សាលក្រម​កាត់ក្ដី​លោក នួន ជា និង ខៀវ សំផន វគ្គ​ពីរ​នឹង​ប្រកាស​នៅ​ពាក់​កណ្ដាល​ខែ​វិច្ឆិកា

មួង ណារ៉េត
2018-09-27
អ៊ីម៉ែល
មតិ
Share
បោះពុម្ព
ជន​ជាប់​ចោទ នួន ជា (ឆ្វេង) និង ខៀវ សំផន នៅ​ក្នុង​ពេល​តុលាការ​កំពូល​នៃ​សាលាក្ដី​ខ្មែរ​ក្រហម ប្រកាស​សាលដីកា​លើ​បណ្ដឹង​សាទុក្ខ​ក្នុង​សំណុំរឿង ០០២ វគ្គ​ទី​១ នៅ​ថ្ងៃ​ទី​២៣ ខែ​វិច្ឆិកា ឆ្នាំ​២០១៦។
ជន​ជាប់​ចោទ នួន ជា (ឆ្វេង) និង ខៀវ សំផន នៅ​ក្នុង​ពេល​តុលាការ​កំពូល​នៃ​សាលាក្ដី​ខ្មែរ​ក្រហម ប្រកាស​សាលដីកា​លើ​បណ្ដឹង​សាទុក្ខ​ក្នុង​សំណុំរឿង ០០២ វគ្គ​ទី​១ នៅ​ថ្ងៃ​ទី​២៣ ខែ​វិច្ឆិកា ឆ្នាំ​២០១៦។
Photo courtesy of ECCC

សាលក្រម​ជំនុំ​ជម្រះក្ដី ក្នុង​សំណុំរឿង អតីត​មេដឹកនាំ​ជាន់ខ្ពស់​ខ្មែរក្រហម​ពីរ​រូប គឺ​លោក នួន ជា ដែល​ជា​បងធំ​ទី​ពីរ បន្ទាប់ពី ប៉ុល ពត និង លោក ខៀវ សំផន ដែល​ជា​អតីត​គណៈ​ប្រធាន​រដ្ឋ នៃ​របប​ខ្មែរក្រហម នឹង​ត្រូវ​ប្រកាស​នៅ​ពាក់​កណ្ដាល​ខែ​វិច្ឆិកា ឆ្នាំ​២០១៨ នេះ។

ការប្រកាស​សាលក្រម​នេះ នឹង​ធ្វើ​ឡើង​នៅ​ពេល​ព្រឹក នៅ​ក្នុង​សាល​សវនាការ​ធំ របស់​តុលាការ កូនកាត់​នេះ។

ក្នុង​សំណុំរឿង០០២ វគ្គ​ពីរ​នេះ (០០២/០២) ចាប់ផ្ដើម​សវនាការ​ដេញដោល​ពិនិត្យ​ភស្តុតាង តាំងពី​ខែ តុលា ឆ្នាំ២០១៤ និង​បញ្ចប់​នៅ​ខែ​មករា ឆ្នាំ​២០១៧។ ក្នុង​ការ​ជំនុំជម្រះ រួម​ទាំង​ការ​ស្ដាប់​សេចក្ដី​សន្និដ្ឋាន​បិទ​បញ្ចប់​កិច្ចពិភាក្សា​ដេញដោល​ផង តុលាការ​បាន​ស្ដាប់​សក្ខីកម្ម​សាក្សី ១៨៥​នាក់​។ ក្នុង​នោះ​សាក្សី ៦៣នាក់​ជា ជនរងគ្រោះ ដែល​តាំង​ខ្លួន​ជាដើម​បណ្ដឹង​រដ្ឋប្បវេណី។

តាមច្បាប់​របស់​សាលា​ក្តី​នេះ ជនរងគ្រោះ​អាច​ប្ដឹង​ទាមទារ​សំណង បានតែ​ពីរ​ប្រភេទ​ប៉ុណ្ណោះ គឺ​សំណង​ផ្លូវចិត្ត និង​សំណង​សមូហភាព។ ពួកគាត់​មិន​អាច​ប្តឹង​ទាមទារ​សំណង​ជា​ប្រាក់កាស​បានទេ។

បទ​ចោទ​ក្នុង​សំណុំរឿង ០០២ វគ្គ​ពីរ​នេះ គឺ​ឧក្រិដ្ឋកម្ម​ប្រឆាំង​មនុស្សជាតិ អំពើ​ប្រល័យពូជសាសន៍ ទៅលើ​ប្រជាជន​ចាម និង​វៀតណាម។ បទ​ចោទ​មួយទៀត គឺ​ការ​បំពារបំពាន​យ៉ាង​ធ្ងន់ធ្ងរ លើ​ច្បាប់​អន្តរជាតិ។ បើ​រក​ឃើញ​ថា មាន​ពិរុទ្ធភាព អ្នក​ទាំងពីរ​អាច​ប្រឈមមុខ នឹង​ជាប់ពន្ធនាគារ​អស់​មួយ​ជីវិត។

លោក នួន ជា និង​លោក ខៀវ សំផន រង​ការចោទប្រកាន់​ជាច្រើន​បទ​ចោទ ក្នុង​សំណុំរឿង ០០២ នេះ។ ហេតុ​ដូច្នេះ​ហើយ ទើប​តុលាការ​បាន​បំបែកសំណុំរឿង​នេះ​ជា​ពីរ​វគ្គ គឺ​សំណុំរឿង ០០២ វគ្គ​មួយ (០០២/០១) និងសំណុំរឿង ០០២ វគ្គ​ពីរ​នេះ (០០២/០២)

កាលពី​ក្នុង​សំណុំរឿង ០០២ វគ្គ​មួយ (០០២/០១) អ្នក​ទាំងពីរ ត្រូវ​បាន​តុលាការ​កាត់ទោស ឲ្យ​ជាប់​ពន្ធនាគារ​អស់​មួយ​ជីវិត ចំពោះ​បទឧក្រិដ្ឋ​ប្រឆាំង​មនុស្សជាតិ ពាក់ព័ន្ធ​តែ​នឹង​ការ​ផ្លាស់​ទីលំនៅ​ប្រជាជន ដោយ​បង្ខំ​ចេញពី​ទីក្រុង​ភ្នំពេញ និង​ការ​សម្លាប់​ទាហាន​របប​សាធារណរដ្ឋ​ខ្មែរ នៅ​ទីតាំង​សម្លាប់​មនុស្ស​ទួល​ពោធិ៍ជ្រៃ។ សវនាការ​សំណុំរឿង​០០២ វគ្គ​មួយ​នោះ បិទ​បញ្ចប់​កាលពី​ចុងខែ តុលា ឆ្នាំ​២០១៣ ក្រោយ​ជំនុំ​ជម្រះក្ដី​អស់​រយៈពេល​ជាង​ពីរ​ឆ្នាំ។

ក្រៅពី​សំណុំរឿង ដែល​បាន​ឆ្លងកាត់​ដំណាក់​ជំនុំ​ជម្រះក្ដី​ចប់​សព្វគ្រប់​ទាំងនោះ នៅ​មាន​សំណុំរឿង​ពីរ​ផ្សេងទៀត ដែល​កំពុង​ដំណើរការ។ សំណុំរឿង​ពីរ​ផ្សេងទៀត​នេះ គឺជា​សំណុំរឿង​ដ៏​ចម្រូងចម្រាស ដោយសារតែ​ភាគី​ជាតិ និង​ភាគី​អន្តរជាតិ ខ្វែង​យោបល់​គ្នា​យ៉ាង​ខ្លាំង តាំង​ពី​ដំបូង។ សំណុំរឿង​ទាំងពីរ​នោះ គឺ​សំណុំរឿង ០០៣ ដែល​មាន​ជន​ត្រូវ​ចោទ មាស មុត និង​សំណុំរឿង ០០៤ ដែល​មាន​ជន​ត្រូវ​ចោទ អោ អាន និង យឹម ទិត្យ។ ភាគី​ជាតិ អះអាង​ថា អ្នក​ទាំងនោះ មិនមែន​ជា​មេដឹកនាំ​ជាន់ខ្ពស់ ឬ​អ្នកទទួលខុសត្រូវ​ខ្ពស់​បំផុត ក្នុង​របប​ខ្មែរក្រហម​ទេ។ ប៉ុន្តែ ភាគី​អន្តរជាតិ ថា​មាន​ភស្តុតាង​គ្រប់គ្រាន់ បញ្ជាក់​ថា អ្នក​ទាំងនោះ ជា​អ្នកទទួលខុសត្រូវ​ខ្ពស់​បំផុត ដែល​ត្រូវតែ​យក​មក​កាត់ទោស។ ការ​ខ្វែង​យោបល់​គ្នា​នេះ កំពុង​រង់ចាំ​ការសម្រេច​ពី​អង្គ​បុរេ​ជំនុំជម្រះ។ សំណុំរឿង​ទាំងនេះ ប្រើ​ពេល​អស់​ជាង ៩ឆ្នាំ​មក​ហើយ។

ដោយឡែក ករណី​អតីត​កម្មាភិបាល​ខ្មែរក្រហម​អ្នកស្រី អ៊ឹម ចែម ដែល​ត្រូវ​បាន​ចោទប្រកាន់​ក្នុង​សំណុំរឿង ០០៤​ដែរ ត្រូវ​បាន​សាលា​ក្តី​សម្រេច លើកលែង​ការចោទប្រកាន់​កាលពី​ខែកុម្ភៈ ឆ្នាំ ២០១៧៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល