ជម្លោះរវាងក្រុមហ៊ុនស្ករស និងប្រជាពលរដ្ឋ បានកើតឡើងជាបន្តបន្ទាប់ ដែលទាមទារឲ្យក្រុមហ៊ុនចូលមកដោះស្រាយ។ ក្រុមហ៊ុន ភ្នំពេញ ស៊ូហ្គើរ៍ (Phnom Penh Sugar) បានអះអាងនៅថ្ងៃទី២០ មីនា ថា ការទទួលដីសម្បទានសេដ្ឋកិច្ចពីរាជរដ្ឋាភិបាល ដាំអំពៅដើម្បីផលិតស្ករស គឺបានជួយលើកកម្ពស់ជីវភាពប្រជាពលរដ្ឋមូលដ្ឋាន តាមរយៈការអភិវឌ្ឍហេដ្ឋារចនាសម្ព័ន្ធ និងការបង្កើតការងារ។
ក្រុមហ៊ុនផលិតស្ករសនៅប្រទេសកម្ពុជា មួយចំនួន កំពុងរងការចោទប្រកាន់ថា បានរំលោភដីធ្លីប្រជាពលរដ្ឋ និងបណ្ដេញពួកគាត់ចេញដោយគ្មានសំណងសមរម្យ។ ជម្លោះដីធ្លីកំពុងកើតឡើង រួមមាននៅខេត្តកោះកុង ឧត្ដរមានជ័យ និងខេត្តកំពង់ស្ពឺ។ ដីសម្បទានសេដ្ឋកិច្ចដាំអំពៅភាគច្រើន គឺគ្រប់គ្រងដោយសមាជិកសភាមកពីគណបក្សប្រជាជនកម្ពុជា លោកឧកញ៉ា លី យ៉ុងផាត់។
តំណាងលោកឧកញ៉ា លី យ៉ុងផាត់ គឺលោក សេង ណាក់ និងជានាយកក្រុមហ៊ុន ភ្នំពេញ ស៊ូហ្គើរ៍ បានប្រាប់វិទ្យុអាស៊ីសេរី តាមសារអេឡិចត្រូនិក (Email) នៅថ្ងៃទី២០ មីនា ថា ដីសម្បទានសេដ្ឋកិច្ចបានអនុញ្ញាតឲ្យក្រុមហ៊ុន ភ្នំពេញ ស៊ូហ្គើរ៍ អភិវឌ្ឍហេដ្ឋារចនាសម្ព័ន្ធ និងបង្កការងាយស្រួលការបង្កើតការងារដល់ប្រជាពលរដ្ឋរាប់ពាន់នាក់ និងការអភិវឌ្ឍសហគមន៍មូលដ្ឋាន។
លោក សេង ណាក់ បានបញ្ជាក់ទៀតថា បើគ្មានគម្រោងអភិវឌ្ឍន៍តាមរយៈការផ្ដល់ដីសម្បទានសេដ្ឋកិច្ចនោះទេ សកម្មភាពសេដ្ឋកិច្ចក៏មិនត្រូវបានបង្កើតឡើងដែរ។ ក្រុមហ៊ុនបានទទួលដីសម្បទានសេដ្ឋកិច្ចពីរាជរដ្ឋាភិបាល ដើម្បីការអភិវឌ្ឍកសិឧស្សាហកម្មស្ករអំពៅ បានវិនិយោគទឹកប្រាក់ប្រមាណ ២០០លានដុល្លារអាមេរិក ដើម្បីសាងសង់សេវាទឹកភ្លើងនៅក្នុងខេត្តកំពង់ស្ពឺ ដែលក្រុមហ៊ុនជឿជាក់ថា សហគមន៍មូលដ្ឋានអាចទទួលផលពីការអភិវឌ្ឍរបស់ក្រុមហ៊ុន ភ្នំពេញ ស៊ូហ្គើរ៍។
ទោះជាយ៉ាងណាក៏ដោយ តំណាងសហគមន៍ប៉ះពាល់ដីធ្លីនៅខេត្តកំពង់ស្ពឺ លោក ផល វណ្ណៈ បានឲ្យដឹងថា ចាប់តាំងពីក្រុមហ៊ុនចូលទៅអភិវឌ្ឍដើម្បីផលិតស្ករអំពៅរបស់ លោកឧកញ៉ា លី យ៉ុងផាត់ កាលពីឆ្នាំ២០១០ បានធ្វើឲ្យប៉ះពាល់ដីសហគមន៍ និងដីស្រែប្រជាពលរដ្ឋបង្កបង្កើនផល។ ក្រុមហ៊ុនវិញបានផ្ដល់សំណងដីគ្មានគុណភាពដល់ប្រជាពលរដ្ឋរងគ្រោះរាប់ពាន់គ្រួសារ។
បន្ថែមលើនេះ នាយកអង្គការសមធម៌កម្ពុជា លោក អៀង វុទ្ធី មានប្រសាសន៍ថា ប្រជាពលរដ្ឋដែលបាត់បង់ដីបានរស់នៅរងទុក្ខវេទនា។ បើទោះជាប្រជាពលរដ្ឋរងគ្រោះមួយចំនួនមានការងារធ្វើនៅក្រុមហ៊ុនស្ករអំពៅក៏ដោយ ក៏ចំណូលនោះមិនអាចផ្គត់ផ្គង់គ្រួសាររបស់គាត់ឡើយ។
«សំឡេង»
ប្រទេសកម្ពុជា បាននាំចេញស្ករសទៅសហភាពអឺរ៉ុប ដោយការអនុគ្រោះពន្ធគយមានតម្លៃជាង ៥០លានដុល្លារអាមេរិក នៅក្នុងឆ្នាំ២០១៣។ ការកើនឡើងនេះ ក្រុមអ្នករងគ្រោះបានអះអាងថា ក្រុមហ៊ុនបានចំណេញលុយច្រើនលានដុល្លារ ហើយអ្នកខាតបង់វិញ គឺម្ចាស់ដី។ ទោះជាយ៉ាងណាក៏ដោយ សហភាពអឺរ៉ុប បានអះអាងថា មិនមានការចុះស៊ើបអង្កេតលើសង្វាក់ផលិតកម្មស្ករអំពៅ ចំពោះអ្វីដែលអ្នករងគ្រោះ និងសង្គមស៊ីវិលបានអំពាវនាវនោះទេ។
ប៉ុន្តែ ក្រុមហ៊ុនធំមួយដែលជាអ្នកទិញស្ករសឈ្មោះ ប៉ិបស៊ី (Pepsi) បានសហការជាមួយក្រុមហ៊ុនកូកាកូឡា (Coca-Cola) ដើម្បីស៊ើបអង្កេតការរំលោភបំពាននានាលើសង្វាក់ផលិតកម្មស្ករស នៅលើពិភពលោក។ បច្ចុប្បន្ន ក្រុមហ៊ុនទាំងពីរនេះបានចាប់ផ្ដើមត្រួតពិនិត្យ ក្នុងនោះមានអ្នកផ្គត់ផ្គង់ស្ករសរបស់ប្រទេសកម្ពុជា ដែរ។ គោលបំណងរបស់ក្រុមហ៊ុន គឺធានាអំពីនិរន្តរភាពវិស័យកសិកម្ម ការការពារបរិស្ថាន និងពិនិត្យសកម្មភាពមិនស្របច្បាប់នានា ដែលទាក់ទងនឹងការផ្លាស់ប្ដូរទីកន្លែងរស់នៅរបស់ម្ចាស់ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។