក់ថា ពលរដ្ឋភាគច្រើនសុខចិត្តស្ងៀមស្ងាត់មិនហ៊ាននិយាយរិះគន់បើទោះបីជាមានរឿងអយុត្តិធម៌សង្គមកើតឡើងនៅចំពោះមុខក្តី។ តាមរយៈព្រឹត្តិការណ៍នេះកញ្ញាសង្ឃឹមថាពលរដ្ឋនឹងយល់ដឹងច្បាស់ពីការប្រើប្រាស់សិទ្ធិរបស់ខ្លួនដែលធានាដោយរដ្ឋធម្មនុញ្ញនិងច្បាប់អន្តរជាតិ៖
«ចង់ឱ្យពលរដ្ឋគាត់ដឹងថា យើងមានសិទ្ធិកុំឱ្យខ្លាចក្នុងការបញ្ចេញមតិឬក៏ធ្វើសកម្មភាពអីដែលត្រឹមត្រូវបើយើងអត់ធ្វើសកម្មភាពអីទេយើងនឹងភ្លេចថាយើងមានសិទ្ធិអ្វីខ្លះក្នុងសង្គមនេះ។អត់មានការភ័យខ្លាចអីទេបងព្រោះវាជារឿងត្រឹមត្រូវក្នុងការធ្វើយុទ្ធនាការនេះ»។
ក្រុមយុវជនឱ្យដឹងថាកំឡុងពេលធ្វើយុទ្ធនាការនេះមានយុវតីម្នាក់មានបញ្ហាសុខភាពអស់កម្លាំងឈឺរាងកាយដោយត្រូវសម្រាកនៅមន្ទីរពេទ្យរយៈពេលខ្លីតែពេលនេះបានធូរស្រាលហើយ។ យុទ្ធនាការជិះកង់ទាំងនេះក្រុមយុវជនសិទ្ធិមនុស្សព្យាយាមតស៊ូជិះកង់រយៈ៥ថ្ងៃជាប់ៗគ្នាដើម្បីទាមទារយុត្តិធម៌សង្គមក្រោមអាកាសធាតុក្តៅនិងជិះបញ្ច្រាសខ្យល់ចាប់ពីចំណុចប្រាសាទអង្គរវត្ត ខេត្តសៀមរាប ឆ្ពោះទៅកាន់ក្រុងភ្នំពេញ។ ពួកគាត់ជិះកង់ពាក់ឯកសណ្ឋានអាវយឺតពណ៌ផ្ទៃមេឃនិងពណ៌សរភ្ជាប់ពាក្យស្លោកថាការគោរពសិទ្ធិមនុស្សនាំមកនូវយុត្តិធម៌សង្គម។
ឆ្លើយតបការលើកឡើងនេះអ្នកនាំពាក្យគណៈកម្មការសិទ្ធិមនុស្សរបស់រដ្ឋាភិបាលលោក កត្តា អ៊ន ប្រាប់វិទ្យុអាស៊ីសេរីថានៅកម្ពុជាពុំមានការរឹតត្បិតនិងគំរាមកំហែងសិទ្ធិពលរដ្ឋនិងមន្ត្រីសង្គមស៊ីវិលដែលធ្វើសកម្មភាពត្រឹមត្រូវស្របតាមច្បាប់នោះឡើយ។បន្ថែមពីនេះលោកថាអាជ្ញាធរមានសមត្ថកិច្ចអនុវត្តច្បាប់ចំពោះតែបុគ្គលមួយចំនួនតូចបានប្រព្រឹត្តល្មើសច្បាប់តែប៉ុណ្ណោះតែបែរជាចោទសមត្ថកិច្ចថារំលោភសិទ្ធិមនុស្ស។លោកបញ្ជាក់ថាអ្នកនយោបាយ ពលរដ្ឋ និងមន្ត្រីសង្គមស៊ីវិលពុំអាចប្រើប្រាស់សិទ្ធិសេរីភាពរបស់ខ្លួនតាមអំពើចិត្តនោះទេគឺត្រូវគោរពច្បាប់រដ្ឋនិងកិត្តិយសអ្នកដទៃ៖
«អ្វីដែលគាត់ធ្វើនៅពេលដែលបានប្រព្រឹត្តល្មើសច្បាប់សមត្ថកិច្ចមានវិធានការចំពោះគាត់ទាំងសមត្ថកិច្ចនគរបាលយុត្តិធម៌ទាំងតុលាការពួកគាត់បែរជាចោទសមត្ថកិច្ចទាំងនោះថារំលោភសិទ្ធិមនុស្សនេះជាការខុសឆ្គងទាំងស្រុងព្រោះពលរដ្ឋក្តីមន្ត្រីសង្គមស៊ីវិលនិងអ្នកនយោបាយក្តីពុំមែនប្រើប្រាស់សិទ្ធិសេរីភាពរបស់ខ្លួនតាមអំពើចិត្តនោះទេគឺប្រើប្រាស់តាមច្បាប់រដ្ឋនិងគោរពកិត្តិយសសេចក្ដីថ្លៃថ្នូរអ្នកដទៃ»។
ឆ្លើយតបនឹងបញ្ហានេះដែរប្រធានបណ្តាញជនជាតិដើមភាគតិចព្នងខេត្តមណ្ឌលគិរី អ្នកស្រី ភ្លឹក ភីរម្យ មើលឃើញថា ព្រៃឈើ ភ្នំ បឹង រ៉ែ ដីធ្លី អូរ និងធនធានធម្មជាតិក្នុងខេត្តមណ្ឌលគិរីកំពុងឋិតក្នុងភាពគ្រោះថ្នាក់ដោយសារក្រុមអ្នកមានអំណាចឃុបឃិតជាមួយអាជ្ញាធររំលោភបំពានយកជាបន្តបន្ទាប់គ្មានការអនុវត្តច្បាប់ច្បាស់លាស់។
លោកស្រីថា ការគោរពសិទ្ធិមនុស្សមានស្តង់ដារពីររវាងពលរដ្ឋនិងអ្នកមានអំណាចដោយអ្នកមានអំណាចឬឧកញ៉ាប្រព្រឹត្តល្មើសច្បាប់ឈូសឆាយដីព្រៃរាប់រយហិកតារគ្មានទោសពៃរ៍ផ្ទុយពីពលរដ្ឋសាមញ្ញ៖
«អ្នកមានឱកាសយើងឃើញហើយឧកញ៉ាអ្នកធំនិងអ្នកមានអំណាចអ្នករងគ្រោះពលរដ្ឋក្រីក្រ ទន់ខ្សោយ។មានតែក្នុងក្រដាសតែអត់គោរពសិទ្ធិសូមស្នើឱ្យរដ្ឋាភិបាលនិងអាជ្ញាធរពាក់ព័ន្ធគោរពសិទ្ធិមនុស្ស»។
សកម្មជនសិទ្ធិមនុស្សបន្ថែមថានៅល្ងាចថ្ងៃដដែលនេះពួកគាត់ជិះកង់ក្នុងចម្ងាយផ្លូវជាង៩០ គីឡូម៉ែត្រ មកដល់កៀកទីរួមខេត្តកំពង់ធំពុំមានអាជ្ញាធរណាហាមឃាត់នោះទេប៉ុន្តែឃើញនគរបាលពាក់ឯកសណ្ឋានមកថតរូបសួរនាំនិងឃ្លាំមើលសកម្មភាពតាមដងផ្លូវ។ពួកគាត់គ្រោងនឹងទៅឱ្យដល់ទីលានប្រជាធិបតេយ្យ ក្នុងក្រុងភ្នំពេញនៅព្រឹកថ្ងៃទី១០ ខែធ្នូ ប៉ះចំថ្ងៃទិវាសិទ្ធិមនុស្សអន្តរជាតិលើកទី៧៤ ហើយបន្តប្រារព្ធព្រឹត្តិការណ៍ជិះកង់ ចម្ងាយ ៣០គីឡូម៉ែត្រ បន្ថែមទៀតនៅថ្ងៃដដែលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។