សាកលវិទ្យាល័យ​មួយ​នៅ​អាមេរិក​គ្រោង​រៀបចំ​កិច្ច​ពិភាក្សា​ពី​បទពិសោធន៍​ក្នុង​សម័យ​ខ្មែរក្រហម

ដោយ ម៉ៅ សុធានី
2018-05-04
អ៊ីម៉ែល
មតិ
Share
បោះពុម្ព
សកម្មភាព​ថត​កុន​ខ្នាត​ធំ​របស់​ក្រុមហ៊ុន ហូលីវូដ (Hollywood) របស់​សហរដ្ឋ​អាមេរិក ដឹក​នាំ​ថត​ដោយ អ្នកស្រី អែនជេលីណា ចូលី ភីត (Angelina Jolie-Pitt) រឿង «មុន​ដំបូង​ខ្មែរ​ក្រហម​សម្លាប់​ប៉ា​ខ្ញុំ» នៅ​ខេត្ត​បាត់ដំបង ថ្ងៃ​ទី​១៣ ខែ​កុម្ភៈ ឆ្នាំ​២០១៦។
សកម្មភាព​ថត​កុន​ខ្នាត​ធំ​របស់​ក្រុមហ៊ុន ហូលីវូដ (Hollywood) របស់​សហរដ្ឋ​អាមេរិក ដឹក​នាំ​ថត​ដោយ អ្នកស្រី អែនជេលីណា ចូលី ភីត (Angelina Jolie-Pitt) រឿង «មុន​ដំបូង​ខ្មែរ​ក្រហម​សម្លាប់​ប៉ា​ខ្ញុំ» នៅ​ខេត្ត​បាត់ដំបង ថ្ងៃ​ទី​១៣ ខែ​កុម្ភៈ ឆ្នាំ​២០១៦។
Photo: RFA

កិច្ចពិភាក្សា​ស្ដីពី​បទពិសោធន៍​ក្នុង​សម័យ​ខ្មែរក្រហម នឹង​រៀបចំ​ធ្វើ​ឡើង​នៅ​ល្ងាច​ថ្ងៃ​អង្គារ ទី​៨ ខែ​ឧសភា ចាប់ពី​ម៉ោង ៧​កន្លះ​ល្ងាច​ដល់​ម៉ោង ៩​យប់ នៅ​សកល​វិទ្យាល័យ​ស្តែនហ្វដ (Stanford) ក្នុង​រដ្ឋ​កាលីហ្វរនីញ៉ា (California)

កញ្ញា ហេ សារ៉ា និស្សិត​ឆ្នាំ​ទី​៤ នៃ​សកល​វិទ្យាល័យ​ស្តែនហ្វដ ផ្នែក​ជីវវិទ្យា ដែល​ជា​អ្នក​រៀបចំ​កិច្ចពិភាក្សា​នេះ បាន​ប្រាប់​អាស៊ីសេរី តាម​ទូរស័ព្ទ​ថា អ្នកនិពន្ធ​សៀវភៅ «មុនដំបូង​ខ្មែរក្រហម​សម្លាប់​ប៉ា​ខ្ញុំ» (First They Killed my Father) អ្នកស្រី អ៊ឹង លួង នឹង​មក​ចូលរួម​ជា​វាគ្មិន​ក្នុង​កិច្ចពិភាក្សា​នេះ។

កញ្ញា សារ៉ា សង្ឃឹមថា នឹង​មាន​អ្នកចូលរួម យ៉ាង​តិច ជាង​៤០០​នាក់ ក្នុង​នោះ​រាប់ទាំង​និស្សិត និង​ប្រជាពលរដ្ឋ​ខ្មែរ ដែល​រស់នៅ​យ៉ាង​ច្រើន​ក្នុង​រដ្ឋ​មួយ​នេះ​ផង។

កញ្ញា ហេ សារ៉ា បន្ត​ថា គោល​បំណង សំខាន់​នៃ​កិច្ចពិភាក្សា​នេះ គឺ​ដើម្បី​បង្ហាញ​ពី​វប្បធម៌ និង​អារ្យធម៌​ខ្មែរ ព្រមទាំង​រំលឹក​ឡើងវិញ​នូវ​សោកនាដកម្ម​ក្នុង​ជំនាន់​ខ្មែរក្រហម ជាពិសេស ការ​កសាង​ជីវិត​ថ្មី​របស់​ពលរដ្ឋ​ខ្មែរ​ជាច្រើន​ក្នុង​ទឹកដី​សហរដ្ឋអាមេរិក ក្រោយ​ដែល​ពួកគាត់​រស់រាន​មាន​ជីវិត​ពី​របប​វាល​ពិឃាដ​នេះ៖ «យើង​នឹង​ព្យាយាម​ជជែក​ពិភាក្សា​ពី​បញ្ហា​បទពិសោធន៍​របស់​ពលរដ្ឋ​ខ្មែរ ដែល​បាន​ឆ្លងកាត់​ក្នុង​របប​ខ្មែរក្រហម ដើម្បី​ឲ្យ​អ្នក​ដែល​មក​ចូលរួម បាន​យល់​ច្បាស់​ពី​មូលហេតុ​ដែល​យើង​បាន​មកដល់​ទីនេះ ពីព្រោះ​មាន​ខ្លះ នៅ​មិនទាន់​យល់​អំពី​រឿង​នេះ ហើយ​ពួកគេ​មិន​បាន​ដឹង​ទាល់​តែ​សោះ​អំពី​ប្រវត្តិសាស្ត្រ និង​វប្បធម៌​របស់​ខ្មែរ។ សំខាន់​បំផុត យើង​មាន​ភ្ញៀវ​ពិសេស គឺ​អ្នកស្រី អ៊ឹង លួង ដែល​នឹង​លើកឡើង​ពី​ការ​តស៊ូ ប្រឹងប្រែង របស់​អ្នកស្រី ដើម្បី​ជម្នះ​ឧបសគ្គ​គ្រប់​បែប​យ៉ាង រហូត​ដល់​ទទួល​បាន​ជោគជ័យ​ក្នុង​ជីវិត នៅ​សហរដ្ឋអាមេរិក​នេះ...»

សៀវភៅ «មុនដំបូង​ខ្មែរក្រហម​សម្លាប់​ប៉ា​ខ្ញុំ»(First They Killed my Father) គឺជា​ខ្សែភាពយន្ត​អន្តរជាតិ​ខ្នាត​ធំ ដែល​បាន​ដឹកនាំ​ដោយ​តារា​ល្បីល្បាញ​ហូលីវូដ (Hollywood) គឺ​អ្នកស្រី អែនជេលីណា ចូលី (Angelina Jolie) ។ ខ្សែភាពយន្ត​នេះ រៀបរាប់​ពី​សោកនាដកម្ម​របស់​អ្នកនិពន្ធ​គឺ​អ្នកស្រី អ៊ឹង លួង ដែល​ត្រូវ​បាន​ខ្មែរក្រហម​យក​ឳ​ពុក​ទៅ​សម្លាប់ កាលពី​វ័យ​កុមារី។ ខ្សែ​ភាពយន្ត​នេះ ទទួល​បាន​ជោគជ័យ​ជា​ខ្លាំង ក្រោយ​ដែល​បាន​ចាក់​បញ្ចាំង​តាមរយៈ​ក្រុមហ៊ុន Netflix កាលពី​ខែ​កញ្ញា ឆ្នាំ​២០១៧ កន្លង​មក​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល