ចៅ​អធិការ​វត្ត​បាកាន​រង​ការ​ចោទ​ថា​កាយ​ប្រឡាយ​រំដោះ​ទឹក​ប៉ះពាល់​ផ្លូវ​ចេញ​ចូល​ផ្ទះ​ពលរដ្ឋ

ដោយ ជិន ជេដ្ឋា
2016.12.07
ផែនទី​ខេត្ត​ពោធិ៍សាត់ ៨៥៥ ផែនទី​ខេត្ត​ពោធិ៍សាត់
Photo: RFA

ពលរដ្ឋ​មួយ​គ្រួសារ​នៅ​ឃុំ​ត្រពាំងជង ស្រុក​បាកាន ខេត្ត​ពោធិ៍សាត់ ចោទ​ចៅ​អធិការ​វត្ត​បាកាន ថា​បាន​បញ្ជា​ឲ្យ​គ្រឿងចក្រ​កាយ​ប្រឡាយ​រំដោះ​ទឹក​ចេញ​ពី​វត្ត បណ្ដាល​ឲ្យ​ប៉ះពាល់​ដល់​ដី​មុខ​ផ្ទះ​របស់​ពលរដ្ឋ​ចំនួន ៥​គ្រួសារ។ ពលរដ្ឋ​ទាមទារ​ឲ្យ​ចៅ​អធិការ ឬ​អាជ្ញាធរ​ដាក់​លូ​តាម​ប្រឡាយ​ចេញ​ចូល​មុខ​ផ្ទះ​ពលរដ្ឋ ប៉ុន្តែ​ព្រះសង្ឃ និង​អាជ្ញាធរ ថា​ពុំ​មាន​លទ្ធភាព​ដាក់​លូ​ឲ្យ​ទេ។

អ្នក​ភូមិ​អូររំចេក នៃ​ឃុំ​ត្រពាំងជង មួយ​គ្រួសារ​ក្នុង​ចំណោម ៥​គ្រួសារ ដែល​ថា​ព្រះសង្ឃ និង​អាជ្ញាធរ​មូលដ្ឋាន រួម​គ្នា​ធ្វើ​បាប​ពលរដ្ឋ​ដោយ​កាយ​ប្រឡាយ​ផ្ដាច់​ផ្លូវ​មុខ​ផ្ទះ​មិន​ដាក់​លូ​ឲ្យ​វិញ និង​បាន​ប៉ះពាល់​ដល់​ការ​រស់នៅ​របស់​ពួក​គេ​នោះ ទទូច​ឲ្យ​គណៈកម្មការ​វត្ត និង​អាជ្ញាធរ​ជួយ​រក​ដំណោះស្រាយ។

ការ​ស្នើសុំ​នេះ ក្រោយ​ពេល​ចៅ​អធិការ​វត្ត ជួល​ត្រាក់ទ័រ​កាយ​ប្រឡាយ​មួយ​ខ្សែ​កាល​ពី​ថ្ងៃ​ទី​២១ ខែ​វិច្ឆិកា។

ពលរដ្ឋ​ម្នាក់ លោកស្រី ផាន់ ផល្លី មាន​ប្រសាសន៍​នៅ​ថ្ងៃ​ទី​៦ ខែ​ធ្នូ ថា ចៅ​អធិការ​ព្រះនាម ឡាយ សន និង​អាជ្ញាធរ​ភូមិ-ឃុំ បាន​ប្រើ​អំណាច​បំពាន​លើ​ពលរដ្ឋ​ក្នុង​សកម្មភាព​ឈរ​បញ្ជា​ឲ្យ​គ្រឿងចក្រ​កាយ​ប្រឡាយ ប៉ុន្តែ​មាន​ពលរដ្ឋ​ខ្លះ​ខឹងសម្បា បាន​ទាញ​កាំបិត និង​ពូថៅ​សម្ញែង​ម្ចាស់​គ្រឿងចក្រ ទើប​នៅ​មុខ​ផ្ទះ​ពលរដ្ឋ​ខ្លះ​ត្រូវ​បាន​គេ​កាយ​ដី​លុប​វិញ និង​កន្លែង​ខ្លះ​មិន​ទាន់​លុប ឬ​ដាក់​លូ​ឲ្យ​នៅ​ឡើយ៖ «ខ្ញុំ​ឲ្យ​កាយ​ទៅ​ក្រោយ​ទៅ គេ​អត់​កាយ គេ​មក​កាយ​ឆ្វៀល​ផ្ទះ​បង។ អ្នក​ដែល​ប៉ះពាល់​នៅ​ក្បែរ​ផ្ទះ​បង​ខាង​ត្បូង​ណោះ​ពីរ​គ្រួសារ បី​គ្រួសារ​ទាំង​បង។ អា​ហ្នឹង​ជ្រៅ​មែនទែន ហើយ​ទៅ​ជើង​ពីរ​គ្រួសារ​ទៀត តែ​ម្ចាស់​គេ​លុប​វិញ​ហើយ។ បើ​និយាយ​ពី​ដាក់​លូ​ត្រូវ​ដាក់​ជាង ១០​កង់​ណោះ​ប្អូន។ បង​ទើប​ទិញ​បាន​បី (បី​អស់ ១៥​ម៉ឺន​រៀល) ដាក់​តាម​ផ្លូវ​ដើរ​សិន»

ទាក់ទង​បញ្ហា​នេះ ព្រះ​ចៅ​អធិការ​វត្ត​បាកាន ព្រះតេជព្រះគុណ ឡាយ សន គណៈកម្មការ​វត្ត និង​មន្ត្រី​រាជការ​ខ្លះ​អះអាង​ថា ការ​កាយ​ប្រឡាយ​រំដោះ​ទឹក​ចេញ​ពី​បរិវេណ​វត្ត​អារាម និង​ក្បែរ​របង​វត្ត​នេះ គឺ​បាន​បម្រើ​ផល​ប្រយោជន៍​សាធារណៈ​ច្រើន​ជាង​ផល​ប៉ះពាល់​ពលរដ្ឋ ១ ឬ ២​គ្រួសារ ហើយ​ប្រឡាយ​ដែល​កាយ​រួច​នោះ គឺ​រត់​តាម​ចិញ្ចើម​ផ្លូវ​សាធារណៈ​របស់​រដ្ឋ មិន​ប៉ះពាល់​ដី​ឯកជន​របស់​ពលរដ្ឋ​ឡើយ។

ព្រះតេជព្រះគុណ ឡាយ សន មាន​ថេរ​ដីកា​បន្ត​ថា វត្ត​ពុំ​មាន​បច្ច័យ​សម្រាប់​ទិញ​លូ​ដាក់​នៅ​តាម​មុខ​ផ្ទះ​ពលរដ្ឋ​នោះ​ទេ ព្រោះ​ការ​កសាង​វត្ត​អារាម​អាស្រ័យ​លើ​បច្ច័យ​របស់​ពុទ្ធបរិស័ទ។ ព្រះអង្គ​បន្ថែម​ថា រយៈពេល​ពីរ​បី​ឆ្នាំ​ហើយ​ដែល​ផ្នែក​ខ្លះ​នៃ​បរិវេណ​វត្ត ត្រូវ​លិច​ដោយ​ជំនន់​ទឹក​ភ្លៀង ព្រោះ​ពលរដ្ឋ​ចូល​មក​តាំង​ទីលំនៅ​ថ្មីៗ​ក្បែរ​វត្ត​ចាក់​ដី​ធ្វើ​ផ្ទះ​ខ្ពស់​ជាង​ដី​វត្ត ទើប​ទឹក​មិន​អាច​ហូរ​ចេញ​បាន៖ «ប៉ូលិស​ក៏​គេ​មក មេ​ឃុំ​ក៏​គេ​មក អាចារ្យ​អី​នៅ​ត្រង់​ហ្នឹង​អស់ អាត្មា​គ្រាន់​ប្រាប់​ថា អាត្មា​អ្នក​ចេញ​លុយ​ឲ្យ​អាអ៊ិច។ អាអ៊ិច​ហ្នឹង​អត់​ហ៊ាន​កាយ​ទេ ដើម​អាកាស្យា​នៅ​សល់​ដី​ប្រហែល​មួយ​ម៉ែត្រ ធម្មតា​មាន​ផ្លូវ​យើង​ដាំ​នៅ​ត្រង់​ចិញ្ចើម ហើយ​ប្រឡាយ​ទឹក​នៅ​ខាង​កើត​ដើម​អាកាស្យា​ហ្នឹង​ទៀត ស្រាប់​ពេល​ដល់​អ៊ីចឹង គេ​អត់​ឲ្យ​កាយ កាយ​គ្រាន់​តែ​ឲ្យ​មាន​ទឹក​ចេញ​ទេ ហើយ​ឲ្យ​អាត្មា​ដាក់​លូ​អាត្មា​មិន​ដឹង​ទៅ​រក​លុយ​ណា មាន​តែ​លុយ​ពុទ្ធបរិស័ទ​ដែរ»

អាជ្ញាធរ និង​ព្រះសង្ឃ បាន​ឯកភាព​គ្នា​កាយ​ប្រឡាយ​ប្រវែង​ប្រមាណ ២០​ម៉ែត្រ ជម្រៅ ១​ម៉ែត្រ និង​ទទឹង ១​ម៉ែត្រ ដើម្បី​រំដោះ​ទឹក​ចេញ​ពី​វត្ត​ផង និង​សម្រួល​ដល់​ការ​ធ្វើ​ដំណើរ​របស់​សិស្ស​ដែល​រៀន​សូត្រ​នៅ​សាលា​ក្បែរ​នោះ​ផង។ ពលរដ្ឋ​រង​ផល​ប៉ះពាល់​ផ្លូវ​ដើរ​ចូល​ផ្ទះ ចង់​មាន​ដំណោះស្រាយ​សមស្រប​មួយ​ដោយ​សុំ​ឲ្យ​ចៅ​អធិការ​ទិញ​លូ​ដាក់ ឬ​កាយ​ប្រឡាយ​បង្ហួស​ទៅ​បឹង​ផ្នែក​ខាង​ក្រោម ដើម្បី​ការពារ​កុំ​ឲ្យ​ទឹក​ដែល​បង្ហូរ​ចេញ​ពី​វត្ត​នោះ​ចាល់​លិច​ផ្ទះ​ពលរដ្ឋ ប៉ុន្តែ​មេ​ឃុំ​ត្រពាំងជង លោក អ៊ឹម សាមិន ថា​ឃុំ​ពុំ​មាន​ថវិកា​បម្រុង​សម្រាប់​ទិញ​លូ​ក្នុង​ករណី​ដូចនេះ​ទេ ដែល​ម្ចាស់​ផ្ទះ​គួរ​ទិញ​ដាក់​ខ្លួន​ឯង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។