«​រដ្ឋាភិបាល​នៅ​តែ​មិន​ទាន់​អាច​បញ្ចប់​បញ្ហា​វិវាទ​ដីធ្លី​ក្នុង​ឧស្សាហកម្ម​ស្ករ​អំពៅ​»

ដោយ​ មាន ឫទ្ធិ
2019-12-09
អ៊ីម៉ែល
មតិ
Share
បោះពុម្ព
តំណាងសហគមន៍ខេត្តកំពង់ស្ពឺអ្នកស្រី ផាវ ញ៉ើង ក្នុង​ថ្ងៃប្រារព្ធ​ទិវា​សិទ្ធិ​មនុស្ស​នៅ​ថ្ងៃ​ទី​៩ ខែ​ធ្នូ​ ឆ្នាំ២០១៩។
តំណាងសហគមន៍ខេត្តកំពង់ស្ពឺអ្នកស្រី ផាវ ញ៉ើង ក្នុង​ថ្ងៃប្រារព្ធ​ទិវា​សិទ្ធិ​មនុស្ស​នៅ​ថ្ងៃ​ទី​៩ ខែ​ធ្នូ​ ឆ្នាំ២០១៩។
បណ្ដាញសង្គម​ហ្វេសប៊ុក

តំណាង​សហគមន៍​មាន​ជម្លោះដីធ្លី​ជាមួយ​ក្រុ​មហ៊ុនស្ក​អំពៅ​នៅ​តាម​បណ្តា​ខេត្ត​រង​ផល​ប៉ះពាល់​ពី​ការ​ផ្តល់​ដីសម្បទាន​សេដ្ឋកិច្ច​ និង​មន្ត្រី​សង្គម​ស៊ីវិល​ លើកឡើង​ថា​ រដ្ឋាភិបាល​នៅតែ​មិនបាន​ដោះស្រាយ​បិទ​បញ្ចប់​ករណី​វិវាទ​ដី​ធ្លី​រំា​រ៉ៃ​ ដូច​តាម​ការ​ចង់​ឃើញ​ពី​គណៈ​កម្មា​ការ​អឺរ៉ុប​នៅឡើយ​ទេ​។ ពួកគេ​លើកឡើង​ថា​ ពលរដ្ឋខ្មែរ​ក្រីក្រ​ និង​ពលរដ្ឋ​ជនជាតិ​ដើម​ភាគតិច​ នៅតែ​រង​ការរំលោភ​បំពាន​ និង​រើសអើង​ផ្នែក​សិទ្ធិ​ដីធ្លី​ ពីសំណាក់​អ្នកមាន​អំណាច​ និង​មាន​ឥទ្ធិពល​ដដែល​។ ការ​លើកឡើង​នេះ​ កើតមានឡើង​ស្រប​ពេល​ដែល​កម្ពុជា​មាន​ពេល​មិនដល់១សប្តាហ៍​ផង​ ដើម្បី​ឆ្លើយតបទៅនឹង​របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​ ដែល​រក​ឃើញថា​ មានការ​រំលោភ​ធ្ងន់ធ្ងរ​ជា​ប្រព័ន្ធ​ទៅលើ​សិទ្ធិ​ដីធ្លី​ និង​សិទ្ធិ​ទទួល​បាន​លំនៅ​ដ្ឋាន​សមរម្យ​នៅ​កម្ពុជា​នោះ​ បើ​ទោះជា​មានការ​កែលំអ​តិចតួច​ក៏ដោយ​។

​តំណាង​សហ​គម​ពលរដ្ឋ​មាន​វិវាទ​ដីធ្លី​ជាមួយ​ក្រុ​មហ៊ុនស្ក​អំពៅ​នៅ​ខេត្ត​កំពង់ស្ពឺ​ ប្រាប់​អាស៊ី​សេរី​ក្នុង​លក្ខខណ្ឌ​សុំ​មិន​បញ្ចេញ​ឈ្មោះ​ព្រោះ​ភ័យខ្លាច​ពី​សុវត្ថិភាព​ ថា​ អាជ្ញាធរ​រដ្ឋាភិបាល​នៅតែ​បរាជ័យ​ មិនបាន​ដោះស្រាយ​វិវាទ​ដីធ្លី​ដល់​ពួកគាត់​ជាង១ពាន់​គ្រួសារ​ មក​ពី​សហ​គម​អម​លាំ​នៅ​ស្រុក​ថ្ពង​ និង​សហ​គម​ត្រពាំង​ជោរ​ និង​រស្មី​សាមគ្គី​នៅ​ស្រុក​ឱរ៉ាល់​នៅឡើយ​ទេ​។ ផ្ទុយទៅវិញ​ពួកគាត់​នៅតែ​រង​ការ​គំរាមកំហែង​ និង​ការរើសអើង​ឥត​ឈប់ឈរ​ពីសំណាក់​អាជ្ញាធរ​ដដែល​។

«យើង​ឃើញ​តាំងពី​សហគមន៍​អឺរ៉ុប​គាត់​ធ្លាប់​ចុះ​មក​ ជាមួយ​អាជ្ញាធរ​អី​ដល់​ហ្នុង​ដែរ​ ប៉ុន្តែ​មិនទាន់​ឃើញ​មាន​សកម្មភាព​អី​ខ្នះខ្នែង​ យកចិត្ត​ទុកដាក់​ក្នុង​ការ​ដោះស្រាយ​ជូន​ប្រជាពលរដ្ឋ​នោះ​ទេ​។ អត់មាន​វិវឌ្ឍន៍​អី​ល្អ​ទាល់តែសោះ​។ នៅតែ​គ្មាន​។ នៅ​ជាង១ពាន់​គ្រួសារ​ដដែល​។ ... ដូចជា​កោះកុង​អី​ ក៏​ឧញ្ញា​ លី​ យ៉ុង​ផាត់​ តែមួយ​ទេ​ ហើយ​ខ្ញុំ​ក៏​ជា​ប្រជាពលរដ្ឋ​នៅ​កម្ពុជា​ដែរ​ ហេតុ​អី​មិន​ធ្វើការ​ដោះស្រាយ​ឲ្យ​ពួក​ខ្ញុំ​ ឲ្យ​ដូច​ខាង​កោះកុង​ដែរ​ទៅ​? ម៉េច​ក៏​បែងចែក​ដូច្នេះ​? តែ​គេ​ប្រើ​ភាសា​ដូចជា​ គំរាម​សម្លុត​ អសុ​រស​ខ្លាំង​ៗថា​មិន​បាន​ចឹង​តែម្តង​ខាង​កំពង់ស្ពឺ​។ ខ្ញុំ​សួរ​ថា​មូលហេតុ​អី​ គេ​មិន​បញ្ជាក់​ឲ្យ​យើង​។»

ការ​លើកឡើង​របស់​តំណាង​សហ​គម​រងគ្រោះ​ដោយសារ​វិវាទ​ដីធ្លី​ក្នុង​ឧស្សាហ​កម្ម​ស្ក​អំពៅ​តាម​បណ្តា​ខេត្ត​កំពង់ស្ពឺ​នេះ​ កើតមានឡើង​ស្រប​ពេល​កម្ពុជា​នៅសល់​ពេល​មិនដល់១សប្តាហ៍​ផង​ដើម្បី​ឆ្លើយតបទៅនឹង​គណៈ​កម្មា​ការ​អឺរ៉ុប​។ បញ្ហា​សិទ្ធិ​ដីធ្លី​ និង​លំនៅ​ដ្ឋាន​នេះ​ ជាផ្នែក​មួយ​ដ៏​សំខាន់​នៃ​លក្ខខណ្ឌ​របស់​គណៈ​កម្មា​ការ​អឺរ៉ុប​ក្នុង​ការ​ផ្តល់​ប្រព័ន្ធ​អនុគ្រោះ​ពន្ធ​ EBA​ របស់​ខ្លួន​ ខណៈ​ របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​រក​ឃើញថា​ មានការ​វិវឌ្ឍន៍​តិចតួច​ ហើយ​មានការ​រំលោភបំពាន​ធ្ងន់ធ្ងរ​ និង​ជា​ប្រព័ន្ធ​ទៅលើ​សិទ្ធិ​ទាំងនេះ​ ក្រៅពី​សិទ្ធិ​នយោបាយ​ ពលរដ្ឋ​ និង​សិទ្ធិ​ការងារ​នោះ​។

​ដោយឡែក តំណាង​សហ​គម​មាន​ជម្លោះដីធ្លី​ក្នុង​រឿង​ផ្តល់​ដីសម្បទាន​សេដ្ឋកិច្ច​ដល់​ក្រុមហ៊ុន​ឧស្សាហ​កម្ម​ស្ក​អំពៅ​មួយ​រូប​ទៀត​នៅ​ខេត្តកោះកុង​ អ្នកស្រី​ ផាវ​ ញ៉ើង​ ថ្លែង​ថា​ រដ្ឋាភិបាល​គ្មាន​ការ​យកចិត្ត​ទុកដាក់​ទាល់តែសោះ​ក្នុង​ការ​ដោះស្រាយ​បញ្ហា​វិវាទ​ដីធ្លី​រ៉ាំរ៉ៃ​នា​ពេល​កន្លងមក​នោះ​ទេ​។ អ្នកស្រី​ថា​ អាជ្ញាធរ​ដោះស្រាយ​កន្លងមក​បានតែ​ក្នុង​រឿង​ករណី​ជាមួយ​ក្រុ​មហ៊ុនស្ក​អំពៅ​ តែ​ករណី​វិវាទ​ដីធ្លី​ចាស់​ផ្សេងទៀត​គ្មាន​ការ​ដោះស្រាយ​នោះ​ទេ​។

«ការ​ដោះស្រាយ​នៅតែ​ប្រឈម​នឹង​ការ​អត់​បាន​ទទួល​ដំណោះស្រាយ​ ដូច​ក្រុម​ខ្ញុំ​អ៊ីចឹង​ គឺ​ធ្វើឲ្យ​មាន​កង្វល់​ របៀប​ពុករលួយ​ហាក់បីដូចជា​ប្រព័ន្ធ​យ៉ាងម៉េច​មិនដឹង​ទេ​។ ដូច​ព្រឹក​ម៉ិញ​ ពួក​ខ្ញុំ​បាន​ទៅ​ការពារ​ដី​ដែល​សេសសល់​ពី​វាស់វែង​សង​ជូន​ប្រជាពលរដ្ឋ១៧៥គ្រួសារ​ខ្ញុំ​ហ្នុង​ គឺ​បាន​ដោះស្រាយ​រួចហើយ​ តែ​ផ្លូវ​វិញ​គឺ​អត់​បានទេ​។ ខ្ចី​ផ្លូវ​ក្រុមហ៊ុន​ដើរទេ​ ហើយ​មនុស្ស​រាប់ពាន់​រាប់​ម៉ឺន​គ្រួសារ​នៅ​ខាង​ហ្នុង​។ មួយទៀត​ ដី​ដែល​មិន​ដោះស្រាយ​គឺ​ខ្ញុំ​មើលឃើញ​។ ... ការ​ឆ្លើយតប​ការ​ដោះស្រាយ​ខ្ញុំ​ឃើញ​គ្រាន់តែ​ឆ្លើយ​ទេ​ ថា​ចាំ​ដោះស្រាយ​ តែ​អត់​ឃើញ​ទទួលលទ្ធផល​ដល់​ក្រុម​ណាមួយ​ឲ្យ​ជាក់លាក់​នោះ​ទេ​។.. នេះ​បញ្ជាក់ឲ្យឃើញថា​ការ​ដោះស្រាយ​នេះ​ គ្មាន​ការ​យកចិត្ត​ទុកដាក់​ទេ​ គឺ​ដោះស្រាយ​ចោល​ទៅ​ដើម្បី​រំលត់​កំហឹង​ កុំ​ឲ្យ​ចេញ​តវ៉ា​អី​ជាដើម​។ ខ្ញុំ​ឃើញ​ដាក់​ពាក្យ​បណ្តឹង​មាន​ជាង​ ១ពាន់២រយ​គ្រួសារ​ទៀត​ដែល​អត់​ទាន់បាន​ដោះស្រាយ​ ហើយ​ក្រុម៣១៧​ នៅសល់៩៥គ្រួសារ​ទៀត​ ហើយ៩៥គ្រួសារ​ហ្នុង​ឃើញ​វាស់ដី​ជាង១០ឡូត៍​ហើយ​នេះ​ឮតំណាង​ប្រាប់​ខ្ញុំ​។»

​​មន្ត្រី​សម្របសម្រួល​ប្រចាំ​ខេត្តព្រះវិហារ​របស់​សមា​គម​អាដ​ហុក​ លោក​ ឡោ​ ចាន់​ ពន្យល់​ប្រាប់​អាស៊ី​សេរី​ថា​ នៅ​ខេត្តព្រះវិហារ​មាន​ពលរដ្ឋ​ជនជាតិ​ដើម​ភាគតិច​នៅ​ស្រុក​ចំនួន​បី​ គឺ​ស្រុក​ឆែប​ ស្រុក​ត្បែងមានជ័យ​ និង​ស្រុក​ជ័យសែន​ នៅតែ​រង​ផល​ប៉ះពាល់​ខ្លាំង​ពី​ការ​ផ្តល់​ដីសម្បទាន​សេដ្ឋកិច្ច​ឲ្យ​ក្រុមហ៊ុន​វិនិយោគ​លើ​ឧស្សាហ​កម្ម​ស្ក​អំពៅ​នេះ​។ លោក​ថា​ពលរដ្ឋ​ដែល​រងគ្រោះ​ខ្លាំង​ជាងគេ​គឺ​សហ​គម​ជនជាតិ​ដើម​ភាគតិច​នៅ​ឃុំ​ប្រមេ​រ ស្រុក​ត្បែងមានជ័យ​។

«... សម្រាប់​ការ​ដោះស្រាយ​ទំនាស់​ហ្នុង​ ឃើញថា​គាត់​ចុះ​មក​ ហើយ​មានការ​ប្រឹងប្រែង​ហើយ​ តែ​គ្រាន់តែ​ថា​ ការ​ប្រឹងប្រែង​របស់​គាត់​ហាក់បីដូចជា​ទៅ​មិន​រួច​ ត្រង់ថា​ស្ថានភាព​ដីធ្លី​ដែល​ជា​ដី​របស់​ជនជាតិ​ដើម​ភាគតិច​នា​ពេល​បច្ចុប្បន្ន​នេះ​ ក្រុម​ហ៊ុន​ចិន​ស្ក​អំពៅ​គឺ​ គាត់​បាន​យក​ទៅ​ដាំស្រូវ​មួយភាគធំ​ ហើយនឹង​យក​ទៅ​ដាំ​អំពៅ​មួយភាគធំ​ ស្ទើ​តែ​ទាំងអស់​ហើយ​។ អ៊ីចឹង​ហើយ​បាន​ជា​ក្រសួង​គាត់​ដោះ​មិន​ចេញ​ ត្រង់ថា​គាត់​មិន​ហ៊ាន​ប្រើ​រូបមន្ត​ស្បែក​ខ្លា​ ត្រង់​ថា​គ្វាល​ដី​ដែល​ក្រុមហ៊ុន​បាន​រំលោភ​យក​របស់​ប្រជាពលរដ្ឋ​ហ្នុង​ ជូន​ប្រជាពលរដ្ឋ​វិញ​ ដើម្បី​ចុះ​ឲ្យ​គាត់​ជា​លក្ខណៈ​សមូហភាព​ គឺ​អត់​ទៅរួច​។»

​មន្ត្រី​សម្របសម្រួល​គម្រោង​ធុរកិច្ច​ និង​សិទ្ធិមនុស្ស​ នៃ​មជ្ឈមណ្ឌល​សិទ្ធិមនុស្ស​កម្ពុជា​ លោក​ វណ្ណ​ សូ​ផា​ត សង្កេតឃើញ​ថា​ នៅតែ​មិនទាន់​ការវិវឌ្ឍន៍​ និង​ភាព​ជឿនលឿន​នៃ​ការ​ព្យាយាម​ដោះស្រាយ​បិទ​បញ្ចប់​វិវាទ​ដីធ្លី​ដូច​តាម​ការ​ចង់បាន​របស់​គណៈ​កម្មា​ការ​អឺរ៉ុប​នៅឡើយ​ទេ​ ដោយសារ​បញ្ហា​អសកម្ម​មួយចំនួន​។

«បើ​តាម​កា​រស​ង្ក​តឃើញ​របស់ខ្ញុំ​ ហើយ​ទាំងអស់គ្នា​ក៏​សង្កេតឃើញ​ដែរ​ ឃើញថា​ ការ​ដោះស្រាយ​វិវាទ​ដីធ្លី​នៅ​បច្ចុប្បន្ន​នេះ​គឺ​ពុំ​មាន​ជា​លក្ខណៈ​ប្រព័ន្ធ​ទេ​ គឺ​ទៅតាម​តំបន់​តាម​ខេត្ត​នី​មួយ​ៗនោះ​ ឃើញថា​យន្តការ​នៃ​ការ​ដោះស្រាយ​ ហើយ​ល្បឿន​ឬក៏​ឆន្ទៈ​នៃ​ការ​ដោះស្រាយ​គឺ​មិន​ដូចគ្នា​ទេ​។ លក្ខណៈ​ហ្នុង​ហើយដែល​ធ្វើឲ្យ​មានការ​ស្មុគ្រ​ស្មាញ​។ គឺ​ទៅ​អត់​រួច​ទេ​។ ដូច្នេះ​យើង​ឃើញថារហូត​មកទល់​បច្ចុប្បន្ន​ គឺ​ចាប់តាំងពី​របាយការណ៍​របស់​សហ​គម​អឺរ៉ុប​បាន​ចេញ​ទាក់ទង​ពី​រឿង​លក្ខខណ្ឌ​ EBA​ ឃើញថា​ មិនទាន់​មាន​ភាព​ជឿនលឿន​ ឬពន្លឿន​ដូច​តាម​ការ​ស្នើសុំ​នោះ​ទេ​។»

រី​ឯនាយ​ករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លី​កាដូ​វិញ​ លោក​ អំ​ សំអាត​ មើលឃើញ​មាន​បញ្ហា​ចម្បង​ៗបី​ដែល​ធ្វើឲ្យ​រដ្ឋាភិបាល​មិន​អាច​ដោះស្រាយ​បិទ​បញ្ចប់​បញ្ហា​វិវាទ​ដីធ្លី​ជា​រួម​បាន​។ ក្នុង​នោះ​ លោក​ថា​ មាន​បញ្ហា​បរាជ័យ​ក្នុង​ការពិគ្រោះ​យោបល់​ជាមួយ​ពលរដ្ឋ​មុននឹង​ផ្តល់​ដីសម្បទាន​សេដ្ឋកិច្ច​ អាជ្ញាធរ​មិនបាន​ប្រឹងប្រែង​ដោះស្រាយ​ធ្វើឲ្យ​ពលរដ្ឋ​អស់ជំនឿ​ ហើយ​អ្នក​ពាក់ព័ន្ធ​ក្នុង​វិវាទ​សុទ្ធតែ​ជា​អ្នកមាន​អំណាច​ និង​មាន​ឥទ្ធិពល​។

«ត្រូវតែ​ពង្រឹង​យន្តការ​ឡើងវិញ​ក្នុង​ការអនុវត្ត​។ បើសិនជា​យើង​ធ្វើតាម​យន្តការ​ដែល​មានស្រាប់​ ឬបន្ថែម​ច្បាប់​ទៀត​ដើម្បី​ជំរុញ​យន្តការ​ក្នុង​ការ​ដោះស្រាយ​ដីធ្លី​នេះ​ ឲ្យ​មាន​និរន្តរភាព​ស្ថេរ​ភាព​ ទើប​អាច​ដោះស្រាយ​បាន​។ ទីពីរ​គឺ​បំបាត់ចោល​បក្សពួកនិយម​ អំពើពុករលួយ​។ កាលណា​យើង​នៅតែ​មាន​បញ្ហា​នេះ​ គឺ​នៅតែ​ពិបាក​ដោះស្រាយ​ព្រោះ​អ្នក​រំលោភ​មិនមែន​ជា​ពលរដ្ឋ​ក្រីក្រ​នោះ​ទេ​។... ដោះស្រាយ​សូមកុំ​ឲ្យ​មានការ​យោគយល់​ បក្ខពួក​និយម​ឬអំពើពុករលួយ​។»

​បន្ថែម​ពីលើ​នេះ​ មន្ត្រី​មជ្ឈមណ្ឌល​សិទ្ធិមនុស្ស​ លោក​ វណ្ណ​ សូ​ផា​ត មើលឃើញ​ថា​ បញ្ហា​លំបាក​មួយទៀត​គឺ​ខ្វះ​ការចូលរួម​ពី​គ្រប់​ភាគី​ពាក់ព័ន្ធ​ក្នុង​ជម្លោះដីធ្លី​ជាពិសេស​ភាគី​ខាង​ក្រុមហ៊ុន​។ លោក​ថា​ផ្អែក​តាម​គោលការណ៍​ណែនាំ​ស្តី​ពី​ធុរកិច្ច​ និង​សិទ្ធិមនុស្ស​របស់​អង្គការសហប្រជាជាតិ​ គឺ​ត្រូវ​មានការ​ចូលរួម​ពី​គ្រប់​ភាគី​ពាក់ព័ន្ធ​ ជាពិសេស​គឺ​ក្រុមហ៊ុន​តែម្តង​។

«នៅ​ប្រទេស​យើង​នេះ​ខ្ញុំ​កត់សម្គាល់​ឃើញ​រហូតមកដល់​បច្ចុប្បន្ន​ គឺ​ក្រុមហ៊ុន​គាត់​ជិះសេះលែងដៃ​។ គាត់​មាន​បញ្ហា​អី​ក៏ដោយ​គឺ​គាត់​ទំលាក់​ទៅ​ខាង​អាជ្ញាធរ​។ គាត់​ទំលាក់​ទៅ​ខាង​រដ្ឋ​តែម្តង​។ ក្នុង​ហ្នុង​ទៀត​ ខាង​អាជ្ញាធរ​ដែល​ខ្ញុំ​បាន​ជួប​ ស្ថាប័ន​ពាក់​ព័ន្ទមួយ​ចំនួន​នៅពេល​ណា​ដែល​ខ្ញុំ​ចុះទៅ​ហើយ​ខ្ញុំ​សាកសួរ​គាត់​អំពី​ជម្លោះដីធ្លី​រវាង​ពលរដ្ឋ​និង​ក្រុមហ៊ុន​ គាត់​ថា​ កុំ​និយាយ​ពី​រឿង​ គាត់​ថា​កុំ​និយាយ​ពីជ​ម្លោះ​រវាង​ពលរដ្ឋ​នឹង​ក្រុមហ៊ុន​ គឺ​ពលរដ្ឋ​ និង​អាជ្ញាធរ​។ គឺ​គាត់​ថែមទាំង​លើកទឹកចិត្ត​ឲ្យ​ក្រុមហ៊ុន​ជិះសេះលែងដៃ​គឺ​គាត់​ជា​អ្នកការពារ​តែម្តង​។»

​អាស៊ី​សេរី​ មិន​អាច​ទាក់ទង​មន្ត្រី​នាំពាក្យ​ក្រសួង​រៀបចំ​ដែនដី​ លោក​ សេង​ ឡូត​ កាលពី​ថ្ងៃទី០៦​ ធ្នូ​ ដើម្បី​សុំ​ប្រតិកម្ម​ និង​ព័ត៌មាន​វិវត្ត​ចុងក្រោយ​នៃ​ការ​ដោះស្រាយ​វិវាទ​ដីធ្លី​នេះ​បាន​នៅឡើយ​ទេ​ ដោយ​លោក​មិន​លើក​ទូរស័ព្ទ​។

​ផ្អែក​តាម​របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​ ដែល​អាស៊ី​សេរី​ទទួល​បាន​ គណៈ​កម្មា​ការ​អឺរ៉ុប​រក​ឃើញថា​ ដោយសារតែ​ការ​ផ្តល់​ដីសម្បទាន​សេដ្ឋកិច្ច​ដល់​ក្រុមហ៊ុន​ ឧស្សាហ​កម្ម​ស្ក​អំពៅ​ ពលរដ្ឋខ្មែរ​ជាង​ ១ម៉ឺន៥ពាន់​នាក់​ មក​ពី​តាម​សហគមន៍​នានា​ជាពិសេស​ក្នុង​ខេត្ត​ចំនួន៤​ គឺ​ខេត្តកោះកុង​ កំពង់ស្ពឺ​ ព្រះវិហារ​ និង​ឧត្តរមានជ័យ​ បាន​បាត់បង់​ដីធ្លី​របស់​ខ្លួន​ និង​ទទួល​បាន​សំណង​មិន​សមរម្យ​ ឬពុំ​ទទួល​បាន​សំណង​ទាល់តែសោះ​។ របាយការណ៍​លើកឡើង​ថា​ បើ​ទោះបី​ទំនងជា​មានការ​វិវត្ត​ក្នុង​ដំណើរការ​ដោះស្រាយ​វិវាទ​ដីធ្លី​នៅ​ខេត្តកោះកុង​ និង​ខេត្ត​ឧត្តរមានជ័យ​ក៏ដោយ​ ក៏ប៉ុន្តែ​នៅ​មាន​បញ្ហា​មិនទាន់​ដោះស្រាយ​រួច​ជាច្រើន​នៅក្នុង​ខេត្ត​កំពង់ស្ពឺ​ និង​ខេត្តព្រះវិហារ​។ ទាំងនេះ​គឺ​ដោយសារ​កង្វះ​ប្រព័ន្ធ​ត្រួតពិនិត្យ​យុត្តិធម៌​ដោយ​អព្យា​ក្រិត្យ​ កង្វះ​តម្លាភាព​ និង​កង្វះ​ការចូលរួម​ទាំងអស់គ្នា​ពី​គ្រប់​ភាគី​ពាក់ព័ន្ធ​ ខណៈ​ការចុះបញ្ជី​ដី​សមូហភាព​ដល់​សហ​គម​ជនជាតិ​ដើម​ភាគតិច​វិញ​នៅ​មាន​លក្ខណៈ​សុ​គ្រ​ស្មាញ​ ស៊ីពេល​យូរ​ និង​មានតម្លៃ​ថ្លៃ​។ សិទ្ធិ​ដីធ្លី​ និង​សិទ្ធិ​ទទួល​បាន​លំនៅ​ដ្ឋាន​សមរម្យ​ដោយ​គ្មាន​ការរើសអើង​ គឺជា​ផ្នែក​មួយ​ដ៏​សំខាន់​នៃ​សិទ្ធិ​ដែល​ចែង​ក្នុង​កតិ្ត​កាស​សញ្ញា​អន្តរជាតិ​ស្តី​ពី​សិទ្ធិ​សេដ្ឋកិច្ច​ សង្គម​ និង​វប្បធម៌​របស់​អង្គការសហប្រជាជាតិ​ ដែល​រដ្ឋាភិបាល​កម្ពុជា​បាន​ផ្តល់​សច្ចាប័ន​ ហើយក៏​ជា​លក្ខខណ្ឌ​មួយ​ដើម្បី​ទទួល​បាន​ប្រព័ន្ធ​អនុគ្រោះ​ពន្ធ​ EBA​ របស់​អឺរ៉ុប​នេះ​។

កន្លងមក​ លោក​ ហ៊ុន​ សែន​ ខ្លួនឯង​ក៏​ធ្លាប់​បាន​បង្ហាញ​ជា​សាធារណៈ​ពី​ការរើសអើង​ និង​រំលោភសិទ្ធិ​សេដ្ឋកិច្ច​ សង្គម​ និង​វប្បធម៌​ក្នុង​រឿង​ដីធ្លី​នេះ​ ជាពិសេស​ទៅលើ​ក្រុម​មន្ត្រី​បក្ស​ប្រឆាំង​។

​«ឥឡូវហ្នឹង​មនុស្ស​មួយចំនួន​ទៅ​រកស៊ី​ទិញ​ដី​ហើយ​។ ប៉ុន្តែ​ បើ​ហែ្អង​ឈ្លើយ​ កាត់​ប្លង់​អត់​បាន​ទៀត​។ អញ​ដឹង​ អញ​ផ្តាច់​ឆ្នាំងបាយ​ហ្អែង​ទៀត​។ ហ្អែង​ឈ្លើយ​។ ដី​នៅ​កំពត​ ដី​នៅ​កំពង់ស្ពឺ​។ កំពត​និង​កែប​គឺ​នៅ​ជាប់​ជាមួយគ្នា​ហ្នុង​ ហ្អែង​ឈ្លើយ​កាត់​ប្លង់​អត់​បាន​។ អាខ្លះ​ចង់​លួច​ដី​នេះ​ទៀត​ ហ្អែង​កុំ​ភ្លេច​ថា​គេ​ធ្វើ​ដល់​ប៉ុណ្ណឹង​ គេ​មិនមែន​ខ្វះ​ព័ត៌មាន​ពី​ហ្អែង​រកស៊ី​ទេ​។»

ជុំវិញ​បញ្ហា​នេះ​ លោក​ អំ​ សំអាត​ ថា​ នៅ​កម្ពុជា​ពុំ​ទាន់​មានការ​អនុវត្ត​ឲ្យ​ស្មើភាព​គ្នា​នៅឡើយ​ទេ​ទាក់ទង​ទៅ​នឹង​សិទ្ធ​សេដ្ឋកិច្ច​ សង្គម​ និង​វប្បធម៌​នេះ​ ជាពិសេស​ក្នុង​បញ្ហា​ដីធ្លី​នេះ​តែម្តង​រវាង​ក្រុម​អ្នកមាន​អំណាច​ មាន​លុយ​ មាន​ឥទ្ធិពល​ និង​ក្រុម​ប្រជាពលរដ្ឋ​ក្រីក្រ​ និង​ពលរដ្ឋ​ជនជាតិ​ដើម​ភាគតិច​ជាដើម​។

​បច្ចប្បន្ន​ កម្ពុជា​កំពុង​ប្រឈម​នឹង​ការបាត់បង់​ប្រព័ន្ធ​អនុគ្រោះ​ពន្ធ​ EBA​ របស់​អឺរ៉ុប​ ប្រសិនបើ​គ្មាន​ការ​ស្តារ​សិទ្ធិ​សេដ្ឋកិច្ច​ សង្គម​និង​វប្បធម៌​ បន្ថែម​ពីលើ​សិទ្ធិ​នយោបាយ​ សិទ្ធិពល​រដ្ឋ​ និង​សិទ្ធិ​ការងារ​ ដែល​គណៈ​កម្មា​ការ​អឺរ៉ុប​រក​ឃើញថា​ នៅតែ​មានការ​រំលោភបំពាន​ធ្ងន់ធ្ងរ​ជា​ប្រព័ន្ធ​ ខណៈ​មានការ​កែ​លម្អ​តិចតួច​នោះ​។ ថ្ងៃទី១២​ ធ្នូ​ខាងមុខនេះ​ គឺជា​ថ្ងៃ​ឱសា​ទដែល​កម្ពុជា​ត្រូវ​ដាក់​អំណះអំណាង​ទៅ​គណៈ​កម្មា​ការ​អឺរ៉ុប​ មុននឹង​សហភាព​អឺរ៉ុប​ឈាន​ទៅ​សម្រេចចិត្ត​ជា​ផ្លូវការ​ត្រូវ​ព្យួរ​ឬមិន​ព្យួរ​ប្រព័ន្ធ​អនុគ្រោះ​ពន្ធ​នេះ​ យ៉ាង​យូរ​បំផុត​ត្រឹម​ពាក់កណ្តាល​ខែកុម្ភៈ​ខាងមុខ​៕

ខ្លឹមសារ​ទំព័រ​ទី៥៣​ ពាក់ព័ន្ធនឹងសិទ្ធិដីធ្លី នៃ​របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​ មុននឹងឈាន​ទៅ​សម្រេច​ព្យួរ​ប្រព័ន្ធ​អនុគ្រោះ​ពន្ធ​ EBA​។ Photo: RFA
ខ្លឹមសារ​ទំព័រ​ទី៥៣​ ពាក់ព័ន្ធនឹងសិទ្ធិដីធ្លី នៃ​របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​ មុននឹងឈាន​ទៅ​សម្រេច​ព្យួរ​ប្រព័ន្ធ​អនុគ្រោះ​ពន្ធ​ EBA​។ Photo: RFA

ខ្លឹមសារ​ទំព័រ​ទី៥៤​ ពាក់ព័ន្ធនឹងសិទ្ធិដីធ្លី នៃ​របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​ មុននឹងឈាន​ទៅ​សម្រេច​ព្យួរ​ប្រព័ន្ធ​អនុគ្រោះ​ពន្ធ​ EBA​។
ខ្លឹមសារ​ទំព័រ​ទី៥៤​ ពាក់ព័ន្ធនឹងសិទ្ធិដីធ្លី នៃ​របាយការណ៍​វាយតម្លៃ​បឋម​របស់​គណៈ​កម្មា​ការ​អឺរ៉ុប​ មុននឹងឈាន​ទៅ​សម្រេច​ព្យួរ​ប្រព័ន្ធ​អនុគ្រោះ​ពន្ធ​ EBA​។ Photo: RFA

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល